أحداث 24 ساعة

إشربـــي يامصـــــــر !






منذ فتره طويله وهناك تحذيرات عديده من جانب بعض المفكرين السياسيين والعسكريين المصريين مرارا وتكرارا من ضرورة الانتباه والتصدي للتدخلات الإسرائيليه في إفريقيا وخطرذلك على الأمن القومي المصري . ويأتي على رأس هذه المخاطر، تهديد حصة مصر من مياه النيل .



فالوجود الإسرائيلي في القاره السمراء قديم وليس وليد الأمس وتعلمه جيدا الدوله المصريه وتتابع تحركاته بالطبع أكثر الأجهزة الأمنيه حرصا على الأمن القومي المصري وعلى رأسها المخابرات . ومن البديهي أن أبعاد هذه التحركات تضعها تحت يد وتصرف القيادة السياسيه ، وهذه ظنوني الحميده . ولكن ما أكاد أعتقد به عن ظهر قلب أن هذه القياده السياسيه ، ودن من طين والأخرى من عجين .. وتركت الملعب لليهود وغرقت في سُبات عميق .!



فمصالح إسرائيل من وراء توغلها في قلب إفريقيا كما يبدو لي ، تتمثل في نقطتين جوهريتين :



النقطه الأولى ، إثارة النعرات الطائفيه والعرقيه والحروب الأهليه بين الدول والكيانات الإفريقيه ، حتى تضمن لنفسها سوقا مشتعله تغذيها بصادرات صناعاتها من الأسلحه العسكريه التي تحقق بها فائضا ماليا بالمليارات لخزينتها ، وتفوقا نوعيا في لعبة الصراع الإستراتيجي بينها وبين مصر في المنطقه.


وأظن أنها نجحت كثيرا في هذا الإتجاه ، وأذكر جيدا قصة هذا الكيان الشيطاني مع دولة إريتريا التي نالت استقلالها في مطلع التسعينات بعد الحرب الأهليه ، وكانت إسرائيل من أوائل الدول (عفوا) التي اعترفت بها وأقامت معها علاقات قويه ومع رئيسها أسياسي أفورقي الى الدرجة التي استأجرت فيها احدى الجزر الإريتريه لتربية الأبقار ثم شحنها إلى تل أبيب ، وكي تكون لها عين على مدخل البحر الأحمر حتى تـُنسي العرب مقولة أن البحر الأحمر بحيره عربيه خالصه وتجعل ذلك أسطورة من المستحيلات الثلاثه ، والهدف بالطبع هو أمن مصر.



النقطه الثانيه ، وهي الأخطر في تقديري ، والتي تتعلق بتهديد مباشر لحصة مصر من مياه النيل عن طريق مساعدة دول المنبع مثل إثيوبيا وأوغندا في إقامة مشروعات زراعيه وسدود على النهر ، منها للتأثير على حصة مصر التاريخيه في مياه النيل والضغط عليها مستقبلا من خلال الربط بين حصولها على الحصه كما هي _كما قد تزيد_ وبين مد إسرائيل بالمياه عن طريق صحارات عملاقه تمر أسفل قناة السويس وعبر أرض سيناء.. كنوع من المصالح المشتركه التي تفرضها الأوضاع السياسيه القذره، ومنها ماهو منافع اقتصاديه بين إسرائيل وهذه الدول.


وقد اتضحت الآن ملامح هذه الأخطار والمخططات بجلاء وأصبحت بالفعل على المحك في الإجتماع الأخير لدول حوض النيل في منتصف شهر مايو الماضي بشرم الشيخ . فدول المنبع ترفض بشدة مطالب مصر والسودان الخاصه باحتفاظهم بالحصص التاريخيه من المياه بحجة أنها أُقرت بناءا على اتفاقيات وُضعت في عهد الإستعمار وانه يجب وضع آليات جديده لتقسيم عادل لمياه النهر. كما رفضت المطلب الخاص بضرورة إخطار مصر بإقامة أية مشروعات خاصه بالنيل عند المنبع.


ومما يؤكد وجود الصهاينه وراء هذه الكواليس ، ذكرت صحيفة المدينه السعوديه عن مصادر رسميه بالخارجية المصريه أن الوزارة لديها معلومات تفيد أن وفدا إسرائيليا قام بزيارة العاصمه الإثيوبيه أديس أبابا قبل أسبوع من انعقاد الإجتماع الوزاري لدول حوض النيل بنية التدخل في مسار المفاوضات. وقد نجحت إسرائيل كعادتها في ذلك ، وسيطرت أجواء عدم الاتفاق والتوتر بين مصر ودول حوض النيل وهي بداية لمرحله أكثر خطورة في تاريخ مصر.

بعد هذا الإستعراض ، يمكنني القول أن إسرائيل بتوغلها في إفريقيا لم تواجه صعوبات ، نظرا للفراغ الذي تركته مصر لها في هذه المنطقه الحيويه والإستراتيجيه لأمننا القومي والمائي.


هذا هو واقع الحال ، مصر تؤمًن لإسرائيل حدودها الجنوبيه والغربيه بإستسلامها السياسي والعسكري ، وُتسكت المقاومه الفلسطينيه كي ينعم اليهود بالأمان .. ثم ترد إسرائيل لنا الجميل بإثارة القلاقل في إفريقيا.. مما يقد يتسبب في اندلاع حرب بين مصر وبعض دول المنبع كإثيوبيا وأوغندا في المستقبل القريب حسب توقعات مراكز أبحاث أمريكيه ومصريه.


مصر في خطر حقيقي ، والحكماء وأصحاب الفكر القديم والجديد لاهم لهم سوى تربية الكروش فلهم في ذلك خبرات عظيمه ، ودائما لايتوقعون الكوارث وان توقعوها لايتحركون إلا بعد وقوعها بالفعل ، كي يتحركوا جارين معهم ذيول الخيبه والفشل.


إشربي يامصر
من كوعك وأكيد م البحر
النيل دا ماهوش دايم
دا ولادك بيصحوا العصر
اشربي يامصر.. نامي يامصر 
___________

قلم رصاص

32 تعليقات القراء:

ستيتة يقول...

عندما قال كل الخبراء ان الحرب القادمة هي حرب المياة
كنا احنا بنهتف ونصيح في مولد طرش تانيين

يالا يا مصر
ربنا يرحمك
كنتي طيبة
وولادك ولاد ستين في سبعين
اغبياء او مستغبيين

أنا - الريس يقول...

بص يا سيدي .. مفيش حرب ولا حاجة ..
ما تقلقش ..
مصر رغم اللي هيا فيه لسه فيها رمق ..
اما عن اسرائيل عارفه ان مصر مش حلفيه ومصر صرحة علي لسان ابو الغيط بان اسرائيل دولة عدوه .. وأول عدو للجيش المصري معروف اسرائيل او الدولة الصهيونية

اما مين حيث المفواضات هتتحل ... بتنازل من مصر والدول ... كل اللي بتحاول تعمله الدولة الصهيونية انها تدخل مصر في مشاكل عشان مصر ما تفضاش تبص حوليها .

قلم رصاص يقول...

ستيته

فعلا يادكتور والله احنا دايما عايشين في مود الموالد

انها حروب المياه بلا شك
مش شرط نعرف هتقع امتى بس المؤكد هتحصل
اغلب الظن ..فالملابسات تؤكد ذلك

منوراني يادكتور

في امان الله

قلم رصاص يقول...

سيدي الرئيس

انا عارف انه مفيش حرب هتحصل دلوقتي لكن صدقني اكيد هتحصل في المستقبل .. دي طبيعة الأمور .. لأن المياه تتناقص من العالم لأسباب عديده ليس هذا المكان و لا الزمان المناسبين للكلام عن ذلك.

وفعلا يمكن زي ما انت بتقول انه هدف اسرئيل الهاء مصر عنها وعما يحدث من حولها ...........!

وهل هذا قليل؟!

ألم تلهنا إسرائيل عن تنمية الدولة المصريه بإقحامها في حروب لاناقة لها فيها ولا جمل منذ قيامها عام 48 وعطلتنا وأخرتنا وراء الدول اللي كانت بدائه معانا في الخمسينات مشروعات النهضه والانطلاقه الاقتصاديه زي الهند والبرازيل والصين وغيرها .. انظر احنا فين وهم فين دلوقتي؟!

منورني بشدة

في امان الله

غير معرف يقول...

بينما كانت اسرائيل تخطط للإستيلاء على النيل وتثبيت قوتها في افريقيا ...كنا هنا منشغلين بتثبيت كرسي الحكم وتوريثه

لك الله يامصر

جوعونا وهيموتنونا عطشانين

تحياتي

خواطر شابة يقول...

نفسي اعرف بس اللي ولاهم ربي امورنا بيفكروا ازاي عارفين ولا لاهيين حاسين بحجم الاخطار و لا غافلين ايه مدى حسن النية ف اللي بيعملوه نفسي بس يوم اقدر ادخل جوا دماغهم اشوف بيفكروا ازاي والله نفسي عشان ارتاح

كلمات من نور يقول...

والله يا قلم رصاص مصر شربت وطفحت من عمايل أبنائها ....ونقول إيه غير حسبي الله ونعم الوكيل

Tarkieb يقول...

لو بصيت لعلم اسرائيل حتعرف انها من النيل للفرات ..زوصلت دلوقتي الفرات وفي النيل بتلعب من تحت واحنا نايميين في العسل...تفيد بايه الحرب لو حطو لنا في ميه النيل ميكروبات وسموم ولا جيوش الارض تمنعهم..بجد احنا اللي نايميين

حفيدة عرابى يقول...

وكانوا فين من زمان والامور واضحة جدا كده
وصلوا لمرحلة من الغباء السياسى
مالهاش حل
العيال فى اعدادى بنقولهم ان فى 67 حوالى 8 دول افريقية مالهاش اى مشاكل مع اسرائيل قطعت علاقتها معاها
علشان مصر
و22 دولة عملوا كده فى 73
طبعا ايام ماكانت مصر معبودة الافارقة
لما كانت بتساعد نكروما
مش بتضرب اللاجئين وتطردهم
وسايبة الناس لاسرائيل تظبط امورها معاهم



بس الموضوع معقد من ناحية تانية
احنا بنتعامل مع دول حوض النيل بكبر شديد من زمان
وفاكرين نفسنا فى موضع قوة وكنا بنحاول نملى عليهم شروط
وهما حاولوا بالذوق يفهمونا كتير
ان الاتفاقيات دى مش مقدسة
وان الوضع اتغير
والمطر بيقل
واحتياجات الدول دى بقت اكتر من زمان
لو كنا اتفاهمنا معاهم من زمان
كنا شفنا حل عادل
وفهمناهم انهم مهما احتاجوا مياه
احنا محتاجين اكتر منهم
لاننا دول مصب
والنيل النجاشى اللى اغلب ملئه من اثيوبيا بيوصل لنا بعد مايعدى اقسى صحراء فى الدنيا
وانه بيفقد كتير من مائه
وان مطرنا يكاد يكون نادر
لكن احنا مش فاضيين لكده

كفايه اننا نجهز الخرابة للوريث
الهى مايتهنى بيها
حسبى الله ونعم الوكيل

معلش اصل موضوع النيل ده
موجع لدرجة الواحد مش عارف يتكلم ولا يسكت
ولا يعمل ايه
ربنا يرحمنا ويسترها معانا

حفيدة عرابى يقول...

نزار قبانى فى النكسة قال
لم يدخل اليهود من حدودنا
وانما تسربوا كالنمل من عيوبنا


اسرائيل وبتدور على مصالحها وبتأمن مصالحها لمئات السنين
واحنا بنعمل ايه؟
بندور معاها على مصالحها

أبو العريف يقول...

تصدق من سنين مش فاكر اد ايه

قريت مقال او تحقيق في جريده مش فاكره هي ايه

عن الموضوع ده

وتقريبا كل اللي قالوه بيحصل دلوقت

الله يرحمك يا عبد الناصر





هو ايه علاقة عبد الناصر بالموضوع

sony2000 يقول...

بجد ربنا يستر
بس المشكله ان فعلا عملين هنا ودن من طيبن وودن من عجين
مهما لو اتحركو من الاول مكنشي كل ده حصل
يلا ملناااااش غير ربنا ينجدنا

Atef Shahin يقول...

ليس مهما النيل ومياهه
المهم مين اللي فاز :
مرتضى ولا شوبير
زاهر ولا روراوة
سمية الخشاب ولا غادة عبدالرازق

ياراجل دي مهزلة
هو لو الإعلام عمل برامج عن أزمة المياة حتجيله إعلانات؟
طبعا لأ
خلاص .. لما نعطش نبقى نتحرك
كالعادة!!
تحياتي

دعاء العطار يقول...

هى دى الحكومه المصريه

تفضل ناااااايمه ناااااايمه

لغاية ماحد يجى يديها على دماغها

تلاقيه بتقول ايييه فيه اييييه ؟

لكى الله يامصررررر

shimaa elkholy يقول...

السيناريو ده معمول من زماااااااااااان

وياما قلنا وعدنا يا استاذنا بس احنا بنستهبل

مش فاضيين يا استاذنا قيادتنا

الله هو فى حرامي وهو خارج من باب البيت والناس بتجري وراه بيحاسب احسن يكسر الفازه

لا طبعا بيلوش كل الى فى طريقه ومش بيفكر غير فى حماية نفسه ثم السريقه

حسبنا الله ونعم الوكيل

حلم بيعافر يقول...

ياعم وفروا انتو بس فى الميه شوية
يعنى بدل ما الواحد يستحمى مرتين فى السنة يخليها مرة واحدة ومش معنى ان رئيس حكومتك نظيف انك تبقى زيه

akeed يقول...

السلام عليكم

ربنا يرحمنا انها الحرب الباردة


تحياتى

مدونة حكومتى ملاك يقول...

يا أخى احنا هنعمل ايه ولا ايه

مش كفاية جبنا بطولة الأمم الافريقية

وبنحاول نأمن حدودنا مع غزة وبنبى الجدار

دى الحكومة كتر خيرها والله

تحياتى

فارس عبدالفتاح يقول...

أخي الكريم /

أنا مش هتعالى ولا هتكلم بطريقة متحبهاش بس هسأل سؤالين اعتراضيين .. وتسمحلي بعد إذنك طبعاً ، عبد الناصر كان بيدعم كل الحركات التحررية في أفريقيا وتجلى هذا الدعم في جمهورية الكنغو ، وكذلك في ثورة اليمن .. وكانت النظرة الإستراتيجية للنظام القومي العربي تعمل على تأمين الموارد الطبيعية والحماية الجغرافية والممرات المائية والسيطرة علية أو تأمينها بإقامة أنظمة موالية للجمهورية العربية المتحدة مثل الثورة اليمنية على مضيق باب المندب ونحن نسيطر على قناة السويس في الشمالي

ووصف الانهزاميين والمغفلين والعملاء والجهلاء والحمير واللى مش فهمين حاجة أن هذه الأمور تبديد للأموال المصرية والعسكرية المصرية .. الآن وبدون سابق إنذار اتضح أن كل الكلام ده صح ومظبوط


هو ده اللى أنا مش لقيله تفسير اللى تفسير واحد وقد قلته لك .. انه هناك عدم وعي وتضليل للجماهير حدث في عصر السادات بإعطاء شرعية لنظامه العميل والموالي لإسرائيل ونظام مبارك أيضا الابن الشرعي لنظام السادات

فقد كانت آخر كلمة قالها الزعيم عبد الناصر لا صلح لا اعتراف لا تفاوض .. ونحن الآن نبيع مواردنا الطبيعية بأرخص من أسعار السوق للعدو

في أي مكان في العالم يحدث هذا .. ربنا يصلح الحال

قلم رصاص يقول...

فتاه من الصعيد

يبدو ان كلامك صحيح ميه في الميه

ربنا قادر على كل شيئ

منوره دايما

قلم رصاص يقول...

خواطر شابه

الحكم في البلاد العربيه أصبح مصالح خاصه اكتر منه مصالح أمم
وتصوري انا اتمنيت نفس الكلام بتاعك.. انا نفسي فعلا انا كمان ادخل دماغ الناس دي عشان اعرف بيفكروا ازاي ولو اني متأكد بس عشان عقلي ميشتش بس

منوره

_______

كلمات من نور

ونعم بالله
وليس لنا سواه
وعليه إرجاع الأمر لمجراه

منوره

_______

Tarkieb

اه طبعا ماكلنا عارفين الحلم الصهيوني بامتلاك دوله من النيل الى الفرات .. دا حتى فيه بعض المحللين الاستراتيجيين بيقولوا ان هناك بعض الإسرائيليين مؤمنين بفكرة ان الدوله الصهيونيه حدودها تنتهي عند الأرض التي يقف عليها أخر جندي إسرائيلي
يعني براحهتم ان قدرو ياخدوا السودان بالمره ياخدوها دا حسب لو رغبتهم يعني..!

وطبعا احنا بنشرب اللبن وننام بدري

منورني

Beram ElMasry يقول...

اخي الحبيب قلم رصاص حي
يسعدني مرورك دائما وبارك الله لنا فيك وفي قلمك
في مدنتك قرأت اشربي يامصر
اكاد اجزم لنفسي ان هناك صفقة حقيرة بين اميركا والنظام.. امريكا تحفظ الكرسي واستمراره والنظام يتعامي عن مصالحنا المناهضة لمصالح اسرائيل لتسود وتعلوا اسرائيلفي المنطقة ويبقي الكرسي للتوريث

وسلام ولا سلام مع بني صهيون

قلم رصاص يقول...

حفيدة عرابي

اتكلمتي في نقط في غاية الأهميه

احنا فعلا مقصرين جدا جدا جدا في عمقنا الإفريقي رغم وقوف دول افريقيا معانا في الحرب ولو حتى بالتضامن المعنوي

والفكره دي متأصله في فكر المسئولين المصريين منذ فتره طويله ....

أذكر مثلا من خلال كلام الدكتور بطرس بطرس غالي أمين عام الأمم المتحده الأسبق في كتابه طريق مصر الى القدس استغرابه واستهجانه لموقف الديبلوماسيه المصريه من إفريقيا ولاحظ الرجل عدم اهتمامهم بالشأن الإفريقي وان القاره تأتي في أخر اولوياتهم

احنا فعلا بنمر بأزمه حقيقيه في أفكارنا الاستراتيجيه

ورغم كده أملي في بكره كبير

وشكرا على قصيدة العظيم الراحل نزار قباني

منوره يا أستاذه

______

أبو العريف

فكرتني بسمير غانم لما كان بيقول :

انا قريت الخبر دا في مجله ألمانيه اسمها علمني العوم والنبي يا احمد هههههههه

ياصديقي دا عبدالناصر ليه علاقه ونص بالموضوع لأنه من اهم حسنات هذا الزعيم الله يرحمه انه كان عنده بعد استراتيجي في تفكيره القومي لخدمة مصر والأمه العربيه

منورني دايما

_______

سوني 2000

وياريت هما حاسيين بالوضع البائس اللي بيتعاملوا بيه مع القضايا القوميه

لنا الله من قبل ومن بعد

منوره دايما

قلم رصاص يقول...

عاطف شاهين

عندك حق فعلا
هي الحاجات دي هتجيب اعلانات؟

احنا في قمة التفاهه وقلة القيمه والله

ربنا يهديهم

منورني جدا

_______

دعاء العطار

أيووووا بالظبط كدا
نايمين نايمين لحد ماحد يجي يخبطهم على قفاهم عشان يحسوا باللي بيجرى حواليهم

منوره جدا

_______

ندى الياسمين

معمول فعلا من زمان يا ام مريم
بس محدش عاوز ياخد باله
ودن من طين والتانيه من عجين

لنا الله

منوراني جدا

قلم رصاص يقول...

حلم بيعافر

هههههههههههههه
ياراجل قول كلام غير دا

طيب انا مش هعمل راسي براسه
أصله طويل بغباء

^_^

منور ياض

_______

أكيد

عليكم السلام ورحمة الله وبركاته

يبدو فعلا انها فعلا حرب بارده بيننا وبين اسرائيل

منور بشده

_______

مدونتي حكومتي ملاك

اه والله فعلا
كتر ستين الف خيرها
الحمل بقى عليها تقيييييل

منورني جدا

قلم رصاص يقول...

فارس عبدالفتاح

أهلا بك أخ فارس

طبعا انا سعيد بتفهمك لوجهة نظري خصوصا فيما يتعلق بالطريقه اللي بندير بيها النقاش ، دا اولا

ثانيا، عاوز اقولك اني متفق معاك تماما فيما يتعلق بالزعيم الراحل جمال عبدالناصر والخاص بتوجهه العربي القومي وتفكيره الاستراتيجي لحماية العمق العربي وامنه من خلال اهتمامه بمحيط هذا الوطن سواء في افريقيا او آسيا.

دي نقطه تأكد اني متفق معك فيها جدا
لكن عتابي عليك في ظلمك الشديد للرئيس السادات وتشبيه النظام الحالي بانه امتداد له .. فهما كان اختلافك مع السادات او توجهه فدا لايستدعي بالمره بل من الظلم والاجحاف تسويته مع النظام الحالي الذي لايعرف معنى الكرامه في التعامل مع ابناءه في الداخل والخارج ..!

على الاقل السادات كان رجلا زكيا جدا، اما الأن فحدث ولاحرج

منورني جدا

واتمنى استمرار التواصل

في امان الله

_______

بيرم المصري

وبدون تأكيد للمعاني ، فزيارتك هي اللي شرف على جبيني يااستاذي

ويبدو ان وجهة نظر حضرتك فيما يختص بموضوع اليوم صحيحه الى حد كبير ومفقوسه على رأي المثل

منورني جداااا

في امان الله

فارس عبدالفتاح يقول...

عفواً

وانا عايز اعرف ما هو دليل ذكاء وعبقرية السادات .. لانه بصراحة وبموضوعية حقيقية دون الرجوع الى العوامل النفسية تجاه امر معين اريد ان اعرف ما هي عبقرية السادات في حكم مصر وما هي الانجازات التي ادت اليها عبقرية السادات في حكم مصر تجاه الجماهير


يا ريت يكون الرد موضوعي وله مرجعية تاريخية سليمة مع الاحترام والتقدير لوجهة نظرك اريد موضوعية حقيقية دون ابداء وجهات نظر خاصة

مع الشكر

قلم رصاص يقول...

فارس عبدالفتاح

أخي الكريم فارس يبدو من خلال تنبيهك لي بضرورة توخي الشخصنه والالتزام بالموضوعيه ومن خلال ردودنا بعضنا على بعض منذ بعيد انك انت اللي مشخصن المسألة .. وهقولك ليه:

لأنك معتز جدا بحبك واحترامك لشخصية الرئيس عبدالناصر وانا لايقل اعتزازي واحترامي وتقديري له عنك وان اختلفنا في الأسلوب.. واعتزازك وحبك لهذا الزعيم الخالد ، يجعلك تغض البصر عماسواه من القاده حتى وان كانوا افضل منه .. ولو اني متفق معك في انه الأفضل.. بس انا بوضح لك الفكره.

فالرئيس السادات انا او غيري مهما حاولنا ان نتكلم بموضوعيه كما تريد عن ما ادعيته انا بذكاء الرجل ، فأنت لن تقتنع !

وللعلم انا لم أنعت السادات بالذكاء بالمقارنه مع ناصر ، فهذه ليست حرب نفسيه ، وانما وجهات نظر بسيطه قد أبدو مخطئا انا فيها ، ولكن صدقني انا وصفت الرجل بالذكاء في مواجهة الغباءالذي يحكمنا الأن الحالي.

وبعدين انت قلت ان النظام الحالي هو وريث نظام السادات ، كلام جميل جدا

طيب ، ولما لا يمكن القول عن نظام السادات انه وريث نظام عبدالناصر،
حتى الموضوع أقرب للحقيقه من كلامك
ويكفي انهما كانا(ناصر والسادات) زملاء كفاح واحد ومنتمين لتيار واحد عدل موازين الحكم ألا وهو الضباط الأحرار.

ولو السادات كان سيئا الى هذه الدرجه كما تعتقد ، ليه عبدالناصر اختاره نائبا له؟!

طبعا عندك المره دي حجج قويه للرد على هذه النقطه!

انت دائما تركز على اخطاء السادات وتصفها بالفادحه ، ودائما أيضا تفند مايقوله الاخرون عن اخطاء ناصر وتهون منها رغم فداحتها في مراحل معينه أهمها النكسه.. وهذا لايقلل من شان الانجازات العظيمه التي قام بها عبدالناصر.

عارف الفرق بيني وبينك ايه؟

انك بتصنف النظام أو الأشخاص على احد وجهين .. إما أبيض أو أسود!
ودا ظلم من وجهة نظري ، دا ربنا قال : ولاتزر وزارة وزر أخرى ..صدق الله العظيم

أما انا مؤمن بالعدل في هذه المسأله ، بمعنى اني اعطي كل ذي حق حقه .. أي لو أصاب الرجل أحسبها نقطه له ، وإن اخطأ احسبها عليه.

صدقني انت اللي مشخصن الموضوع
وعلى كل الأحوال لازم تكون واثق جدا اني سعيد أوي بالحوار معاك

لأني بجد باستفيد منك

منورني دايما

تقبل تحيتي

فارس عبدالفتاح يقول...

أخي الكريم

أولا : اقصد بالبعد عن الشخصنة تقييم الأفعال ومرجعيتها الفكرية والعاطفية أيضا لا الأشخاص واقصد بها أفعال السادات لا اقصد بها فارس عبد الفتاح أو حضرتك .


ثانيا : اعتبر عدم تقبلي للحقيقة الواضحة عن شيء حقيقي وثابت وواضح وله نتائجه التي تصب في صالح المبدأ وفي صالح الجماهير العربية والمواطنين المصريين أمر لا يقنعني أو شيء غير ذي بال ... ولن اقتنع به


فانا اعتبر أن هذه إهانة لشخصي وأنا اعلم انك لا تقصدها .. فانا يا أخي لست إنسان مكابر ينكر الحق والحقيقة ويتبع هوى النفس أنا لست هذا الإنسان الحقير القذر الذي يعرف الحق والحقيقة ولكنه يكابر بإنكارها ... ارجوا أن تفهم هذا الأمر جيداً


ثالثا : أنا لا أفاضل بين ناصر وبين السادات وبين مبارك بل أفاضل بين الأفعال ومرجعياتها والأفعال ما هي إلا نتاج ذهني وعاطفي وموروث ثقافي .. فإذا كانت تصب في صالح الوطن والمواطنين أم لا تصب هذا هو جوهر النقاش .

رابعاً : نعم إن نظام السادات هو وريث نظام ناصر ولكنه مع الأسف انقلب على المشروع الوطني والقومي وأنكره بل وشنع به .. وادعى انه لديه مشروع آخر سمى آنذاك ( بالانفتاح .. ) وحاول جاهداً أن تكون له شريعة بعد نصر أكتوبر ولكن الله سبحانه وتعالى كشف فشل هذا المشروع وشرعيته في أحداث 18- 19 يناير 1977م .


خامساً : اختار عبد الناصر السادات نائباً بعد النكسة بدلاً من السيد ذكريا محيي الدين على أساس انه لم ينل نوع من الاهتمام مثله مثل باقي ضباط الثورة وانه كان في الظل لفترة طويل وانه سوف يساعد على الاستقرار السياسي في النظام المهزوم بعد النكسة ويدعم شرعيته بعد 9 – 10 يونيو الجماهيرية وانه سوف يكون وجه جديد في النظام بدلا من عامر والبغدادي وذكريا محيي الدين وغيرهم


سادساً : أخطاء عبد الناصر أكثر فداحة وأكثر كارثية .. لكن الفرق بين عبد الناصر وغيره في سياسته وفي أخلاقياته انه كان يعترف بالأخطاء.. وكان يعمل وبجد وإخلاص على تصحيحا واستدراك ما تم اهماله أو التقصير فيه أو التهاون معه وهذا تجلى بصورة لا مثيل لها في التاريخ العربي بي ( بيان 30 مارس ) إذا كنت تعرف شيء عنه .


أما غيره لا يعترف ولا يتحمل مسئوليته تجاه ما اخطأ فيه ولا يعمل على إصلاحه أبداً .. بل العكس يدافع ويدافع عنه إلى ابعد مدى وهو يعلم انه على خطأ وهذه هي المكابر وهوى النفس الذي كانت بعيده كل البعد عن هذا الرجل وما ميزه عن غيره .


ثامناً : أنت مع احترام لك ولكل الناس لست أحب مني ولا تطالب أكثر مني بالعدل وأنت تقول ولا تزروا واذره وزر أخرى ،،،

أنا أقول لك بعد بسم الله الرحمن الرحيم ( ولا يجرمنكم شنأن قوم على ألا تعدلوا اعدلوا هو اقرب للتقوى ) أنا اكره أفعال السادات وسياساته ومشروعه الغير وطني والغير قومي وطلبت منك أن تبين لي ما ذكاء وعبقرية السادات الفذة في سياسته ومشروع ولكن قمت بكيل الأسئلة والاستفسارات والتوضيحات ولم تجبني إجابة واحدة عن عبقرية السادات الفذة خوفاً مني ( ..... باني لا اقتنع ) أقول لك أخي :

أنا أوعدك أن أكون عادل واوعدك آن أكون موضوعي واوعدك أن أكون نزيه في ردي دون النظر إلى كرهي لسياسات السادات


بس أحب أقول لك شيء بسيط قبل أي شي ... لا تستطيع أن تقنع إلا بما هو مقنع .. وله وثائقه وله حقائقه التاريخية والموضوعية .. الموضوع ليس موضوع مزجات يا أخي الكريم


شكراً لك على أتساعد صدرك

عطش الصبار يقول...

قلم رصاص
السلام عليكم
انا عايزه اطمنك ان لافيه حرب ولا يحزنون لاننا رافعين شعار ان حرب اكتوبر اخر الحروب ووكأنها مقوله نازله من الساء وعلمنا ولادنا ان حب البقاء اقوى من الكرامه
ولما نعيش على هامش الحياه الكريمه احسن ما نموت تبقى الحياه حتى لو كانت بدون حدادنى من الانسانيه افضل بكتير
فضلنا سنين نتريق على عبد الناصر بفكر احمق وكاننا مسكنا على الراجل خطألايغتفر انه رايح افريقيا يعمل ايه ووووالخ
دلوقت ياريت ننصف الرجل عرفنا ليه كان فى افريقيا
وعرفنا ان السلام ده وهم
احنا بنعمل سلام عشان نحافظ على ولادنا واسرائيل بتحاصرنا فى كل مكان اهو دلوقت لاالسلام حافظ على ولادنا ولا هيحافظ على الشعب من اصله

عموما قدامناالبحر نحليه ونشرب
وبكره برضه اسرائيل تشوف لنا حاجه للبحر
ارجو ان تقبل تحياتى واعجابى بمدونتك

ستيتة يقول...

لك عندي واجب على هيئة رجاء
فهل من مجيب؟
ولو كان الواجب ده ضد اهدافك الشخصية من فتح مدونة فأنا اعذرك واتفهمك ومفيش مشكلة ان شاء الله

ليس فقيرا من يحب يقول...

وياترى دى اوامر رئاسيه عليا ولا ايه

يعنى مسموحلى امتنع عن الشرب ولا اشرب

احسن ماقفايا يضرب هههههههههههههه

والله بجد هم يضحك وهم يضحك برده

يا اخويا طب احنا نعمل ايه

الحل فى الكلمتين الاخرانيين

نامى يا مصر اصلا هيا نايمه من زمان

ولما تصحى ان شاء الله هيكون مش باقينا ولا حاجه

ان شالله تكون بخير دايما ياريس

تقبل تحياتى

Twitter Delicious Facebook Digg Stumbleupon Favorites More

 
Free Web Hosting