أحداث 24 ساعة

الرجل المناسب في الوقت المناسب





هل حقا يمكن أن يصبح الدكتور محمد البرادعي رئيسا لمصر في 2011 ؟!
ولما لا ؟!

فنحن الأن في مأزق سياسي حقيقي ..الرئيس مبارك تقدم به العمر وأصبح لايستطيع بالفعل من الناحية الواقعية قيادة البلاد لفترة قادمه .. إلا إذا فرط في صلاحياته الرئاسية علنا لمن يقع عليه اختياره من حاشية نظامه مع بقاءه في الصورة رئيسا كما هو!

وهناك شواهد تدل بقوة على نية النظام توريث الحكم بما له وماعليه الى نجل الرئيس جمال ..وسواء اتفقنا أم اختلفنا على شخص جمال مبارك.. فالمشكلة في رأيي الشخصي تكمن في نفي كبار مسئولي  الدولة وعلى رأسهم الرئيس ونجله هذا الطرح .. وفي مناسبات عديدة.

في حين نجد النظام نفسه وبحزبه الوطني يسربون وبقوة نية دفع جمال مبارك الى سدة الحكم تحت ستار انتخابات يعلم الجميع أبعاد ماسيتم فيها .. أي أننا أمام موقفــــــــــين متناقضين .. نفي نية الترشح .. وفي ذات الوقت التحضير والترتيب للوضع المنفي بقوة

الأدهى في رأيي الشخصي أن بعض قيادات النظام والحزب يعلمون أن الموضوع يشغل بال الناس هذه الأيام بشكل كبير جدا. ومع ذلك هم ينفون ذلك ويؤكدون أن انتخابات الرئاسة المصرية القادمه لاتعني أي أحد من المواطنين وأن كل هذه الزوبعه مفتعله من بعض قوى المعارضه والعناصر المدعومه من الخارج بهدف زعزعة الاستقرار الداخلي.. والحقيقة هم يقصدون استقرار وضعهم وليس الوضع المصري بشكل عام!
                            
وانا رأيي أن هذه كارثه ..طب لما الناس لايعنيها اهم حدث سياسي سيأتي على البلاد في 2011 أي خلال سنة من الان ..إذن ماهو الدورالذي يلعبه الحزب الوطني في الحياه السياسية المصرية وباعتباره حزب الأغلبيه الحاكم ..الحزب ده بيشتغل ايه بالظبط في البلد لما قياداته المعتوهه ذهنينا تطلع علينا بهذه التصريحات المستفزة ..ولكن سبحان الله رغم ذلك ، هم خير من عبرعن حقيقة وضعهم الحزبي البائس.

نرجع لموضوعنا الأساسي وهو انتخابات الرئاسة

دائما مايتحجج المحسوبين على الحزب الوطني والنظام أنه حتى الأن لايوجد أفضل من جمال مبارك للمنصب وأنه الأكثر خبرة من أي أحد  يمكن التفكير في الدخول
أمامه باعتباره متربي في المطبخ السياسي وصنع اتخاذ القرار .. وبعض الأغبياء يقولون : انه بيتكلم انجليزي كويس اوي .. وبيعتبر ان دي ميزة ومعيارللتقييم!!!

افتقاد الساحة للبديل القوي حتى وقت قريب جعل البعض يرى أنه فعلا لايوجد أفضل من جمال مبارك للمرحلة القادمه باعتباره أقوى إسم مطروح .. لكن بعد طرح اسم عمرو موسى من بعيد تغيرت الصورة نسبيا واصبح لدينا أمل في التغيير مع تحفظات البعض على سن عمرو موسى، وبعض مواقفه.

وكنت في نفسي أمل أن يفكر بجدية الدكتور البرادعي في انتخابات الرئاسة لأنه الأفضل على الاطلاق .. وبالفعل فعلها الرجل وفجر مفاجأه من العيار الثقيل جدا عندما أعلن عن نيته خوض انتخابات الرئاسة القادمة اذا تم احاطتها بالنزاهه والشفافية .. وقوبل تصريح البرادعي بارتياح شديد جدا ..وأمل عارم من جانب النخبه المصرية وصفوة المثقفين بل والناس البسطاء ..وقوبل أيضا بانزعاج شديد من جانب الحزب الوطني وقلق وارتباك لايمكن اخفاؤه على وجهوهم وتصريحاتهم بل وتصرفاتهم وكأن يوم القيامة قرب!

والدكتور البرادعي رجلا غنيا عن التعريف للقاصي والداني .. يعرفه الجميع .. ويعرف من يكون ومن أين أتى وماذا فعل لخدمة بلاده .


أظن أن الرئيس  يتمنى الخير للبلاد والعباد ..وأظن كمان انه يتمنى رئيسا قويا-نيتي طيبة- لمصر.. يحافظ عليها وعلى مركزها في الشرق الأوسط !

وانا أشعر مجرد شعور انساني انقله لكم الان بدون تحوير ولاتدوير ، أن جمال مبارك فارض نفسه على والده الرئيس ..وأن الرئيس في قرارة نفسه لايريد نجـــــــله رئيسا لمصر..ويتمنى ان يجد رجلا قويا بحجم البرادعي يوكل اليه مهمة انتقال  سِلمي للسلطة من خلال انتخابات حتى لو كانت غير نزيهه. لكن يبدو ان العند سمة مسيطرة على الرجل، بما يرهن مصير أمة كاملة بمزاج هذا الرجل.


ولذلك ومن هنا أتمنى أن يضع الرئيس مبارك عودة رجل بحجم محمد البرادعي للوطن بعد انتهاء ولايته كمدير عام للوكالة الدولية للطاقة الذرية ، في اعتباره وأن يعطيه الفرصه كاملة لإثبات نفسه وألا يسمح لنظامه وحزبه الحاكم بوضع العراقيل أمام امكانية وصول الرجل لقيادة مصر الفترة القادمة.. وذلك إن كانت هناك نية حقيقية من جانبه للحفاظ على مستقبل الدولة المصرية.

ولكن على الجانب الاخر ، يجب على الدكتور البرادعي ان يعد العدة من الأن .. فهو مطالب بالحصول على موافقة 250 عضوا من اعضاء البرلمان بمجلسيه الشعب والشورى والمجالس النيابية المحلية وذلك للترشيح كمستقل..اعلم ان الحزب الوطني سيحاول بقوة التصدي له وسيضيق عليه فرصة الحصول على هذه الموافقات !

من هنا فليس أمام الرجل سوى الانتماء لأحد الأحزاب السياسية الموجودة والعضوية في هيئتها العليا حتى يكون موقفه القانوني والدستوري سليما كي يكون بمنأي عن دعاوى المحبطين لهذه الفرصه الذهبيه .

وأنا شايف ان حزب الوفد هو أكثر الأحزاب السياسية الموجودة الأن يمكنها ترشيح البرادعي من داخلها .. وذلك بصرف النظر عن وضع الحزب الآن ودوره المتراجع جدا في الحياه السياسية المصرية .. فكلكم تعلمون جيدا ان الحزب الوطني هو اللي مضيق الخناق على جميع القوى الوطنيه وعلى رأسها حزب الوفد .. وانا رأيي ان حزب الوفد الأفضل لأسباب متعددة اهمها انه حزبا ليبراليا حقيقيا له جذور وطنيه ضاربه في التاريخ .. ويمكنه من خلال شخصية قوية كالدكتور البرادعي ان يعود  من جديد لقيادة مصر في هذه المرحلة على الأقل.

أتمنى ان يحدث ذلك السيناريو او شيئا قريبا منه..لكسر حاجز الصمت والملل السياسي اللي احنا عايشينه .. واحد زي البرادعي لو محسش بجد برغبة الناس كلها في ترشيحه للرئاسة ..فرص نجاحه هتكون ضعيفه جدا.

أي فكرة بتبدأ دايما بحلم ...........

وأنا رأيي أن الأحلام وقود النجاح .................

اعذروني على الاطالة .............

لكن كان لازم اتكلم .................................

ولو بطلت اتكلم هموت .............

تقبلوا تحيتي

قلم رصاص

35 تعليقات القراء:

عابرة السبيل يقول...

معلش يعنى
الناس مش مهتمة لانهم عارفين اللى هيحصل
او مطحونين فمش فارقة معاهم
او يائسين فبرضه ما عدتش تفرق


ده اولا

اما ثانيا
مافكرتش ليه الوطنى بينفى اى ترشيح لمبارك او جمال؟
اولا عشان ما يهيجوش الناس ثانيا عشان يقيسو قد ايه الناس عايزة جمال او عايزة غيره عشان يعملو حسابهم فى التزوير

اما ثالثا
ماحدش يكره ابدا ان يكون رئيسنا زى محمد البرادعى او عمرو موسى او حتى جمال طالما انه هيعمل اللى فى مصلحة الشعب

والله اعلم

الشعب لابد له من حكومه تشكمه يقول...

حتى انت يابروتوس...قول تانى باه ايه اللى يخلينا نرشح البردعى:؟؟
هقولك رد انا قلته قبل كده:

هو البرادعى عنده كام سنه؟؟؟؟؟؟؟؟؟ 70؟؟؟
جميل نطلع من شيخوخه ندخل فى شيخوخه....

وبعدين البرادعى يعرف ايه عن مصر؟؟ بيشوفها فى التليفزيون؟؟؟؟
يعرف ايه عن احتياجات المواطن فيها؟ يعرف الدويقه؟ يعرف اسطبل عنتر؟؟؟؟؟؟ ولا يعرف شرم والغردقه؟
البرادعى يعرف نظام التعليم اللى عندنا ماشى ازاى؟؟؟؟؟؟؟؟؟؟؟؟؟؟
انا ضد اى واحد عاش عمره كله بره مصر والمفروض انه يرأسها..
زيه زى زويل اتنين قضوا عمرهم فى المعامل والعلم والمفروض دلوقتى يباوا رؤساء؟؟..

لو اتعمل الدستور وقدر البرادعى يترشح؟
يباه البرادعى ولا عمرو موسى؟

أبو العريف يقول...

السلام عليكم

هو احنا كمواطنين عاديين

نعرف ايه عن البرادعي او غيره

نعرف ايه عن افكاره وتوجهاته السياسيه

احنا اينعم مش هنختلف عن المناصب

اللي شغلها

وعن اعتباره واحد من كبار القانونين زي ما قلت

لكن احنا محتاجين الاول نسمعه

ونعرف افكاره وتوجهاته

نعرف برنامجه الانتخابي

سواء هو او غيره

دا طبعا اذا ما اتنفذش السناريو المتوقع

انا شخصيا بحب عمرو موسي جداااا

لكن موضوع السن برضه مشكله

تحياتي

حلم بيعافر يقول...

هههههههههههههههههههه
والله العظيم اول ما شفت القرعة اللى منورة فى اول المدونة دى عرفت انه البرادعى(مش تقليس والله)
المهم مبروك ع الاستايل الجديد للمونة دون
الاهم بقى
هو فيه حد فى الدنيا بيخاف من الحق غيرنا؟
هو مجرد طرح فكرة انتخابات نزيهة بيزعجنا كده؟
والبرادعى دخوله اى حزب معارض هيسبب الكتير من الامتعاض داخل الحزب حتى الوفد اللى انت ذكرته بس مش مهم لو فيه امكانية يدخل وياخد الغطاء الشرعى واللحاف كمان
حتة ان الناس مش مهتمة دى مبقتش بمزاج الناس يابن خالتى وده خوف وتراجع اترسخ فى اذهان الناس فى اى مكان دانا لما جيت استفسر عن اللجنة بتاعة قيد وتصفية الانتخابات هنا ف البلد الناس فكرونى مجنون ولا عبيط وقالولى انت مالك؟
معظم الناس يابن خالتى بتقول اللى يجى يجى ومعظم الناس مش مصدققين ان حسنى مبارك ممكن يسيب الحكم ده اترسمه فى اذهانهم صورة اله يابنى وانا بستغرب من الجيل اللى فات ده كان بيهبب ايه وخلونا وصلنا لكده ازاى وكانوا ساكتين ازاى
اعتارضك على عمرو موسى عشان سنه مش فاهمه طب ما البرادعى كبير برضه
حكاية قيادات الحزب والمحسوبين عليه دى تعبانى اوى يا قلم افندى
تشوف دكاترة ورؤساء تحرير وصحفيين المفروض انهم كبار فكرا قبل سنا بيروجوا لحاجات غريبة للحزب ده يعنى حاجات غبية تخليك تشد فى شعرك
حتة اننا وصلنا لاننا نتخب جمال مبارك لانه الاحسن دى عملها الحزب برضه بتضييقه على الاحزاب التانية وقتل اى فرصة ظهور كادر فى اى حزب تانى
وبعدين لو فيه حد عايز يترشح من اللى انت قلت عليهم المفروض يخشوا ف اللية من دللوقتى
سلاااااااااااااااااام وللكلام بقية

Angel يقول...


السلام عليكم

مساء الخير (:

أنا بصراحة ماليش في الحاجات دي خالص
ولا اعرف مين البرادعي ده
بس انا شايفه زي شيما ما قالت نطلع من شيخوخة ندخل في شيخوخة

تعرف أنا اللي يهمني ايه ان ربنا يرضى عن بلدي ويتصلح حالها
كل انسان في البلد دي مسئول عنها
احنا بس بنقول الحكومة والرئاسة هما السبب بس كل واحد فينا مسئوووول

فا مش هتفرق لو اخترنا حد ونجح واتغيرت الحكومة بأكملها المهم اننا نتغير

بس خلاص

Angel love

ليس فقيرا من يحب يقول...

سلام عليكم

اولا لولولولولولولولى على اللوك الجديد

ثانيا ولا كأنى قريت حاجه

بص يا عالم تطلع ستى اسخم من سيدى ولا

ايه الايام هيا هتورينا

مع انى بحب الواد عمورة ده بس يا

خسارة عجوز احنا عايزين نشجع

الشوباب ايه رئيك ترشح نفسك للرئاسه

ونضخ دماء جديده فى جثه الشعب المصرى

هههههههههههههههههههههه

حلوة دماء جديده دى

اقعد بالعافيه

شاب فقرى يقول...

والله يا قلم يا أخويا

كلامك دا أثبتلى إنى بفهم مش شوال جوافه


أنا متفق معاك 100 %

قلبا وقالبا

وبالذات عالبرادعى

اما لو البرادعى وعمرو موسى مش داخلينها يبقى خلاص جمال يخش الانتخابات بس على فرص ان فى ناس كتير هتترشح

يعنى حتى لو مش داخلين فجمال خيارنا الاخير

تحياتى على وجهات النظر المحترمة بجد :)

اخوك الفقرى

نهر الحب يقول...

والله كلام جميل
بس الكرسى فى بلدنا شكله مسحور من ايام الفراعنة ؟!!

الزنارى يقول...

سمعت شئ لم أتكد عن صحتة بخصوص التعليم
فى برنامج الطبعة الاولى قال احمد المسلمانى
أن البرادعى ضد مجانية التعليم
يعنى بلاش منة احسن
نع خالص تحياتى و تقديرى
أحمد الزنارى

~PakKaramu~ يقول...

Visiting your blog

همسات تربوية يقول...

نعم نحن في مأزق ولكن
هل ترون ان الحل والخروج من هذا المازق يتمثل في أن نأتي برجل ولو كان مثل د البرادعي
المأزق خطير ومتشعب فهو سرطان يسري في هياكل الدولة يحتاج إلى استئصال من الجذور وتغيير كل مكونات هذا النظام وكل روافده
والا فلن ينصلح الحال ولن يزول السرطان ولن نخرج من أزمتنا ومأزق أمتنا

صبرني يارب يقول...

هو انا عندي سؤال لكل الناس يا فندم

هو اي حد كان اي حاجه بره يبقى حلو وعليه عسل وسكر وينفع ما ينفعش ليه ؟

ما فاروق حسني فرقت معاه بنط
كان يجى يرشح نفسه بكره ونقول اه ماهم اختاروه نختار وراهم ؟؟

مع الفارق بين المنصبين اوك

الا ان اساسا اساسا هذا الشعب حاليا لا يصلح لان يختار

احنا اصبحنا شعب مفتقد الهويه والراي وكل حاجه

بالنسبه لجمال مبارك مش شايفه ان ابوه بريء مما يحيكونه فى الحزب

اطلااااااااقا

وسواء جمال مبارك او اي حد من حاشيته هانبقى تقريباااااا ما عملناش اي حاجه

هاتفضل راس الافعى هى هى وجذور الفساد ضاربه فى الارض

البرادعي او غيره او غيره

المهم يسيبونا نختار حتى لو اختارنا غلط نبقى نصححها بعد ست سنين

بس نقدر نصححها مش كددددددده

الوفد
هاو كام يا فندم ؟؟
الحزب المفروض انه مش مجرد رايه امشي فى ظلها عشان اتشرح من غير توكيلات وخوته ويحصله زي ما حصل لايمن نور

الحزب ده على حد علمي يعبر انتمائي له الى ايمانى باتجاه وفكر وولاء سياسي معين

تسمح حضرتك تقولي فجأه كده يروحوا ياخدوا واحد يعملوا من قيادات الحزب عشان عايزينه يترشح ؟؟

طيب ما شوفناش الهمه دي ليه المره الى فاتت

ما كان فى مليوووووون واحد فى مصر ينفع يعملوا معاه كده الوفد

جابوا الاخ الى كانوا جايبينه من كومبارس مسرحيه على مسرح الدوله ده ليه


ليه بتتك على الزرار وتفتحنى بس

ادينى رغيت وانت قايل خش فى الموضوع

تحياتي لحضرتك في اول زياره لمدونتك

مسدس صغير يقول...

اولا بوست هايل
ثانيا انا بجد محتار حيرة غريبة بين عمرو موسى والراجل ده
يلا ربنا يسهل
بس مش عارف قلبى حاسس ان مفيش حد منهم هيترشح
اترشح انا
هتدينى صوتك؟؟
ههههههه
عارفك ندل وهتدى للحسينى ابو قمر
ههههههه
احييك على البوست

قلم رصاص يقول...


عابرة السبيل

مرحبا بك اختي الكريمة في زيارتك الاولى

انا اختلف معاكي في اولا .. لأنه الناس فعلا وان اظهرت عدم اهتمامها او عدم اكترائها بشخص من سيأتي ، إلا ان ده مش مؤشر على عدم رغبتهم في التغيير وذلك لتغيير اوضاعهم البائسة التي يعيشون فيها وينسبون الفشل دائما للنظام الحالي
ودي شريحة كبيرة جدا من المجتمع

لكن انا مع حضرتك في ثانيا ، ممكن جدا يكون الحزب بينفي لاختبار مدى قبول السيد جمال في الشارع ، واما عن حتة عشان استعدادهم للتزوير ، فهما كده مستعدين وبأي كمية !

واما عن ثالثا ، طبعا محدش يكره خالص بس جمال مبارك حتى لو ينفع عن غيره الا ان قدره انه نجل الرئيس وهي دائما ماتحسب عليه حتى لو كان لاذنب له في ذلك

نورتينا ودمت في حفظ الله


قلم رصاص يقول...


الشعب لابد له من حكومة تشكمه

"حتى انت يابروتوس" ههههههههههههههه

بتشتميني ماشي مااااااااااااشي

وبعدين انتي مالك ومال السياسة
يلا اتمشي اعمل لنا شاي هههههههههههههه

---

بصي ياستي هقولك

اولا البرادعي عنده 67 سنة مش 70 زي ما انتي قولتي يامفترية ههههه لأنه مواليد 42
واصغر من عمرو موسى بست سنوات اللي هو مواليد 1936 وعنده 73 سنة

وبأمانه والله الراجل باين عليه لسه كويس وبصحة جيدة فعلا .. عكس عمرو موسى اللي بجد ظاهر عليه التعب فعلا

وانا معاكي انه يعتبر كبير ، بس مقارنة بسن غيره ووضعهم الصحي من الاسماء المطروحه غير جمال زي الرئيس مبارك وعمرو موسى ، فهو الأفضل على الاطلاق

وبعدين متزعليش .. ايه رأيك ارشح نفسي ..واديني لسه صغير وانفع
وكمان خالي شغل .. وبصراحة عيني على الوظيفة دي هههههههههه

ده كان من ناحية السن والحالة الصحية العامة

واما من ناحية البرادعي يعرف ايه عن مصر وانه مبيشوفهاش غير من التليفزيون
ياستي انا هعتبر كلامك ده سليم .. بس ماهو الريس مبارك كان برضه كان رجل عسكري طيلة 57 ولايمت للسياسة بصلة وفجأة عين نائب رئيس الجمهورية وبعدها رئيسا للجمهورية الى الان

اما البرادعي فهو رجل سياسة طول عمره علاوة على انه قانوني عالمي .. دي نقطة

وبعدين انتي عاوزاه صغير سننا عشان ايه.. ؟ّ

عشان يبلط لنا فيها ويقعد له 5 او ست دورات لحد مايوصل للتمانين

ياستي اعتبري البرادعي فترة انتقالية لحد ماالبلد تعدي من الازمة اللي فيها .. احنا فعلا محتاجين فترة انتقالية ليس الا

وبعد كده يجي المناسب

ومعلهش اوعي توقعي نفسك في نفق مقارنة زويل بالبرادعي .. فشتان شتان بين الرجلين .. فزويل رجل علم وبس.. أما البرادعي فهو رجل سياسة وقانون .. وهما المجالان المناسبان للقائد


ياريت تكون وجهة نظري المتواضعه وصلت

ويلا اعملي لنا شاي بسرعه ههههههههههه

نورتي ياشيما والله
ورأيك على دماغي من فوق

دمتي في حفظ الله

قلم رصاص يقول...


أبو العريف

وعليكم السلام ورحمة الله وبركاته

كلامك سليم .. بس ظروف الراجل برضه مسمحتش اننا نعرف عنه الكتير لأكتر من سبب

اولا هو لسه مخلص وظيفته الدولية الشهر الحالي .. ومفيش وقت كفاية عن انتخابات الرئاسة القادمة .. لكن اترك ده للوقت ولما نشوف ايه اللي هيحصل

زائد انك عارف ان الحزب الوطني يحتكر كل وسائل الاعلام الرسمية لنفسه وحاجر على كل وجهات النظر الاخرى مهما كانت حتى لو طالعه كمعارضه من داخل الحزب نفسه


واحنا محتاجين يااخي تغيير فعلا .. احنا تعبنا .. وانا وجهة نظري اننا نعتير البرادعي مجرد فترة انتقاالية لعملية تسبق الاصلاح الدستوري المطلوب

طب انت عندك الراجل اهه وفقا للدستور والقانون والمتطلبات ووفقا للوضع الدستوري الخربان الحالي .. مش هيعرف يدخل الانتخابات الا بالتحايل

فانا فكرتي ان الراجل ده ان قدر له ونجح بإذن الله يكون فترة انتقالية .. في عهده يعمل اصلاح دستوري باصدار دستور جديد لأن الحالي اصبح لايعد يحتمل التعديل .. كتر الضرب في الميت حرام ياجدعان

وبعد كده تبقى فرص الترشيح متاحه للجميع دون الحزب الوطني لوحده

نورتنا يا ابو العريف ياخويا

ودعنا للأيام القادمة ونشوف هيحصل ايه

دمت في حفظ الله

قلم رصاص يقول...


حلم بيعافر

ههههههههههههههههههه

منور يامحمد .. بس حلوة ياد حتة القرعه دي .. ودي ميزة للراجل انه بيفهم هههه

عندك حق في كلامك .. بس خد بالك عمرو موسى انا مش معترض عليه ابدا بالعكس دا حبيبي هههههه وباحترم الراجل ده جدا
بس هو فعلا اكبر شوية من البرادعي بحوالي 6 سنوات .. مش شرط الفرق.. بس المشكلة ان فعلا باين على عمرو موسىى التعب والارهاق .. عكس البرادعي خالص اللي لسه يبدو كشاب وقوي كمان

ومش شرط يكون الواحد اكبر ويبان عليه الضعف والتوهان .. ماعندك الاستاذ هيكل اهه معدي التمانين بكتير ومع ذلك دماغه لسه سسسسسسسسسم هههههههههههههههه

سيبها لله واما نشوف الجي ايه

دمت في حفظ الله


قلم رصاص يقول...


Angel


وعليكم السلام

ومساء النور كمان

منا قلت كده برضه .. المفروض فعلا انكن ملكوش في السياسة .. وابقي فهمي شيما كويس الموضوع ده وقوليلها تقعد في المطبخ وتسكت احسن لها هههههههههههههههههههههه


بس هي شيما معذورة في مسألة السن دي

انا معاكم انتوا الاتنين في ان الراجل كبير برضه .. بس ياجماعه هو اصغر شوية من عمرو موسى وكتير من الرئيس مبارك

زائد انه لسه يبدو عليه القوة والشباب والله بجد .. هو انا يعني مناسبه عشان اقف معاه هههههههههههههه

دا مجرد رأيي الشخصي

وفعلا يا اخت انجل عندك حق .. مفروض التغيير يجي من تحت تحت تحت خااااااااالص
من الشعب لأنه مصدر السلطات والمانح الشرعي لها

دمتي في حفظ الله

قلم رصاص يقول...



ليس فقيرا من يحب

وعليكم السلام ورحمة الله وبركاته

تصوري محدش بارك لي غيرك على اللوك الجديد

اشكرك والله على الزوق الرفيييييييييع

وثانيا ولا كأنك قريتي حاجة ازاي يعني
ههههههههههههههههه

دا انتي حتى لو كل وقتك في المطبخ .. ففيه

حاجة برضه اسمها المطبخ السياسي ..

صحيح احنا مش فيه دلوقتي .. بس تقدروا

تعبتروا مدونتي المطبخ السياسي

ههههههههههههههههههه

وفعلا عمورة موسى كلنا بنحبه بس بكل

أسف مهنج اليومين دول ومحتاج عمره

وعمره بفتح العين .. فتحها ياجدعان

مش فقئها سيبوا الراجل يشوف ههههههههه

وانا قلت كده برضه بخصوص ترشيحي انا

واقترحت ده لسه من شوية في ردي على شيما

ظبطوا مع بعض ومع الجيران والمعارف

واضغطوا علي وانا هترشح ومش هنزل كلمتكم الأرض ههههههههههههه

نورتي يا اخت رانيا

دمتي في حفظ الله

قلم رصاص يقول...



شاب فقري


منورني والله

ومين قال انك شوال جوافه بس يااخي

اكيد واحد فكهاني طمعان فيك بس

هههههههههههههههههه

ورأيك سليم ميه في الميه

واشكرك على المرور الطيب

وابقى طمنا عليك يابطل

في حفظ الله





قلم رصاص يقول...


نهر الحب

مرحبا بحضرتك

والله باين فعلا زي ماقولتي .. الكرسي شكله

معمول له عمل على رجل قرد مسلسل

ههههههههههههه

وادينا هنشوف الفترة الجاية

نورتي المدونة

في حفظ الله




قلم رصاص يقول...


الزناري

والله لو ده صحيح او مش صحيح هيبان الايام

الجاية .. ولو اني استبعد الكلام ده انه

يكون رأي واحد زي البرادعي

ومع ذلك يا اخ احمد ده مش مربط الفرس


ما كل الدول المتقدمه معندهاش تعليم

مجاني .. بس ده عشان هي دول متقدمه

وانا عندي امل بقى اننا نبقى دولة

متقدمه لو حصل تغيير سياسي جذري

عموما الايام هتوضح لنا المستخبي

نورتنا

في حفظ الله



قلم رصاص يقول...


PakKaramu

Hello and welcome to my blog sir

ههههههههههههههههههههه

شايفين يامدونين .. مدونتي وصلت للعالمية

بقى ناس من ماليزيا بيزورني اهه عشان

بس تعرفوا انتوا بتتكلموا مع مين يا

شعب ناكر الجمايل هههههههههههههه

هو الراجل بس داخل يقولي كلمة السر

للعملية الجديدة .. ومش هقولكم عليها

لأنها صفقة مخدرات كبيرة هتنقلني للمريخ

ههههههههههههههههه



قلم رصاص يقول...



همسات تربوية

ايوا يافندم بس عشان ده يحصل احنا برضه

محتاجين فترةو انتقالية بدل ماندخل في دوامة

لان البلد فعلا على اعتب مرحلة خطيرة جدا

ولو الرئيس ربنا يطول عمره جراله اي

حاجة وده وارد والاعمار بيد الله وحد

من الحوش الموجودين في النظام دول مسك

البلد مش هيسيبها ولو بالطبل البلدي

انما لو فيه انتخابات حقيقية وواحد

زي البرادعي نجح هتبقى كويسه اوي على

الاقل كفترة انتقالية

دمتم في حفظ الله

قلم رصاص يقول...



صبرني يارب

اولا مرحبا بحضرتك في المدونة للمرة الاولى
واكيد لينا الشرف بزيارتك

اما بخصوص التعليق بقى

اولا السؤال اللي حصرتك بتسأليه دلوقتي مش موجه غير للعبد لله لأنك هنا في مدونتي انا .. صح هههههههههههههه

طيب .. مين قال ان اي حد ينجح من المصريين برا يبقى على طول ينفع لأي حاجة في مصر .. هل معنى كده بقى ان الدكتور بطرس بطرس غالي أمين عام الأمم المتحدة الأسبق ينفع لرئاسة مصر .. مع تحفظي على سنه وحاجات تانية ..

هل معنى كده احمد زويل ينفع لرئاسة مصر.. لأه طبعا وبالثلث مينفعش .. لأنه رجل علم

وبخصوص مقارنتك لفاروق حسني بواحد زي البرادعي .. شتان شتان .. هو لو كان نجح ومسك اليونيسكو .. كان ينفع يبقى بني ادم حتى عادي.. عمر المناصب ماتغير من طبيعة الامكانيات الشخصية .. فاروق حسني وامثاله هيفضل ماهو مهما يمسك مناصب.. بعكس البرادعي .. الرجل فعلا عنده مقومات رجل الدولة الحقيقية بصرف النظر عن انه كان ماسك منصب عالمي .. وهل ده يعيبه

احنا زعلانين عشان بنقول مفيش في مصر غير ده او او .. طب خلاص لما احنا زعلانين اوي
كده .. خلاص خلي النظام الحالي زي ماهو طالما هو عاجبنا .. خلي الرئيس مبارك

بلاش .. تعالوا كلنا نقف مع جمال مبارك
ونسانده بقوة .. لأن ده اللي عايش جوا مصر وحاسس بيها اكتر من واحد زي البرادعي او غيره

اقولك حاجة تانية احسن .. تعالوا نقف مع أيمن نور .. مش ده مصري برضه وعايش وسطنا وحاسس بينا اكتر من البرادعي او حتى عمرو موسى

صدقيني اختي الكريمة والله احنا المصريين مايعجبناالعجب ولا الصيام في رجب .. بجد
مبقيتش فاهم احنا عاوزين تغيير بجد ولا لأ

وبعدين البرادعي ده هيبقى مجرد فترة انتقالية ليس الا .. وبعدين حضرتك شايفه حد واقف معاه ولا سانده .. وانتي شايفه يعني ان النظام هيسمح له بكده .. دا كل اللي انا كاتبه ده مجرد توقعات وتخمينات وأمال ليس الا .. حضرتك شايفاهم راحين جري عليه وبالأحضان


طب ماتطرحي حضرتك انتي وغيرك وغيرك اسماء نتناقش فيها وعن امكانية دخولها في الانتخابات ونقيش مدى مناسبتهم للمنصب

الراجل ده اصلا خساره فينا والله

طب عارفه الراجل ده نجح للوصول لمنصبه ازاي .. الدولة ماكانتش واقفه وراه ولا في مساندته في الوصول لمنصبه العالمي ده .. دا كان خبير قانون دولي مرموق فيها علاوة على انه ديبلوماسي مخضرم.. والوكالة اللي رشحته لرئاستها ومن اعلى سلطات في العالم ومن رؤساء العالم ومصر اتفاجأت بتولي واحد مصري المنصب الرفيع ده .. عكس تمام اللي عملته مع سي فاروق حسني اللي صرفت عليه دم قلبها مايزيد عن 200 مليون دولار حملة انتخابيه بس

عموما وجهة نظرك وصلت واحترمها بشدة

وانا كل اللي قولته في البوست ماهو الا

وجهة نظري المتواضعه اللي على ادي

يمكنكم الاتفاق او الاختلاف عليها

ونورتي في الزيارة الاولى

دمتي حفظ الله

☺ ☺ ☺

قلم رصاص يقول...



مسدس حبيبي

عجبك يعني البوست ؟

طب خلاص والله ماهو راجع

ههههههههههههههههههههه

فعلا نفس الحيره عندي .. بس انا مرجح

البرادعي شوية عن عمرو موسى

واما تجيلي هنبقى نكمل كلام

ثم اساسا يابني احنا والله مانستاهل حد

محترم يمسك البلد الفترة الجاية .. احنا

اخدنا على المرمطه .. بس انت لو مكانه

ترضى تحط نفسك في المسألة دي .. انا والله

لو مكانه ما ارضى .. لأنه وحد زيه حقق

أقصى طموح ممكن حد يحلم به في عالم

السياسة .. بس المسألة بس خدمة الوطن

وطالماان الوطن ولا الشعب هامه ولا عاوز

يبقى يتفلق هههههههههههههههههه

نورت الشاشه ياابوصلاح


☺ ☺ ☺

mohamed ghalia يقول...

لسه فى انتظتر ماذا ستسفر عنه الأيام
بس انا عندى تحفظ على بعض الشخصيات العلمية الى بتطرح زى الدكتور زويل وغيرهم
دول عقليات علمية رائعة
لكن مش بالضروة انهم عقليات سياسية
أكيد فى فرق كبير

جنات يقول...

ربنا يحفظ مصر .. والشعب المصري

موفقييين

الشعب لابد له من حكومه تشكمه يقول...

اممممممممممم طااايب..
اعملك شاى لانى بس عندى ذوق وبعرف اكرم الضيوف:)
ثانيا:
انا كنت فى البلوج عندى مش بتكلم غير فى السياسه بس تقدر تقول بدات اتنوع فى الفتره الاخيره..

ثالثا:
مش معنى ان واحده بتكلمك تقولها خلىكى فى المطبخ وانتو مالكو بالسياسه واعملوا شاى( اوعى تكون فاكر انى زعلانه لا انا بس بحرجك ههههههههههههههههههه...ا

رابعا:
عندك حق 67 من 70 فرق شاااااااااااااسع دا صغنن ولسه بيتدى حياته..عاوزاه صغير علشان البلد محتاجه تخرج من الشيخوخه اللى فيها ,محتاجه حد يجدد شبابها مش ياخدها معاه للاخره..

نتكلم جد باه:

عارف انت بتقول انه اللى عايش هنا عمل ايه مهو برضه مش حاسس بالناس..
بس صدقنى اللى عايش هنا يفرق جامد اوىىىى عن اللى ميعرفش اى حاجه عن البلد ولا حتى يعرف ظروفها ايه وظروف شعبها وحياتهم اليوميه يااخى دا مره قال انه عاوز يلغى مجانية التعليم دا ايه ده ؟
دى الحاجه الوحيده العدله فى البلد عاوز يقضى عليها ,ال علشان التعليم دلوقتى بيخرج نماذج سيئه ومش بتقهم....مش بقولك مش عارف حياة المصريين ماشيه ازاى.دا بدل ميقول نطور المناهج..!!!!!!!!


بالنسبه لموضوع فتره انتقاليه انت بتحلم ياحلمى اى واحد هيوصل للكرسى هيظببط نفسه ويجيب الامير معاه ويلزق فيه لحد ميموت..

ومش معنى ان حد يقول لا للبرادعى يباه البديل جمال مبارك او نور او زويل ولا اللى بيقولوا غنيم وكله كووووم وهيكل كوم تانى(شعب غريب والله)
بس يكون فى عقل ومنطق..

عارف بجد الحزب الوطنى نجح فى ايه؟
نجح فى انه ميخليش ادامنا بدائل ولا اى شخصيه قدرت تظهر على السطح وتقول ييس وى كان(زى اوباما)
احنا محتاجين حد زى اوباما حد يقولنا اننا نقدر ونغير ويخلينا نرجع نحلم من جديد..بس هو مين ده,هو دا السؤال...

على فكره وبينى وبينك كلامنا دا كله ملووووووووش اى لازمه لان انا وانت وكلنا عارفين مين هو رئيس مصر القادم:)

اللى موش عارف يتغير يقول...

هلا والله هلا
اعتقد انه لا صوت يعلو فوق صوت العركة
الماتش بس اتفرج عليه واجى اقولك رايى ايه ؟
يارب نكسب
.

قلم رصاص يقول...


محمد غالية

تمام كده يامحمد

هو ده اللي انا عاوز اقوله بالظبط

جزاك الله خير يابطل

نورتني طبعا وبشدة


قلم رصاص يقول...


جنات

اشكرك اختي الكريمة جنات

واهلا ومرحبا بأهل السعودية


قلم رصاص يقول...



الشعب لابد له من حكومه تشكمه

ههههههههههههههههه

على فكرة والله انا عارف انك بتتكلمي
في السياسة وبتفهمي فيها كويس جدا ..
بس انا حبيت أغيظك !


وبعدين انا متحرجتش ولا حاجة .. انا
مكسوف شوية بس هههههههههه
وانا طبعا مش ضد ان المرأة تتكلم في السياسة بل وتشارك فيها كمان .. يعني هي جت على دي يعني .. مانتوا حاطين عنيكوا على كل حاجة بيشتغلها الراجل ..جت علي دي يعني .. دا احنا معشر الرجال هنطالب بالمساواة قريب اوي هههههههههههههههه

انا بهزر طبعا

المهم بقى

انا اما باقولك ان البرادعي 67 مش 70 مش تريأه ولا حاجة.. انا بس بصحح معلومه .. عارف جدا انها مش تفرق كتير
بس حبيت اقولك ان الراجل من الناحية السنية والصحية اللي انتي اساسا فكرتيني بيها حبيت اقولك انه يبدو عليه كويس جدا وبحالته مش محتاج عمره يعني ههههههه!

واما عن جزئية ان الواحد من دول لما بيمسك المنصب بيجيب معاه الأمير عشان يلزق هو وعياله .. فعاوز اطمنك الراجل ده معندوش غير ولد وبنت .. الواد بيشتغل مخرج في لندن تقريبا.. والبنت محاميه هنا في مصر .. يعني خربانه خربانه من ناحية العيال .. بس انتي اديله فرصه هههههههههههه

انا بقى اللي تاعبني بجد والله يا اخت شيما اننا مفيش حاجة عاجبانا .. نقول في وقت من الاوقات : يجي اي حد غير الرئيس مبارك يبقى تمام اوي .. نيجي بقى نطرح اسماء محترمه ميعجبناش ونطلع فيه القطط الفطسه


طب سيبك من كل ده.. تصدقي بالله
انا لو مكان الراجل ده والشعب اختارني وجم واحد واحد باسوا رجلي .. خصوصا بعد الجزمة الجديدة اللي انا شاريها هههههههههههه .. والله ما ارضى اتحمل مسؤلية الشعب الاهبل بتاعنا ده اللي معادش عارف راسه من رجله

ايه يغري واحد زي البرادعي يكون رئيس مصر.. عنده فوبيا مناصب يعني ؟!

ماكفاية عليه اوي اللي وصل له .. اعتقد الراجل حقق منتهى طموح أي رجل سياسة في اي دولة في العالم .. خبير قانون دولي مرموق ..أستاذ لفترات متفاوته في اكبر جامعات العالم .. ديبلوماسي مخضرم لمدة تزيد عن 30 سنة في الخارجية المصرية والأمم المتحدة والمنظمات الدولية الاخرى وعلى رأسها الوكالة الدولية للطاقة الذرية .. وحاصل على نوبل في السلام .. وغيرها وغيرها .. وكل ده حققه بمجهوده الشخصي وبدون اي مساندة من الدولة المصرية كموقف رسمي .. ودي حقيقة لاجدال فيها لأي بني ادم ومعروفه للجميع ..عكس بقى اللي دفعته من قوت الشعب الغلبان ده عشان خاطر فاروق حسني 200 مليون دولا .. يعني مليار لحلوح مصري ههههههههه


اللي عاوز اقوله باختصار ان لو الرجل ده قبل تحمل المسئولية سواء جه بانتخابات او توافق كل قوى الوطن عليه ..فانا متأكد صدقيني انه هيكون ده تطوع منه لخدمة بلاده وليس طمعا في المنصب لأنه راجل شبعان مناصب اوي !

وفي الاخر سيبك من كل اللي بنقوله وتعالي انتي وانا وغيرنا نطرح اسماء تانية ونتناقش فيها ونتداول الرأي حولها ونشوف مين يكون افضل ومناسب للمنصب من وجهة نظرنا .. بدل الجدل اللي احنا فيه ده

تعرفي اني تعبت من كتر التناقض .. التناقض حتى اللي بيننا كشباب في الرأي .. مرة الاقي واحد نازل حب وعشق في ناصر .. وفجأة يقلب عليه .. ومره تانية غيره يعملها مع السادات..

ومرات تانية مع فلان .. وترتان وعلان

انا بجد والله مابقيت فاهم احنا عندنا مين كويس بقى .. كل حاجة ناقمين عليها ليه كده بالشكل ده.. كل حد مش كويس في نظرنا ليه.. طب تعرفي اننا بتوع كلام فعلا ومحدش فينا عنده اي قدرة لتحمل اي مسئولية في الدولة دي .. احنا شاطرين في الكلام بس

خلي كده مثلا من الصبح حد من المدونين يختاروه وزير للصحة ولا التموين (التضامن يعني ) ولا التعليم ولا ولا حتى على سبيل التجربة.. والله ما هنسلك نسد في اي حاجة!

عاوزين بس الفترة الجاية دي نهدى شوية كده ونحدد احنا عاوزين ايه بالظبط..
والاهم بقى في كل ده .. يكون عندنا شوية تفاؤل عشان التغيير عمره ماهيجي واحنا شايلين هموم العالم كده وباصين لكل حاجة بنضاره سودا

عموما متزعليش ياشيما للمرة التانية
وبعيدا عن السياسة .. لو سمحتي من فضلك .. فنجان شاي بس كواجب بسيط منك

هههههههههههههه

نورتينا

في حفظ الله




واحد من العمال يقول...

السلام عليكم

ده حلم كبير فعلاً

ان الدكتور البرادعى يحكم مصر

ومصر فعلاً تستحق راجل زى ده

بس أنا شايفه حلم صعب

بس لازم نحلم

لأننا لوبطلنا نحلم حنموت

على فكره الدكتور البرادعى بلدياتى من قريه إبيار مركز كفر الزيات

ودمت فى أمان الله وحقظه

رضا الكومى يقول...

والله أنا شايف إن اللى يحكم مصر لا يخرج عن المؤسسة العسكرية بحكم طبيعة المنطقة اللى بنعيش فيها
يعنى واحد فاهم المنطقة وعارف عدونا كويس ودايما فى دماخة الدفاع عن البلد فى المقام الأول
مش واحد قضى نص عمره فى المعامل و والنص التانى يدور على السلام
عايزين ننسى الكلمة دى شوية

تقبل مودتى

Twitter Delicious Facebook Digg Stumbleupon Favorites More

 
Free Web Hosting