أحداث 24 ساعة

هجاوب وامري لله





السلام عليكم ورحمة الله وبركاته

انا جالي حوالي ست او سبع تاجات قبل كده معظمهم مكرر..وانا بكل أسف لم تهيئني الظروف للرد على أي منها ..لكن لما الموضوع زاد عن حده ..واصبحت مملكتي قصدي مدونتي مهددة بالاحتلال من كتر هطول التاجات علي نفوخي .. فانا قررت أرد هذه المرة على أخر تاج وصلني .. وهو التاج المكرر من كل من البت المشمشية ومسدس صغير وهاجر زعبل وغيرهم كتير .



لكن الاهم بقى انه جي من الشعب لابد له من حكومة تشكمه..ودي صاحبة اول حقيبة وزارية في وزارتي المزعومة .. وانا بصيطها بس عشان متفضحنيش ادام الأمم المتحدة ودول عدم الانحياز!

بلاش رغي بقى وندخل في التاج على طووووول

إسمك؟

السيدعبدالرازق

عارف انه اسم مزعج ..بس مش مهم الاسم ..المهم الفعل في جملة مفيدة
تواضع تواضع هههههههههه

سنك؟

عارف ان شيما هي اللي شالت الخانة دي من التاج ..عشان بس هي زي كل بنات حوا
قلوبهم سودا ومش عاوزين يقولوا عندهم كام سنة .. مع اننا عارفين انه مش بايدهم ..ودي خلقة ربنا هههههههه

انا عندي 29 سنة ..لسه شاب والله وحلو كمان .. ايه النرجسية دي بقى؟!
بس دوافري طويلة وهقصها اطمنوا ههههههههههه

دراستك؟

خريج كلية الحقوق جامعة المنصورة ..وكنت بعمل دبلوم دراسات عليا في القانون العام السنة اللي فاتت بس محصلش نصيب على درجة واحدة فقط لاغير وقدر الله وماشاء فعل ..بس ان شاء الله مسجل السنة دي في دبلوم الدراسات العليا في الاقتصاد والعلوم المالية ..ودعواتكم بقى

هل فكرت في اغلاق مدونتك؟ والسبب؟

بالطبع لاااااااا.. والسبب انها عالمي الذي أشعر فيه ببعض من القوة والحرية
ممكن اغير العفش والديكورات ..ممكن اغير السيرفر..ممكن اغير خط النت
ههههههههه انما عمري ما افكر اقفلها


ايه رد فعلك لو حد قل ادبه عليك في المدونه؟

هزود أدبي عليه ومش هرد غير بكل احترام واقناعه انه قل ادبه ..لكن لو الفاظه نابيه هضطرأسفا امسح تعليقه مع اني ضد الحجر على حرية حد في ابداء الرأي لكن هعمل كده حفظا لماء الوجوه..والاخلاق العامة في مدونتي

فأنا من نظر الأعمى الى ادبي ..مع اني كنت علمي والله هههههههههههههههههه


أسوأ مدونه دخلتها؟


بدون ذكر أسماء ..فيه اللي دخلتها مرة ومعاودتش تاني ومش هتحصل ان شاء الله لأنها تحمل افكارا مسمومه في الدين والسياسة والحياه بكل معانيها ..وفيه اللي دخلتها ومازلت بدخلها بس بدون ما اعلق لحد ما اشوف صاحب المدونة هيوصل لفين بشطحاته ..النوع الاخير ده بصبر عليه عشان كنت واخد عنه فكره كويسه..وربنا يهدي الجميع


هيحصل ايه لايميلك بعد ماتموت؟


ههههههههههه سؤال عجيب بصحيح .. طب انا هكون مت هعرف ازاي بقى يحصل له ايه؟
بس لو المقصود اتمنى يحصل له ايه قبل ما اموت..هعمل له مقام وكل الكونتاكتس اللي عندي يجوا يزوروه في السنة مرة..والعائد هوصي انه يروح لتسديد ديون مصر


اديت الباسورد لحد قبل كده؟

لامحصلش ..دا حتى اللي يفرط في باسورده كأنه فرط فىىىىىىىىى ساعته
ههههههههههههههههههههههه

السفر بالنسبه لك؟

وقت بحبه جدا رغم اني قليل السفر حاليا..بس لما بروح اي مكان جديد بحس اني زي مايكون حد تاني جديد وخالي من الكوليسترول ..وبحب اوي امتع نظري بالطبيعه وبرضه بحب اوي اتكلم في موضوعات مهمة وضاحكةوانا مسافر..وكمان بحب جدا اتعرف على ناس بالصدفة البحتة .. شباب بس ياجماعه مش حاجة تانية
عشان متفهمونيش صح هههههههههه.. دا انا بتحرج من أي برايه والله

المود بتاعك ايه؟

دايما والله متفائل .. بجد ده حقيقي رغم انه احيانا بتحط في مواقف تدعوا ليس للتشاؤم فقط بل تدعو لكره التفاؤل نفسه هههههههههه..الحمدلله على كل شيئ .

بتعمل ايه وقت فراغك؟

بقولهم في البيت : متفلقونيش ..ماهو يااما اشتغل ..يا اما ادور على شغل ههههههههههههههههه
طبعا انا كائن بيعشق القراءة جدا ..اتعاطى المواد السياسية والعسكرية والقانونية والاقتصادية واحيانا الادبية والشعرية بالخصوص ..موطني الأساسي الانترنت ..واتغذى على امهات الكتب الالكترونية والورقية ولكني انحاز للأخيرة.
اهتم بالكتابة بين الحين والاخر سواء مع نفسي او في بعض الصحف المعروفة والمغمورة او في المدونة وذلك لافراغ شحناتي الزائدة كي اعود للحياه بشكل كيميائي وبيولوجي سليم ..ولو حد محتاج تفاصيل اكتر هقوله : وفيزيائي كمان.. ده حقيقي !

عندي هواية الرسم من طفولتي ..على فكرة انا كنت طفل مش مولود كده يعني ههههههههههه ..وخصوصا الطبيعه والتجريد
وبكتب خط عربي ببوصه وحبر ..وكمان برسم الكاريكاتير السياسي وكنت واخد جايزة في 2003 من وزارة الاعلام وشهادة تقدير وفلوس
كمان ..مش هكمل لتتعقدوا هههههههه ..وبلعب الشطرنج واعشق اللعبة العظيمة دي بجد ..واحترم بشدة المدرسة الروسية والفرنسية فيها ..رغم اني مازلت هاوي ولكني اعرف بعض دهاليزها وازقتها الضيقة .

بالاضافة للكمبيوتر والانترنت بحبهم جدا وبحب الابتكار في المجال ده حتى ولو بشكل غير احترافي لأنه مش مجالي ، لكني احبه وارى نفسي فيه ..واللي عاوز حاجة يقولي يمكن اقدر اساعده .

كفاية كده ولانكمل ؟

خلاص نكمل



الاكلات المفضله؟

محشي ورق العنب دا عندي احسن من صلاح العميري نفسه هههههههههههه
هو الوحيد اللي ممكن اكل منه كميات ..رغم ان معدتي مش مترامية الأطراف ولست بصاحب كرش الحمدلله
وكله بالمستندات ههههههههههههههه ..يلي ذلك المسقعه دا صنف عظيم في عالم الجهاز الهضمي هههههه
ولو جينا بقى للحوم احب اوي الفراخ المشوية ..واللحمه الضاني لما تتعمل كباب حله .. مش بقولكم مش اكيل ههههههه



الصفات التي اخدتها عن والدك؟

البساطه والقناعه بجد


الصفات التي اخدتها عن والدتك؟

عزة النفس ويعني ايه كرامة .. وشوية عصبية وقت اللزوم ..بس كلمة واحدة حلوة تدوب جبال التلج



اكتر 6 حاجات بتحبهم؟

اشمعنى 6 يعني .. دي لها علاقة بالستات برضه؟ هههههههههههه

عموما هجاوب هجاوب

+ ربنا سبحانه وتعالى
+ الرسول عليه الصلاة والسلام ..يارب أعني على حسن طاعتك وعبادتك وحب رسولك
+ ولاد اخواتي عمر ، مادو ، وبيبو .. بحبهم اوي وربنا يخليهم لينا
+ بحب العب فيفا ..وبحب المنافسة فيها مع واحد بس هو عارف نفسه ..ابن خالي..وهتعرفوه لما يدخل يسجل حضور
+ بحب جدا اقعد اتفرج على منظر القمر وهو كابس على نفس السما الصافية ..دي حالة معرفش اوصفها بجد ..ببقى تايه في حب جمال المنظر ده..سبحان الله ..له في خلقه شئون !

كفاية كده ياجدعان بقى انا هبطت هههههههههههه

اكتر 6 حاجات بتكرهم؟

+ الظلم .. ظلم حد لحد .. مش ظلم حد لي انا .. لأن بجد محدش يقدر يظلمني وافضل ساكت .. دا انا اكله بسنان قلمي الرصاص ..وممكن احرك له الأسطول السابع في محيطي الهادي مع كام غواصة نووية وحتتين أباتشي وعدد اتنين صاروخ عابر للقارات

هههههههههههههههههههههه
+ الكذب .. بكرهه بكرهه بجد
+ النفاق .. بيحسسني بقلة قيمة المنافق اوي وانه معندوش دم ولاكرامة
+ نقل الكلام بتعمد عمل وقيعه بين اتنين .. بيبوظ اعصابي
+ اسرائيل .. جدا
+ لوحة المفاتيح بتاعتي ..نفسي اغيرها ومكسل
هههههههههههههههه


شخصيتك نوعها ايه؟

مرح في حياتي الشخصية .. لكن حينما تفرض عليً الجدية فستجد عندي لها سبيلاااااااااا

لماذا دخلت عالم التدوين من الاساس؟


ايه الأسئلة دي .. شوية شوية هنطرد من مدونتي هههههههه
بصراحة مكنتش عارف انا دخلته ليه بالظبط في الاول وكنت عامل مدونة قبل قلم رصاص بس مكنتش باستخدمها لحد مااخويا وصديقي العزيز صلاح (مسدس صغير) دخل عالم التدوين ولقيته بيكتب وبيعبر عن اللي عاوز يقوله .........................
صحيح محدش كان يعرفه ولابيعلق عنده غيري هههههههههههه 


لدرجة ان فيه ناس مدونين كانوا بيحسبوا ان انا وصلاح شخصية واحدة وبندخل بحسابين مختلفين وبنضحك على نفسنا .....................
بس بجد هو شجعني وعملت قلم رصاص وبقينا نِعًـــــــــِلم بعض
بس انا اتعلمت منه كتير..أي خدمة ياابوصلاح ..بس بلاش تاخد مقلبا كبيرا في النفس بتاع الانت
ههههههههههههههههه

ودلوقتي انا مقدرش اعيش بدون تدوين ..لو بطلت ادون هموت
وياتلحقوني يامتحلقونيش


اهميه التعليقات بالنسبه لك؟

بتديني انطباع مهم جدا عن تأثير كتاباتي على الاخرين..وبتقوم قلمي ضد القصف


احلي بوست كتبته مع ذكر السبب؟

كلهم ولادي زي مابيقولوا ..بس فيه بوست اسمه مجلس الشورى اتحرق يابني أدمين هنــــــــــــــــــا

حسيت اني كتبته بعفوية وبدون تكلف .. اخدت راحتي يعني بس بحساب برضه

افضل مدونه قريتها؟

أي مدونة عندي تبقى حلوة من وجهة نظري
واي مدونة مش عندي ولقيت فيها حاجة محترمة ومفيدة


اهميه الانترنت بالنسبالك؟

وسيلة مهمة جدا لاغنى لي عنها ..بتفيدني جدا لكنها لاتستطيع ان تغنيني عن اشياء اخرى  أهم في الحياه

وبكده نكون وصلنا لنهاية حلقتنا النهاردة

انا مقدرتش اجاوب الا على تاج واحد دلوقتي .. والتاني ان شاء الله هجاوب عليه لما تسمح ظروفي

وباهدي التاج ده لكل حد مجاوبش عليه ولو اني اعتقد اني اخر حد مجاوبش عليه هههههههه

اتمنى تكونوا عرفتوني كويس..واعملوا حسابكوا الانتخابات قربت ..مفيناش من حجج انكم متعرفونيش واني جيت لكم بالبراشوت ومتعرفوش عني حاجة .. يلا كل واحد فيكوا يظبط ورقه عشان بلدنا بتتقدم بينا!

واخييييييييييييرا مع هدية البوست

صورة للعبد لله عشان برضه تبقوا عارفين انتوا هتنتخبوا مين بالظبط
ههههههههههههههه






محدش يتريأ.. وهتلاحظوا ان الصورة دي بالذات فيها جدية .. عشان تعرفوا انكوا هتنتخبوا زعيم .. زعيم بجد مش هيفاء وهبي
ههههههههههههههه



في أمان الله

33 تعليقات القراء:

الشعب لابد له من حكومه تشكمه يقول...

ههههههههههههههههه والله ابدا انا تلاقين نسيت السؤال عادى وبعدين انا سنى معروف للبشريه كلها دنا بقوله فى معظم البوستات مش ذمبى انك مش متابع:)
اما انت عليك ححجات:))
وبالمناسبه انا حاطه عينى على رئاسة الوزرا ووزارة التعليم.ايييييييييه فى مانع؟

طلعت محااااااااااامى,ال وتقولى صلاح محامى وخدى بالك وطلعت انت محاااااااامى..

اكتر حاجه لفتت نظرى هو تواضعك الحقيقى متوااااضع لدرجة الاستفزاز:)

اقولك سر انا كنت فاكره انك انت وصلاح واحد:)علشان كده كنت برد عند صلاح بس بقول هرد عليه فى مدونتين :)
لحد مسبتلى كومنت عندى عرفت انك مش هو:)

حلم بيعافر يقول...

مفيش حد يقدر يتريأ
والنعمة اقفلك البلوجر كله
ادينى انت بس اوردر قد كده
انت وراك رجالة يابن خالتى
ورشح انت بس نفسك وشوف ايه اللى هيجرالك
وتعمل وزارة من غيرى؟
الحق نفسك بدل مالم شوية الظباط الصيع بتوعى واجى اعتقلك
انت حر
هههههه مش عايزنى اشوفلك حد يتبادل ثروته معاك زيى؟

قلم رصاص يقول...


الشعب لابد له من حكومه تشكمه

انا عارف والله انك مش قاصده بس انا حبيت اهزر بس واعمل شهره على حسابك .. انا مغمور ههههههههههههه

وعن الوزارة .. بلاش طمع ..كفاية عليكي وزارة التعليم يمكن تقدري تعملي فيها حاجة عشان خاطر مصر..اطمعي في اي وزارة كله الا الخارجية سيبهالي ارجوك ههههههه

وبعدين علىفكرة انا مش محامي حاليا ..رغم اني دارس الحقوق ..فمش شرط اشتغل محامي وزي ما انا قايل في البوست اني بكمل دراسات عليا في الاقتصاد والعلوم المالية ..دعواتك انتي بس

وبخصوص تواضعي اللي وصل لدرجة الاستفزاز .. فالكلمة دي زعلتني .. والحقي صلحي اخطائك قبل ما اسحب السفير هههههههههههه

انا وصلاح حاجة واحدة فعلا..ب مش في كل حاجة ياد انت ..فيه حاجات مستحيل تشاركني فيها ياحبيبي ههههههههه

عموما منوره دايما يا شيما

وهدي موضوع الجزائر بقى شوية عاوزين نلم الموضوع

في امان الله

قلم رصاص يقول...


حلم بيعافر

هههههههههههههههههه

ماشي ياعم محمد افندي

انا مطمن ..ونورت

في حفظ الله

بنت الأسلام يقول...

ما شاء الله تاج دمه خفيف قوى
وإجابتة حلوة

أول مرور لى فى المدونة وما شاء الله المدونة ذات موضوعات هادفة

تحياتى

هــو..مش ..نـو يقول...

ندخل في الموضوع ...
بعيد عن الممنوع.
خليك في آخر حاجه (الصوره)
بص شوف ...المناخير ..
يا حلاوه كلها....أنفه
أوعي تزعل ...هاتزعل من واحد بـ
يهوهو..
---هوهو---

عابرة السبيل يقول...

مش عارفة مبعرفش ارد على التاجات اللى عند الناس بحاجة بصراحة

غير ان كويس انك جاوبت التاج بتبقى وقفة مع النفس حلوة وسريعة
بس هو انت انت اللى فى الصورة ؟
دى تريقة ؟
لا عادى يعنى بس تريقة عادى يعنى
ولا اقولك



تريقة

لا والله مش تريقة بس مستنين التاج الجديد
شد الهمة
وكل عام وانت بخير

♥نبع الغرام♥♪≈ يقول...

هههههههههههه

والله العظيم انت اخف دم


وضحكتنى قووووووووووووووووووووووى

♥نبع الغرام♥♪≈ يقول...

ربنا يسعدك يارب ويوفقك وبتمنالك الخير من كل قلبى


بسم الله ماشاء الله عليك
ربنا يحفظك من كل شر

واجابات من انسان ذو اخلاق عاليه

مودتى

اللى موش عارف يتغير يقول...

منافسة !!!!!
منافسة ايه ياعم انت نسيت يا تي ت افريقيا
هههههههههههههههه
وبعدين السؤال اكتر ست حاجات بتحبهم كتب خمسة ليه واكتر ست حاجت بتكرهم كتبت سنة ولو كانوا 16 كنت كتبتهم
هههههههههههههه
اكتبنى سادس حاجة بتحبها جاملنى يا اخى
تعرف فعلا وحشنى لعب الفيفا معاك
حبيبى يا سيد
افتح الياهو الليلة
.

اللى موش عارف يتغير يقول...

فكرة حلوة
وجميلة وردودك مقنعة
ممكن اعطيك 96% يعنى تروح طب اسنان
هههههههههه
انا الموضوع اتعكس موش هدخل عالياهو بالنهار فادخلى بالليل بقى
وابقى شديلى ودن صلاح على ما اقابلك واقولك.

ليس فقيرا من يحب يقول...

السلام عليكم

بسم الله افك الاضراب اللى كنت عاملاه

ههههههههههههههههههههههههه

ليس فقيرا من يحب يقول...

ايه الاجابات العسوله دى

والله بجد اجابات زى العسل وخفيفه كده

بس يا ريس لازم نغير الاسم ده نحوله لاسم

موسيقى كده يليق بسياده سعاده

رئيسنا القادم

طبعا اسم مبارك اسم كله بركه

ووشه حلو على صحابه وليه كاريزما

ممكن تخليك تقعد على قلب الشعب فترة

واتنين وتلاته نخليه سيد مبارك

هههههههههههههههههههههههههههه

بما انى وزارة التعليم طارت خلاص منى

خلينى فى وزارة الماليه ولا اقولك انا

هامسك وزارة السياحه ورئاسه مجلس

الشعب نفسى اقول موافقه اوى

ليس فقيرا من يحب يقول...

نسيت شعار هديه منى ياريس يمكن ينفع فى

الانتخابات ولا حاجه

(لو عايز اصلاح من الاساس يبقى انتخب قلم رصاص)

هههههههههههههههههههه

ربنا يوفقك يارب

اقعد بالعافيه

غير معرف يقول...

مبسوطه اوي انك جاوبت التاج ..:)

عاجباني اجاباتك
زخصوصا هواياتك والحاجات اللي بتحبها وبتكرهها ..

الصوره فيها جديه كبيره
كل ده عشان ننتخبك.. خلاص هننتخبك بس قدم لنا خطه الاول :))))))))

قلم رصاص يقول...

بنت الأسلام

أشكرك اختي الكريمة على تشريفك للمدونة

دامت دياركم عامرة بالسعادة والايمان

في امان الله

قلم رصاص يقول...

هــو..مش ..نـو

هههههههههههههههههههه

تعليقك موتني من الضحك يا اخي والله
جزاك الله خيرا

قولي بقى انت مالك ومال مناخيري ؟
انا عارف انها مش حلوة ههههههههه
ممكن توريني مناخيرك انت كمان يمكن اعمل معاك بيزنس ونقايض هههههههههه

وفعلا مش هزعل من حد بيهوهو .. انما ممكن ازعل من حد بينونو ههههههههههه

دمت في امان الله

قلم رصاص يقول...

عابرة السبيل

اهلا بيكي اختي الكريمة

واشكرك على التعليق الجميل

وفعلا انا اللي في الصورة .. وبعيدا عن التريقة ههههههههههه

عشان بس تبقوا عارفين هنتخبوا مين بالظبط!

وانتظروا بوستاتي الجديدة

في امان الله

قلم رصاص يقول...

الأحـ إيناس ــزان

الله يكرمك يارب يا اخت ايناس

دا من زوقك بس والله .. واشكرك على رفع

المعنويات .. تتردك لك ان شاءالله وانتي

راجعه من الحجاز ههههههههههههه

يارب تكوني عرفتوني كويس عشان بس

الانتخابات على الابواب وعاوزكم كلكم

تصوتوا .. مش علي ..لالالالا .. لي

هههههههههههههههه

في امان الله

شبــ اون لاين ـــاب يقول...

الرجاء الدخول علينا


...


و اتمنى تحديد موقفك من القضيه

شفـقــة و إحســــان يقول...

محامى احمدك يارب اخيرا لقينا حد هيدافع عنا لما نتمسك فى قضية
هههههههههههههههههه
اجاباتك مرحة جدا وتنم عن شخصية مرحة ولذيذة بس بلاش اكل محشى كتير
مبروك التاج
وكل سنة وانت طيب

رضا الكومى يقول...

أيوة كده يا عم اظهر
دا اتضح إنك حاجة جامدة خالص فى البلد
وبعدين الواحد يعرف برده الشخص اللى هينتخبه مين

مش هتوزع موبيلات فى الإنتخابات ولا حاجة ؟؟؟؟؟

Unknown يقول...

تؤ تؤ تؤ تؤ !
حلة محشى ورق عنب
تيجى فى حبك قبل صلاح
العميرى تؤ تؤ تؤ تؤ
ياراجل حرام عليك :):)
مكانش العشم يااستاذ
سيد عبد الرازق
وبأذن الله تعوض
الدبلوم اللى
فات وتنجح
المرة دى.

م/ الحسيني لزومي يقول...

المعلومات تدل علي شخصيه واعيه ومتزنه لكن الصوره تدل علي انك جاد الي ابعد الحدود.
-------------------

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك

Heba Faruq يقول...

حقيقي هذا من اجمل التاجات التي قراتها واخفها دما..
بس نسيت تقولنا حاجة عن برنامجك الانتخابي ولو ان عموما الموضوع ده مبقالوش اي اهمية دلوقتي في الانتخابات

مع تحياتي

Beram ElMasry يقول...

عزيزي وحبيبي القلم الرصاص
معذرة للتأخر في الرد وهارد لك لنا فيما حدث المهم أن تكون بخير وكل عام وأنت في صحة وسلامة وعيد سعيد والسلام ولا سلام مع بني إسرائيل قتلة الأطفال والأنبياء .

Dr. Kafy يقول...

إحنا كده اتنورنا بمعرفتك
و اتشرفنا بالتعليق عندك

و ربنا معاك و تزيد حزم و قوة علشان تعرف تسيطر على الموقف لما ننتخبك

حفيدة عرابى يقول...

النظرة نظرة زعيم
والانف انف زعيم
ههههههههههه
تصدق بس مش قتم زى الزعيم اللى عليه العين
ربنا يوفقك
كل سنة وانت طيب

فشكووول يقول...

عسل والله عسل بس انت زعلان قوى كدا ليه يا اخى ابتسم شويه

عيد سعيد وعمر مديد اعاده الله عليك بالخير واليمن والبركات .. وكل عام وانتم بخير وسعاده

م/ الحسيني لزومي يقول...

كل عام انتم بخير
تقبل الله منا ومنكم صالح الاعمال

الشعب لابد له من حكومه تشكمه يقول...

انت جاوبت عل التاج واتقبض عليك بعده ولا ايه؟:)

كل سنه وانت طيب وعيد سعيد عليك يارب:)

ليس فقيرا من يحب يقول...

السلام عليكم

كل سنه وانت طيب يا ابو السيد

عيد سعيد عليك وعلى كل حبايبك يارب

سنابل يقول...

لا والله صحيح طلة زعيم وله هيبة
كل سنة وانت طيب وينعاد عليك وانت ف احسن حال وتكون محقق كل اللي بتتمناه

Twitter Delicious Facebook Digg Stumbleupon Favorites More

 
Free Web Hosting