أحداث 24 ساعة

ويتوالى مسلسل الإقتتال الداخلي




الهجوم على الإسلام من الغرب حاجة مش جديدة علينا ومفروض منستغربش منها ، لأن الإسلام باعتباره دين قوامه السلام وبنيانه العدل يتصادم مع النهج الغربي القائم على النهب المنظم للشعوب الضعيفه تحت دعاوى ديمقراطيه مزيفه بيفرضها بقوة السلاح من اجل اغراضه الخاصه .. دا شيئ نحن كمسلمين يجب علينا منستغربش منه لأنه صراع نظريات وافكار تحاول ان تسود العالم وتحكمه دون الاخرى .. بل اللي مفروض علينا هو تقوية الجبهه الداخليه عشان نقدر نصمد في وجه هذه المخططات المتربصه بنا منذ فجر الإسلام وحتى قيام الساعه.

لكن ازاي هنحافظ على جبهتنا الداخليه وكل فتره بيطل علينا وجه قبيح من داخل المسلمين ينفث سمومه الفكريه في جسد الأمه النحيل الذي يتلقى ضربات من الشرق والغرب . ولكن كخير أمه أخرجت للناس أراد الله عز وجل ان تظل صامدة رغم مابها من وهن .. حتى نستقي نحن المسلمين الدروس والعبر من الماضي لنضمد الجراح ليتعافى جسد الإسلام.

من فتره قريبه جدا لسه يادوب بنحاول ننسى الضجه اللي أثارها أحد معتوهي العصر المدعو سيد القمني بتصريحاته وافكاره الغبيه التي لاتمت للدين بشئ والإسلام منها براء .. حتى خرج علينا من لايقل عنه غباءا واستفزازا لمشاعر المسلمين  بأراء تحمل فكرا مشوهها يرمي بسهام الغل والحقد على الإسلام . إنه أحمد صبحي منصور ..أحد مجاذيب العصر زعيم مايعرف بالقرآنيين .. ينكر السنه النبويه الشريفه ولايعترف سوى بالقرآن .. ومش مستبعد بعد فتره يطلع علينا هو او حد جديد يقول ان القرآن 20 جزء فقط والباقي من تأليف خلق الله ..!

المهم هذا الرجل ظهر بتصريح يقول فيه ان صحيح البخاري يتناقض مع الإسلام ويعادي الرسول........... وقال : إن البخارى جمع كتابه بعد وفاة النبى صلى الله عليه وسلم بقرنين من الزمان، مشيرا إلى أنه اتبع منهجا فى بعثرة تلك الأحاديث وتكرارها بصور مختلفة تدل على مكر هائل كمن يخلط السم بالعسل.

النوعيه دي من المتطفلين والمدسوسين على الإسلام ، دايما بيقولولنا ان الإسلام دين مرن ويجب انه يساير العصر ولازم يكون فيه تجديد في الفكر الإسلامي في محاوله منهم لخلط الأورق وهدم المعبد على اللي فيه.

فيه فرق شاااااااااااااسع بين التجديد في الإسلام ومحاولة ربط صحيحه بمجريات العصر الحديث كما فعل في العصر الحديث الإمام الراحل العلامه محمد الغزالي وغيره ونزع الإسرائيليات المدسوسه عليه .. وبين الطعن في منارات الإسلام التي يهتدي بها كل مسلم على أرض المعموره.

احنا محتاجين فرق صاعقه او على  حد تعبير أحد علماء الحديث لما قال : احنا محتاجين حرس للحدود.

تقبلوا تحيتي

21 تعليقات القراء:

أنا - الريس يقول...

أولا الأسلام متجدد وانا لا اري اختلافا في التجديد لأن النصوص ثابته قرآن وحديث ولكن الفتاوي تتغير بتغير الزمان والمكان .. أما من ينكر السنة .. فلندعو الله له بالهداية .. لأن إنكار السنة شرك والله اعلم .. فكيف أعرف أن العصر 4 ركعات .. ولم يذكرها القرآن ..
المشكلة ان فيه خلل في المؤسسة الدنية حاليا .. وعايزة الدول الإسلامية تتحد أولا عشان إصلاح الذات بيننا وبين أنفسنا ,. أما الإسلام فدين مجدد .. يناسب كل زمان ومكان .. وإن كنت أختلف من الاخوة الذين يريدوننا ان نذهب لنعيش في عصر الرسول .. كما قال احمد الشقيري .. نحن نريد الرسول أن يعيش معنا ..

وربنا يهدي الجميع

خواطر شابة يقول...

اعجبتني هذه الجملة لانريد ان نذهب لنعيش في عهد الرسول نريده ان يعيش بيننا فعلا هذا ما نحتاجه
بالنسبة لهذا الدين الله كفيل بحفظه رغم كيد الكائدين وسبحان الله اعداد الداخلين اليه من غير ابنائه في تزايد مستمر رغم كل هذا الهجوم
دمت بود

حلم بيعافر يقول...

لو كنت تقصد حكاية الكعبة اللى فى سينا فالموضوع مكنش ينت للدين بصلة نهائى والراجل كان بيقول فكرة وشغل سياحى وملوش دعوة بالدين وفيه علماء من الازهر طلعوا معاه ع الهوا وامنوا على كلامه وباركوه...لانه معكش بصراحة ومالش حاجة تمس الدين بشىء بس برضه زى ماقلت افكاره غريبة شوية

او تقدر تقول اننا بنستغرب وجود كائنات بتفكر...

ســــــــــــــاره يقول...

الناس الى بوظت الاسلام بأفعالها و الله

ليس فقيرا من يحب يقول...

يا سيدى الفاضل

دى شخصيات عندها خلل ما بيخليها

بتخلط بين الاجتهاد وبين التعدى

على حدود واضحه ومفيش اى جدال فيها ولا اختلاف عليها

ربنا يهدى الجميع ويجنبنا الفتن ماظهر منها ومابطن

لان دى كلها فتن وامثال الشخصيات

دى كترت قوووى

اخبارك ايه ياريس

الحمد لله انك بخير

كلمات من نور يقول...

ماذا لو جاء المصطفى في هذا الزمان ليرى أحبابه كما قال عنا؟؟؟؟؟؟؟ يا لهفي وخجلي مما سيراه قائلا : سحقا سحقا بعدا بعدا ....يارب اجعلنا من الفئة التي تمضي بكتابك وسنة نبيك إلى يوم موتنا وثبتنا على دينك يا مقلب القلوب...

قلم رصاص يقول...

سيدي الرئيس

اهلا ومرحبا بك دائما في مدونتي

رأيك أثلج صدري والله .. فجمعت ومنعت ولخصت الأمر بشكل رائع

الإسلام دين متجدد بالطبع فهو مناسب لكل مكان وزمان .. وهذا لايعني ان نخرج على الثوابت تحت دعاوى التجديد

وفعلا كما قلت نحن نريد الرسول بيننا ولانريد ان نذهب الى عصره

فالمعنى له دلاله ممتازه

جزاك الله كل خير

سعيد جدا بمرورك وتعليقك

قلم رصاص يقول...

خواطر شابه

بالفعل الجمله رائعه جدا اختي الكريمه
ومشكوره لمرورك وتعليقك

قلم رصاص يقول...

حلم بيعافر

ياأهلا بالمعارك

نعم ياخويا .. بتقول ايه ايه .. مش سامعك علي صوتك شويه.........!

هو اما واحد يطالب ببناء كعبه في سينا بهدف تنشيط السياحه .. دا مش معناه انه اتكلم في الدين وداس فيه كمان؟

بزمتك انت بتتكلم جد وهو دا رأيك؟

وهو معنى ان بعض الأزهريين أمنوا على كلامه يبقى هو وهما بيتكلموا صح ؟
كل مكان في الصالح والطالح ياحبيبي والأزهر مؤسسه تعليميه في الأساس وبها من الإيجابيات كما بالتأكيد مليانه اخطاء وسلبيات.

وبعدين انا مقصدش سيد القمني في موضوع كلامه عن كعبة سينا وبس لالالالالا انا باقصده كواحد حاسب نفسه على المثقفين والمفكرين او العلماء..ومش انا اللي هعرفك سيرته الذاتيه ولا البحثيه .. عندك جوجل ابحث وقلب واعرف مييييييين سيد القمني وبيفكر ازاي وبلاويه اللي ملهاش حد

ثم تعالالي هنا وقل لي .. هو القمني دا علاقته ايه بالاقتصاد والسياحه عشان منتظرين سيادته يطرح افكاره الرائعه في مجال ميعرفش فيه الألف من كوز الدره ؟

ويعني بنستغرب وجود كائنات بتفكر؟

هو التفكير دا ملوش قواعد وحدود واطر بيتحرك فيها.. ولاهو لازم الانسان يبقى مختلف ويشذ عن الخلق عشان يبقى اسمه مفكر؟

رأيك زعلني
والله لاكلم خالتي تمنع عنك المصروف

منورني دايما

قلم رصاص يقول...

ساره

بالتأكيد افعال الناس ليها أسباب
بس النتيجه هي الاهم ودا اللي بنعاني منه كلنا دلوقتي

شكرا استاذه ساره لمرورك وتعليقك

قلم رصاص يقول...

ليس فقيرا من يحب

فعلا كلامك صح جدا
المشكله النهاردة هي الانتهازيه وخلط الاوراق والهدف كله مصالح واهواء شخصيه هدفها الظهور في الاعلام وجني الارباح ولو بطريق غير مشروع على حساب كل الثوابت

انا بخير الحمدلله

شكرا لمرورك وتعليقك الراقي

قلم رصاص يقول...

كلمات من نور

آمين يارب العالمين
واللهم صلي على سيدنا محمد

ناس بتنكر السنه ، ودي اللي قال عنها سيدنا محمد صلى الله عليه وسلم :

"تركت فيكم ما ان تمسكتم به لن تضلوا بعدي ابدا ، كتاب الله وسنتي"
صدق رسول الله صلى الله عليه وسلم

شكرا جزيلا لمرورك وتعليقك الراقي

حلم بيعافر يقول...

تبادر لذهنى حكاية المعبة اللى فى سيناء عشان كده اتكلمت عنها وعشان انا شفت وعرفت الموضوع من الالف للياء فحبيت اوضح انه لم يسىء للدين فى شىء ومجابش اصلا سيرة

ثانيا مفيش حاجة اسمها تاطير للتفكير ودى ام المشاكل فى مصر بناطر اللى ميتاطرش ونسيب اللى مفروض يبقى فى حدود ع البحرى
ومقلتش ان الحكاية خالف تعرف ومينفعش انت تقول (اختلف وشذ)لان الاختلاف مش شذوذ

وبعدين نتكلم فى موضوعك الاصلى
(صحيح البخاري يتناقض مع الإسلام ويعادي الرسول.)مسمعتش الحتة دى ياسيد

البخارى جمع روايات

جمع

جمع

جمع

مش شرط كل الروايات بتاعته تبقى صح

لانه بنى ادم

انسان يعنى

ومواضع الاختلاف حاليا بقت موضع نقاش فى كل مكان

وعلى عينك ياتاجر

متزعلش منى يابن خالتى وابوس ايدك الا المصروف

حلم بيعافر يقول...

للعلم يا استاذ سيد

الحكاية كلها ملخصا ان فيه بعض الروايات اللى ورد فيها اكتر من راى دونه الامام البخارى منها الاراء اللى اجمتعت عليها الغالبية العظمى ومنها الاراء الفردية الغريبة شوية

الخلاف كله على ضرورة الابقاء على الاراء الغريبة دى

بس ادى كل الحكاية ومش مستاهلة لاقضايا تترفع على حد ولا حد يقوله انت جاهل

والموضوع لو اتاخد بالحسنى من الاول هيخلص من غير دوشة انما احنا هنا فى مصر بدل مانتكلم بنضرب علطووووووول

قلم رصاص يقول...

حلم بيعافر

انت بتقول انك شوفت الموضوع بتاع الكعبه من الألف للياء وشايف انه ممسش الدين من قريب او بعيييييييييد

جميل جدا .. وهي الكعبه دي زي الأهرامات مثلا ياعم محمد عشان تقولي ممسش الدين ؟

ينفع واحد يقولي ايه رأيكم نبني كعبه زي اللي في السعوديه عشان نلم حواليها شوية سياح ونعمل دخل للبلد ؟

اولا دا تطاول على الدين لأن الكعبه بيت ربنا أمر سيدنا ابراهيم وابنه اسماعيل ببنائها .. مينفعش نقول للمقاولين العرب تعمل لنا واحده زيها عندنا........ محمد دا مربط الفرس في نقاشي معاك في النقطه ومتحاولش تلف وتدور

انا معاك في ان صحيح البخاري كتاب تم جمعه من هنا وهناك.. وجايز جدا يكون فيه حاجات مغلوطه ومدسوسه زي الاسرائيليات دا انا متفق معك فيه تماما ..

لكن البخاري بشكل عام دا ايه؟ قول انت؟
دا فيه معظم الاحاديث عن الرسول عليه الصلاة والسلام يعني باختصار هو السنه .. اما يجي وااااااااااحد ينكره كله على بعضه يبقى دا معناه ايه

زي ماقال اول تعليق عندي مستر بريزيدنت .. كيف اعرف ان العصر 4 ركعات ولم يذكرها القرأن ؟

هنا بقى يجي دور السنه يا أستاذ اللي الراجل بطل البوست النهاردة بينكرها كلية وعلى اطلاقها ولايعترف الا بالقرأن

ومعلهش ان كنت اخدت هزاري معاك على محمل شخصي

منورني يابن خالتي واطمن المصروف في امان

حلم بيعافر يقول...

بص هو لما قال كعبة كان قاصد المعنى اللغوى ليها وكان بعيد تماما عن دلالتها الدينية وحتى كانت من ضمن المداخلت معاه انه لو كده فاهلى شبرا بيطالبوا بكعبة ليهم هما كمان....طبعا كانت مداخلة على سبيل الهزار(لاحسن تقطع عنى النت )

والثابت والفرض والسنة على عينى وراسى بس انا مش هقبل حاجة تتنافى مع عقلى حتى لو كانت فى صحيح البخارى والا كان ربنا خلقلى مكان راسى بطيخة وخلانى اقبل اى حاجة


بس والله ياجدع انا شفت واحد مع عمرو اديب وجابله ع الخط جمال قطب وكانوا بيتكلموا وياخدوا ويدوا ...صحيح ان كل واحد كان مصمم على رايه بس كانوا بيتكلموا ومحدش فيهم وصف حد لا بالجهل ولابانه مدسوس على حد من حد

وللعلم انا لا مغرم بالقمنى ولا من مريديه بس فيه طريقة تعامل مع كل حاجة دللوقتى تعتبر وش تانى لطريقة التكفير او مش وش تانى دى هى هى والطريقة دى بتغيظنى عشان اللى بينتهجها فاكر انه عنده الحقيقة المطلقة مع ان مفيش حد عنده الحقيقة المطلقة دى وافتكر ان القران بيامرنا بالتفكر ومفيش لا اية ولا حديث بيقولوا كفروا اللى يخالف او اقطعوا رقابته او هزقوه على الملأ

مش كده ولا ايييييييييييه؟

غير معرف يقول...

في ناس تحب الظهور فتفرقعلها كلمتين

وليس على البهايم حرج

تحياتي

مدونة عمار اون لاين يقول...

مدونة راااااائعة


تسجيل اعجااااب

Unknown يقول...

موضوع شائك خاصة حين تراجع منارة الاسلام القديم الازهر واصبحت الهرطقة والتدخل فى الدين والافتراء شئ سهل لكل من هب ودب
لنا الله ولعل الله يهدينا ويهدى الناس من الوقوع فى شرك اختلاط الامور عليهم
تحياتى

غير معرف يقول...

لانريد ان نذهب لنعيش في عهد الرسول نريده ان يعيش بيننا

عجبتنى جدا جدا جدا
احنا فعلا محتاجين لكدة
و هو آه الإسلام دين مرن لكن مرونته دى جواه و اللى دارس فيه حيلاقى ان طل زمن احاكمه مذكورة و كل حاجة ربنا قايل عليها لكن الجهلاء فقط هما اللى مش عايزين يعترفوا بكدة
للآسف امثال الراجل ده كتروا و بقوا شغالين بالكلام الحق الذى يراد به باطل
حسبى الله و نعم الوكيل

Beram ElMasry يقول...

اخي اتلعزيز قلم رصاص
شكرا لمواساتك لنا ونفعنا الله بدعواتك واني لك شاكر ولا اراك الله مكروها في عزيز لديك.... واني بخير والحمد لله

Twitter Delicious Facebook Digg Stumbleupon Favorites More

 
Free Web Hosting