أحداث 24 ساعة

داستور يا اخواننا !




من المعروف أنه هناك فرق بين الشرعيه والقانون . فالأولى هي رضا المحكومين بوجود الحاكم ومايصدر عنه لتصريف شئون حياتهم . أما القانون فهو الوسيله أو الأداة اللي من خلالها يتم تنظيم وحل المنازعات الحاصله في حياة الناس.

وبيكون القانون ليه شرعيه إذا كان صادر ممن يملك حق إصداره ، وهو مايعرف بدستورية القوانين ، والعكس صحيح. ويأتي على رأس هرم القوانين ، القانون الأعلى أو الأسمى وهو ما نعرفه بــ " الدستور ".

فالدستور في أي بلد هو أبو القوانين ، وهو المسئول عن بيان الشكل السياسي للدولة والتوجه الاقتصادي وتنظيم السلطات العامه ، ووضع الخطوط العريضه لكل أنشطة الدولة وترك التفاصيل للقانون .

والحقيقه أنه عند الحديث عن الدستور ، فبالطبع الهدف من ذلك هو الإشاره الى الدستور المصري المعمول به  وهو دستور سنة 71 والذي أصبح مثارا للجدل الأن خصوصا عند الحديث عن شروط الترشح للانتخابات الرئاسية المقبله في 2011 .

إذا تكلمنا عنه بشكل عام ، فيمكنني أن أقول بالفم المليان أننا لدينا دستورا مصريا فاقد الوعي ، ودا لأسباب قويه جدا . أهمها أنه جاء عند وضعه في مطلع السبعينات بالتصادم مع العديد من المبادئ الدستورية العامة منها على سبيل المثال، النص على كوتا (أو حصه) خاصه بفئات معينه للتعيين في مجلس الشعب مثل نسبة الـ 50% عمال وفلاحين .. فهذا يتنافى ومبدأ المساواة بين المواطنين . وكان الرئيس السادات مقتعنا بفكرة عدم تخصيص مثل هذه النسب الغير دستوريه لكنه بكل أسف أطاح باللجنه المشرفه على وضع الدستور وعلى رأسها الفقيه الدستوري الشهير الدكتور إبراهيم درويش وأتى بلجنه أخرى وضعت الدستور الحالي بعدما غيروا كل ما تم الاتفاق عليه دستوريا ليتناسب الوضع وسلطات الحاكم المطلقه .

لم يقف الأمر عند هذا الحد ، بل تفاقمت الأمور بشدة عندما أدخلت ثلاثة تعديلات قاسيه على هذا الدستور الميت . أولها في مطلع الثمانينات وذلك بإضافة مجلس الشورى الذي لايسمن ولايغني من جوع أو بمعنى أدق لا بيهش ولا بينش . ثم تعديل المادة 76 الخاصة بشروط انتخابات الرئاسه وتفصيلها بالمقاس على مرشح الحزب الوطني في الانتخابات القادمه .

واخيرا التعديل الثالث والأكبر في تاريخ الدساتير الحديثه واللي شمل 34 مادة دفعه واحده . وبكل صراحه أصبح الدستور من كثرة التعديلات المدخله عليه رغم أنف الشعب وبمهارة ترزية القوانين وعلى رأسهم الدكتور فتحي سرور ، أصبح شبه ميت ولايخدم إلا ذوي المصالح العليا في الدولة .

و الحديث عن تعديل أخر ان كانت هناك جدية في تبني ديمقراطية حقيقية ، أصبح ضرب من الخيال .. لأن هذا الدستور لم يعد بمقدروه تحمل المزيد من عمليات الترقيع والتخييط ، فهو زي الميت اللي الضرب فيه حرام .

واللي يغيط أكتر ويرفع الضغط هو إصرار وتمسك النظام بعدم تعديل المادة 77 الخاصة بمدة الرئاسة ، واللي بوضعها الحالي بتعطي لرئيس الجمهورية صلاحية للبقاء في منصبه مدى الحياه.

لذلك نادى وينادي وسيظل ينادي الفقهاء الدستوريين ورجال الفكر والنخبه المصرية بضرورة وضع دستور جديد يليق بجمهورية مصر العربيه ان كنا جادين في النهج الديمقراطي السوي في جو صحي .

أعلم جيدا أن الوقت يمكن أن يكون غير مناسب خصوصا وأن الانتخابات على الأبواب ، ولكن امتى مكانش فيه وقت مناسب ؟!

لذا أنهي كلامي بكلمة واحده وأقول :

داستور يا اخواننا

ـــــــــــــــــــــــــــــ
المقال دا كتبته  لمجلة بحلقه 

44 تعليقات القراء:

ستيته حسب الله الحمش يقول...

كتبته لمجلة بحلقة؟
وانت الحمد لله كويس؟

بصراحة ان يتكلم عن القانون والشرعية قانوني هو ده اللي بنكسبه من المدونات
عمري ما ها اروح ادور على الفرق بين الشرعية والقانون
ولا على ايه اللي وكسنا وكله بالضاستور زي ما انت شايف
لكن لما انت اتكلمت ربطت لي نقاط كتيرة كانت في نفوخي كالجزر المنفصلة

بوست حقيقي ولا أروع

انا خايفة يغيروا الضاستور يعملوا المادة الأولى بقاء عظمته مدى الحياة بلا انتخابات
المادة التانية يرث عظمته ابنه حتى الممات
المادة التالتة ان لم يتواجد عظمته او ابنه ترثها سوزي حرة مستقلة

ماهو علشان تغير دور الأول هل البلد فيها على قمة الهرم مصلحيين؟
لو لأ يبقى ده زي اللي عاوز السمنة من ورك النملة

اياك حد يقول
يععععععععععععععععععععع

النملة كلها بروتين والله :)

قلم رصاص يقول...

الدكتوره ستيته

ههههههههههههه
اه انا الحمدلله لسه عايش

ربنا يخليكي يارب على كلامك الحلو دا في شخصي العبد لله .. دي شهادة كبيييييييره جدا في حقي من حد بحجم حضرتك

بس ياسلااااااااام لو الشهادة دي مطبوعه.. كانت هتسهلي حاجات كتير في الدوله ههههههههههههه

واطمني ياكبيره احنا معندناش ضاستور يخرج عن طوعنا قصدي طوعهم ههههههه بس اهو كلام بنجوله عم بيجر حدييييييييت !

واعتبريه حضرتك مجرد تنفيس عن الشعب ..
ايييييييييييه .. فونيا

وعجبني اوووىىىىى السمنه من ورك النمله ذات الوزن التقيل اللي كلها بروتيييين دي

دي قريبة البرغوت أبو جناح بست محركات؟!
ههههههههههههههه

ربنا مايحرمني من دخلتك على مدونتي الغلبانه

منورررررررررره بشدة

في أمان الله

خواطر شابة يقول...

"ان كنا جادين في النهج الديمقراطي السوي في جو صحي" هذه الجملة هي سر البلاء عبارة ان كنا تلخص كل ما يمكن ان يقال وهذه ال ان كنا تشمل الكثير من نواحي حياثنا سياسة واقتصاد وثقافة وتعليم .

بنجاواتى يقول...

سلام عليكم

بجد جزاك الله خيرا على البوست الرائع ده

وربنا يكرمك كده وتقولى ال34 مادة دول اتعدلوا امتى وازاى وهل فى شئ واحد يربطهم ببعض ولا مجرد تعديلات؟؟؟

كمان فكرة تعديل المادة 77 دى معروف لنا جميعا انها ضرب من الخيال:)

اخر حاجة بقى -انا عارف ان طلباتى كتير- ...هو وضع دستور جديد ده حاجة سهلة كده وممكن تتم امتى ؟ وانت من رأيك ان الافضل التعديل ع الموجود ولا كفاية ترقيع؟؟

تحياتى

mohamed ghalia يقول...

أنا بقول دستور يا اخونا ولو حد مغطى راسه يشيل غطاه عان الدنيا ماشية مقلوب عندنا

norahaty يقول...

كلام ممتاز
بس مين ينفذهـ
مش حأقولك يسمعه
لأ احنا كلنا سامعين
لكن من بيده الأمر لن
ينفذ:حد يمحى الورث بتاعه!!

norahaty يقول...

معلش ياقلم دهب
التعليق دا علشان
متابعة الردود تجلى
(نسيت أحط الصووووووح أول مرة)

فتاه من الصعيد يقول...

هي دي بلد قانون ولا شرعيه

ده كويس ان لسه فيها محاكم

تحياتي

أبو العريف يقول...

ازيك يا باش

بصراحه بوست ممتاز

فهمتني حاجات كتيره جدا مكنتش فاهمها

ومكنتش عايز افهمها

من باب السلبيه لا اكثر

عشان هفهم فهتغاظ فهفرقع

فبالتالي متشكر جدا علي الفرقعه

تحياتي

قلم رصاص يقول...

خواطر شابه

مرور حضرتك دايما بيحسسني ان فيه ناس بتقرأ ما أنا كاتبه وبانتظام

نورتي جدا

وشاكر ليكٍ المشاركة الطيبة

في حفظ الله

ليس فقيرا من يحب يقول...

يادى النيله مش باعرف اعلق

على السوياسه وبعدين مش انت هتبقى ريس

ورينا الخطه بتاعتك واياكشى ترحمنا بقى

نبقى نعمل بقى جلسه كده نصيغ فيها

شويه قوانين على ماقسم كده نغرق الشعب

قصدى نفوق الشعب ده بقى

تسلم ايدك ياريس

يارب تكون بخير

حلم بيعافر يقول...

ياشيخ صلى ع النبى متقولش كده
انت عايز المادة 77 تتغير ليه؟
انت بتفكر فى ايه يابنى
ارجع عن اللى فى دماغك احسنلك وكفاية عليك رئيس جمهورية نفسك
مانا قدامك اهوه
رئيس جمهورية بقى لى دللوقتى 29سنة
ايه عنى اللى حصلى؟
ولا حاجة
ومتواضع وربنا يكرمنى يارب

حلم بيعافر يقول...

وبعدين احنا فى مصر معندناش حدد ينفع يبقى ريس غيره
ومعندناش حد ينفع يحط ويعدل قوانين غيرهم
ومعندناش حد غيرنا
سيب الدستور زى ماهو لحاد ماحد من اركان اللعبة يعترض
بذمتك ياشيخ شفت مظاهرة بتعترض على الدستور وعدم صلاحيته
لما الناس تكون عايزة تغير هتغير
والله والله والله هتغير
بس الناس بتاخد فوق دماغهموتقول الحمدلله
فاكرين العجز رضا

قلم رصاص يقول...


بنجاواتي

وعليكم السلام ورحمة الله وبركاته

ازيك يامصطفى بيه بنجا
منورني دايما بطلتك الحلوة وأسألتك المثيره للنقاش

اولا لازم تعرف اني مش فقيه دستوري ولا محلل سياسي بارع عشان اقدر اشرح لك الموضوع بمهنيه عاليه .. انا باجتهد على اد ما اقدر عشان تكون الصوره واضحه ادام نفسي ثم الاخرين !

عموما انا مش هقدر اكلمك على تعديلات كل المواد ال 34 لأكتر من سبب
اولها ان معظم المواد مليانه حشو وتخبط زي مناهجنا التعليمية بالظبط
ثانيا من الصعب نتكلم عن الكم الكبير دا كله من المواد ..هنقلبها محاضره بقى
يابنجا .. دا البلد كلها محتاسه في حتة مادة واحده وهي 76 هههههههه

لكن انا هقولك الخطوط العريضه للتعديل من خلال دراستي ليها في دبلوم الدراسات العليا في مادة النظم السياسية والدستوري بشكل عام على ما اتذكر.

ـــــــــ

التعديلات دي تمت في مارس 2007

تمت ازاي ..هقولك في العموم:

المرحله الأولى ___
لرئيس الجمهوريه وتلت اعضاء مجلس الشعب على الاقل وفقا للمادة189 من الدستور ،
حق طلب تعديل ماده او اكتر من الدستور، وقد كان وحصل.

المرحله التانيه ــ
موافقة مجلس الشعب على طلب التعديل ، وبيشترط موافقة الاغلبية على التعديل من حيث المبدأ .يعني (454 على 2 = 227 +عضو واحد) باختصار موافقة 228 عضوا على الأقل .. وانت عارف بقى بقية القصه في مجلس سيد قراره اللي اغلبيته حزن وتني هههههههه فميش مشكله .. هيتم المراد يعني

بعد كده ينتظروا شهرين من تاريخ الموافقة على مبدأ التعديل .. أل اييييه
بحجة اعطاء فرصة لمناقشة التعديل على المستوى القومي اعلاميا وعلميا الخ الخ .. بيحصل امتى دا بس .. محصلش طبعا .. بس هما درسولنا كده هههههههههه
ثم بقى موافقة تلتين اعضاءمجلس الشعب على التمثيل قصدي التعديل .

المرحله التالته ــ

موافقة الشعب نفسه في استفتاء عام على التعديل اللي أقره مجلس الشعب ..

طبعا كلام زي الصحيح ويتصدق يامصطفى
بس هي فعلا دي الاجراءات اللي بتتم مع معظم دساتير العالم ، لكن التطبيق عندنا مبيكونش كده خالص وانت عارف.

دي كانت اجابتي على سؤالك ، امتى وازاي تم التعديل دا...............؟!

تاااااااااااااابع

قلم رصاص يقول...


بنجاواتي


أما بقى بخصوص ان كانت هناك حاجة بتربط هذه المواد ولا التعديل كان مجرد تعديل .. فالاجابه هي ان التعديلات تتلخص في النقاط التاليه تحديدا:

الأولى: إضافة مفهوم أو مبدأ المواطنه.
التانيه:الغاء النص على المذهب الاشتراكي.
التالته:النص على الحقوق البيئيه.

انت من نفسك هتلاحظ ان مفيش حاجة من دول ليها علاقه بالتانيه .. ودي عادة مصريه لايمكن تجاهلها.

احنا دايما بنلف وندور في حلقه مفرغه ومبنوصلش لأي حاجة أو جمله مفيدة من اللغط اللي بيحصل.

طب انا هقولك حاجة هتضحكك اوي..عندك مثلا لما نيجي نتكلم عن الجزئية الاولى الخاصه بمبدأ المواطنه ، تم تعديل المادة الأولى باستبدال جملة "تحالف قوى الشعب العامل" بجملة "قيام نظام الدولة على مفهوم المواطنه"

وعللوا ده بإن كل المصريين متساوون امام القانون في الحقوق والواجبات ولاتمييز بينهم بحسب العقيدة او الدين ..
الكلام دا جميل اويىىىىىى وانا أول المؤيدين ليه بشده لأني فعلا أؤمن بالوحدة الوطنيه .

لكن اللي يغيظ ويحرق الدم ان نفس الكلام دا موجود أساسا في المادة 40 من الدستور تقريبا بنفس المعنى والمنطق والمفهوم ، ودا معناه حشو وتكرار لمبادئ سابقه ..

وكتير من مواد الدستور بتتصادم مع بعضها البعض غلى رأي احد جهابزة الفقه الدستوري وهو الدكتور ابراهيم درويش أستاذ النظم السياسية والقانون الدستوري بكلية الاقتصاد والعلوم السياسية جامعة القاهره واحد من تم خداعهم اثناء وضع دستور مصر الحالي الصادر في سنة 71
وياما عندنا قوانين بتنفي اللي في قوانين تانيه .. وقوانين موادها ملهاش علاقه بالفكره من انشائها .. من الاخر احنا عندنا ترسانه نووية من التشريعات والقوانين متناقضه مع بعضها البعض ..
ودا يمكن اللي بيدي فرصه لبعض المحامين المارقين للدخول من ثغرات معينه لقلب الحقائق رأسا على عقب لصالح موكليهم .. واللي غالبا بيكونوا محامين كبار جدا واتعابهم بالملايين فعلا .


ولما نيجي نتكلم عن التعديل الخاص بالغاء المذهب الاشتراكي وتبني مذهب الاقتصاد الحر او الرأسمالي عموما ، فدا على حد قول أحد المتخصصين في القانون الدستوري ، خطوة تأخرت 30 سنة .. لأن مصر بالفعل اتحولت للاقتصاد الحر في بداية السبيعينات وتحديدا في سنة 74 بعد وضع الدستور الحالي مباشرة فيما عرف ايامها بسياسة الانفتاح الاقتصادي .. أكيد انت فاكر الكلام دا من خلال متابعاتك يعني.

وبخصوص سؤالك أيمها افضل ، ترقيع الدستور الحالي ولا وضع وااااحد جديد؟

طبعا بديهيا دستور جديد لأن الحالي خلاص أصبح شبه معدوم العافيه يعني .. وعن اجراءات وضع دستور جديد فداااااا بقى موضوع يطول شرحه ياعم .. ارحمني
هههههههههههههههه

طولت عليك انا عارف في الرد
وان كان الموضوع يحتاج صفحات وصفحات
وبرضه مش هنوصل لحاجة ههههههههههههه

سؤالك فتح شهيتي للكلام رغم اني بعيش حالة عزوف عن الرد بقالي فتره

منوررررررر يادرش

في حفظ الله

قلم رصاص يقول...

محمد غاليه

منورني ياحماده
وداستوووووور ياخواننا .. اوعى يكون هنا حد كاشف راسه ويدعى على الحكومه
هههههههههههه

في حفظ الله

قلم رصاص يقول...

نوراهاتي

ربنا يخليكي يادكتور
دايما بترفعي من روحي المعدنيه

^_^

وتابعي حضرتك براحتك


في حفظ الله

انا ودماغي يقول...

و الله شكلك مش حتجبها البر
عيب اللى أنت بتقوله ده
تحيا مصر و تحيا الحكومة

أمسح يللا بلاش كلام فارغ

D:

ربنا يستر علينا

قلم رصاص يقول...

فتاه من الصعيد

ههههههههههههههه
اه والله عندك حق

بس اهو هنعمل ايه .. خلينا حتى نناجي مانتمنى وجوده .. لعل وعسى يحصل في يوم من الايام

ولعلم حضرتك احنا عندنا دستور وقانون والله .. بس مخالفتنا وخرقنا لقواعدها مزااااااااااج بيعمل اعلى دماغ حكوميه
^_^

منوره

في حفظ الله

قلم رصاص يقول...

أبو العريف

الحمدلله تمااااااام
منورني دايما ياأبو العرررراريف

وربنا يخليك يابني على رفع روحي المدنيه
هههههههههههه

وطالما انت استفادت .. هات بقى الخمستاشر جنيه اللي عليك ^_^

في حفظ الله

قلم رصاص يقول...

ليس فقيرا من يحب

هنعمل ايه بس
لما نبقى نمسك ان شاء الله هظبط الأمور دي كلها ..!

بس قولي يارب

|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|

مياخدونيش الليله ويعتقلوني
هههههههه

انا بخير الحمدلله

منوره دايما

في حفظ الله

قلم رصاص يقول...

حلم بيعافر

اللهم صلي عليك يانبي

ياعم هو انا قولت حاجة؟

وبعدين انت بتقول :
"وبعدين احنا فى مصر معندناش حدد ينفع يبقى ريس غيره"

هو انا جبت سيرته يابني .. وبعدين دا راجل طييييييييب وحكيييييييييم وصاحبي كمان هههههههههههه

متقلقش

منورني جدا

في حفظ الله

قلم رصاص يقول...

أنا ودماغي

"و الله شكلك مش حتجبها البر
عيب اللى أنت بتقوله ده
تحيا مصر و تحيا الحكومة

أمسح يللا بلاش كلام فارغ

D:

ربنا يستر علينا"

هههههههههههههه
خلاص يافندم هاعترف .. انا بشتغل لصالح جهات اجنبيه معاديه لحضرة جناب ست أبوها .. قصدي الحكومه يعني

واذ أقر واعترف بهذه الجريمة النكراء .. فانا باطالب بتوقيع أقسى العقووووووبة على نفسي ، وهي توليتي رئاسة مجلس وزراء مصر ^_^

اعتبري حضرتك البوست دا تنفيس عن النفس السياسية اللوامه .. ماهو لو بطلنا نعطس نفوووووووووووووق

نورتي الكوره الأرضيه

في حفظ الله

أم .. بوبه يقول...

بجد القانون والشرعية والمهلبية دول

ولا بيفرقوا مع حد هما ممكن يستخدموا فى أخذ الحقوق مش رد الحقوق لأصحابها

ودستور يا اسيادنا ربنا يجعل كلامنا خفيف عليهم

لولا وزهراء يقول...

بضرورة وضع دستور جديد يليق بجمهورية مصر العربيه ان كنا جادين في النهج الديمقراطي السوي في جو صحي .


فصلنا القوانين على مزاج مزاجنا ..فصلنا 76 على مقاس حضرته و77 مش عايزين نغيرها عشان جناب سعاته يكون قاعد براحته
دي الديمقراطية وهو ده الدستور وداستووووووووووووووووووووور

أحسن تـستاهـل يقول...

بسم الله الرحمن الرحيم

لالالالالالا.. سيبوني شوية آخد نفسي بس احسن كان فيه موضوع بوست بره كطده يخض بسم الله ع المسا كده

انا داخله بقول بسم الله المدونة لقيت مضوع قام خابط في نافوخي عن الدستور وانا والله ما كنت اقصد.. انا أصلي مزاجي كان متحور متشقلب مش على ما يرام.. قلت ادخل مونة جديدة ما دخلتاش قبل كده
لقيت بوست الدستور ده.. قلت لا لازم اشدلي كرسي واقعد اخد نفسي

بس عموما جو المدونة بيقول كلام كبير اوي عن صاحبها.. هدفها واضح وانت مركز فيها ما شاء الله ^_^ انا كنت بهزر والله

بالتوفيق يا رب

مها ميهوووو

Soul.o0o.Whisper يقول...

السلام عليكم و رحمة الله و بركاته

يااااااااااه
ايه الكلام الكبير دا؟؟؟

داستور يابا الحاج

والله أنا خايفة فعلا لحسن كلام د.سنينة يتحقق

ساعتها فعلا "لو علمتم مافى الغيب لاخترتم الواقع " ...

انت عشان فعلا تتكلم عن دستور صح ، يبئا لازم له شعب صح و حكومة صح

كدا احنا عاوزين مصر تتشال بقدرة قادر و نجيب مصر جديدة



داستووووووووور

Soul.o0o.Whisper يقول...

السلام عليكم و رحمة الله و بركاته

يااااااااااه
ايه الكلام الكبير دا؟؟؟

داستور يابا الحاج

والله أنا خايفة فعلا لحسن كلام د.سنينة يتحقق

ساعتها فعلا "لو علمتم مافى الغيب لاخترتم الواقع " ...

انت عشان فعلا تتكلم عن دستور صح ، يبئا لازم له شعب صح و حكومة صح

كدا احنا عاوزين مصر تتشال بقدرة قادر و نجيب مصر جديدة



داستووووووووور

dodoo يقول...

هو كون انه يتعين رئيس مدى الحياه

فدى مش محتاجه لا قانون ولا تشريع ولا داستور

لان ببساطه حكومتنا ماشيه بمبدا اعمل اللى فى مزاجى ويبقى حد يعترض

شوفت بقى الديمقراطيه اصلنا بلد تعز اووووى الديمقراطيه

فكون انهم يغيروا الماده او مايغيروهاش فمش تهمهم اوى مادام بيعملوا اللى على مزاجهم

عايزين نغير الشعار بقى من تحيا مصر حره مستقله

لتحيا مصر موروثه لسيادته وولاد سيادته

بيطرية ومش بايدى يقول...

والله ليكم وحشة والقعدة من غيركم وحشة
كان نفسى اجيلكم بس الحرامى سرق الجحشة
واللى انا بعالجها كمان
فجاية مواصلات
هاتلى كوباية مية بقى على بال ما اخد نفسى:))))

قلم رصاص يقول...

أم بوبه

انا معاكي في ان دا الواقع عندنا
بس ماهو عشان نقدر نغير الواقع لازم نشوف تجارب الاخرين خصوص الناجحه عشان نقدر نغير وضعنا

و داستوووووور وربنا يجعله عامر

منوره دايما

قلم رصاص يقول...

لولا وزهراء

انا بتكلم بشكل عام
ارجوكم متودونيش في داهيه
هههههههههههههه

نورتوا انتوا الاتنين

قلم رصاص يقول...

أحسن تستاهل

ولايهم حضرتك
خصوصا ان دي الزيارة الاولى هنا على مايبدو

وشاكر جدااااا للتعليق والمرور الكريم

في امان الله

قلم رصاص يقول...

Soul

وعليكم السلام ورحمة الله وبركاته

اه هو فعلا كلام كبير جداااااااا
بس شر لابد منه يعني هههههههه

عموما انا منتظر زوار أخر الليل يجوا ياخدوني أشتي في السويت بتاعي بليمان طره بس لسه محدش جه .. عموما يوصلوا بالسلامة
جهزوا انتوا بس العيش والحلاوة..!

انا فدا مصر .. مصر دي أمي !

احنا شعبنا والله كويس بس الظروف المحيطه بيه هي اللي اجبرته على التخلي عن مبادئ حلوة كتيره كانت موجودة

منوره يادكتور

في امان الله

قلم رصاص يقول...

dodoo

الله الله الله ، هو حضرتك ناويه تشتي في طره السنة دي ولا ايه ؟
عموما انا مليش دعوة ومقولتش حاجة توديني هناك .. انا في السليم

عموما انا كنت بتكلم في المطلق
زائد اني عرجب بكلامي شوية للوصول للوضع في بلدنا اللي اكييييييد ميعجبش لاعدو ولاحبيب

انا متفائل والله رغمممممممم كل اللي بيحصل .. ماهو من غير امل مش هيتغير أي واقعععععععععععععععع

نورتي حضرتك

في امان الله

قلم رصاص يقول...

بيطرية ومش بإيدها

"والله ليكم وحشة والقعدة من غيركم وحشة
كان نفسى اجيلكم بس الحرامى سرق الجحشة"

ههههههههههههههه
حلوين الكلمتين دول ..
بس مفيش اخبار عن الجحشه المسروقه ؟
انشري عنها اعلان في الاهرام ولا حاجة

وبخصوص كوباية الميه ، على ايدك اليمين حضرتك هتلاقي تلاجه فيها المطلوب.

نورتي بلوجر من جديد

في امان الله

بنجاواتى يقول...

قلمى الرصاص العزيز على قلبى:

جزاك الله خيرا على هذا التوضيح الجميل وخطوات تعديل مادة فى الدستور دى كان كلام مهم جدا

تحياتى وتاعبينك معانا

فشكووول يقول...

كله ثقوب
50% عشان ما حدش يفهم حاجه واللى يفهم يكونوا اقليه .. مع انهم بقوا كدبه كبيره ومبقاش ولا عمال ولا فلاحين لكن موجودين بالكوته 50% اونطه
ثم ان الدستور اصبح به رقعا كثيره ومن كتر الترقيع بقى الواحد ينكسف يلبسه وينزل بيه الشارع عشان الناس حتزفه وتقول له يا ابو جلابيه مرقعه.

تحياتى

قلم رصاص يقول...

بنجاواتي

ولايهمك يادرش
انت حبيبي

اسأل وقلم يجيب
هههههههههههههههه

منور جدا

في امان الله

قلم رصاص يقول...

فشكووول

حبيبي ياعمو صلاح
منورني دايما بطلتك الحلوة وارائك الفتاكه
ههههههههههههههههه

بالراحه شوية على الضاستور بتاعنا
دا راجل طيب وابن حلال

وانا معترفتش بحاجة وباطلب المحامي بتاعي
هههههههههههههههه

في حفظ الله

SHAPE YOUR LIFE (ABOALI) يقول...

اذا الشعب يوما اراد الحياه
فلابد ان يفيق الوطن


معرفة الحقوق والواجبات والمشاركة بشكل ايحابى فى منافشة قضايا الوطن
هو المقياس الحقيقى لمعدل وعى من ينتمون الى ذلك الوطن


وعلى قدر وجود ترزى للقانون
على قدر وجود الغشاشين والمحتالين فى اماكن اخرى

اذا كان الترزى نسى يوما ان ضميره قد تم اشتغاله
فلابد لغيره ان ينبه

ما ذكر من ثنايا البوست عنوان حقيقى
لسلبية مفرطة لمن كان له قدر عندمن تعليم
فهو الاحق ان ياءخذ بيد غيره نحو الافضل


سؤال على جنب

لمن يعلق

هل معك بطاقة انتخابية
كم مرة ذهبت الى صندوق الانتخابات


اذا سمعت من يقول لك وانا صوتى هايعمل ايه وهاعمل بالبطاقة ايه

اهم حاجة بطاقة التموين

فاعلم ان هولاء هم الشعب الذى اراد لنفسه الهوان


تحياتى على السمو فى الفكر

تلميذة سلمان الفارسى يقول...

ضرورة وضع دستور جديد يليق بجمهورية مصر العربيه ان كنا جادين في النهج الديمقراطي السوي في جو صحي .

تمام
والأهم أن يحقق المعنى المهم الذى ذكرته فى أول التدوينه(الشرعيه)
__________
دمت بخير

قلم رصاص يقول...

SHAPE YOUR LIFE (ABOALI)

عندك حق يافندم
شكرا جزيلا لمرور حضرتك وتعليقك الراقي

نورتني جدا

في امان الله

قلم رصاص يقول...

تلميذة سلمان الفارسي

دا الأساس يابشمهندسه
الشرعيه أهم من القانون نفسه

ليه؟

لأنه ممكن تكون فيه دولة محتله ، ويجي المحتل يوضع ويسن بعض القوانين ..فهل معنى كده ان القوانين دي شرعيه ؟
بالطبع لأه .. لأن القانون صادر ممن لايملك اصداره .. !

شكرا جزيلا لمرورك وتعليقك

في امان الله

Twitter Delicious Facebook Digg Stumbleupon Favorites More

 
Free Web Hosting