أحداث 24 ساعة

تخاريف واحد صايم !


كل سنه وانتوا طيبين ياناس ياطيبين ورمضان كريم عليكم جميعا

عندي حالة عزوف عن الكتابه اليومين دول مش عارف ليه .. يمكن عشان صايم ؟ معتقدش لأني مكتبتش من قبل رمضان بأسبوعين تقريبا .. لقيتني من كام يوم بفكر اعلق على شوية حاجات بتحصل حوالينا سواء في محيطي الضيق أو مصر بشكل عام لكن مكسل اقرب للوحة المفاتيح ............

وبعد مافطرت الحمدلله وبدأت أمرن إيدي على الضرب على الكيبورد واستعادة لياقتها وبدأت تختمر في رأسي كام فكره كدا ، فجأة وبدون سابق انذار رغم انه شيئ متوقع ، إنقطعت الكهربا..............!

بالعقل ياناس حد حدق يفهمني .. احنا منين دوله مصدره للكهربا ومنين كل يوم بتقطع عندنا الكهربا بحجة ترشيد الاستهلاك؟
طبعا هيدخلونا في قصة ان دا بيحصل في معظم دول العالم بسبب ظاهرة الاحتباس الحراري الخ الخ الخ
طب لما الموضوع فعلا كدا ، ليه الرئيس مبارك شخصيا مستغرب من اللي بيحصل دا وسأل الوزير اكتر من مره عن اسباب الانقطاع اليومي المتكرر للكهربا؟
العجيب ان المستشار عدلي حسين محافظ القليوبيه طلع امبارح بتصريح يموت من الضحك في جريدة الشروق بيقول فيه :
"أزمات الكهرباء والأسعار تضاعف من ثواب الصائم " هههههههههه ياسلام على الفتوى

______________

العروض الجديدة اللي نازله بيها موبينيل قبل واثناء وان شاء الله بعد رمضان مغريه جدا وبتجبرالموبينيليين يتكلموا غصب عنهم ماهو الكلام بقى ببلاش .. لكن اللي غايظ الواحد انه مش خاطب عشان يعرف يستغل العرض دا في الكلام مع خطيبته .. طبقا لمقولة : أبو ببلاش كتر منه ^_^

______________


الأسعار في رمضان عاليه ، خصوصا اللحمه.. والحجه النظيفه دايما بتقول : ان رمضان السبب .. ايه اللي جايبه اليومين دول في عز الحر ..؟!
طيب سؤالي للحكومه بقى : طب ومين السبب في ارتفاع الأسعار طول السنه ؟ 

معلهش دا مجرد سؤال مش أكتر .. أصل انا صايم !
معلومه ع الهامش : اتعلمت من دروس الجغرافيا في اعدادي ان مصر رقم واحد في انتاج الجاموس على مستوى افريقيا.

_____________

كل فتره تطل علينا وزارة الثقافة بقيادة الفتان (أقصد الفنان او ذو الوجه الحسن) فاروق حسني بحادثه .. مره حريق في قصور الثقافه .. ومره يطلع لنا بتصريحات يهاجم فيها اليهود وبعدين يرجع في كلامه ويعتذر ، ومره يهاجم الحجاب ويغلط في المحجبات وميعتذرش .. واخييييييييرا حكاية سرقة لوحة زهرة الخشخاش للرسام العالمي فان جوخ من متحف بالجيزة .. وطبعا فيه ناس كل مره جاهزين يشيلوا الليله ويطلع منها الوزير زي الشعره من العجين......!

فاروق حسني دا يطلع مين وايه بالظبط في مصر .. هتجنن واعرف سر ابقاء النظام علي الراجل دا وزير للسكافه لمدة تزيد عن العشرين سنه؟ 

نطلع من الموضوع دا بإيه غريب وعجيب .. انا اقدر اقول ان المصري لسه بخيره .. مش حرامي ومش ممكن يسرق في رمضان .. لأن حرامي اللوحه طلع ايطالي ..........^_^

وعاوز اعرف هو فان جوخ مش هولندي؟ طب ايه جاب اللوحه بتاعته عندنا؟ هو احنا سارقينها ولا حاجة ؟ انا بسأل بس 
طب لو طلعنا سارقينها .. يبقى انا باقترح ان هولندا تاخدها وترجع لنا آثارنا المسروقه عندهم .. ما احنا اكيد لينا هناك حاجات مسروقه ومحدش يبقى ليه عند التاني حاجة ههههههههههه

____________

رمضان السنه دي زي كل سنه ، كريم فعلا والله اكرم علينا .. رغم صعوبة الجو وشدة الحراره وارتفاع الرطوبه الا ان الواحد محسش بعطش زي سنين فاتت خصوصا اني شايف العيال في البيت بيشربوا يجي متر ميه طول ما انا صايم زي مايكون عاوزين يفرسوني .. بس انا ولا هنا .. صايم يعني صايم..^_^

لو خرفت تاني هابقى اجي احكيلكم

والسلام على من اتبع الهدى

30 تعليقات القراء:

Hager ZaǮbal يقول...

كل سنه وانت طيب :)
*معلش جايه متأخره شويتين


الحاله دي بتحصلنا كلنا .. مش عارفه ليه الواحد مبقاش عنده قدره يكتب بالكم بتاع زماان ، بس اعتقد ان الاسلوب بيتحسن رغم الكميه القليله !


انتوا كمان بتقطع عندكوا الكهربا :(
بقت حاجه مستفذه بجد ..
ويتقطع في اوقات مستفذه برضو ..
في الأول قالوا أزمة انقطاع التيار الكهربائي في مصر بسبب درجات الحرارة العالية ..
وبعدين ألقت المسئوليه علي وزارة البترول بيقولوا انهم مش موفرين غاز طبيعي كاف ...
وتظهر شوية أقلام وتقول أكيييد ماهم صدروا غاز لإسرائيل بكميات كبيره !
وناس تانيه تقول دا مجرد ترشيد للإستهلاك ، طب وليه الترشيد ظهر فجأه كده ؟؟ مكناش بنرشد ليه من زمان ؟!

والسيناريو بتاع الرئيس ده بقي كوميدي عالأخر .. لما يكون مش عاجبه وتاني يوم تقطع برضو !!
مش معقول يعني !


أما بقي تصريح عدلي حسين ده بصراحه ..
ولا أقولك نو كومنت ...



امممم
احنا فعلا كمصريين بنحب ابو بلاش اوي :))
بس انا مش موبينيل ولا هكون :D




ع الهامش : اتعلمت من دروس الجغرافيا في اعدادي ان مصر رقم واحد في انتاج الجاموس على مستوى افريقيا.

*واضح ان مؤلف الكتاب كان بيعاني من شوية أحلام يقظه !


بالنسبه لموضوع لوحة زهرة الخشخاش، مش عارفه ليه ماهتمتش اقرا عن الموضوع .. خصوصا كمان لما عرفت ان اللي راسمها مش مصري ..
وخصوصا ان انا كمان مبقتش اتابع اي حاجه فيها سيرة فاروق حسني عشان هبقي عارفه ان وقتي هيضيع عالفاضي !


مستنين التخاريف الجديده :))

خواطر شابة يقول...

رمضان كريم تقبله الله منا ومنك
بخصوص لوحة زهرة الخشخاش التصريح الاول بالقبض على السارق الايطالي تراجع عنه الوزير وبالتالي للان لايعرف مكانها ولا من سرقها
بانتظار تخاريفك الجديدة تقبل تحياتي

اقصوصه يقول...

رمضان كريم

وكل عام وانتم بخير :)

ليس فقيرا من يحب يقول...

ههههههههههههههههه

عودا احمد ياريس وكل سنه وانت طيب يارب

رمضان كريم عليك وعلى كل حبايبك

ويارب يجعلنا واياك من العتقاء من النيران

طبعا الكهربا دى بقت حاجه بجد غلسه جدا مع انى بصراحه اعصابى مش بتهدى الا لما النور يقطع
اصل بيقولك ان الجيران اولى بالمعروف وطبعا احنا صدرنا الغاز ليهم وبدأنا نشغل المعدات بالمازوت وياحبه عينى المازوت طلع مضروب فالمعدات فى منها كتير تلف وتسأل يقولولك بنريح الترنسات وبنوفر والكلام الاهبل المفقوس ده

بالنوسبه لموبنيل مش لازم تخطب ياريس ممكن تأنتم وتحكى براحتك هههههههههههههههههه

انا هنجت كفايه كده الدنيا صيام
والجو حر

كل سنه وانت طيب

داليـ ـ ـ ـ ـ ـ ــــا يقول...

بص بقه ياسيدى
مصر دى ينطبق عليها المثل الا بيقول
باب النجار مخلع


بالنسبه للفتوى بقه يالا كل الا عايز يقول حاجه سيبه متحرموش من انه يقولها
باينهم شايفنا عبط وهبل عشان نصدق كلامهم

تحياتى

حلم بيعافر يقول...

مصر فعلا اكبر دولة فى انتاج الجاموس فى افريقيا وفى العالم كمان

اوعى تنطق

دى حاجة مفروغ منها

ستيتة حسب الله الحمش يقول...

طبعا مصر رقم واحد في انتاااااااج الجاموس
جاموسة كل 14 ثانية
اللهم اني صائمة

تخاريف راقية وواجعنا كلنا
بلغنا الله وإياك ليلة القدر وكتبنا في المرحومين
تحياتي

Rosie يقول...

هو الأكيد أن فترة الانقطاع ما قصرتش على موهبة الكتابة لسه شغاله و زى الفل ..اطمن..حلو أنك كتابت فى كذا موضوع مستفزييين..عامل زى اللى بياخد لقطة من كل حتة..و أحب أقول إن
دى تانى مرة أقرا لتصريح بتاع تضاعف الثواب و واضح أن مأثر فى كل الناس.. و انا منهم..و عارف أنا كنت بافكر فى نفس الحكاية ازاى إحنا نبقى بنصدر كهرباء و نبنى محطات فى السودان و نقطع على المصريين..و ياريتها كهرباء و بس لأ و مياه كمان..المياة الأيام دى بقت زى اللى بتلعب معانا استغماية..

قلم رصاص يقول...

هاجر زعبل

وانتي طيبه
ولايهمك ولا متأخره ولا حاجة

فعلا رغم ان المنتج اقل الا ان الواحد بيحس بتحسن نوعي بس مش في كل الكتابات اظن دا حسب المود العام وقت الكتابه

ايوا الكهربا بتقطع عندنا
احنا مصريين ولانقل وطنيه عنكم ههههههههه

سيبك من التصريحات الذكيه للحكومه النظيفه دول عالم ضاربين الدنيا طبنجه على رأي واح صاحبي ^_^

منوره بتعليقك الرائع

ورمضان كريم وربنا يتقبل منا ومنكم

قلم رصاص يقول...

خواطر شابه

الله اكرم وجزاكم الله خيرا وكل عام وانتم بخير

من زمان مفتقد مود الرد على التعليقات فكرتينا بهذه الأيام ربنا يكرمك

موضوع زهرة الخشخاش دا موضوع مستفز جدا
ومش جديد على فاروق حسني التراجع عن اي حاجة بيقولها
ربنا يهديه

منوره دايما ورمضان كريم على كل المغاربه

قلم رصاص يقول...

اقصوصه

الله اكرم
وانتي بخير اختي الكريمه
وتقبل الله منا ومنكم

قلم رصاص يقول...

ليس فقيرا

احمد مييييييييين؟
هههههههههههههههه

وانتي طيبه والله اكرم

أأنتم؟
يرضيكي كدا على اخر الزمن
واحد لساله ظلطه ويطلع بره،، ويأنتم
هههههههههههههههه

شكرا جزيلا على المرور والتعليق

قلم رصاص يقول...

داليا

معلهش اسمحييييييلي اختلف معاكي

مفيش باب أساسا هههههههههههه

ربنا يصلح الاحوال للبلاد والعباد

وكل سنه وانتي طيبه

قلم رصاص يقول...

حلم بيعافر

طببببببببعا يابني
ماانا اللي لسه قايل اهه
انت هتغش من ورقتي ياض؟

منورني

قلم رصاص يقول...

الدكتوره ستيته

هههههههههههههه
ليه بس كدا يادكتور

عموما اللهم انا صايمين جميييييييعا

وتقبل الله منا ومنكم
وكل سنه وحضرتك طيبه

قلم رصاص يقول...

روزي

الحمدلله اني لسه فاكك الخط
^_^

لاداعي للاستغراب مما يحدث في مصر
احنا ماشيين بطريقة باب النجار مخلع
ناسيين ان النجار طالما نجار وبيفهم في النجاره يبقى قادر على انه يعمل باب كويس لنفسه

لكن هيهات هيهات لحكومه تسير والشعب ينبح

ربنا يصلح الاحوال عما قريب

مشكورة جدا للمرور والتعليق القيم

وكل سنه وانتم بخير ورمضان كريم

حلم بيعافر يقول...

انت تقصد انهى جاموس؟

мαησηα يقول...

وانت طيب يا ريس وبخير وف احسن حال :)

- كلنا هذا الرجل محدش له نفس يكتب
واللى بيكتب قرب يبطل للاسف معرفش فيه ايه ربنا يعديها ع خير الايام دى :(

- الكهرباااااا دى بقت عادى ع فكرة خلاص اتعودنا احلى حاجة فينا اننا شعب بيتعود ع كل حاجة بسررعة وبعد ما تعودنا ال الرئيس جاى يفتكر يسال هو فى ايه ؟
هيجنونى والله يا ريس


- الحمد لله انا فودافون وبردووووو متغاظة اووووووى الناس دى بتحرق دم العزاب
بس ع راى رانيا انتم واستفيد واهو كله ببلاش حتى تبقى عملت بروفة هههههههه علشان لما تيجى تخطب يبقى عندك خلفية بحيثيات الموضوع كله :)))


- انا السبب نياها نياها
عاااااااااا منهم لله الواحد بقه يفك العشرة جنية تتفرتك يا ريس والله ف لحظة عاااااااااااا


- هو احنا عندنا متحف اصلاااا ؟؟

- سلملى ع العيال كلهم بجد وحشونى اوى

وبطل تتفرج عليهم وهما بيشربوا علشان ماتنساش هه واخدلى بالك

كل سنة وانت طيب يا ريس وماتغيبش علينا

قلم رصاص يقول...

حلم بيعافر

ايه ياعم انت هتزفلطي الكلام؟
هههههههههههه

روح نام يامحمد واسكت

قلم رصاص يقول...

منونا

وانتي بالصحه والسلامه

ايه مبتكتبيش انتي كمان ليه ؟ معندكيش كيبورد يعني؟ ههههههههه

أنا لن أسلم ولن أفرط ولن أأنتم ههههه
اللهم اكفينا شر الأنتمه والذي منه

يوصل السلام ان شاء الله

وانا باقترح اقتراح احسن بخصوص العطش
فيها ايه لو حد كتفني وسقاني غصب عني؟
حتى عشان يبقى صيامي ماشي وسليم لأنه حصل غصب عني ههههههههههه

حاولوا تفكروا في الاقتراح دا

منوره ومشكوره على التعليق

ورمضان كريم

М€ŝЋМΣŞĦ يقول...

إلحق بسرعة .. فى شمع فى الجمعية .. الواحد يلحق يجيبله شمعتين

بعد أزمة الفراخ و اللحمة و الرز و الدقيق و العيش و حاجات كتير

بقى فيه أزمة شمع فى البلد

و ربنا حليم ستار

Qatarat_Nada يقول...

هههههههههههههههههههههههههههههههههه
بتحصل يا قلم كتيييييييييير معايا
ابقى كاتبة وعمالة اطلع غللي في الكيبورد ولما اخلص انده لاختى اقولها بصي التوبيك دة انا عمالة اكتب فيه من بدري تقول الله ومن غير ماتكلملها اووبس النور قطع
طبعا في الموقف دة ما قدرش اقول غير كلمة واحدة " نحسسسسسسسسسسسسسسسسسسسسس " طبعا في سري والا كنت خدت لى كام بوكث حلوين ^_^
ودى مصر على فكرة يا قلم ماحدش عنده امل في انها تتغير بس انا عندي امل كبير جداااااا طالما اللى زيك واللى زي الشباب المسلمين موجودين
وربنا يوفقنا
متابعاك ان شاء الله ...
وجزاك الله كل خير

حلم بيعافر يقول...

مش رايح

انا فى شارع الحكومة

قلم رصاص يقول...

М€ŝЋМΣŞĦ

هههههههههههههههههههه

ماعادش الا الشمع
دي حاجة تجيب شلل اطفال في عمر الشيخوخه
هههههههههههههه

كل سنه وانت طيب
وياريت تجيبلي ب 5 ج شمع معاك

رمضان كريم عليك

قلم رصاص يقول...

قطرات الندى

الحال من بعضه يعني؟

اه ما احنا في مصر واحده .. ماما سوزان واحده ههههههههههههه

اشكرك على مرورك وتعليقك
وكل سنه وانتي طيبه

قلم رصاص يقول...

حلم بيعافر

امشي ياض قبل ما ابعت الغفير والحنايني يجبوك من القفا بتاع الانت
هههههههههههههه

منورني يابن خالتي

زهرة يقول...

تخاريف زى الفل

موضوع الكهرباء دة اكتر موضوع بقى بينرفزنى

بتقطع بالدور على الشارع .. عند كل منطقه شوية .. مهو بردوا المساواة فى الظلم عدل

ربنا يهدى وكل سنةو انت طيب :)

قلم رصاص يقول...

زهره

اشكرك على المرور الطيب والتعليق

فعلا الكهربا بقت حاجة مستفزه
انا معدتش باستغرب حاجة في مصر

وانتي طيبه ورمضان كريم عليكم

SAHAR يقول...

رمضان كريم على حضرتك أخي / قلم رصاص
والله انامش عارفه برضه أي تبرير لقطع الكهرباء كل يومعملولي هيستريا وخلوني ( أسيف )بمعدل كل ست ثواني ^ــ^ ربنا يهديهم..

،،،،،،،،،،،،،

واللي جعل الناس محافظة على فاروق حسني
هو السبب برضه في كل اللي احنا فيه ده *ــ^
،،،،،،،،،،،

شكرا جزيلا لللافتات حضرتك الراائعه

غير معرف يقول...

ya heek el Ta5areef ya ema Balash (:

law koll fatra hat3'eeb keda w terja3 toktob kalam mo5tasar w mofeeeed bel shakl da yeb2a Hanee2an lana fe 3'yabak w 3awdetak :)

kollo 2ella e3lanat el Mobinile , ya 3ami o5tob w raya7ni ba2a :)

leek wa7sha 2ad el donia bjad wallahi...

Rana..

Twitter Delicious Facebook Digg Stumbleupon Favorites More

 
Free Web Hosting