هجاوب وامري لله

السلام عليكم ورحمة الله وبركاته

انا جالي حوالي ست او سبع تاجات قبل كده معظمهم مكرر..وانا بكل أسف لم تهيئني الظروف للرد على أي منها ..لكن لما الموضوع زاد عن حده ..واصبحت مملكتي قصدي مدونتي مهددة بالاحتلال من كتر هطول التاجات علي نفوخي .. فانا قررت أرد هذه المرة على أخر تاج وصلني .. وهو التاج المكرر من كل من البت المشمشية ومسدس صغير وهاجر زعبل وغيرهم كتير .


لكن الاهم بقى انه جي من الشعب لابد له من حكومة تشكمه..ودي صاحبة اول حقيبة وزارية في وزارتي المزعومة .. وانا بصيطها بس عشان متفضحنيش ادام الأمم المتحدة ودول عدم الانحياز!

بلاش رغي بقى وندخل في التاج على طووووول

إسمك؟

السيدعبدالرازق

عارف انه اسم مزعج ..بس مش مهم الاسم ..المهم الفعل في جملة مفيدة
تواضع تواضع هههههههههه

سنك؟

عارف ان شيما هي اللي شالت الخانة دي من التاج ..عشان بس هي زي كل بنات حوا
قلوبهم سودا ومش عاوزين يقولوا عندهم كام سنة .. مع اننا عارفين انه مش بايدهم ..ودي خلقة ربنا هههههههه

انا عندي 29 سنة ..لسه شاب والله وحلو كمان .. ايه النرجسية دي بقى؟!
بس دوافري طويلة وهقصها اطمنوا ههههههههههه

دراستك؟

خريج كلية الحقوق جامعة المنصورة ..وكنت بعمل دبلوم دراسات عليا في القانون العام السنة اللي فاتت بس محصلش نصيب على درجة واحدة فقط لاغير وقدر الله وماشاء فعل ..بس ان شاء الله مسجل السنة دي في دبلوم الدراسات العليا في الاقتصاد والعلوم المالية ..ودعواتكم بقى

هل فكرت في اغلاق مدونتك؟ والسبب؟

بالطبع لاااااااا.. والسبب انها عالمي الذي أشعر فيه ببعض من القوة والحرية
ممكن اغير العفش والديكورات ..ممكن اغير السيرفر..ممكن اغير خط النت
ههههههههه انما عمري ما افكر اقفلها


ايه رد فعلك لو حد قل ادبه عليك في المدونه؟

هزود أدبي عليه ومش هرد غير بكل احترام واقناعه انه قل ادبه ..لكن لو الفاظه نابيه هضطرأسفا امسح تعليقه مع اني ضد الحجر على حرية حد في ابداء الرأي لكن هعمل كده حفظا لماء الوجوه..والاخلاق العامة في مدونتي

فأنا من نظر الأعمى الى ادبي ..مع اني كنت علمي والله هههههههههههههههههه


أسوأ مدونه دخلتها؟


بدون ذكر أسماء ..فيه اللي دخلتها مرة ومعاودتش تاني ومش هتحصل ان شاء الله لأنها تحمل افكارا مسمومه في الدين والسياسة والحياه بكل معانيها ..وفيه اللي دخلتها ومازلت بدخلها بس بدون ما اعلق لحد ما اشوف صاحب المدونة هيوصل لفين بشطحاته ..النوع الاخير ده بصبر عليه عشان كنت واخد عنه فكره كويسه..وربنا يهدي الجميع


هيحصل ايه لايميلك بعد ماتموت؟


ههههههههههه سؤال عجيب بصحيح .. طب انا هكون مت هعرف ازاي بقى يحصل له ايه؟
بس لو المقصود اتمنى يحصل له ايه قبل ما اموت..هعمل له مقام وكل الكونتاكتس اللي عندي يجوا يزوروه في السنة مرة..والعائد هوصي انه يروح لتسديد ديون مصر


اديت الباسورد لحد قبل كده؟

لامحصلش ..دا حتى اللي يفرط في باسورده كأنه فرط فىىىىىىىىى ساعته
ههههههههههههههههههههههه

السفر بالنسبه لك؟

وقت بحبه جدا رغم اني قليل السفر حاليا..بس لما بروح اي مكان جديد بحس اني زي مايكون حد تاني جديد وخالي من الكوليسترول ..وبحب اوي امتع نظري بالطبيعه وبرضه بحب اوي اتكلم في موضوعات مهمة وضاحكةوانا مسافر..وكمان بحب جدا اتعرف على ناس بالصدفة البحتة .. شباب بس ياجماعه مش حاجة تانية
عشان متفهمونيش صح هههههههههه.. دا انا بتحرج من أي برايه والله

المود بتاعك ايه؟

دايما والله متفائل .. بجد ده حقيقي رغم انه احيانا بتحط في مواقف تدعوا ليس للتشاؤم فقط بل تدعو لكره التفاؤل نفسه هههههههههه..الحمدلله على كل شيئ .

بتعمل ايه وقت فراغك؟

بقولهم في البيت : متفلقونيش ..ماهو يااما اشتغل ..يا اما ادور على شغل ههههههههههههههههه
طبعا انا كائن بيعشق القراءة جدا ..اتعاطى المواد السياسية والعسكرية والقانونية والاقتصادية واحيانا الادبية والشعرية بالخصوص ..موطني الأساسي الانترنت ..واتغذى على امهات الكتب الالكترونية والورقية ولكني انحاز للأخيرة.
اهتم بالكتابة بين الحين والاخر سواء مع نفسي او في بعض الصحف المعروفة والمغمورة او في المدونة وذلك لافراغ شحناتي الزائدة كي اعود للحياه بشكل كيميائي وبيولوجي سليم ..ولو حد محتاج تفاصيل اكتر هقوله : وفيزيائي كمان.. ده حقيقي !

عندي هواية الرسم من طفولتي ..على فكرة انا كنت طفل مش مولود كده يعني ههههههههههه ..وخصوصا الطبيعه والتجريد
وبكتب خط عربي ببوصه وحبر ..وكمان برسم الكاريكاتير السياسي وكنت واخد جايزة في 2003 من وزارة الاعلام وشهادة تقدير وفلوس
كمان ..مش هكمل لتتعقدوا هههههههه ..وبلعب الشطرنج واعشق اللعبة العظيمة دي بجد ..واحترم بشدة المدرسة الروسية والفرنسية فيها ..رغم اني مازلت هاوي ولكني اعرف بعض دهاليزها وازقتها الضيقة .

بالاضافة للكمبيوتر والانترنت بحبهم جدا وبحب الابتكار في المجال ده حتى ولو بشكل غير احترافي لأنه مش مجالي ، لكني احبه وارى نفسي فيه ..واللي عاوز حاجة يقولي يمكن اقدر اساعده .

كفاية كده ولانكمل ؟

خلاص نكمل



الاكلات المفضله؟

محشي ورق العنب دا عندي احسن من صلاح العميري نفسه هههههههههههه
هو الوحيد اللي ممكن اكل منه كميات ..رغم ان معدتي مش مترامية الأطراف ولست بصاحب كرش الحمدلله
وكله بالمستندات ههههههههههههههه ..يلي ذلك المسقعه دا صنف عظيم في عالم الجهاز الهضمي هههههه
ولو جينا بقى للحوم احب اوي الفراخ المشوية ..واللحمه الضاني لما تتعمل كباب حله .. مش بقولكم مش اكيل ههههههه



الصفات التي اخدتها عن والدك؟

البساطه والقناعه بجد


الصفات التي اخدتها عن والدتك؟

عزة النفس ويعني ايه كرامة .. وشوية عصبية وقت اللزوم ..بس كلمة واحدة حلوة تدوب جبال التلج



اكتر 6 حاجات بتحبهم؟

اشمعنى 6 يعني .. دي لها علاقة بالستات برضه؟ هههههههههههه

عموما هجاوب هجاوب

+ ربنا سبحانه وتعالى
+ الرسول عليه الصلاة والسلام ..يارب أعني على حسن طاعتك وعبادتك وحب رسولك
+ ولاد اخواتي عمر ، مادو ، وبيبو .. بحبهم اوي وربنا يخليهم لينا
+ بحب العب فيفا ..وبحب المنافسة فيها مع واحد بس هو عارف نفسه ..ابن خالي..وهتعرفوه لما يدخل يسجل حضور
+ بحب جدا اقعد اتفرج على منظر القمر وهو كابس على نفس السما الصافية ..دي حالة معرفش اوصفها بجد ..ببقى تايه في حب جمال المنظر ده..سبحان الله ..له في خلقه شئون !

كفاية كده ياجدعان بقى انا هبطت هههههههههههه

اكتر 6 حاجات بتكرهم؟

+ الظلم .. ظلم حد لحد .. مش ظلم حد لي انا .. لأن بجد محدش يقدر يظلمني وافضل ساكت .. دا انا اكله بسنان قلمي الرصاص ..وممكن احرك له الأسطول السابع في محيطي الهادي مع كام غواصة نووية وحتتين أباتشي وعدد اتنين صاروخ عابر للقارات
هههههههههههههههههههههه
+ الكذب .. بكرهه بكرهه بجد
+ النفاق .. بيحسسني بقلة قيمة المنافق اوي وانه معندوش دم ولاكرامة
+ نقل الكلام بتعمد عمل وقيعه بين اتنين .. بيبوظ اعصابي
+ اسرائيل .. جدا
+ لوحة المفاتيح بتاعتي ..نفسي اغيرها ومكسل
هههههههههههههههه


شخصيتك نوعها ايه؟

مرح في حياتي الشخصية .. لكن حينما تفرض عليً الجدية فستجد عندي لها سبيلاااااااااا

لماذا دخلت عالم التدوين من الاساس؟


ايه الأسئلة دي .. شوية شوية هنطرد من مدونتي هههههههه
بصراحة مكنتش عارف انا دخلته ليه بالظبط في الاول وكنت عامل مدونة قبل قلم رصاص بس مكنتش باستخدمها لحد مااخويا وصديقي العزيز صلاح (مسدس صغير) دخل عالم التدوين ولقيته بيكتب وبيعبر عن اللي عاوز يقوله .........................
صحيح محدش كان يعرفه ولابيعلق عنده غيري هههههههههههه 

لدرجة ان فيه ناس مدونين كانوا بيحسبوا ان انا وصلاح شخصية واحدة وبندخل بحسابين مختلفين وبنضحك على نفسنا .....................
بس بجد هو شجعني وعملت قلم رصاص وبقينا نِعًـــــــــِلم بعض
بس انا اتعلمت منه كتير..أي خدمة ياابوصلاح ..بس بلاش تاخد مقلبا كبيرا في النفس بتاع الانت
ههههههههههههههههه

ودلوقتي انا مقدرش اعيش بدون تدوين ..لو بطلت ادون هموت
وياتلحقوني يامتحلقونيش


اهميه التعليقات بالنسبه لك؟

بتديني انطباع مهم جدا عن تأثير كتاباتي على الاخرين..وبتقوم قلمي ضد القصف


احلي بوست كتبته مع ذكر السبب؟

كلهم ولادي زي مابيقولوا ..بس فيه بوست اسمه مجلس الشورى اتحرق يابني أدمين هنــــــــــــــــــا

حسيت اني كتبته بعفوية وبدون تكلف .. اخدت راحتي يعني بس بحساب برضه

افضل مدونه قريتها؟

أي مدونة عندي تبقى حلوة من وجهة نظري
واي مدونة مش عندي ولقيت فيها حاجة محترمة ومفيدة


اهميه الانترنت بالنسبالك؟

وسيلة مهمة جدا لاغنى لي عنها ..بتفيدني جدا لكنها لاتستطيع ان تغنيني عن اشياء اخرى  أهم في الحياه

وبكده نكون وصلنا لنهاية حلقتنا النهاردة

انا مقدرتش اجاوب الا على تاج واحد دلوقتي .. والتاني ان شاء الله هجاوب عليه لما تسمح ظروفي

وباهدي التاج ده لكل حد مجاوبش عليه ولو اني اعتقد اني اخر حد مجاوبش عليه هههههههه

اتمنى تكونوا عرفتوني كويس..واعملوا حسابكوا الانتخابات قربت ..مفيناش من حجج انكم متعرفونيش واني جيت لكم بالبراشوت ومتعرفوش عني حاجة .. يلا كل واحد فيكوا يظبط ورقه عشان بلدنا بتتقدم بينا!

واخييييييييييييرا مع هدية البوست

صورة للعبد لله عشان برضه تبقوا عارفين انتوا هتنتخبوا مين بالظبط
ههههههههههههههه

محدش يتريأ.. وهتلاحظوا ان الصورة دي بالذات فيها جدية .. عشان تعرفوا انكوا هتنتخبوا زعيم .. زعيم بجد مش هيفاء وهبي
ههههههههههههههه

في أمان الله