تعالوا نفكر لتغيير بلدنا+تحديث

      وانا على الفيس بوك ، جت في بالي كام فكرة اتمنيت يتعمل حسابها عند وضع الدستور الجديد لمصر وكتبتها هناك ، فاقترح عليً الأخ العزيز والمدون الجميل محمد غالية صاحب مدونة هل تبحث عن السعاده؟ أن نجمع أفكارنا كلنا ونرسلها الى المسئولين..كنوع من المشاركة المجتمعية من شباب مصر في صياغة افكار جديدة تناسب الدولة المصرية بعد ثورة 25 يناير.

     وسأبدأ بنفسي وأدعو كل المدونين والشباب أن يقولوا أرائهم ويطرحوا أفكار يرون انه يجب الأخذ بها او مراعاتها كمبادئ في الدستور الجديد ان شاء الله.

أهم المبادئ التي يجب وضعها في الحسبان عند وضع الدستور الجديد من وجهة نظري كالأتي :

1-إلغاء أي كوتة وعلى رأسها نسبة 50%عمال وفلاحين.

2-أتمنى يكون نظام الحكم برلماني وليس رئاسي ، حتى نضمن أن تكون السيادة دائما للشعب.

3- التأكيد على ممارسة الحريات بدون تمييز.. وحرية تكوين الأحزاب بسهولة وسرعة ،  مع وضع في الاعتبار حظر انشائها على أساس ديني ..مصر مش بتاعة حد دون الأخر.

4-أهم مبدأ وهو الفصل بين السلطات ..يعني مينفعش يجيلي وزير يرشح نفسه للبرلمان..عصر الاستهبال انتهى.

5-لما افتكر حاجة تانيه هقولها ....^^

___________
تحديث:

نقطة نظاااااااام :

أظن لحد دلوقتي الشعب الثائر حقق المعجزة واطاح بالنظام والبلد عدت من كوارث أكتر من مره أثناء الثورة..ندي فرصة بقى للقوات المسلحه تلم الأوضاع وتسيطر عليها خصوصا بعد حل البرلمان وتجميد العمل بالدستور وغيرها من اللي كنا بنحلم بيه..مش أي واحد ليه طلب شخصي أو واحد عامل منُظر(شدة) يعمل فيها بطل ويستمر في طلبات سخيفه..البلد مش ناقصه ..إدوا الناس فرصه تشتغل ، وبعدين نتحاسب..O_O

وأتمنى من كل قلبي يرجع الأستاذ والإعلامي القدير حمدي قنديل للظهور على شاشة التليفزيون المصري الرسمي (بعد ما انطرد منه ) أو القنوات المصرية الخاصة لإستكمال مسيرته الإعلامية التنويرية الراقيه اللي بكل تأكيد لمصلحة البلاد والعباد ..ودا ماخبرناه منه دايما.