4:05 ص
قلم رصاص
اللي يعرف مين صاحب الشخصية اللي في الصوره .. ليه عندي جايزةمش عارف هي ايه .. بس هي اكيد حاجة كويسه
وهسهلها عليكم .. هو من قِيل في حقه : انه باااااااااااااع البلد
الله يرحم أيامه .. الجنيه في عهده كان لسه فيه الروح وكان يسوى تلاتين قرش بحالهم
انما النهاردة طلعت روحه ، وعاد بيبتاع بالكيلو
وللعلم الإسكيتش دا انا رسمته من حوالي سبع سنين .. تصوروا
يعني قبل إديسون مايخترع المصباح
^_^
والراجل دا انا من بعده نفسي اتسدت عن رسم الكاريكاتير
لأنه بجد كان فاتح شهيه بالنسبة لي ..ومعظم مارسمت في الكاريكاتير كان عليه
وهوريكم فيما بعد ، بعض الحاجات اللي تتماشى مع هذه الأيام الذكيه
ــــــــــــــــــــــــــــ
تقبلوا تحيتي
50 تعليقات القراء:
مصريا واستنادا لمعطياتك
شايف انه عاطف عبيد
عالميا بقى شايف انه بالظبط
Michael Caine
داه عاطف صدقي مش عبيد ..عموما بدل ما ندوخ خد قائمتهم كلاتهم وشوف انت اللي تحبه...
http://ar.wikipedia.org/wiki/%D9%82%D8%A7%D8%A6%D9%85%D8%A9_%D8%B1%D8%A4%D8%B3%D8%A7%D8%A1_%D9%88%D8%B2%D8%B1%D8%A7%D8%A1_%D9%85%D8%B5%D8%B1
تمام
بس تشكر عالقايمة طلعت اطول مما تخيلت !
ههههههههههههههه طالما باع ا لبلد يباه مفيش غيره بتاع الخصخصه,,
ياعينى مشى بل ميبيع الاهرامات وابو الهول.
ياسيد دا كفايه عنيه تخلى اى حد يعرفه,كان دايما عندى سؤال اقولهم الراجل داا بيشرب ايييييييييييه؟
كنت بحس انه لازم يطلع يكلمنا وهو ماسك الشيشه.
انه عاطف عبيد.
مش كده ولا اييييييييييييه؟
El Shandwely
فعلا عاطف عبيد
برافو عليك
منور
ـــــــ
كلمات من نور
لا مش عاطف صدقي نهائي لاشكلا ولا سياسات
عاطف صدقي صلح كتير في الاقتصاد
انما المقصود هو عاطف عبيد
وزي ما انا قولت الأماره
اللي باع البلللللللد
وشكرا على اللينك
الشعب لابد له من حكومه تشكمه
شاطره ياشيماء ، جبتيها من اول مره
فعا هو مفيش غيره قائد سلاح الخصخصه واول وزير لقطاع الاعمال العام واللي باع البلد في مزاد علني !
عاااااااااطف عبيد
وفعلا عنيه غريبه اوي ، بس دي علامة الجودة بتاعته يعني .. وزي ما انتي توقعتي .. هو فعلا انا سمعت انه كان بيشرب بلاوي سوده .. والدليل عنيه ونبرة صوته كانت واضحه جدا
بس رغم كل دا كانت ايامه البلد ارحم بكتير من اليومين دول ..
الفترتين انيل من بعض بس في عهده لم تصل الامور لما آااااااااااالت اليه الان !
وليكي جايزة
منوره دايما المكان
في امان الله
انا ماعرفتش انه عاطف عبيد غير لما قلت باع البلد
على فكره من اسوء الاشياء انك تذكر بشيء سيء ... بل بخيانه البلد
تحياتي
فيه حد ميعرفش ده ؟؟ :(
اسوأ واحد في مصر :(
....
متعرضش الحاجات الوحشه ده عندك ^_^
....
المدونه ده نظيفه و هتفضل طوول عمرها نظيفه ^_^
ده عاطف عبيد..
لما كان دكتور فى الجامعة كان راجل محترم أوى و كان ليه آراء حلوة و كان بيتسمعله (ده على حسب كلام ماما و بابا لما كانوا الطلبة بتوعوا فى كلية تجارة :) )
بس بعد ما مسك النظام بهت عليه
مادام الحكاية فيها جائزة استنى اما أغش من التعليقات لاني أكيد مش حأعرف
فين ورقة شيما فين فين أه أهي الجواب هو عاطف عبيد صح مش كده عشان تعرف اني شاطرة ههه
انا مش غشيت
بس العيون هى اللى أكدت لى انه عاطف عبيد
الراجل ده
مع ناس تانية
فى الحته السوده اللى فى قلبى
ربنا يديهم على اد نيتهم
بص انا برده مش غشيت بس عينين الباندا دى مكانتش غير مع عاطف باشا عبيد امبراطور الخصخصه
و استاذ تعويم الجنيه و هو مبيعرفش يعووووووووووم
هو الكل قال عاطف عبيد
فهانمشيها عاطف عبيد
مع اني اول ما وشفت صورته في الريدر عندي افتكرته نور الشريف
تحياتي
ياريت الناس تعرف ان اللي بيتبقى منها فعلا واللي بيفتكره الناس هو اعمالهم فقط
وطبعا الاعمال السودة بتعلق اكتر في ذهن الناس
بس على فكرة احنا ممكن نشيل الصورة ونضع صور ناس تانية كتير قوي ويفضل برضه نفس الكلام ينطبق عليها"باع البلد"..مش كده والا إيه
فتاه من الصعيد
سبحان الله .. كلكوا عارفين انه باع البلد
بس ياترى مين اللي قبض التمن؟
^_^
منوره أختي الكريمة
ــــــــ
سبايدرمان
ههههههههههههههه
انا مقدر شعورك تجاه الراجل دا
بس والله انا ماقصدتش ادايكم بنماذج سيئة في تاريخ مصر ، بقدر ما كنت عاوز اوريكم رسوماتي القديمة نوعا ما.
دا الراجل دا انا عملت فيه عمايل بالكاريكاتير هههه
وشكرا جزيلا يادكتور على ثقتك في المدونة وكلامك الحلو دا!
منور دايما
انا ودماغي
فعلا عاطف عبيد
ودي سنة الحياه بكل أسف اختي الكريمة
الواحد من المسئولين بيبقى له أراء وهو بعيد عن السلطة مخالفه لما يرتكبه من افعال بنفسه بعد مايمسك السلطة
ماعندك مثلا المفتي كان ليه اراء في الختان وهو استاذ في جامعة الازهر ، غير اراءه دي بعد مابقى مفتي .....
بريق الكراسي يفقد العقول صوابها
منوره بمرورك وتعليقك
ـــــــــ
خواطر شابه
كنت عارف انك هتغشي من شيما عشان هي شاطره وبتذاكر كويس هههههه
منوره اختي الكريمة
حفيدة عرابي
الحكاية مش محتاجه غش يامصريين
كلنا نعرف هذا الرجل
وعجبني تعليقك يافندم
منوره
ــــــ
صيدلانيه طالعه نازله
فعلا عنيه جميله اوي وبتدل اد الراجل كان بيسهر وتاعب نفسه عشان الشعب
هو مكانش بينام اساسا من التفكير في حل مشاكل مصر ^_^
منوره يادكتور
أحمد عاطف
نور الشريف مين بس يا أستاذ أحمد
ههههههههههههههههه
عموما اجابتك صحيحه رغم انك غشيت والغش ممنوع في الفصل
منور ياباشا
ــــــــ
هبه فاروق
طبعا أستاذه هبه ، كل بني أدم الى زوال ولا يبقى له سوى اعماله وسيرته
وطبعا الحسنه تخص والسيئة تعم
بس رغم ان دي القاعده العامه في الحياه
الا ان الراجل دا كانت ايامه سوووده اوي ..بس مش اسود من النهاردة
صحيح الصوره تنفع يتحط مكانها الف صوره لألف مفسد في البلد غيره ، وهتمشي برضه باع البلد وداس البلد وخرب البلد الخ الخ الخ
بس الفكره اني حبيت اوريكم رسمتي للرجل يعني !
مشكوره على المرور
مين ده
اللى باع واشترى
اللى هان وهونا عليه
اللى كان ونسى اللى هايكون
اللى بنا ونسى عمود البُنا
اللى خطط ونسى المخطط
اللى اتصور ونسى المصور
اللى خطب ونسى الكلام
اللى قال وترك الفعل
اللى ركب طقم سنان
وانا كنت شاهد
فى عيادة دكتور عبد المجيد فى وسط البلد
بس كانت سنان لبلده كلها قواطع
وعجبى
احييك دقة رسم الغير عاطف ولا عبيد
وفتح الله شهيتك بمن نظف البلد فاصبحت يا كبدى مش لاقى حاجة تاكلها
تقديرى
لااااااااااااااااااااااااااااااا
السؤال ثععععععععب اوى يا مستر
ممكن اختيارات
بص انا محتارة بين تلاته
عمرو ذكى
عبد الحليم حافظ
زكى رستم
بس دول باعوا البلد فين ياريس
اكيد السؤال بتاعك فيه اخطاء
زمانيه ومكانيه
ههههههههههههههههههههههههههههههههه
طب بص انا هاخد برأى الجمهور
الراجل ده هو عاتف عبيد
اياكشى بس الجمهور يكون بيضللنى
وهيسقطنى فى المسابقه
هههههههههههههههههه
مشاء الله عليك
موهوووووووووووب
وهل يخفى القمر ده عمنا عاطف عبيد
الى حرر الجنية وقاله عوم وانزل البحر لوحدك انت من الأحرار يا ابنى
AboALI
مرور حضرتك شرف في حد ذاته يا أستاذنا
وشاكر جدا لتعليقك الرقيق وكلماتك المنمقه
دمت في امان الله
ــــــ
ليس فقيرا من يحب
مفيناش من الغش لو سمحتي
ومع كل اجاباتك صح
وشاكر جدا لمرورك وتعليقك يا أخت رانيا
في حفظ الله
محمد غاليه
هههههههههههههههه
جدع يامحمد خليك دايما مصحصح معايا
هووووووووووو عاطف بذات نفسه
منورني يا ابوحميد
بعد ماقولت علي كل حاجه حلوة في عهده مش عايزني اعرفه
دا ياسيدي الاستاذ الدكتور المحترم جدا
اخو الست نبيلة عيبد
بس بجد تسلم ايديك انت بجد فنان
واتمني تشرفني بمدونتي الجديدة وتقولي ايه رايك
http://samtelghrob.blogspot.com
تحياتي
ـــــــــــ
(معلومة هامة)
___________
تعويم الجنيه :
تعويم الجنيه أو أي عمله بشكل عام معناه اقتصاديا عدم تحديد الدولة أو مؤسسات الصرف كالبنوك المركزية لسعر العمله ، بل تركها لأليات السوق حسب العرض والطلب.
والفكره ليست بالشكل السيئ اللي انتوا متخيلينه لأن معظم الدول المتقدمه بتتبع الاسلوب دا في اوقات كتيره .
لكن مشكلة النظام دا انه مينفعش يطبق في اقتصاد الدول الصناعية الناشئة او الدول النامية زي مصر ، لأن اقتصادنا ضعيف وليس بالكفاءه اللي تحميه من التقلبات المفاجأة لحركة الأسواق العالمية.
لذلك تعويم العمله في حد ذاته بشكل عام مش عيب .. لكن تعويم الجنيه المصري هو اللي غلط لأن النظام ميناسبش مصر .
أردت التوضيح بس كمعلومه وعشان منظلمش الأليات المعروفه ، وانما عشان نفهم كويس اننا اللي بنستخدمها غلط .
واللي يضحك ان عاطف عبيد كان أستاذ إدارة وبيفهم كويس في الاقتصاد ، ومع ذلك دايما بقى يعمل عكس اللي مفروض يتعمل على طوووووووول الخط.
ودا ملوش عذر، لأن دا مجاله
انما احمد نظيف .. يلخبط براحته .. ليه عذره .. لأنه مش فاهم حاجة في أي حاجة ودي مش شغلانته ولا لعبته من الأساس.وزي ماانتوا عارفين ياما وزراء ورؤساء وزارات جم في مناصبهم غلطه .. او نتيجة لخبطة في الأسماء .. ومينفعش الغلطة تتصلح الا بعد خراب مالطه !!!!!!!!
تقبلوا تحيتي
مانو
اهلا بيك ياباشا
وشرفتني زيارتك الميمونه
وايه النباهه دي كلها
عرفت ازاي انه اخو نبيله عبيد
هههههههههههههه
وجي وراك روح انت بس حضر المشروبات
خصوصا الشاي .. انا كائن يتعذى على احتساء الشاي ليل نهار......!
منور
عاطف عبيد على عاطف صدقى بيجيب الإتنين
بس البدلة بتاعته طعمه أوى
لالالالالالالالا ياعم
لاتدينى بالكوع ولا غيره
هاقول الاجابة وامشى على طول
بس انت ماقولتش نتصل بانهى رقم
زيرو زيرو تلات ازيار زيرو زيرو
ولا 33تلاتة تلاتات 33
:))))))))))))))
الاجابة رقم عاطتشف عبيد بين قوسين الله يحرقه قصدى يرحمه طبعا اوعى تفهمنى صح
صباح الفل
على كده بما انى التعليق الاخير
وانا ماشية بمبدا الاخير ربه كريم
فانت اكيد اكيد هتدينى الجايزة مش كده؟؟
ملحوظة فى غاية الاهمية
انت عليك اكياس هريدى بالهبل انا بفوتلك من زمان وجب بقى ترد الدين اللى عليك
النوتة اتمليت يا معلم انا قولتلك اهو وانت حر
عاطف عبيد
دى رسوماتك اللى من سنوات
والله خطك حلو
الراجل ده كانت "أمى" ربنا يديها الصحة كل ما تشوفه فى التليفزيون تقوله "اللــه يخرب بيتك يا شيخ"...
وكنت كل ما أسمع صوته أحس ان عنده 3 أو أربع حنجرة مش حنجرة واحدة زينا
وكان دايما بيأكد جدا على حكمة الرئيس
انه عمو عاطف عبيد
زمانك اديت الجايزة خلاص لناس تانية أنا مليش دعوة أنا عاوزة جايزتى
أنا عرفت إنه عاطف عبيد من عينيه
لأن فيهم سواد غريب من كتر ( السهر ) على راحة البلد والأنيميا علشان يوفرلنا الأكل
وبعدين غشيت الإجابة علشان أتأكد بس
وإن كان على الشخصيات اللى ترسمها من بعده فهى كتير
وتاريخ حكومتنا حافل بيهم
فأرجو أن يفتحوا نفسك من تانى
عاطف عبيد !
اتقال انه اتعين رئيس للبنك العربي بعد انتهاء وزارته عشان يسدد ديون عليه للوزارة ..
دخله كان بيوصل ل 850 الف دولار سنويا
هناك مصر اخرى
السلام عليكم
يسلم قلمك الرصاص
تحياتى
احمد الشاعر
حلو الكاركتيير
ارسم احسن من انك تقعد تضارب خلق الله خخخخخخخخ << اسولف بس
^^
الرسمه حلوه =)
لا يا عم انا مش هجاوب الا لما اعرف الجايزة اى
بس بجد فنان
تحياتى
انا عن نفسي لسه مفهمتش
مين ده؟
الله يجازيه بعمله
أن شراً فشر
وأن خيراً فخير
أنت تفتكر ايه؟
بالذمة ده كلام؟!!
يعني انا أديك الصور تقوم تضحك ع لحظة انقطاعي و تنزل واحدة منهم >_<
لا و كمان هتنزل الباقي
اتفضل هات جايزة المرة دي و الجوايز الباقية بسرعة x_x
جد بقي امتي كبيرت الرسمة دي مني p:
عاطف صدقى
عاطف عبيد
احمد عز
...........الخ
نحن في حاجه الي رأيك في مشاكل القراء بمدونة "دقات قلب بعد الخمسين"
مع خالص تقديري
ههههههههههههههههههههههههههههه
جامد الاسكتش ده ولايق على عاطشيف :D
اولا وحشتنى جدا
ثانيا ده عاطف عبيد بس معلمواتى عنه ضعيفة جدا
حلو اوى الكاريكاتير
بس ايه شغل الفوازير ده
غلب حمارنا
ههههههههههههههه
بتهيقلي الموكوس المنحوس الفلحوس رئيس المنسر قصدى الوزراء السابق عاطف عبيد
ازيك يا سيد
عامل ايه ؟؟ فينك مش بقيت بتظهر ليه
يارب تكون بخير
=) لكنتك الساخرة جذبتني
مممم اللي بيبيع بيتباع , مش كدة ؟ ^_^
زورني هُنا: http://www.facebook.com/pages/mudwn-frs-uzyrn/329352219778?ref=ts
او في مدونتي .. حيث ستجديني دائما
هوا بدماغه باع البلد في السوق السودا
واضح موهبتك في الكاركتير
عاوزين بقي شويه كاركاتيرات عن باقي الاخوه البعده اللي باعوها معاه
دمت بكل خير
أشكركم كلكم على المرور والتعليق والسؤال
ومتأسف على التأخير في الرد نظرا لبعض الأشغال
جزاكم الله خيرا
ونورتووووووووني
في امان الله
إرسال تعليق