أحداث 24 ساعة

مادو والرئيس !






يستيقظ كعادته دون أن يأخذ قسطه الطبيعي من النوم والراحه على إثر مداعبة ذلك الصبي الصغير ذو الربيع الثالث ، والذي يتجاذب معه دوما أطراف الحديث قائلا: "إصحى بقى ياعمو ، الشمس طالعه "
هذا المشهد ينسخ نفسه تلقائيا بشكل شبه يومي بين الجانبين .. أنا وهو.!

مادو، ذلك الطفل الوسيم ذو الشعر الناعم المنسدل على جبهته الدقيقه ، وعيناه تشعان بالقوه والإصرار..كلماته أحيانا_لخجله_ تعد على أصابع اليد، لكنها تزن مقدار سنوات لأحاديث البالغين.يقضي معظم وقته أمام الحاسوب ممارسا لألعابه المفضله والتي بحق برع فيها وأبلى بلاءا حسنا كغالبية أطفال جيل عصر المعلوماتيه.عندما أعلمه شيئا جديدا في لغة الفرنجه (الإنجليزيه) وأتأكد من حفظه وادراكه إياه ،أجد أن نفس الشيئ الى حد كبير أصبح عند ابن عمه الذي لايفارقه ويصغره بعام "بيبو". أسأل بيبو عن أشياء لم أعلمها له كنوع من الدعابه قبل أن أبدأ في تلقينه هوالآخر ، أجده وقد أصاب الحقيقه.عقلي يشت واستجوبه : مين اللي قالك دا يابيبو؟
يرد قائلا: مادو.

أُرسل لإحضار الأخير واعقد بينهما المواجهه في غرفتي ، وألقي على سمعيهما نفس معنى السؤال..فيتضاحكا سويا في خبث ودهاء يدل على تعاون من نوع رهيب بين الإثنين.. ليضعاني أمام واقع ملموس يتلخص في أن ما أعلمه لمادو ينتقل تلقائيا الى بيبو بمباركه ضمنيه من جانب عمر الشقيق الأكبر لمادو على شرط ألا يزعجانه عن متابعة فيلم الكارتون الجديد والذي أجبرني أمس على تنزيله له من الشبكه العنكبوتيه بعدما أعطاني إسم وتفاصيل الفيلم من خلال متابعته الحثيثه لقنوات سبيس تون.

من أهم الحوارات التي داريت بيني وبينه ، كان بطلها سؤال روتيني يكرره كل أصناف البشر مع الأطفال :

أنا : مادو لما تكبر عاوز تبقي إيه؟
مادو: عاوز أبقى ظابط واركب الطياره
أنا : اشمعنى
مادو: عشان أضرب إسرائيل بالصواريخ
أنا: ههههههههههههههه ممممممممممممم ، لأ يامادو أنا عاوزك تطلع دكتور...!
مادو: ماشي ياعمو .. هابقى دكتور .. وادي إسرائيل الحقنه
أنا: هههههههههههه ..ليه بتقول كدا؟
مادو: عشان إسرائيل دول ناس شريرين وبيموتوا الطيبين زي اللي في لعبة كونتر سترايك ياعمو

البارحه ، جائني في الموعد كعادته لا لكي يوقظني من نومي هذه المره واعلامي أن الشمس في كبد السماء، لكن كي يودعاني هو وعمرقبل المضي لركوب الطائره متوجهين الى بلاد الحجاز.. حيث ينتظرهم أبيهم (شقيقي)الذي يعمل بإحدى الشركات هناك منذ سنوات، للم شمل عائلته الصغيره لمدة شهر وقضاء مناسك الحج ثم يعودون الى أرض الوطن.يمر علي هذا الشهر وكأنه الدهر لافتقادي عمر ومادو ، وعزائي الوحيد هو وجود الضلع الاخير لمثلث الرعب ابن شقيقي الأخر بيبو.

الرئيس مبارك سيذهب الى قضاء مناسك الحج هذا العام، والصدفه وحدها قد تجمعه بمادو وهي ظاهره لاتحدث إلا كل 82 عام.يخيل لي لوحدث اللقاء ، أن يهم الرئيس بتوجيه نفس سؤالي الى مادو .. فتنزل إجابة الطفل صاعقه على السمع لتغير موقفه من عملية السلام في الشرق الأوسط ^_^
________
ملحوظه:
كان مفروض البوست دا ينزل الاثنين الماضي ، لكن تأخر إلى اليوم بسبب عطل مفاجئ بالمواصلات السلكيه أفقدني وعيي الإنترنتي 48 ساعه.
________
تقبلوا تحيتي


32 تعليقات القراء:

اللى موش عارف يتغير يقول...

بدور على اسمى موش لاقية
مع انى التقيت بمادو وسلمت عليه
ربنا يتقبل
وفكرة حلوة
تحياتى

حلم بيعافر يقول...

اصجى ياعمووووو

حلم بيعافر يقول...

فين اللينكات بتاعة الشركات اللى كنت قايل عليها؟

غير معرف يقول...

هههههههههههه ربنا يبارك فيهم يارب ويبقى طيار أأأأأأأأأأد الدنيا ويضرب اسرائيل بردوا
وحشووووووونى اوى سلامى ليهم جميعااااا ولكل العيله

كلمات من نور يقول...

حج كل 82 سنة؟؟؟؟؟؟؟؟؟؟؟ يا ترى حيحج تاني؟؟؟؟؟؟؟؟؟؟

قل لمادو وبيبو وعمر يسمعوا كلامنا احنا واحنا نعلمهم مين أخواتنا و مين أعدائنا..........

زهرة يقول...

يروحوا ويرجعوا بالسلامة .. روح الأطفال فى البيت حاجة جميلة والله وممتعة ..

بس أحياناً بكون نفسى أزقلهم من الشباك ..

ايون .. بنفس المعنى كدة :)

حجيت على فكرة 3 مرات ..

بس نفسى أحج بجد :)

عقبالك وعقبالنا ..

تحيااااتى

Qatarat Nada يقول...

هههههههههههههههههههههههههههههههه
ماشاء الله ربنا يحميهم يااااارب
وبعدين النت مقطوع بقالى 48 ساعة ومتضايق طب انا اعمل ايه بقالى اسبوع
وتخيل انى بكتب الرد دا وانا باخد حرف حرف كوبي من كل مكان لان الكيبورد بايظ
بس ماقدرتش ماردش

well يقول...

ربنا يحفظهم .. وينصر بيهم امة محمد صلى الله عليه وسلم


تحياتى

ستيتة يقول...

انا خايفة يقابل مادو
هو اللي يغير علينا فكر الواد
منوفي برضه وليه سكته في التنويم المغناطيسي
بلاش يا مادو تقابله
خليك على فطرتك علشان تدي اسرائيل حقنة :)
ربنا يخليهم ويبارك فيهم ويرزقك مثلهم وزياااااااااااااااااادة :)

خواطر شابة يقول...

حج مبرور وذنب مغفور ان شاء الله ويرجعوا لارض الوطن بأل سلامة ان شاء الله
الاطفال احباب الله أكبادنا تمشي على الارض

قلم رصاص يقول...

اللي موش عارف يتغير

هههههههههههههههه
انا بردو دورت عليك ملقيتكش
اوعدك أشوفك
شكرا يا ايهاب على مرورك الطيب ياراجل ياطيب

أي خدعه ياعم

قلم رصاص يقول...

حلم بيعافر

دايما خارج عن الموضوع
دايما داااااااااايما

مليتوا المدونات
ههههههههههههههههه

واللينكات في الموضوع والرابط بتاعه في شريط القوائم الرئيسيه على شمالك وانت داخل

منور

قلم رصاص يقول...

غير معرف

الله يسلمك
شكرا على المرور والتعليق ربنا يكرمك
ولو اني معرفتش مين حضرتك

قلم رصاص يقول...

كلمات من نور

أنا بردو شاكك زي حضرتك
احتمال يعملها تاني أصله بركه

واطمني حضرتك الولاد دول متربين في مدرسة الوطنيه المصريه اللي العبدلله عمهم طلع منها هههههههه

شكرا على المرور والتعليق

قلم رصاص يقول...

زهره

الله يكرمك يارب شكرا أستاذه سلمى

طبعا الأطفال دول الفاكهه الرئيسيه في البيت وبالنسبه لي العلاقه خاصه جدا كمان

لالالا اختلف معاكي في النقطه دي
اه هما صحيح فيه منهم نوعيات عاوزه ضرب اللللللللل بس بردو مازالوا اطفال يعني اهم حاجة في حياتي

تلات مرات حج ماشاء الله
ربنا يوعدنا واياكم ان شاء الله

شكرا مره تانيه على المرور والتعليق

قلم رصاص يقول...

قطرات الندى

الله يكرمك يارب شكرا جزيلا

اه فعلا النت اصبح شيئ مهم جدا في حياتي ومقدرش مستخدموش اكتر من يوم بحس ان فيه حاجة كبيره ناقصاني..وسيلة اتصال ومعرفه رهيبه طبعا لاشك

شكرا لمرورك وتعليقك

قلم رصاص يقول...

Well

أاااااامين يارب

ربنا يكرمك

شكرا على المرور والتعليق

قلم رصاص يقول...

الدكتوره ستيته

ههههههههههههههههه
اطمني حضرتك يادكتور مادو محدش يشتري دماغه
دي أجيال نافوخها مش هارد ديسك قابل للفرمته دي حاجة لم تخترع بعد ... ^_^

وكل دا رغم ان الريس منوفي أصلي وقادر ويعملها بس بردو احنا أصلي أصلي بردو

وان شاء الله اسرائيل تاخد أجدعها حقنه

وامين يارب يادكتور ربنا يكرمك على الدعوه الحلوه دي

منوره المكان بشده
عشان كدا فاتورة الكهربا على حضرتك المره دي هههههههههه

شكرا جزييييلا على المرور والتعليق

قلم رصاص يقول...

خواطر شابه

آاااااااامين يارب العالمين
ربنا يكرمك على الدعاء
وان شاء الله يرجعوا بالسلامه
شكرا جزيلا على المرور والتعليق

سجود يقول...

السلااااام عليكم
يعني حسني مبارك هناديه بالحاج حسني ولا ديه فكاهه
ده مش بتاع زحمه لازم نعمله سنه يحج فيها لوحده ونفضيله مكه كلها الراجل مش متعود علي الزحمة حرم نفسه منها عشان يسيبها لللشعب كتر خيره وقلل عمره
ربنا يهديه او يهده
ههههههههههههههههه

المتبهدلون في الأرض يقول...

حج مبرور إن شاء الله .. لمادو وعمر
وحُسني .!
وعقبال عمهم ..وجمال حُسني ..!

ميرام يقول...

الله
مادو ده جميل قوي (:

قلم رصاص يقول...

سجود

عليكم السلام ورحمة الله وبركاته

طبعا هنقول له ياحاج
وفعلا هو مش متعود على الزحمه دا كلام مش جديد ..بس فيه فكره في الموضوع دا
انه منتظرها على شوقه ..عشان يحس بالزحمه وحلاوتها يعني

ربنا يهدي الجميع

شكرا لمرور حضرتك

قلم رصاص يقول...

المتبهدلون في الأرض

وسعي مشكور

شكرا لمروركم الكريم

قلم رصاص يقول...

ميرام

ربنا يخليكي ويكرمك
شكرا على ردك الرائع

كل عام وانتي بخير

Dr/ walaa salah يقول...

ربنا يخليهم يارب

الاطفال احلى حاجه في الدنيا ببرائتهم وطيبتهم

بس صحيح تفتكر لو قابل الرئيس هيكون ردة فعله ايه لما يسمع كلامه


قلم رصاص راقت لي مدونتك كثيرا

ذو النون المصري يقول...

هل الرئيس فعلا هيحج هذا العام؟
هل المعلومة مؤكده
انا مقيم بالمملكة و ناوي احج ايضا لو هيعملها جايز يعطل المواصلات و يسبب زحام لوحدة و حراسته

Rosie يقول...

كلام زى الفل..لأ بجد..عجبنى أسلوب الوصف ..المرة دى عامل زى بتوع الروايات...و بعدين الأطفال نعمة فعلا..بيخلوا الواحد يضحك من قلبه..ربنا يخليهم...و تصدق اول مرة أعرف أن الرئيس مسافر يحج..منك نتسفيد..

قلم رصاص يقول...

Dr/ walaa salah

آااااااامين يارب
ربنا يستجب منك

اعتقد انه هيعمل حاجة
مادو جبار وانا اللي مربيه
هههههههههههه

شكرا لحضرتك على المرور والتعليق

قلم رصاص يقول...

ذو النون المصري

انا سمعت المعلومه دي بس الصراحه محاولتش استوثق منها
وصدقتها عشان اربطها بفكرتي في البوست دا

بس اعتقد ان الخبر حقيقي فعلا

شكرا لحضرتك على المرور وكل عام وانت بخير

قلم رصاص يقول...

Rosie

انا اول مره اكتب بالأسلوب دا رغم اني بقرأ النوعيه دي كتير وبحبها جداااااا

شكرا لمروروك وتعليقك

Unknown يقول...

ماشاء الله ربنا يحفظهم،بكرة هيقولك تعالى ياعمو وانا اعلمك زى احمد ما بيقول.

Twitter Delicious Facebook Digg Stumbleupon Favorites More

 
Free Web Hosting