أحداث 24 ساعة

حــــــــداد


مشكلتنا اننا شعب طيب وبننسى المآسي بسرعة... ياترى لسه فيه حد محتاج العسكر يكمل لنهاية يونيو؟ لسه حد عنده كرامة ولا ذرة عقل وإنسانية بل ووطنية وغيره على بلده، هايقول: إصبروا عليهم كمان شوية... مش قادرين تستنوا كام شهر؟!!!
×××
طب والله لسه بعد اللي حصل أمس، فيه عبيد بيدافعوا عن بقاء مجلس العار لحد يونيو... زماااااااااان من آلاف السنين، قالوا لفرعون ايه ياعم الحاج اللي فرعنك، قال ملقيتش حد يلمني...!!!
×××
بس تصدقوا، والله العظيم احنا نستاهل أكتر من اللي حصل، ﻷن الشعب اللي يفرط في محاكمة قتلة ولاده في كارثه كبرى زي موقعة الجمل، ويمر سنه بدون أي إنجاز يذكر، يبقى يستاهل يتعمل كدا فيه لتاني مرة، وفي نفس اليوم كمان. باقول اننا شعب طيب... ايوا ايوا احنا كدا فعلا، بس مكنتش متخيل إننا شعب طيب وأهبل كمان....
.
. إن غابت الدولة في تحقيق العدالة الناجزه، الحاسمة، يبقى العيب على شعبها مش عليها. ﻷنه في الأدبيات السياسية والدستورية، الدولة شخص معنوي يقوم على ثلاثة أركان( الاقليم، والشعب، والسلطة السياسية).. فعندنا الأساسين، إقليم وشعب... ولما سقط الضلع التالت وفي غيبته ولسه بندور عليه بقالنا سنه ومش لاقيينه، كان حريا بالشعب القصاص لنفسه. احنا كنا في ثورة مش في رحلة سفاري ياشعب إستعبده خوفه... ^|^
×××
آن الأوان أن يدير وزارة الداخلية رجل مدني، طول ما العالم دي وزيرهم عسكري هايفضلوا دافنينه سوا. كل الدول المحترمة وزراء داخليتها مدنين، وتخضع ﻹشراف مباشر من القضاء. عسكرة المجتمع ظاهرة فاقت كل الحدود، وهاتخلي البلد جحيم... عقيدة الشرطة هي مايجب العمل على تغييره بشتى الطرق، لازم وأهم شيئ يتزرع في نفوس هؤلاء الناس، الإخلاص لمصر وشعب مصر........!!!
المحاسبة السياسية فورا قبل التحقيق الجنائي ياقووووووم ^|^
 

7 تعليقات القراء:

موناليزا يقول...

فعلا لازم يتاخد موقف حاسم وبسرعة

نيللى على يقول...

أنا أتفق معك في كلوا إلا أن الشعب أهبل ونستاهل, يعني نقول لكل أم أبنها مات تستهلي, وعاوز الشعب يعمل أيه أكثرمن كدا ماهو بيموت, المشكلة مش في الشعب المشكلة في الحكومة اللي ماسكه وحلفه ماتسلم السلطة عشان يفضل مبارك وأولاده محمين, أوعي تفتكر أنهم بيتحكموا لأ دول حبسنهم عشان يحفظوا عليهم

قلم رصاص يقول...

موناليزا

ان شاء الله نتعشم خيرا في ربنا يعين الناس للضغط على من بيدهم السلطة لاتخاذ الأصح للبلد في ظروفها دي

قلم رصاص يقول...

نيللي علي

يا اختي الكريمة، كلامي مجرد عتاب. عتاب على الناس اللي بتنسى مآسيها بسرعة وتحن للمسؤلين بمجرد تصريحات بتعزف على مشاعرهم وعواطفهم واحنا شعب عاطفي جدا. دا مش وحش لكن الافراط منه هو اللي بيوصلنا لكدا. طب تصدقي ان فيه ناس اتأثرت بكلمة الجنزوري امبارح في مجلس الشعب؟ تماما زي اللي اتأثروا وعيطوا من كلمة مبارك قبل التنحي. العيب مش بس في الحكومة اللي مبتنفذش وعودها وانما بردو فينا كشعب بينسى بسرعه... لابد من الحسم والضغط لتنفيذ مطالب الثورة. مش معقول كل يوم هايموت مننا ناس والحجة نصبر عليهم شوية..!!!

زهرة يقول...

كلامك صح مليون فى الميه والله

واه لسه فيه ناس تجيب صغط بتدافع وبتقول اجنا اسفين يا جيش ويا مجحلس .. تقريبا دول اخوات احنا اسفين يا ريس من نفس الام والاب.. هم يضحك وهم يبكى والله

وصح .. مادام حنا سكتنا كل الشهور دى على محاكمه المخلوع وبقيه الحاشيه ليهم يعملوا فينا اكتر من كدة .. دول عايشين عادى مبيتهانوش ولا بيتجرحوا .. منحنا شفناهم فى محاكامات دى منظر ناس كانت اصحاب سلطةو فقدتها ..؟؟؟

دة اكبر دليل على انهم لسه ليهم سلطة ولسه عايشين فى نعيممع اختلاف وحيد انهم بطلوا يركبوا طيارات ويطلعوا شرم الشيخ ومارينا

يارب من عندك انتقم منهم اشد انتقام وارحم اللى راحوا واحمى بلدنا يارب

تحياتى

ليلى الصباحى.. lolocat يقول...

بس تصدقوا، والله العظيم احنا نستاهل أكتر من اللي حصل،

اخى الفاضل عندك حق تماما فى رأيك
لايجب ان نفرط فى حقنا وبعدين نشتكى

كل ما نقوله حسبنا الله ونعم الوكيل

وياما مر على مصر وياما لسه هيمر ونشوف لكن الاهم اننا ننتبه للحقائق ومانعمل زى الصعيدى ( مع احترامى الشديد للصعايدة لكن النكتة تحكم :) ) زى الصعيدى اللى اخد تسع اقلام على وجهه وهو مش واخد باله
ليه مش بنتعلم الدرس ليه دايما نشير بالاتهام للشخص الغلط ونترك راس الحية تمرح فى تشفى وغل وغرور ؟؟؟

والله لو تخلصنا من حكومة طرة ومن فيها ســ يرتاح الشعب وتهدأ النفوس

لكن مش هنقول غير لاحول ولاقوة الا بالله


تحياتى لك اخى الكريم

Saudi Tech يقول...

ان شاء الله القادم احلى

Twitter Delicious Facebook Digg Stumbleupon Favorites More

 
Free Web Hosting