أحداث 24 ساعة

الصورة مقلوبة خالص


السجن مع وقف التنفيذ لصاحبة نزل صغير في فرنسا رفضت استقبال محجبات


أصدر القضاء الفرنسي الاربعاء 8/10/2008 حكما بالسجن مع وقف التنفيذ على صاحبة نزل صغير في منطقة فوج (شرق) بعد ان رفعت احدى زبائنها شكوى ضدها لانها رفضت استقبالها ووالدتها لانهما محجبتان.

وحكمت محكمة الاستئناف في نانسي على صاحبة النزل بالسجن شهرين مع وقف التنفيذ.

وسترغم صاحبة النزل على دفع تعويضات بقيمة 500 يورو لاربعة مدعين بالحق المدني ويورو رمزي لرابطة حقوق الانسان والرابطة الدولية لمكافحة العنصرية ومعاداة السامية وحركة الصداقة بين الشعوب ومناهضة العنصرية.

وحكم على ايفيت تروشليه لرفضها استقبال حورية دمياتي ووالدتها في نزلها مع خمسة اشخاص اخرين بينهم مسن مقعد ورضيع لانهما رفضتا نزع الحجاب.

وخلال الجلسة التي عقدت في الثالث من تشرين الاول/اكتوبر قالت صاحبة النزل "لم ارفض استقبالهما. طلبت منهما نزع الحجاب في الاماكن العامة" وهذا ما نفته حورية دمياتي.

ومنذ ذلك الحادث قررت تروشليه اغلاق النزل بحسب محاميها.

وفي تشرين الاول/اكتوبر 2007 حكمت المحكمة الابتدائية على تروشليه بالسجن اربعة اشهر مع وقف التنفيذ بتهمة التمييز الديني وبدفع غرامة بقيمة 4400 يورو الى المدعين بالحق المدني.

)()()()()()()()()()()()()()()()()()()()()()()()()()()()(

شايفين فرنسا بلد الفسق والمجون من وجهة نظر البعض .. وبلد العلم والنور من وجهة نظر البعض الأخر
شايفين فيها الحريات وصلت لحد فين .. شايفين المسلمين والمسلمات ليهم كرامة في بلاد الفرنجة لحد فين

طبعا لو انا جيت اقارن اللي بيحصل في فرنسا مع اللي بيحصل في مصر .. هتبقى بايخه اوي مني
لأن مهبقاش جبت جديد من عندي ولا حاجة.. النظام والمحسوبين عليه هيقولوا لنا .. برضه تاني وتالت وعاشر
بتنتقضوا في بلدكم.. انتوا مأجورين وخونه وتعملوا لحساب جهات معاديه .. الخ الخ .. بل ويمكن يوصفونا
بالإرهابيين .. وهلم جرا من هذا الكلام الكبير

طب ومنقارنش ليه .. هو مش من حقنا نقول رأينا في أبسط حقوق المواطن اللي ماشي في الشارع.. اللي
رايح شغله واللي بيتعلم واللي بيتمشى .. واللي واللي ..

منقارنش ليه لما نكون احنا من اهم البلدان الإسلامية .. ومنساويش بلد أجنبي منحل أخلاقيا من وجهة نظر ديننا الحنيف
في تعامله السمح مع مسلمينا على أراضيه ولو حتى من باب الإنسانية

بكل أسف الواحد بيبقى مكسور الخاطر لما بيعرف كل يوم والتاني .. ان شرطة وبوليس مصر بيوقف كل محجبه
او منقبه أو ملتحي .. او حتى واحد غلبان ماشي في حاله .. لمجرد ممارسة جبروته عليه واستغلاله الفج لسطلته التي في غير محلها
بدعوى .. حماية البلد من الإرهاب .. والتطرف .. والسرقه .. وا وا وا .. الخ الخ

طب فرنسا دي مثلا .. مبصتش للمسلمات والمسلمين بتوعنا النظره دي ليه .. على الأقل من باب انهم اجانب عنها
ويمكن من مصلحتهم الاضرار بفرنسا أو غيرها ..

أنا بجد مش عارف ألاقي كلمات او تعبيرات توصل المعنى اللي انا عاوز اقوله لكم .. بس أكيد كلكم حاسين وعارفين كل حاجة
لأنكم بكل تأكيد برضه بتشوفوا كل حاجة وبتتعرضوا لحاجات كتير من هذا النوع

إرفعوا أيديكم عن مصر يارجال الشرطة .. واعرفوا انكم في الاول والاخر أبنائها
دا على رأي الموضوع اللي بيقول : الأم مدرسه .. طب حد يعمل في المدرسه كده

هههههههههههههههههههه

هم يبكي وهم يضحك صحيح

فعلا ملف الحريات في بلدنا انا وجهة نظري هو الأهم والأولى بالمناقشه ياشباب عن كثير من الملفات
لأنه باختصار من لايملك حريته .. لايملك حياته

وربنا يهدي النفوس

تقبلوا تحياتي

24 تعليقات القراء:

Empress appy يقول...

متنساش مشاكل اللى حصلت فى فرنسا قبل كده بسبب الحجاب من فتره طويله فلازم الدنيا تتعدل شويه
اما عننا هنا
فمش هعلق طبعا
غير كده شوف اللى بيهاجم الحجاب مين فى بلدنا

قلم رصاص يقول...

أخت أبي

أولا مرحبا بيكي

ثانيا كلامك سليم فعلا

انا فاكر ان فيه كانت مشاكل عن الحجاب في فرنسا من فترة.. بس دي مش بلد مسلم .. يعني مفروض منتوقعش منها غير كده يعني

بس على رأي كان لازم الدنيا تتعدل شوية

وبخصوص هنا طبعا مفيش كلام يتقال

تقبلي تحياتي

كلام على بلاطة يقول...

;كل عام وانت بخير

غير معرف يقول...

والله كلام جميل بس مش لازم نتخدع بالسراب الديموقراطى اللى دول الغرب بتزعمه لأن اى خطوه تخطوها دول الغرب ومنها فرنسا محسوبه بدقه

قلم رصاص يقول...

كلام على بلاطة

وانت بكل خير

نورت البلوج

تقبل تحياتي

---------------

مسدس

ياسيدي محسوبة ولا ملغيه.. بس المهم فيه حاله احسن من اللي عندنا

نورتنا يابني عاوزينك تكرر الزياره بقى

تقبل تحياتي

ابراهيم بكر يقول...

هههههه
الفرق كبير
فرنسا ............ ايجيبت
ساركوزى .......... مبارك

mido يقول...

فرنسا بتطبق القانون على الكل

انمااحنا مثلا

الامن المركزى قفل مدرسة اسلامية فى اسكندرية
وجاب شلل لولى امر طالب علشان اعترض و عمل مهازل تانية مع اولياء الامور

قلم رصاص يقول...

hinger

هههههههههههههههه

كلامك صح فعلا

نورت البلوج

تقبل تحياتي

--------------

mido

ازيك ياحبيب قلبي

صحيح فرنسا دولة القانون

بس المسألة هنا صدقني بدافع انساني.. لأنه احنا لو معندناش انسانية بس بنحترم ونطبق القانون .. مكانش فاته ده حالنا

لنا الله

نورتني ياباشا

تقبل تحياتي

mahasen saber يقول...

هايل قوى الموقف ده ومش غريب على دول اوربا عامتا مش فرنسا بس
انما افهم بقه هما ليه عندهم ازدواجيه ناحية الحجاب
يعنى يمنعوه ويدافعوا عن حقوق المضهدين بسببه
طب ما هما برضه اليى اتضهدوا بنات وستات مسلمات من ارتدائه فى المدارس واماكن العمل
انتا مش شايف معايا انها ازدواجيه ولاا ايه...

No Fear يقول...

السلام عليكم
الحجاب هان علينا داخل أوطنا اللي يقال إنها إسلامية فاكيد يهون علي الناس برة بس هم عندهم إحترام للغير أكتر مننا

أحلى حياة يقول...

no comment

كل اللي ممكن يتقال انها فعلا حاجه تحزن وللاسف مالهاش معنى ولا تفسير منطقي ممكن يتقبله عقل، مفيش اي مبرر سليم ممكن يبرر مهاجمة الحجاب ورفضه واعلان العداء ليه بالصورة دي و على المللأ كده في الاعلام و من مسئولين كمان ..

حسبنا الله ونعم الوكيل

FreeKiller يقول...

مش من حقك تقول رايك
انت ليك تلات حقوق بس
الصمت
و السكوت
و الجمود

رؤية يقول...

تفتكر الشعب هايقول ايه....؟

انا لله وانا اليه راجعون

تحياتى لك.

قلم رصاص يقول...

أستاذه محاسن

انا معاكي ان فيه ازدواجية حصلت في فرنسا .. عند مقارنة هذا الموقف بموقف قديم للحكومة الفرنسية إزاء منعها للحجاب في المدارس

لكن دعينا الان حتى على الأقل نسعد بموقف ايجابي حدث هناك مثل ما حدث هذا

انا مبدافعش عن فرنسا ولاغيرها من دول الفرنجة .. إطلاقا.. أنا بس بقارن اللي بيحصل هناك من معاملة البشر لبعضهم البعض كبشر.. أو حتى معاملتهم للحيوان وحقوق الحيوان.. بقارنه مع مايفعله البشر المصريين في إخوانهم من أبناء نفس البلد وهي مصرنا الحبيبة..

عموما نورتينا بجد يا أستاذه

تقبلي تحياتي

--------------

no fear

عندك حق فعلا .. لكن لم يهن بدول الغرب كما هان علينا بهذا السوء

تحياتي

--------------
أحلى حياه

بجد أختي الكريمة انتي لمستي نقطة حساسه جدا وبتحصل بشكل علني وفج وعلى عينك ياتاجر في التليفزيون الرسمي

عندما يتباهى المذيعون باستضافتهم المحسوبين على السلطة بالتحديد وتشجيعهم على الهجوم على الحجاب بطريقة تنفرها حتى أبسط قواعد الحياء واللياقه

لنا الله من قبل ومن بعد

نورتينا بجد
تقبلي تحياتي

-------------
freekiler

ههههههههههههههههههه

كفيتي ووفيتي يا أخت نهال.. أه والله

اللاءات التلاتة
ههههههههههههههههههه

ونعم الحقوق

نورتي يانهال وخدي بالك فيه أمناء شرطة محاوطين المكان خارج أسوار المدونة
ههههههههههههههههههه

تقبلي تحياتي

----------------

رؤية

مرحبا بك أختي الكريمة

وعلى رأيك الشعب هيقول ايه يعني

دا شعب خلاص جتته نحست.. معادش عنده جرأة يواجه حتى نفسه

نورتي البلوج للمرة الأولى

تقبلي تحياتي

FreeKiller يقول...

طبعا لازم اكفي واوفي
خير الكلام ما قل و دل


و كمان ايه بقى
بيقول لك يا سيدي
اذا كان الكلام من فضه فالسكوت من ذهب
اكيد قال المثل ده كان و لا مؤاخذة تبع الحزن الـ............

ما علينا

انا بحب مبارك و بكره اسرائيل

FreeKiller يقول...

واحلى تحيه لامناء الشرطه

قلم رصاص يقول...

freekiller

هههههههههههههههههه

مكنتش اعرف انك اترعبتي كده للدرجة دي
هههههههههههههههههه

يلا حصل لنا الرعب ..

وانا بأيدك في قوتليه على يد الأديب شعبان عبدالرحيم : أنا بكره إسرائيل فعلا

نورتينا

FreeKiller يقول...

من خاف سلك
وسلم
ووصل لكل حاجة

فارس القمر يقول...

السلام عليكم

كلامك حلوا وانا معاك فى الكلام دا اللى هو

طبعا لو انا جيت اقارن اللي بيحصل في فرنسا مع اللي بيحصل في مصر .. هتبقى بايخه اوي مني
لأن مهبقاش جبت جديد من عندي ولا حاجة.. النظام والمحسوبين عليه هيقولوا لنا .. برضه تاني وتالت وعاشر
بتنتقضوا في بلدكم.. انتوا مأجورين وخونه وتعملوا لحساب جهات معاديه .. الخ الخ .. بل ويمكن يوصفونا
بالإرهابيين .. وهلم جرا من هذا الكلام الكبير
======
بس برضوا متنساش ان فرنسا جات فى وقت وقالت فيها ممنوع اى مسلمه تلبس حجاب
وكل اللى يلبس حجاب يقبضوا عليه بتهمه ارهابى ودا مش كلام من عندى دا كلام صديقه سوريه جنسيتها فرنسيه

تقبل مرورى وسيبك من الحكمومه
على فكرة عجبتنى مهنتك قوى وضحكتنى بجد
اكيد برضوا مش بتشتغل فى قمل الدوله
ههههههه

بشكرك على موضوعك

فارس

قلم رصاص يقول...

freekillet

هههههههههههههه

لالالالالالالالالا وحياتك
من خاف .. أخد على قفاه

سوري في التعبير يعني .. انا بتكلم عن واقع أليم

ماعلينا .. انتوا اتغديتي ايه النهاردة
هههههههههههههه

نورتي يانهال

تقبلي تحياتي

قلم رصاص يقول...

فارس القمر

نورتني أخي الكريم فارس

فعلا انا مش ناسي موقف فرنسا المتناقض من موضوع الحجاب.. لكن انا بتكلم عن مقارنة ده بما يحدث عندنا في مصر.. مصر المسلمة

وطبعا مبشتغلش مع قمل الدولة
هههههههههههههههه


نورت البلوج والله

تقبل تحياتي

بنت الصالحين يقول...

هنقووووول ايه

نو كومنت

وربنا يرحمنا

قلم رصاص يقول...

عاشقة الفردوس

نورتينا اختي الكريمة

ويسمع منك ربنا.. ويرحمنا جميعا

تقبلي تحياتي

koukawy يقول...

بس مش ده شئ غريب شويه و يتانافي مع منعهم المحجبات من دخول المدارس و الجامعات بالحجاب ايه اللي غير الموضوع فجأه كده

Twitter Delicious Facebook Digg Stumbleupon Favorites More

 
Free Web Hosting