أحداث 24 ساعة

هو المصري مصري ؟!







عندي سؤال للسادة المسئولين الكبار اوي اللي صدعونا ايام ازمة الماتش اياه مع الجزائر
..اللي صدعونا بكلام كتير عن كرامة المصريين .. وانه لازم يتحافظ عليها اينما ذهبوا


مش هفكرهم بكرامة المصري في اوروبا واللي بيحصله فيها .. ومش هفكرهم برضه بكرامة المصري في
البلاد العربية الشقيقة في الخليج..مش هفكرهم بكل ده


انا بس سؤالي محدد


هو المصري داخل مصر .. مصري برضه ولا اسرائيلي ولا ايه بالظبط؟


اقروا خبر اعتقال نجل المستشار عبدالغفار محمد، قاضى قضية تنظيم الجهاد الكبرى
واللي داهمت اجهزة الامن منزل الرجل وصادرت كل متعلقاته واوراقه ومذكراته


من هنا


انا كمواطن مصري بسأل عن تطبيق القواعد والمبادئ اللي السادة الكبار قالوها لنا ايام احداث مباراة الجزائر


هو كرامة المصري في الداخل اولى بحمايتها وصونها والمحافظه عليها زي برا ولا لأ ..
دا اذا كان اتحافظ عليها برا اصلا يعني !


انا دلوقتي على فكرة مبتكلمش في السياسه .. اه والله دي ماهي سياسه


دي الحياه .. بدون سياسة ولا حتى رز بلبن


انا بس بنبه السادة المخبرين بس عشان ملاقيش واحد منهم جي يخبط على بيتنا .. قصدي
يكسر الباب عشان ياخدني لجهة غير معلومه زي الحرامية .. هما طبعا مش انا
هههههههههههههههههههه


انا عارف انه مهما كان .. وزير الداخلية اللواء حبيب العادلي راجل وطني وبيحب بلده مصر أكيد
وعارف برضه نفس الكلام بينطبق على وزير العدل .. وعلى النائب العام .. وكمان كمان على
رجال مباحث امن الدولة في مصر.. دول كلهم ولاد مصر ومؤكد بيحبوا مصر لأنهم بياكلوا من خيرها
لأنها بلدهم والطبيعي انهم يحبوها 


طيب لما حضراتكم تقولوا كلام .. وتعملوا عكسه .. مش ده بالعقل كده يخلي الناس شر برا وبعيد يعني
هههههههههههه تفقد الثقة فيكم !


دايما لما حد بـُيعتقل خصوصا لما يكون حد مهم ومعرووف ورمز زي المستشار ده اللي اعتقلوا ابنه ، بيبقى اكيد وراه
حاجة بتخليكوا تقولولنا : ان ده عشان خاطر مصر .. وان فلان ده او علان ده خطر على امن البلد واحنا
بنشتغل لصالح المجموع .. وانه ممكن تقولولنا برضه انه فلان ده طلع عميل .. بيتخابر مع دولة معادية
لقلب نظام الحكم او بيتجسس على مصر


طيب ماتطلعوا تلمحولنا حتى مجرد تلميح في بيان او مؤتمر صحفي بكده
ريحونا قولولنا الشخص ده او ده عميل .. خاين .. يعمل ضد نظام الدولة


صدقوني ساعتها انا واحد من الناس هشوف جزمه قديمه (لامؤاخذه يعني ياجماعه) واجي بنفسي
اضرب معاكوا .. ماهي بلدنا غاليه علينا برضه .. وبنتقدم بيها..وشاربين من نيلها
واللي بيسمعوا اغاني وربنا يتوب عليهم بيغنولها


كلامي واضح واضح ؟!




محدش يفهمني غلط .. خصوصا اللي اديهم طارشه ومتحبش تسقف الا على القفا


يلا ياشباب كلكوا استعدوا لزيارتي قريب في الشاليه بتاعي في ُطـره


ههههههههههههههههههههه


انتهى 


اخوكم قلم رصاص




39 تعليقات القراء:

noon kiko يقول...

هههههههههههههههههههههه
استنى اضحك الاول قبل ما اعلق
ههههههههههههههههههههههههههههههههه
هههههههههههههههههههههههههههههه
ههههههههههههههههههههههههههه
هههههههههههههههههههههههه
ههههههههههههههههههههه
هههههههههههههههههه
هههههههههههههه
هههههههههه
ههههههه
هههه

noon kiko يقول...

طبعا ليه بلدنا بلد الفن
عشان كله عندنا بيغنى على كله
حكام على مجكومين
كله بيغنى يا ولدى
يعنى عندك غزه تولع البلاد كلها تتفرج ف صمت ومصر تطلع تغنى..وكل المطربين يلاقولهم سبوبه يشتغلوا بيها..كله يغنى لغزه..بعد ماخلاص غزه تبقا رماد كله يصدر الطرشه..ومصر يقوم فيها ماتش يخرب الدنيا يطلع بردو كله يغنى حكام ومطربين كله بيغنى وكلهم صوتهم وحش؟..
ان انكر الاصوات لصوت.....
ماعلينا
وطبعا حكومة نظيف نظيفه جدا..الا مش نظيف لسه هو رئيس الوزرا ولا نشروه ع الحبل خلاص
؟؟؟
بالنسبه للحكومه عندنا فهى انظف حكومه ف العالم اللى تحت الارض
:)
حكومه غير مرئيه..اى حاجه تحصل محدش بيتشاف منهم خالص
زى حكومة الجزائر بالظبط

noon kiko يقول...

شكلى هاخد السويت اللى جمبك على طول ف طره..ايه رايك نتفق مع اقرب سوبر ماركت عشان انت عارف ازمة الحلاوه الطحينيه دلوقتى..نعربنلنا على كام كيلو..بعيد عنك من كتر قرارات الاعتقال والسجن اكتر حاجه بتخلص دلوقتى الحلاوه الطحينيه
هههههههههه
واهو كله بقا عسل وطحينه
طحينا م النوم

ستيتة يقول...

وزير الداخلية اللواء حبيب العادلي راجل وطني وبيحب بلده مصر أكيد
وعارف برضه نفس الكلام بينطبق على وزير العدل .. وعلى النائب العام .. وكمان كمان على
رجال مباحث امن الدولة في مصر.. دول كلهم ولاد مصر ومؤكد بيحبوا مصر لأنهم بياكلوا من خيرها
لأنها بلدهم والطبيعي انهم يحبوها

طالما كتبت البؤين دول وهم صح طبعاااااااااااااااااااااااا وميه ميه يا عم انا مش قد طرة
فأنا ها أكتفي بإجابة رأس البوست واسيب لك ديله لحسن كله ألغام :)
هو المصري مصري؟
انت بتستعبط يا عم قلم؟
لأ طبعا موزمبيقي من الهنود الحمر وخلانه من سكان استراليا الأصليين

قلم رصاص يقول...


واحدة من الناس

خلصتي ضحك ولا لسه
هههههههههههه

واطمني انا وصيت ع الحلاوة من قبل ما اكتب البوست ومجهز 7 كيلو بحالهم على وهروح احطهك في التلاجه عما المخبرين يجوا ياخدوني ههههههههههههه

المهم دلوقتي نعمل شوية اتصالات بمنظمات لحوم الإنسان عشان نبقى مرتبين الشو الاعلامي للرحله الجميلة اللي هنعملها للمنطقة السياحية في طره
ههههههههههههههههه

على فكرة انا لو رحت في داهية
هبلغ عنك بجد .. مش انتي اللي قايلالي
في البوست اللي فات : يلا انزلنا ببوست من اللي يودوا ورا الشمس ؟

حصل ولا محصلش ؟
أنا احملك السمئولية كاملة

هههههههههههه

في امان الله ولنا الله

قلم رصاص يقول...


الدكتورة ستيته

هههههههههههههههههههه

يادكتورة راعي ظروفي .. لازم اقول البوقين دول عشان وهما بيحققوا معايا .. قصدي بيجلدوني ابقى موقفي سليم
هههههههههههههههههههه

وياريت بس حد من السادة المخبرين يرد علينا بس

منوراني دايما

بس اطمني حضرتك انا لو اتقبض علي .. هقر واعترف بالحقيقة كاملة .. وهاقول : اني كنت بتاجر في الممنوع .. خصوصا انهم قفشوا معايا في اخر مرة .. بعشرة قروش خص
على رأي عادل امام

ههههههههههههههههههههه

في امان الله

well يقول...

الجميع يفعل ما على هواه ..ثم يقول من اجل مصر
يسرقونا .. يجوعونا ..يسجنونا.. يعذبونا .. يسمومونا ..ويقولوا من اجل مصر
واحنا نموت من اجل مصر

وابكى انزف امووووت وتعيشى يا ضحكة مصر
تحياتى

حلم بيعافر يقول...

ياسيد قلم رصاص

انت هتكفر ولا ايه؟

انت بتشكك فى صدق كلام رموز ورجالة النظام الكهنوتى ولا ايه؟

عيب عليك ياراجل متتريقش عليهم تانى انت مش قد لعنة من لعناتهم

*البت المشمشية *حلوة بس شقية * يقول...

ههههههههههههههههههههههههههههههههههههههههههههههههههههههههههههههههههههههههههههههه
ان شاء الله هنزورك ومعانا عيش وحلاوة وبسطرمة
ايه اللى انت اكاتبو ايه يبنى
هو احنا ناقصين
ماحنا متهانين ومتمرمطين
ومش بنكلم

حفيدة عرابى يقول...

سيادتك
ان فرعون علا فى الارض واتخذ اهلها شيعا

شيعا يعنى جزء منهم وزراء
ينفذوا اوامره
وجزء شيوخ يقولوا
واطيعوا اولى الامر
وجزء
وظيفته يبقى شعب طيب مهاود
علشان الصورة تطلع حلوة


جميلة اوى الوزراء وخصوصا هامان بيحبوا مصر
حلوة بجد

Unknown يقول...

عندك حق في سؤالك والله

يعني الناس اللي بيموتوا كل شوية في حوادث في مصر ( عبارة - تصادم قطارات - سور يقع علي الطلبة ..... الخ )
دول مش غاليين و دمهم رخيص والي يتجرحوا بس في ماتش يبقي دمهم غالي ؟؟

و السفير الجزائري ارخص بكتير عندنا من السفير الاسرائيلي !!!

سبحان الله

دمت بالف خير

ليس فقيرا من يحب يقول...

غير معرف يقول هههههههههههههههه

هههههههههههههههههههههههههههههههه

معلش يا باشا قلم اخويا مكنش فى

وعيه وهو بيكتب البوست ده

صح يا قلم رد مش تتكسف الباشا قلبه

طيب وهيسامحك هع هع هع

ههههههههههههههههههههههههههه

متخفش يا ابو السيد عندنا بقاله

والحلاوة الطحينيه للركب

الله يخيبكم يللى فى بالى

طبعا انا ولا اعرفك ولا عمرى شفت

المدونه دى وتقريبا حد سقانى حاجه

اصفره فعلقت هنا

سلام عليكم

قلم رصاص يقول...


ًWell

عندك حق اخي الكريم

بس على الاقل بس يتعاملوا بذكاء مع الناس
بدل التطنيش ده
يضحكوا حتى علينا .. يكسبوا ودنا حتى لو فعلا بيسرقونا .. ساعتها احساسنا بالظلم يمكن يتلاشى شوية

منورني

في امان الله

قلم رصاص يقول...


حلم بيعافر

هههههههههههههههه

انا اكفر بأي حد ميحبش مصر

واطمن انا وهما علاقاتنا حلوة

اطلعوا منها انتوا بس

ههههههههههههه

منور

قلم رصاص يقول...


البت المشمشية

نفسك تلاقيه اتقطع من الضحك
محدش بينفع حد في الزمن ده

ههههههههههههههههههه

واطمني انا معايا الحلاوة بتاعتي وجاااهز

هههههههههههههه

في امان الله

قلم رصاص يقول...


لقد خلقنا الله احرارا

ايه التحليل الجامد ده

المفروض انهم بيحبوا مصر

دا مصر دي امي .. حد مبحبش امه

ههههههههههههههههههه

في امان الله

قلم رصاص يقول...


ذات النطاقين

ده الواقع اختي الكريمة أسماء

والله نفسي بجد الوضع ده يتغير احنا تعبنا نفسيا من التصرفات المتناقضة واللامسئولة

دمتي في امان الله

قلم رصاص يقول...


ليس فقيرا

هههههههههههههههههه

والله انتي فيكي الخير يا اخت رانيا

هي دي الاخوات اللي بجد اللي عاوزين يصححوا الصورة للمسئولين

انا مش حمل شاليهات طره والتصييف فيها

خصوصا ان العضمه عادت كبيرة يا اختي

ورجل في المدونة ورجل في الاخره

ههههههههههههههههههههه

ومع ذلك جهزي الحلاوة برضه احتياطي

ممكن عمو المخبر ميعبرش الكلام ويصمم يضايفني

انتي عارفه الناس دول زوقهم عالي اوي

وبيفهموا في الواجب

هههههههههههههههههههه

في امان الله

noon kiko يقول...

انت مالكش حل
طيب انا جهزت الشنطه لزوم الرحله..ممكن اجيب معايا كاميرا عشان الصور وكده..عايزين ناخد اكبر قدر من الصور للذكرى لاهالينا عشان يلاقوا حاجه تفكرهم بيننا

ثم انا عارفاك اصيل
اول قلم وهتقول برىء يابيه البت بتاعة مدونة يبقا انت اكيد ف مصر هى اللى مسلطانى
وبالاماره ادتنى نص كيلو كباب وشوية طحينه ورغيفين عيش وربطة فجل
هههههههههههههه
عموما انت عارف
انا اصيله بردو وهقول ولا اعرفك
وانك من رجالةبن لادن
واشرب بقا يا حلو
:)

سنابل يقول...

ولا يهمك
اتكل ان بس على الله واحنا نعمل معاك احلى واجب
طبعا انت وجهت سؤالك للسادة المسئولين الكبار اوى اللي انا منهم طبعا
شوف يا سيدى
المصرى داخل ارضه يا ريته كان اسرائيلي كانوا عينوا ليه حراسة
اما البهدلة وانتهاك الكرامة وكل ده فا مش تخوين ولا اتهام بالعمالة ولا حاجة خالص لا سمح الله .ده من باب سد الذرائع
وانت عارف طبعا ان الوقاية خير ان شاء الله

قلم رصاص يقول...


واحدة من الناس

هههههههههههههههههههه

من اول ألم خصوصا لو كان رصاص يعني ، هعترف واقول اني عميل للموساد .. وانتي شريكتي في اللعبه دي
ههههههههههههههههههه

المهم جهزي العيش والحلويات

هنعزل قريب

اه وفعلا موضوع الكاميرا ده مفيد جدا
خصوصا هينفع واهالينا بيظهروا في الفضائيات يشحتوا بينا

ههههههههههههههههه

منوره يا أستاذه

في امان الله

قلم رصاص يقول...


سنابل قمح

ماشي خلاص

انا هسلم نفسي احسن
ههههههههههههههههههههههه

وربنا يسهل بقى وكلها عشرين تلاتين سنة واطلع اربي العيال واصرف القرشين

في امان الله

Dr. Kafy يقول...

يا قلم رصاص باشا أنا أشاركك الرأى و لسه متكلم فى موضوع شبه ده و قارنت فيه ما بين تعويض أهل المصرى المتوفى ب 5000 جنيه بينما السعودى المتوفى من سيول جدة عوض الملك أهله ب 1.000.000 ريال سعودى. و ده دليل على إن كلامك صح لازم المصرى يحترموه جوه أول.

تحياتى

noon kiko يقول...

لا يابنى
يوووووووووووه
انا هفضل لامتا اعلم فيك يعنى
والله عندك حق تقوللى يا استاذه
عشان انا ميس بردو
وبعلمك اهو
الصور دى شويه منهم هيتحط ف الصالون عندنا وشويه ف الصالون عندكم
الاول هيتحطوا كده وبعد كده
هيتحط شريط اسود كبير ع الجمب مايل
حلو؟
وشويه منهم هيروحوا لاستديو طره المصوراتى هناك هيبروزهم ويخليهم عبره لمن لا يعتبر
هههههههههههههههههههه
وياعينى هتعترف اخيرا انك عميل الموساد..انا بقا هقول انى جمعه الشوان ولا رأفت الهجان وهخلى الحكومه المصريه تشدك من ودانك شده عجب..اخليك تقول حقى برقبتى
اه مقولتليش
عايز الحلاوه الطحينيه ساده ولا محشيه؟
عشان بس انا مش هقدر هناك اكل من غيرك
داحنا هناكل اكل يا جدعان
ههههههههههههههههه
اوعى وشك
وطاخ طيخ طوخ
اكل تمام
شبعت يا ضنايا؟
ههههههههههههه
عندى شوية افكار للرحله دى ملهاش حل
اعمل حسابك البس كوتشى عشان لو طلع الحكم مع الشغل هتتعب لو الجزمه كلاسيك ويا حبذا لو رجالى ببوز من قدام
هههههههههههههههه

noon kiko يقول...

من رايك اجيب معايا الام بى فور..عشان واحنا بناكل نسمع فيروز؟ولا مفيش وقت نسمع غير الرعد ف وداننا؟
ههههههههههههههههه

قلم رصاص يقول...

Dr. Kafy

اهلا بيك يادكتور

بتشاركني الرأي طب الحمدلله

بس اهم حاجة ساعة التحقيق معايا متقولش ولاعمري شوفته هههههههههههههه

في حفظ الله

قلم رصاص يقول...



واحده من الناس

هههههههههههههههه
وهو انا قولت حاجة منا بتعلم اهه ياميس
خصوصا انك قائد الكتيبه وصاحبة فكرة البوست .. ولاتنكري دي .. أهيه اعترفت اهه ياحضرة الظابط ياللي عامل العملية
هههههههههههههههه

وبعدين هتقولي لهم انك رأفت الهجان او جمعه الشوان على أساس ان اللي هيقبضوا عليكي الموساد يعني وتطلبي منهم تبقي عميل مزدوج؟!

اه بخصوص الحلاوة ابقى نوعي .. عادي .. ومحشية عشان القعدة باين هتطول وهزهق فلازم ننوع يعني .. وياحبذا بقى لو كام كيس شيبسي وهريدي وحاجات من بتاعة العيال الصغيرة .. من مصاصات وهلم جرا
هههههههههههه

وعملت حسابي ومش هلبس كوتشي ولا جزمة ولا أي حاجة .. هاجي حافي .. عشان انا مضمنش يمكن حد تكبر في دماغه ويحقق معايا بالجزمة .. وكله الا كده ههههههههههه

وعجبتني اوي حتة مش هنسمع غير الرعد دي
هههههههههههههههههه

تعليقك رائع ياميس والله

في امان الله

mohamed ghalia يقول...

أنا رايح هناك اهو رايح طره ابقى اعدى بقى بالمرة
هههههههههههه

dr.lecter يقول...

ان الطغاه كانوا دائما سبب الغزاه

قلم رصاص يقول...


محمد غاليه

ههههههههههههههه
مستينيك هناك يامحمد .. اوعى تتأخر

قلم رصاص يقول...


دكتور ليكتر

كلامك زين والله يادكتور .. بس هنعمل ايه طيب

انا بقول : صبرا جميلا لحد ماربنا يسهل

منورني

في امان الله

الشعب لابد له من حكومه تشكمه يقول...

على فكره انا مش عارفه ارد على البوست خالص,مره تليفون يرن ومره الانتر فون يرن والاقى جيلنا ضيوف, اعتبرد ده اشاره من ربنا ليا ولا اييييه:)

المهم انت غريب جداااا ,
افهم الزتونه بتاعة الموضوع,,
انت لما تتهان بايد اخوك المصرى ليها مذاق مختلف,,
مصريين مع بعضينا,
لكن لما تاخد على دماغك من حد غريب كده اهانه لا تغتفر,

فهمت الفرق..

يعنى هقولك لما تضرب من والدك دى اهانه؟؟؟؟؟؟تؤ تؤ والدك وبيربيك,

لكن لما تضرب من واحد فى الشارع اللى بعدك,دى باه اهانه..ووالدك اذ يقف ويقول ابنى محدش يضربه انا بس اللى اضربه:)

بس يبقى فى النهاااااايه ايه؟
انك اضربت على دماغك فى كل الحالات وهذا هو المطلوب اثباته..
:)

شفت انا حلوه ازاى:))

جلال كمال الجربانى يقول...

السلام عليكم

كرامه المصريين موجوده فعلاً بس بالكلام وليس بالفعل

ودمت بخير

Asmaa Fathi يقول...

ههههههههههههههههه

كده هتلاقيهم بيقولوا ان كل المصريين خاينين وخطر علي أمن مصر مش بعيد يصدروا الشعب الخاين ويستوردو شعب غير عميل يحب البلد ويخاف عليه اصل احنا زي القطط بناكل وننقل ااقصد وننكر

تحياتي لحد منيجي في الشلية اللي جمنبك

ابو صهيب ( الجمعاوي الاصيل)سابقاً يقول...

هي دي مصر

وهما دول المصريين

قلم رصاص يقول...


الشعب لابد له من حكومه

ههههههههههههههههههه

ياسلام على الحلاوة .. بس الحلاوة دي مش هتنفعني ياشيما .. انا اللي هينفعني الحلاوة بتاعة طره .. ياريت تكتري منها لأني هحتاجها كتير هههههههه

ثم انه انتي عليكي تحليلات .. ملهاش حل فعلا

تصدقي لما ابويا يضربني يبقى بأدبني
ولما واحد من الشارع يفكر يعملها يبقى أهاني !

أول مرة اخد بالي من الحكاية دي !

بس مكنتش اعرف انك خوافه اوي كده .. انتي راسمه على وزارة من ورايا .. على فكرة اللي ياكل من غيري يزور ههههههههه

وانتي نسيتي اني انا اللي واعدك بوزارة لما اتولى تشكيل الحكومة الجديدة .. شكلك نسيتي !

وايه حكاية انك مش عارفه تردي على البوست ايه ايه .. على فكرة نيتك مش سالكه خالص اليومين ولازم ابعت لك واحد سباك يظبط المواسير

هييييييييييه .. فونيا ومحدش واخد منها حاجة ههههههههههههههههه

منوراني دايما ياشيما
ربنا مايقطع لك عادة

في امان الله

قلم رصاص يقول...

واحد من العمال

وعليكم السلام ورحمة الله وبركاته

اهلا بك اخي الكريم

وعندك حق .. بس المهم الفعل مش الكلام

يعني ميصحش اطلع اعمل هوليله في الاعلام ان المصري كرامته فوق اي اعتبار في حين اجهزتي الامنيه بتهينه على ارض الواقع

اعتقد يكفي حتى التناقض بين الاقوال والافعال .. انا عارف انه المسئولين لابد انهم بيحبوا البلد لأنها بلدهم .. بس نفسي يترجموا ده لواقع

منورني

في امان الله

قلم رصاص يقول...

أسماء فتحي

أهلا بيكي استاذه أسماء

وكل سنة وحضرتك بخير

اه ممكن يجي يوم ويستوردوا شعب بيسمع الكلام وميقولش لأ هههههههههههه

وحضرتك تنوري طره والله .. بس انوي بس

في امان الله

قلم رصاص يقول...

الجمعاوي الاصيل

كل سنة وحضرتك طيب

منور

في امان الله

Twitter Delicious Facebook Digg Stumbleupon Favorites More

 
Free Web Hosting