أحداث 24 ساعة

الجريمه السياسيه



دعوت في البوست السابق إلى ضرورة أن ينزل الناس للمشاركه في إنتخابات الأحد الماضي لتضييق الخناق على فرص النظام لتزوير إرادة الشعب في اختيار ممثليه في المجلس القادم.وكنت أرى وفقا لإعتقادي تاره ، وانخداعي مثل الأخرين وعلى رأسهم القوى السياسيه في وعود القابضين على مقاليد السلطه في التأكيد على انها ستكون انتخابات نزيهه ، تارة أخرى.إضافه إلى رغبة الأجيال الجديده في التغيير الحقيقي وطموحاتهم وآمالهم المتعلقه بهذا الحلم ..والكثير من الظروف والملابسات والرغبات في الداخل والخارج ..وأحيانا التلويح بالضغوط ، من أجل ضمان حد أدنى على الأقل من النزاهه.

لكن ماحدث الأحد الماضي ،كان جهرا بإصرار الحزب الحاكم على إغتيال إرادة الأمه وتزويرها لصالحه.وعوده لعهود الظلام السياسي الخالي من التعدديه ولكن في ثوب جديد يتقدمه وحش رأس المال الذي حوسل كل شيئ في يد ثله من المطبلاتيه يعثون في البلاد فسادا.

إن أشد المتفائلين بالتغيير،لم يتمنوا أغلبيه جديده خارج سور الحزب الوطني لخلاص مصر.ولكن على الأقل تمنوا تمثيل مشرف يعطي للمعارضه  وجودا قويا تحت القبه لضمان حقوق المطحونين.كما أن أشد المتشائمين لم يتصوروا أن تصل حالات التزوير إلى هذه النسب الفلكيه.فكرة المعارضه في النظام المصري غير وارده ..وتأصلت في وجدان التكنوقراط أكثر من السياسيين أنفسهم الذين تاهوا في أدغال الحزب الحاكم.وخير مثال على هذه الفكره، رد الفعل المستفز لوزير التعليم العالي على الإعلامي محمود سعد وقت الأحداث المؤسفه في جامعة عين شمس ، حينما اتهمه بأنه ينتمي للمعارضه..في صوره قبيحه تبين أن المعارضه شيئ غير مألوف في مجتمعنا..وتبين مدى الهوان الذي وصلت إليه أحوال النخبه نفسها قبل العامه.


ماحدث في الجوله الأولى للانتخابات التشريعيه المصريه ، يعد جريمه سياسيه بكل ماتحمل الكلمه من معنى ،وخطوه إلى الوراء مقدارها ألف ميل.ولعلي أعول على قرار انسحاب القوى السياسيه من هذه المهزله لاسيما الوفد ، بنزع الشرعيه عن هذا المجلس حتى وان انحصرت في الوجه الأدبي أمام العالم.كنا نأمل وبكل أمانه ان يصدق الحزب الحاكم مع رغبة الناس في تجفيف منابع الفساد من الحياه السياسه المصريه ..وأن يبدأ الإصلاح بنفسه على اعتبار أنه اندمج مع الدوله في صوره صعب الفكاك منها هذه السنوات.ولكن يبدو أنه بالفعل مفيش فايده.

هذه الانتخابات تعتبر من وجهة نظري، صوره طبق الأصل من انتخابات المجمع الانتخابي للحزب الوطني.فالحزب كان ينافس نفسه بتزوير الإراده الشعبيه.حتى بعض أعضائه من العناصر الجيده بالفعل، نوى عدم الدفع بهم في الانتخابات..ولما تنبهوا لذلك وتحت وطأة إرادة الناخبين ترشحوا مستقلين ، فأسقطهم الحزب بدم بارد برشاوى ماليه كبيره لصالح القادرين على الدفع.

الانتخابات الرئاسيه القادمه ، ستكون النكته الحقيقيه في تاريخ مصر الحديث.فبعد أن عدل ترزية النظام الدستور وقانون مباشرة الحقوق السياسيه على مقاس مرشحين بعينهم ، الكل كان متصور أن ذلك سيحدث في وجود مرشحين آخرين من الأحزاب ولو من باب تجميل صورة مصر أمام العالم.لكن نظرا لخلو المجلس القادم إلا من الحزب الوطني ، لن يكون هناك أي منافس أصلا حتى نقول له فرصه أم ليس له.

23 تعليقات القراء:

ستيتة حسب الله الحمش يقول...

اصبحنا نتمنى دوما التمثيل المشرف

ارى الإنتخابات قد فضحتنا فضيحة علني
امام انفسنا على اقل تقدير

عندما اعلم ان فئة من الشعب "تقدر بالآلاف" تحتفظ بكرسي وفاءا لمن مات حتى يرثه ابنه
اجد اننا فعلا ننعق نعيق البوم وبجد بجد قلة مندسة

قلم رصاص يقول...

الدكتوره ستيته

ماهو بالعقل يادكتور احسبيها كدا
عمر ماهيكون فيه سياسه في مصر طول ما الحوب الوطني مندمج في مؤسسات الدوله اندماج لافكاك منه الا بالتضحيه بحد منهم

وسياسه يعني تعدديه ودا بعيييييييد المنال طول ماالحزب الوطني موجود..لازم حله او اعادة تشكيله من جديد..دا في حالة لو هما نووا يبدأوا الإصلاح من الداخل..ودا من سابع المستحيلات طبعا

انا بجد مش عدت عارف فيه ايه
ربنا يستر

شــوَيــه كـرَامـه يقول...

صرح مصدر مسئول بأن عمليه التزوير تمت بنجاح ولكن شابها بعد الإنتخابات !! الموضوع مبقاش مسأله مفيش فايده لاء دا تحول إلي ملوش لازمه ..
تحيتي يا صديقي

حلم بيعافر يقول...

عو

رغم تجربتى فى الانتخابات اللى فاتت واخرها انتخابات الشورى كنت حسن النية ونزلت وروحت احط صوتى

برررررررررررررررررضه لقيته محطوط

الظاهر ان صوتى اسرع منى

وطبعا متعرفش تعمل حاجة غير انك تهرش فى دماغك

هتعمل ايييييييييييييييه وواقف تحت بلطجى المروض يحميك مش يبلطج عليييييييييييك

يللا كل حى منه لله

مع كده فيه ناس لسه بتطلع تقول الانتخابات نزيهة

الناس دى مصدقة اللى بتقوله؟!

يللا مااااااااعلينا

ماهو لو يحس ويخزى على دمه البلد حالها هيتصلح م الصبحححححح

بس هو عايز يموت على كرسيه زى كمال الشاذلى

كلمات من نور يقول...

فضيحة فى الصحف العالمية لدرجة ان مراسل الجارديان كاتب انها انتخابات سيريالية!

Lady E يقول...

في اعلان زمان كان بيقول انسى يا عمرو

كنت متوقعة ان ده اللي هيحصل بس مش بالتمثيلية السخيفة دي

الاعلام العالمي بيقول انه لسه بدري اوي على مصر على ما تبقى ديموقراطية

الانتخابات محسومة من قبل الانتخابات أصلا

Dr/ walaa salah يقول...

بصراحه المره دي زي اللي قبلها

ايه الجديد

ان نسبة التزوير بقت اعلى

النتيجه واحده صدقني

ربنا كريم


مشكور قلم على مقالك

فشكووول يقول...

ولا فيه اى حاجه

الدوله المصريه بجلالة قدرها وبتاريخها العريق الضارب فى اعماق التاريخ وبأأجهزتها الداخليه والخارجيه .. حصلت على صفر فى الموندبال
الدوله القطريه .... بارك الله فيهم... حصلت على حق تنظيم بطولة كاس العالم 2022.... ولا تعليق الف مبروك لقطر

قلم رصاص يقول...

شوية كرامه

ههههههههههه حلو أوي الاعلان دا يامحمد بيه.رغم الحصره والألم انا لسه باضحك بس مش عارف ليه..شكلها باضحك علي نفسي

منورني ياأعز الأصدقاء

^^

قلم رصاص يقول...

حلم بيعافر

ماهو يابني لو بيتحط في مكانه الصح كنت أنا رضيتك بكلمتين وقلت لك كدا أوك

^^

الناس دول والله في غيبوبه فعلا
احمد عز بيتكلم تعليقا على نتائج الجوله الأولى وكأنه عايش لوحده في مصر

يحضرني كلمة الزعيم عادل امام في مسرحية الواد سيد الشغال حين قال:

دا فتوه مش مأذون ياجدعان

قلم رصاص يقول...

كلمات من نور

اه ماهو دا الطبيعي..فضيحه عالميه بكل المقاييس

العالم كله دلوقتي بيتكلم عن رجوع مصر الى الخلف 100 خطوه ..في نفس الوقت اللي أمريكا متغاظه ان قطر اقتنصت منها تنظيم مونديال 2022

حاجة تكسف

قلم رصاص يقول...

Lady E

اه عارفه الاعلان دا
بس اللي قبله من بكتير مقولة الزعيم سعد زغلول: مفيش فايده
^^

انا زيك كدا، كنت متوقع النتيجه طبعا لكن مش بالسوء دا اطلاقا
انا مبحلمش بحكومه خارج اسوار الحزب الوطني رغم ان الحلم مشروع وملوش حدود..لكن المسألة فعلا اننا محتاجين سنين طويل جدا عما تتفك العلاقه المريبه بين الحزب الحاكم ومؤسسات الدوله

ولما دا يحصل برضه هنحتاج وقت كمان عما تعم فكرة التعدديه الحزبيه

عشان كدا انا قلت في البوست اللي فات اننا مفيش ادامنا الا التصويت للأفراد وليس للبرامج الحزبيه ..بس دا كان على وهم انا عشته وهو انه هتكون فيه نزاهه وحياد على الاقل نسبي

الصحف العالميه من حقها تقول اكتر من كدا ..والفرق وضح خلاص ..بين مصر اللي اخدت صفر وقطر اللي هتنظم المونديال لعل منظري الحزب الوطني يلموا نفوسهم بقى

شكرا لتعليقك
^^

قلم رصاص يقول...

Dr/ walaa salah

فعلا زي ماحضرتك قلتي
التطور الوحيد هو ارتفاع معدلات التزوير

لك الله يامصر

العفو ..ومشكوره على التعليق

قلم رصاص يقول...

فشكوول

أستاذي الجميل عمو فشكول
لأ فيه كتير ياكبير
كفايه اننا بعد مااتعلقنا بالأمل في تغيير جزئي ، صحينا على فاشوش
ودا اكيد هيكون له رد فعل ان اجلا او عاجلا حسب مشيئة الله

رغم بلادة الشعب بتاعنا وافتقاده لروح التغيير والاصرار عليه، لكن التغيير هيجي غصب عن الشعب لسبب واحد
وهو ان كل الاحداث والضغوط اللي بتحصل له من الحكومه ..بأشبهها لبلونه كل يوم بتزيد نفخ عن اليوم اللي قبله واللي اكيد هتيجي عليها الوقت اللي تنفجر فيه

ربنا يستر بقى

شكرا على مرورك وتعليقك
ومبروك لقطر طبعااااااا

Beram ElMasry يقول...

صديقي العزيز قلم رصاص حي
شكرا جزيلا علي الاطراء ووحشني مشاركتك الدافئة والذكية
سلام ولاسلام مع بني اسرائيل

رحــــيـل يقول...

انا بستغرب هو بجد الناس مصدومة ليه من اللى حصل فى الانتخابات من تزوير وبلطجة وبلاوي سوده عينى عينك
ما كل اللى بيحصل فى البلد الفترة الاخيرة ماكنش اصلا بيبشر بغير كده
دول فجروا بجد و متبعين سياسة خلى الشعب يخبط راسه فى الحيط
النكتة الوحيدة ان عندهم عين يطلعوا يقولوا ان الانتخابات كانت نزيهة وبتعبر عن ارادة الشعب

اتمني الشهادة يقول...

الحزب الوطني يعلن اما العالم باسرة ان شعب مصر يحبه ويؤيدة
ولا شعب مصر ايده ولا العالم صدقه فما هي إلا كذبه منه علي نفسه
وللأسف لم يبق فينا واحد يصدقهم
لان اذا وجد من صدقهم سنبرر لنفسنا انها اختلاف وجهات نظر
اما الان فلا اختلاف
فلا اعرف لم السكوت

قلم رصاص يقول...

بيرم المصري
رحيل
أتمنى الشهاده

اهلا بحضراتكم وسعدت بمروركم وتعليقكم
ولك الله يامصر

^^

Hu-man يقول...

هي جريمة سياسية بالفعل في حقنا وفي حق مصر...المشتركون في الانتخابات من معارضة
كانوا على ما اعتقد يعلمون جيداً ...ان الانتخابات ستزور..ولكن مالم يتوقعوه ان التزوير سيكون بذلك الشكل الوقح والفج ...بدون أدنى إعتبار لأي شخص
وقاحة النظم ليست مستغربة ولكنها بلغت أقصى درجاتها

بدراوى يقول...

لا هو انت قلت للناس روحوا اديوه صوتكوا
تعرف انا قولت كدة برده بس قولت روح شارك ان شاء الله حتى تبطل صوتك بس شارك
بس بعد تجربة انتخابات الشعب اللى شوفتها بعينى كناخب ثم محرر صحفى
اقدر اقول بكامل ارادتى
اللى دعوا الناس للمشاركة فى التصويت عالم عبيطة بجد
انا بجد قرفان من اللى حصل

قلم رصاص يقول...

Hu-man

تمام يا اخ محمد
ويلا هنعمل ايه بقى
لك الله يا ام الدنيا

منورني

قلم رصاص يقول...

بدراوي

أيوا قلت ههههههههههههه

خد بالك ياجدع انت شتمتني بدون قصد:
"اللى دعوا الناس للمشاركة فى التصويت عالم عبيطة بجد"
هههههههههههههههههه

يبدو انها كانت بدايه لمرحله كارثيه جديده في تاريخ مصر

بس اعتقد وكلي أمل في ذلك ان دي بداية النهايه للأوضاع السيئه

نأمل ذلك وبشده

منورني ^^

Beram ElMasry يقول...

اخي وصديق قلم رصاص حي
اهلا بك شرفتني ومرورك يسعدني.... حفظك الله
تحية وسلام ولاسلام مع بني اسرائيل

Twitter Delicious Facebook Digg Stumbleupon Favorites More

 
Free Web Hosting