أحداث 24 ساعة

محاكمة أو محاسبة المسئولين !



الكاريكاتير دا على خلفية بعض الأحداث الأخيره فيما يتعلق بمحاسبة المسئول في مصر

خاصة واننا ننفرد بنظام لامثيل له في العالم ، وهو محاسبة المسئول بعد خروجه من الخدمة

ومنتظرين قانون محاسبة الوزراء من تسع ست سنين

وأشهر واقعتين .. واقعه قديمة بعض الشيئ من عدة سنوات كان بطلها المستشار ماهر الجندي

محافظ الجيزة السابق في واحدة من أشهر قضايا الفساد في مصر واللي أسقطه على ماتسعفني ذاكرتي ، الحملة الصحفية الكبيره بقلم الأستاذ مصطفى بكري في جريدة الأسبوع.

ـــــــــــــــــــــــــــــــ

والواقعه الأشهر على الإطلاق وهي مازالت الأن حديث الإعلام المصري ، والخاصه بالدكتور

محمد إبراهيم سليمان وزير الإسكان السابق .. اللي ظل يعثو في الوزارة فسادا لما يزيد على عشرة سنوات كامله .. تشعبت فيها علاقته وتشابكت مع السلطة والحكومات المتعاقبه 

لدرجةأعطته انطباعا انه فوق القانون وخارج دائرة الحساب وانه ابن البطة البيضا بالبلدي كدا.. ميعرفش ان سلومه الأقرع ميعرفش أبوه !

وبعد ماخرج من الوزارة منحه الرئيس مبارك في 2006 وسام الجمهورية من الطبقة الأولى

وبعد كدا دخلوه مجلس الشعب وبقى عضو ونائب أاااااااااااد الدنيا

ولم يكتفوا بذلك ، حيث عينه الدكتور نظيف في 2008م رئيسا لشركة الخدمات البترولية البحرية وهي واحده

من أكبر الشركات البترولية وتساهم الحكومه فيها بحصه كبيره

وطبعا الدستور بتاعهم بيقول: انه يـُحظر على الوزير وعضو البرلمان (الشعب والشورى ) تولي مناصب حكوميه تتعارض وطبيعة عملهم ، كما يـُحظر عليهم القيام بعمليات البيع والشراء الخ الخ الخ

الراجل دا ملفه كان تضخم جدااااااااااا وزاد عن حده .. مما دفع المحامي وعضو مجلس الشعب المعروف

الأستاذ علاء عبدالمنعم الى تقديم بلاغ ضد هذا الرجل وإثارة الموضوع أمام المجلس والنائب العام وفي الإعلام ..!

وقتها الصحف القوميه(الحكوميه بمعنى أدق) دافعت باستماته عن موقف الدولة 

من تعيين إبراهيم سليمان في موقعه الجديد .. ومع تزايد الخناق حوالين رقبته ، قدم استقالته لمجلس الشعب

بناء على ضوء اخضر من مجلس إدارة الشركة كي يحتفظ بمنصبه فيها ، إلا إنه تفاجأ بعدها بيومين تقريبا

بقرار الشركة بالاستغناء عن خدماته ومنحه إستماره سته .

لا طال عنب الشام .. ولا بلح اليمن

العجيب في الموضوع دا بقى .. انه كان بيتحدي الجميع ويقول :

(اللي عينــي يبقى يشيلني)

وتلاحظوا كمان ان الصحف الحكوميه اياها ، بعد ماكانت بتدافع عن موقف الحكومة

من تعيينه ، تباهت بنشر أخبار التحقيقات معه ولم تخجل من بيان انه كان رجل فساد الخ الخ الخ

ناس ملهاش أمان .. معاك معاك .. عليك عليك

اللي لفت نظري أوي في الموضوع دا  .. أمبارح في برنامج 48 ساعة على قناة المحور لما مـُقدمي

البرنامج سيد علي وهناء سمري ، سألوا الحضور حتة سؤال عجيب أوي :

هي الضربة جاتله من فوووووووووووق .. ولا من تحت ؟!

سؤال خبيث بصراحه ميقولوش الا حد سوسه !!!
ــــــــــــــــــــــــــــــــــــــــــــــــــــــ

ملحوظة : الكاريكاتير دا انا راسمه في 2004 ولقيته مناسب للموضوع فقولت أوريكم أعمالي القديمة ، خصوصا اني لم انشره قبل كده هنا في البلوج.
ـــــــــــــــــــــــــــــــــــــــــــــــــــــــــ
وعظيمه يامصر

ــــــــــــــــــــــــــــــــــــــــــــــــــــــ
قلم رصاص

43 تعليقات القراء:

حلم بيعافر يقول...

(الدستور بتاعهم)

جع يابن خالتى بتقدر تلخص حاجات كتيرة فى كلام مش كتير

بس انت حكاية الكرش فى الكاريكاتير بتاعك؟

خلى بالك انا عندى حساسية منه

حلم بيعافر يقول...

اول تعليق وشكلك دخلت التاريخ عفس

dalia يقول...

هي دي الموضوعات الجامدة ولا بلاش، شوف أخونا سليمان ده حاجه تحير الواحد مش عارف مين اللى حماه ومين اللى هيوديه في دهية بس كل الكلام اليومين دول بيقول انه خارج مصر ومش حيرجع يتحاكم، وعلى العموم مفيش حد بيحصله كده الا لو كان عمل حاجه متعجبش اللى فووووووق
تحياتي لاختيار الموضوع وبعدين الكاركاتير جيد جدا فكرتني بنفسي زمااان لما كنت برسم كاريكاتورات وبطلت الحمد لله ونا شايفه المدونة فرصة للنشر جيدة، بس سؤال اللى جاب الحقوق لي الرسم؟ معلش استحمل فضول الصحفيين

SHAPE YOUR LIFE (ABOALI) يقول...

هناك حديث عن رسول الله صلى الله عليه وسلم فيما معناه

الذى ياءتى من مهابش يذهب فى مهاوش


يعنى اللى ياءتى باخذ قوت الناس ونهب اموالهم
لابد ان يضيع يوما فى المهالك ويصرف على المرض والسفه

الرب يمهل ولا يهمل


وان شاء الله القادم خير

د.آيه يقول...

بسم الله الرحمن الرحيم
هى دى مصر يا عبلة على رأى مش فاكرة مين بالظبط.. بس المهم إن هى دى مصر ..
على فكرة دلوقت حتى لو حاولوا يداروا الحقيقة فالحمد لله القنوات الفضائية بقت بتفضح كل حاجه .. و السيد المسؤل بقي بيطلع يعترف ع الهوا و حاجه آخر بجاحه ..
بس الكاركاتير جامد جدا..
موضوع جميل و طريقة العرض أيضا

رضا الكومى يقول...

يا عم قلم
احمد ربنا إن فيه حد بيتحاسب
وبعدين على رأى الكاريكاتير بتاعك
مش هو بيصرف الفلوس دى على القضايا
يبقى انتقمنا منه ولا لأ ؟؟؟؟؟؟؟؟؟؟؟

دعاء العطار يقول...

الموضوع جميييييل والكاريكاتير يضحك جدااااااا

وكلامك بصراحه كله صح جدااااااا وهى دى المصيبه

ان الشرفاء فى البلد دى مابيستمروش فى مناصبهم يومين على بعض

اما الفاسدين فلهم مدى الحياه

عجبى على دى بلد

سبايدرمان spiderman يقول...

ده العادي و ده الطبيعي
ادام بينهب في البلد يقعد بس على شرط النهب يتقسم علينا احنا الكل ^_^
و بعدين هو مسؤل ابن البطه
هو زي ما انت قلت
معاهم معاهم ... عليهم عليهم
....
اضيف على كلامك كمان نائب الحزب الوطني بتاع القمار
يلا على خيره الله
ما هي كملت :(

سبايدرمان spiderman يقول...

حلو الكريكاتير جدا ^_^
على فكره :)

ستيته حسب الله الحمش يقول...

مسألتش نفسك سؤال كده ع الماشي قبل ما تعد ولاد الأرندلي؟

هو مفيش غير دول بس مهلبتيه؟

لأ فيه كتير ولم يفتح لهم ملف لا قبل الوزارة ولا بعدها لحد ما وصلوا القبر وان شاء الله يتكووا بالمال الحرام

القصة يا عزيزي معروفة لكل مصري

اللي يقل أدبه سواء جوا الوزارة او بره او يحتاج قرصة ودن او ما هو اكتر من كده بس هو اللي بتطلع له الجماجم من الدولاب

يعني حتى اللي حصل ده مش كشف فساد
ده هو نفسه إكمال لمسلسل الفساااااااااااااااااااااد


لنا الله وحقا ما لها دون الله من كاشفة

تحياتي

خواطر شابة يقول...

تعرف ما المفزع في الامر المفزع هو ان هذا الكاريكاتير مرسوم في 2004 اي منذ ست سنوات ومازال صالحا للزمان والمكان هذه هي المعضلة

فتاه من الصعيد يقول...

عظيمه يا مصر يا ارض اللوا

تحياتي

سبايدرمان spiderman يقول...

بص و شوف الخبر ده
http://www.almasryalyoum.com/news/%D9%86%D9%8A%D8%A7%D8%A8%D8%A9-%D8%A7%D9%84%D8%AF%D9%82%D9%87%D9%84%D9%8A%D8%A9-%D8%AA%D9%82%D8%B1%D8%B1-%D8%A5%D8%B9%D8%AF%D8%A7%D9%85-%D8%AC%D8%B2%D8%A1-%D9%85%D9%86-%D8%A7%D9%84%D9%82%D9%85%D8%AD-%D8%A7%D9%84%D9%81%D8%A7%D8%B3%D8%AF-%D9%88%D8%A8%D9%8A%D8%A7%D9%86-%D8%A8%D8%B1%D9%84%D9%85%D8%A7%D9%86%D9%8A-%D9%8A%D8%B7%D8%A7%D9%84%D8%A8-%D8%A8%D8%A7%D9%84%D9%83%D8%B4%D9%81-%D8%B9%D9%86-%D9%85%D8%B5%D9%8A%D8%B1-%D8%A8%D8%A7%D9%82%D9%8A-%D8%A7%D9%84%D9%83%D9%85%D9%8A%D8%A9

بنصدر القمح النظيف و نستودر بفلوس قمح بايظ

Shaimaa يقول...

حلو أوى الموضوع ده

بس فى رأيى كمان ...ان اللى بيديهم الفرصة انهم يستشروا ويتأصل فيهم الفساد أوى كدة هو مكوثهم فى السلطة لسنوات طويلة أوى
شكرا بجد على الموضوع ده

حفيدة عرابى يقول...

أولا الكاريكاتير جميل وعسوله اوى
ثانيا
انا شايفة ان مبدأ المحاسبة ده من المبادىء المرفوضة تماما فى بلدنا
علشان مانتشجعش على كده
وكل اللى اتحاسبوا
كان بمبدأ
ان ربنا بيسلط ظالم على ظالم
أو بيقعوا فى صراع الحيتان
اللى بتتغير وشوشهم كل شوية

كلمات من نور يقول...

لا تعليق عالمقال علشان ضغطي واطي ومش ناقص يوطى مع التوتر أكتر ..بس كاريكاتور في الجوووون جميل جميل ووواقعي مؤسف ...تحياتي

أبو العريف يقول...

ازيك يا صديقي

طبعا احب اقول انك الكاريكاتير جامد جدااااااا

موهوووووب يا ريس والله

الحكومه طبعا ماشيه بنظام طبيعي جدااا

مش ربنا مش بيحاسب الناس الا بعد ما يموتوا

هما كده

بيحاسبوا المسؤلين بعد ما يموتوا

قصدي ما يسيبوا الكرسي


وبعدين هي دي مصر يا عم

قلم رصاص يقول...

حلم بيعافر

أه الدستور بتاعم..انا معرفش الدستور دا ولا لي علاقه بيه.....

وبعدين بخصوص الكرش ، متقلقش
كلللللللله بالمستندات ههههههههههه

ودخول التاريخ دا معادش قضيتي .. المهم ازاي اخرج منه حسن سير وسلوك

منورني دايما يامحمد

ـــــــــ

داليا

أشكرك أستاذه داليا على مرورك ورأيك المتميز في موضوعي المتواضع .
وهي دي الحياه .. ضربتين وأااااااه
وبالسلامة يعني هو هيكون اغلى من مين .. كل واحد بياخد له يومين ويعدي ...!

وبخصوص الرسم وايه اللي جابه للحقوق .. فحضرتك دي موهبه ملهاش علاقه بالدراسه وعندك مثلا أشهر الصحفيين في تاريخ مصر خريجين حقوق .. ولا ننكر؟
دي كلية الحياه والعظماء زي مابيقولوا
هههههههههههههه (وش مطلع لسانه)

نورتي بشدة

قلم رصاص يقول...

أبو علي

صلى الله عليه واله وسلم
حبيبي يارسول الله

وعندك حق فعلا يا أستاذنا ، والأيام دول
وكما قال رب العزة : تلك الأيام نداولها للناس.

وانا باقول دايما كلمة حضرتك دي:

ان الله القادم خير

بإذن الله

نورتني جدا يافندم

ــــــــــ

د. آيه

انا فعلا بسمع نفس الكلمة بس مش عارف بتاعة مين بصراحه !

وعندك حق يادكتوره أيه ، الفضائيات كشفت المستور .. وعلى عينك ياتاجر.

واشكرك جدا والله على مرورك ورأيك في الكاريكاتير

وسعيد انه نال اعجابكم

في امان الله

قلم رصاص يقول...

رضا الكومي

تمااااااام يا أستاذ رضا
هههههههههههههههه
والكاريكاتير بتاعي جاب التايهه !

منورني دايما بطلتك الحلوة ياأستاذنا

في امان الله

ــــــــــ
دعاء العطار

شكرا جزيلا لحضرتك على الرد دا

والحمدلله ان الكاريكاتير طلع بفايدة

نورتي بشدة

في امان الله

قلم رصاص يقول...

سبايدر مان

بكل أسف يا أخي دا الطبيعي حاليا في مصر
بس دوام الحال من المحال
واهه بيشكفوا نفسهم مع الوقت
وعلى رأي المثل :
مشافهومش وهما بيسرقوا .. شافوهم وهما بيقسموا !

وسعيد جدا ان الكاريكاتير نال اعجابك

وشكرا جزيلا على اللينك

تقبل تحيتي

ـــــــــــ

الدكتوره ستيته

سألت نفسي يادكتور ، وعارف حضرتك الإجابه كمان .,. والمصيبه بقى ان لولا انه فيه ناس كانت بتفحر ورا النماذج السيئة دي عمرنا ماكنا هنشوف اللي بيحصل دا وعمر ما كان حد هيحاسب حد طالما هو كافي على الخبر ماجور.

لكن طالما فيه ناس ضغطت عليه وفضحته الخ الخ الخ فضروري يخرج عن شعوره واعصابه ويغلط له بكام كلمة وتكون النتيجة يدخلوه اودة الفيران ويقول : حرمت ياماما حرمت يابابا هههههههههه

لنا الله من قبل ومن بعد

بس كويس برضه انه واحد بيقع ورا التاني اهه وربنا يزيد ويبارك

سعيد بمرور حضرتك

في امان الله

قلم رصاص يقول...

خواطر شابه

ههههههههههههه
اه والله فعلا .. رغم اني اللي عامله بس مكنتش متخيل انه هيفضل صالح طول المدة دي رغم انه خارج التلاجه....!

فعلا حاجة تزعل والله .. ان الأوضاع في بلادنا العربيه مبتتغيرش بسهوله وبتاخد وقت طووووووويل جدا دا اذا كان فيه نية للتغيير أساسا

شاكر جدا لمرور حضرتك وتعليقك

في امان الله

ـــــــــــ

فتاه من الصعيد

طبعا عظييييييمة يامصر مهما حصل
الشعب دا مش بيحمد ربنا ليه
مش لسه جايبين لكم بطولة افريقيا
سيبونا نعيش بقى
ههههههههههههههه

شاكر جدا لمرور حضرتك وتعليقك

قلم رصاص يقول...

shaimaa

فعلا أستاذه شيماء
دا رأي حقيقي
لأنه فعلا كل ما المدة بتطول مع المسؤول كل مايكون أصبح له حاشيه وبطانة سوء وبيبدأ بقى ياخد على الوضع دا ومش عنده استعداد يتخللى عنه الا لما عذرائيل ياخده او تجيله ضربه من فووووووووق

نورتي حضرتك

في امان الله

ـــــــــ

حفيدة عرابي

الحمدلله ان الكاريكاتير نال اعجابكم

وعند حضرتك حق في كلامك
ربنا بيسلط ناس على ناس
يلا واللي يصفى يجي البر

منوره بشدة

في امان الله

قلم رصاص يقول...

كلمات من نور

لايافندم بعد الشر

والحمدلله ان الكاريكاتير نال اعجاب الجميع

منوره

في امان الله

ـــــــــ

أبو العريف

انا بخير الحمدلله ياابو العراريف ياطيب
المهم انت عامل ايييييييييه؟

وعندك حق يابني .. مصر ماشيه بنظام نااااااااااااااتوريل ههههههههههه

والحساب يوم الحساب

منورني دايما يابن الأصول

في امان الله

mohamed ghalia يقول...

هى دى السياسة فى مصر
لعبة قذرةبجد

قلم رصاص يقول...

محمد غاليه

تمااااااااام يامحمد

star in the sky يقول...

هى الحكومة هتعمل ايه ولا ايه

و زى ما قال عمنا اللى فى الكاريكاتير

كتر خيرها

قلم رصاص يقول...

star in the sky

فعلا الحكومة كتر ستين الف خيرها على الشعب المفتري دا اللي مش بيعجبه العجب ولا الصيام في رجب

شاكر جدا لمرور حضرتك وتعليقك

في امان الله

الشعب لابد له من حكومه تشكمه يقول...

مين اللى هيتحاسب!!!!
سليمان مش هيتحاسب دا بس حركة تمويه,احنا بتوع الكلام ده برضه,
عمرك شفت ابن بيحاسب ابوه,دى تباه قلة ادب,
اهو احنا عمرنا منحاسب مسؤلين علشان دىتباه قلة ادب ونباه شعب محدش ربانا:)

الا هو كان بياخد كام فى الشهر قولتلى؟
وعاطف عبيد اللى باع البلد كلها وعوم الجنيه لما كان هيغرقنا وجبنا عوامات هو كمان بياخد كام قولتلى؟

كما قال اللى مش عارفه مين:
ياعزيزى كلهم لصوص..

حلو اوى الكاريكاتير كل مشوف رسمك بحقد اوى:(

عاوزه ارسم بجد:(

اللى موش عارف يتغير يقول...

ياعنى انت كمان على الناس دى
طيب خد بالك لان عندكم واحد كان مسئول
ههههههههههههه
ياكاريكاتيراتك
فينك ياعمو فينك

Sharm يقول...

لا يمكن بأي حال الاعتقاد ان ما يجري هنا محاسبة

انا ما يجري هو مجرد عتاب بسيط ..

و كل الاحكام التي تصدر ضد مسؤولين تصدر ايضا ضد ناس غلابة و لكن الفرق في سنوات الحكم شاسع

قلم رصاص يقول...

الشعب لابد له من حكومه تشكمه

ما انا باقول كده برضه...
دي مش محاسبه .. دي مجرد شدة ودن !

واحقدي براحتك .. اصلي من زمان مبرسمش .. دي حاجات قديمة وبنشرها بس على المدونة
بس والله عندي حنين رهيب للرسم تاني اليومين دول ..!
هو الكمبيوتر السبب .. هو اللي أخدني من كل حاجة حلوة كنت بعملها قبل ما اعرفه .. بس هنحاول تاني بجدية ان شاء الله الفتره الجايه .. حتى عشان حقدك يبقى له فايدة ^_^

منوره المكان

في امان الله

قلم رصاص يقول...

اللي موش ناوي يتغير

هههههههههههههههههه
اي خدمة ياعم .. ولايهمني

موجود ياعبيبي ..بس زي ماتقول كده مش باستمرار يعني .. بحاول ابعد عن جو الالكترونيات شوية .. دا انا حاسس اني دلوقتي بكهرب هههههه

شرفت ياــــــــــــــ أفريقيا

قلم رصاص يقول...

شارم

رأيك في الجووووووون والله

هو فعلا مجرد عتاب
والفرق شااااااااااسع جدا في حجم العقوبه

شرفتنا يادكتور

فشكووول يقول...

مين اللى قال لك انه لا طال عنب الشام ولا بلح اليمن
يا حبيبى دا طال عنب الشام كله .. وهيص هو وولاده واصحابه وحبايبه كلهم وبنوك سويسرا مش عارف تشيل فلوسه فين وكمان طال بلح اليمن كله والمليارات ياحبيبى زى الهم على القلب .. وبعدين سلومه الاقرع مش حيعمل فيه اى حاجه .. اصل التورته بيفرقوها على ناس كتير واولهم بالطبع سلومه الاقرع

انت مكار وعايز توقعنا ليه فى الغلط .. احنا ما قلناش حاجه .. انت اللى قلت

العيسوى الصغير يقول...

هى على دا يعنى ما قانون الاثار وقانون مكافة الارهاب و قوانين كتير متعلقة مش راضية تطلع لحد دلوقت ولا راضية تدخل

Heba Faruq يقول...

نحن ننفرد بنظام لا مثيل له وهو عدم محاسبة المسئول الفاسد ولا وهو في الخدمة ولا وهو خارج الخدمة
فكلامك يخلينا نفتكر ان المسئولين الفاسدين بيتحاسبوا لكن بعد تركهم الخدمة وده انا اشك فيه قوي
الأمثلة عكس ذلك نادرة جدا وغالبا بتنزل على مفيش

الكاريكاتير فعلا جميل احييك عليه

دمت في كل خير

قلم رصاص يقول...

فشكوووووول

أيوا أيوا إررررررررر واعترف ياعمو صلاح
الانكار مش هيفيدك
هههههههههههههههههههههههههه

انا اقصد من ورا انه لاطال عنب الشام ولا بلح اليمن ، انه لافضل في مجلس الشعب ولا فضل في الشركة.

انما بمعيار حضرتك من المليارات وبنوك سويسرا والفلل والقصور الخ الخ الخ فانا باتفق معاك جدا ولاخلاف في ذلك.

منورني دايما يا أستاذنا

في امان الله

قلم رصاص يقول...

العيسوي الصغير

اه تمام طبعا عندك حق
بس طلوعها زي عدم طلوعها
كلها قوانين مسلوقه

منورني جدا

قلم رصاص يقول...

هبه فاروق

لا ماهو كلامي في المطلق
وللأسف النماذج اللي بتتحاسب من المفسدين لولا ان وراها ناس بتفحر وراهم عمر ماكان هيتم محاسبتهم.........

أو لولا انهم احيانا بيفتشوا بعض الأسرار الكبرى للنظام من قريب او من بعيد ، مكانش برضه حد هيحاسبهم.....!

وسعيد جدا ان الكاريكاير عجب حضرتك

في امان الله

Ramy Wasel يقول...

صديقىالعزيز
اخبارك ايه
يا رب تكون بخير
معلش
انقطعت عن النت الفتره اللى فاتت بسبب الدراسه والشغل
بس بأذن الله ارجع الفتره اللى ايه
واتابع مدونات اصدقائى الاعزاء

وبعدين الدستور بتاعى
الدستور بتاعك
الدستور بتاعنا كلنا

ودى التكيه بتاعه السيد الوالد
اللى حيسبها امانه فى رقبه ابنه العزيز
ولا عزاء للمصرين

قلم رصاص يقول...

Ramy Wasel

اهلا اخ رامي
منور والله
وانا الحمدلله بخير
وحمدلله على السلامة
وعلى البركة وان شاء الله يكلل تعبك ومجهودك بالنجاح

ومتتكلمش في السياسه عيب
هههههههههههههههههههههه

نورت بشدة

في امان الله

اميره الصعيد يقول...

احنا كده
الحساب عندنا بأثر رجعي

ومش مع كل الناس
لكن مع اللي ينال الغضب السامي
ويحسوا انه ملهوش لازمه

لكن بصحيح
هي الضربه جاتله من فوق ولا من تحت

Twitter Delicious Facebook Digg Stumbleupon Favorites More

 
Free Web Hosting