تخاريف واحد صايم !

كل سنه وانتوا طيبين ياناس ياطيبين ورمضان كريم عليكم جميعا

عندي حالة عزوف عن الكتابه اليومين دول مش عارف ليه .. يمكن عشان صايم ؟ معتقدش لأني مكتبتش من قبل رمضان بأسبوعين تقريبا .. لقيتني من كام يوم بفكر اعلق على شوية حاجات بتحصل حوالينا سواء في محيطي الضيق أو مصر بشكل عام لكن مكسل اقرب للوحة المفاتيح ............

وبعد مافطرت الحمدلله وبدأت أمرن إيدي على الضرب على الكيبورد واستعادة لياقتها وبدأت تختمر في رأسي كام فكره كدا ، فجأة وبدون سابق انذار رغم انه شيئ متوقع ، إنقطعت الكهربا..............!

بالعقل ياناس حد حدق يفهمني .. احنا منين دوله مصدره للكهربا ومنين كل يوم بتقطع عندنا الكهربا بحجة ترشيد الاستهلاك؟

طبعا هيدخلونا في قصة ان دا بيحصل في معظم دول العالم بسبب ظاهرة الاحتباس الحراري الخ الخ الخ

طب لما الموضوع فعلا كدا ، ليه الرئيس مبارك شخصيا مستغرب من اللي بيحصل دا وسأل الوزير اكتر من مره عن اسباب الانقطاع اليومي المتكرر للكهربا؟

العجيب ان المستشار عدلي حسين محافظ القليوبيه طلع امبارح بتصريح يموت من الضحك في جريدة الشروق بيقول فيه :
"أزمات الكهرباء والأسعار تضاعف من ثواب الصائم " هههههههههه ياسلام على الفتوى

______________

العروض الجديدة اللي نازله بيها موبينيل قبل واثناء وان شاء الله بعد رمضان مغريه جدا وبتجبرالموبينيليين يتكلموا غصب عنهم ماهو الكلام بقى ببلاش .. لكن اللي غايظ الواحد انه مش خاطب عشان يعرف يستغل العرض دا في الكلام مع خطيبته .. طبقا لمقولة : أبو ببلاش كتر منه ^_^

______________

الأسعار في رمضان عاليه ، خصوصا اللحمه.. والحجه النظيفه دايما بتقول : ان رمضان السبب .. ايه اللي جايبه اليومين دول في عز الحر ..؟!

طيب سؤالي للحكومه بقى : طب ومين السبب في ارتفاع الأسعار طول السنه ؟ 

معلهش دا مجرد سؤال مش أكتر .. أصل انا صايم !

معلومه ع الهامش : اتعلمت من دروس الجغرافيا في اعدادي ان مصر رقم واحد في انتاج الجاموس على مستوى افريقيا.

_____________

كل فتره تطل علينا وزارة الثقافة بقيادة الفتان (أقصد الفنان او ذو الوجه الحسن) فاروق حسني بحادثه .. مره حريق في قصور الثقافه .. ومره يطلع لنا بتصريحات يهاجم فيها اليهود وبعدين يرجع في كلامه ويعتذر ، ومره يهاجم الحجاب ويغلط في المحجبات وميعتذرش .. واخييييييييرا حكاية سرقة لوحة زهرة الخشخاش للرسام العالمي فان جوخ من متحف بالجيزة .. وطبعا فيه ناس كل مره جاهزين يشيلوا الليله ويطلع منها الوزير زي الشعره من العجين......!

فاروق حسني دا يطلع مين وايه بالظبط في مصر .. هتجنن واعرف سر ابقاء النظام علي الراجل دا وزير للسكافه لمدة تزيد عن العشرين سنه؟ 

نطلع من الموضوع دا بإيه غريب وعجيب .. انا اقدر اقول ان المصري لسه بخيره .. مش حرامي ومش ممكن يسرق في رمضان .. لأن حرامي اللوحه طلع ايطالي ..........^_^

وعاوز اعرف هو فان جوخ مش هولندي؟ طب ايه جاب اللوحه بتاعته عندنا؟ هو احنا سارقينها ولا حاجة ؟ انا بسأل بس 

طب لو طلعنا سارقينها .. يبقى انا باقترح ان هولندا تاخدها وترجع لنا آثارنا المسروقه عندهم .. ما احنا اكيد لينا هناك حاجات مسروقه ومحدش يبقى ليه عند التاني حاجة ههههههههههه

____________

رمضان السنه دي زي كل سنه ، كريم فعلا والله اكرم علينا .. رغم صعوبة الجو وشدة الحراره وارتفاع الرطوبه الا ان الواحد محسش بعطش زي سنين فاتت خصوصا اني شايف العيال في البيت بيشربوا يجي متر ميه طول ما انا صايم زي مايكون عاوزين يفرسوني .. بس انا ولا هنا .. صايم يعني صايم..^_^

لو خرفت تاني هابقى اجي احكيلكم

والسلام على من اتبع الهدى