أحداث 24 ساعة

إن لجهازك عليك حــــــــــق !


السلام عليكم ورحمة الله وبركاته

البوست ده ياجماعه مختلف شوية وهاتكلم فيه عن حدث تم معايا يوم الجمعة 17 يوليه الجاري
والمفروض اني كنت انزله يوميها ، لكن كالعادة النت عملها معايا وغدر بيا .. ورسـًـخ فكرتي عنه ومقولتي الشهيرة او التي أصبحت شهيرة لأنها طلعت حقيقية في حق جنابه .. واللي بقول فيها : النت في مصر شغال على لمبة جاز !

وبما ان الجاز قل في مصر بعد ماصدرناه لدولة إسرائيل العربية الشقيقة ههههههه ، طبعا ده كلام محصلش انا اللي بفتري بس ، وكل واحد على أد جازه .. فلو جازك نفد يبقى نتك وقف ..دي قواعد رياضية مصرية مفيش فيها جدال .. ولو مش عاجبك اخبط دماغك في المونيتور !

وطبعا النت كان شغال عندي زي الصاروخ بتاعي اللي بطلع بيه القمر ، لكن واحد صاحبي جدا كان عندي قبلها بيومين بيزورني في البيت وبأشكره على الزيارة من كل قلبي ، لكن بكل أسف نش النت عين تماااااااام جبته الأرض وبدأت أعرف يعني ايه نت بيفصل ههههههههههههههه .. المهم صاحبي ده انتوا طبعا كلكم عارفينه ، هو مبيتنقلش من المكان ده ..واما تدخلوا عنده هتلاقوا مدونته غرقانة لأنه بيدخل نت من خط الميه العمومي اللي معدي جنب بيتهم .. نتيجة انه معندوش نت ..يوم شغال و20 لأ .. سوهاااااااااااااااج ههههههههه.. المهم هو حسد النت بتاعي نتيجة الأحقاد الدفينه بين بلدنا كدولة عظمى في المنطقه وبين بلدهم .. فالفجوة التكنولوجيه بيننا وبينهم كبيرة جداااااااااا حاجة متتوصفش .. فأنا عاذره برضه .. وانا باعلنها على الهوا اهه ادامكم إني ممكن اديله حق اللجوء السياسي لبلدنا وانا هروقه هههههههههههههههه !


المهم .. باختصار جهاز الكمبيوتر بتاعي كان مهنج جدا ، وده الطبيعي بتاعه لأني بقالي مدة طويلة تخطت عدة اشهر من غير ما اعمل له صيانه على الهاردوير .. وطبعا اقصد تنظيف الجهاز من الداخل من الاتربة والغبار والعالقات .. وممكن كمان من الحشرات .. من ناموس وفيران ويمكن قطط
ههههههههههه .. والحقيقة انا دايما متعود اعمل صيانة للجهاز كل شهر مرة لأني استخدمه باستمرار وكان الله في عونه
..استحملني كتير والله .. وانا برضه استحملته ..عشان بس مينساش نفسه ويتنطط هههههههه .. فالجهاز ده اول ماجبته من 4 سنين كان سريع جدا وكان يطلق عليه لقب "الناصح" من قبل احد اقاربي ههههههه .. لكن دلوقتي بعد ماكبر في السن ، الفيروسات اصبحت ترتع وتعربد فيه .. وانا ايام ماكنت مهتم جدا بالبرامج والصيانة وهذه الاشياء لم يكن يجرؤ اي فيروس على الدخول من بوابة الفايروول اللي انا عاملها ولو عدى من الحرس ودخل .. كانت بتبقى واقعته سوده ..قبل ما بأقضي عليه .. بــًدخله غرف التعذيب وباعمله قهر نفسي لحد مايقر ويعترف مين وراه وبيعمل لحساب اي كمبيوتر معادي ههههههههههههه !

لكن بعد ماتركت العالم ده كله وركزت اهتماماتي المشتته على جانب او جانبين فقط بالنسبة للانترنت وعلى رأسها التدوين .. الفيروسات رجعت لي تاني وبقوة وبشراسه عن ذي قبل ، لدرجة اني خلاص استسلمت لهجماتها الشرسه بعد استغلالها لابتعادي عن الساحة ومتابعة كل ماهو جديد في عالم الفيروسات اللي كل يوم بيظهر انواع جديدة وبتاخد برامج الانتي فيروس وقت عما تتعرف عليها وتتعامل معاها بكفاءة.

المهم ، انا اضطريت في نهاية الامر اتعامل مع الفيروسات على انها جزء من الجهاز لاغنى له عنها ، ههههههه ، اه والله.. لدرجة اني اتعودت على وجود الفيروسات في الجهاز ومعدتش اقدر ملاقيهاش موجودة ، ومعدتش اقدر دمي ميتعكرش بسببها ، خلاااااااص اخدنا على بعض جداااااا .. زي تعود الانسان المصري على الفول لدرجة انه لو ما أكلش منه يوم واحد ، يتعب ويروح لدكتور هههههههههههه !

نرجع لموضوعنا بتاع صيانة الجهاز ونقول : من المعروف ياجماعه ان تراكم الاتربة على القطع الداخلية للجهاز الموجودة على المزبورد (اللوحة الام) يعتبر احد اهم اسباب تهنيج الجهاز او تعليقه أو تجمده .... الخ

وبما ان الجهاااااااااز خلاص جاب اخره ، ولم يعد هناك مفر من اللجوء للصيانة واعطاؤه حمام او دٌش بارد كي يرجع لحالته الطبيعية

وسأبدأ أقص عليكم الحدث الذي قمت بتأليفه وتمثيله واخراجه ، وبالصور كمان عشان اللي عاوز ياخد فكرة سريعه عن الكمبيوتر من الداخل ..يمكن تفيدكم هذه الحكاية حتى ولو على سبيل المعلومات العامة



اولا احضرت العدة وهي عبارة الادوات التي سأستخدمها في الصيانة

حقيقة الأمر ادواتي اصبحت بدائية جدا عن ذي قبل ، لأني لم أعد اهتم كما قلت لكم سابقا

اول حاجة احضرتها ، هي المفك الرباعي الرأس العادي ، ودي صورته لو تحبوا تتعرفوا يعني ههههههه ومعاه الفرشه ..محدش يفهم وجودهم مع بعض غلط دا شغل ياجدعان بلاش التكفير المش كويس ده ..دول يادوب معرفه وقت الصيانة بس هههههههههههههههههه





هتلاحظوا موجود معاهم قلم رصاص .. طبعا لازم يبقى موجود ..مش ده صاحب الليلة كلها .. دا حتى هو صاحب المدونة ، فمعلهش استحملوه ماهو برضه من نفسه يتصور ياجدعان ههههههههههههههههههه

وكان مفروض استخدم المعجون الحراري وأحطه على المعالج (البروسيسور) لكن بصراحة معادش عندي وكسلت اجيب .. بصراحة استخرسته فيه وقولت لما اغير الكمبيوتر بقى او اتجنن قريب جدا واشتري لاب توب !

ودي صورة المعجون برضه عشان مبقاش حرمتكوا من حاجة

والمعجون ده ياجماعه بيتحط على السطح الخارجي للبروسيسور او المعالج كجزء من نظام التهوية الخاصه بهذه المنطقه الصعبة .. اوعى حده يستعمله للأسنان هههههههههههههه

بدأت العمل ، بفك الكابلات كلها من البي سي كيس او علبة النظام زي مابيقولوا ..دي اللي هي الجهاز نفسه عدا المونيتور(الشاشة) ..وحطيتها في مكان فاضي في غرفتي .. وبدأت بسم الله الرحمن الرحيم

فكيت مسماري الكيس الخارجيين ونزعت الغطاء .. وفكيت كل حاجة في الجهاز وطلعتها برااااااااااه .. فكيت كابلي الطاقة والبيانات من القرص الصلب واخرجته منها .. وقولت له : اخرج برااا بيتي .. انت مش هاردي .. حسن يوسف هو بس اللي هاردي هههههههههههه !
ودي صورة كابلي الباور والداتا


ودي صورتهم الاتنين وهما متوصلين في الهارد ديسك ، حاجة تـِـفرح انا عارف

ثم فكيت الذاكرة العشوائية المعروفة بإسم الرااااااااااااااااااااااااااام أو أحيانا الرامة
واهي متلقحه ادامكم اهه .. اوعى حد يقولها حاجة عما اجي بس

وبعدين انتوا مش هتحسودها انا عارف لأنها مش كبيرة ولا حاجة
دي يادوب 256 و دي دي أر كماااااااااااان يعني من العصر البائد

والجهاز بيها ماشي اليومين تاتا تاتا وربنا يسهل ونطلعه معاش اجباااااااااااااااااااري




ثم دخلت على مرحلة نزع الألغاااااااااام ههههههههههه وفكيت مسامير مروحة المعالج ..وطلعتها مع المكثف او موزع الهواء برااااه الكيس عشان أنضفها من الأتربة والبلاوي اللي عليها .. ومش هقول لكم كان عليها ايه ..ربنا أمر بالستر .. دي كانت محتاجه عمال البلدية يجوا بالمكن الكبير بتاعهم

المهم دا شكل المروحة مع موزع الهوااااااااا

















وبعد ماشيلتهم وانانتهيت من ازالة الأتربة والغبار ، وجدتني وجها لوجه مع رئيس العصاااااااااابه .. البيج بوص .. العقل المدبر للكمبيوتر .. اكييييييييييد عرفتوه .. ألا وهو البروسيسور أو المعالج .. والعالج هو المسئول عن توزيع المهام بين كل قطع واجزاء واعضاء جهاز الكمبيوتر أثناء العمل
كانت عملية فك المعالج بالنسبة زماااااااان اول ماعرفت يعني ايه كمبيوتر كانت من المستحيلات التلاته ههههههههه..المهم اتعودت عليها ولقيت الموضوع سهل بس عاوز حرص عشان متحصلش خساير

المهم قولت بسم الله وفكيت المشبك المحيط للمعالج وشيلته بشويش ..وقلبته على ظهره عشان اطمن على اسنانه الداخلية ..بيسمهوها بينااااااااااااات بكسر الباء .. وعدتهم سنة سنة سنة ههههههههههههه لقيتهم زي ماهما الحمدلله
نضفت حواليه وركبته تاني بسرعه واستكملت العمل

اه من حق باعتباران سيادته غني عن التعريف وكلكم تعرفوا شكلوا بس هوريهولكم كمان مرة يمكن تكون دي اخر مرة تشوفوه فيها لأني نويت خلاص استغنى عن خدماته واغيره






















ودي ياجماعه صورة للكيسه من الداخل بعد ماشيلت منها كل قطع الهاردوير اللي ممكن تتفك .. لأن فيه حاجات مش بتتفك


شايفين الحتة الواسعه اللي جوا اللي لونها أزرق دي .. دي اللوحة الأم أو المزر بورد بالانجلش ودي اللي بيتركب ويتثبت عليها كل قطع الجهاز وكروته الخارجية زي كروت الشاشة او الفيجا الخارجية وكروت الصوت كمان والرامات.. وبتتوصل فيها كابلات الباور والداتا الخاصة بالهارد ديسك والسي دي روم ورايتر والديفي دي ان وجد يعني والمراوح الخ .. ده باللإضافه الى انها بيت البيج بوص المعالج بيتركب فيها .. فصحصحوا عشان محدش يضحك عليكو ويقولكم دا بيتركب على سطوح البيت زي طبق الدش هههههههههههههههه
ودي صورة جبتها من النت للوحة منفردة تقريبا شبه بتاعتي بالظبط من نوع جيجا بايت المشهورة، وانا باعتز بجيجا بايت جدا
وحطيتها عشان بس اوضح لكم عليها من خلال الأرقام اللي انا حاططها على الصورة .. دي ايه ودي ايه ودي ايه
رقم واحد - ده مكان تركيب وصلتي الماوس ولوحة المفاتيح او الكيبورد محدش يزعل

رقم اتنين - ده مكان توصيل مخرج الطابعه من نوع باراليل أو النوع العادي يعني..المهم تحتها بشوية مكان تركيب كابل الداتا الرئيسي بتاع الشاشة في الكيسه

رقم تلاتة - دي مخارج يو إس بس ..دي اللي بتركب فيها كاميرا مثلا او طابعه وصلتها يو إس بي أو قارئ كروت ذاكرة الموبايل أو كابل الموبايل أو أي أجهزة تانية بتتوصل في الكمبيوتر

رقم أربعه - ده مكان توصيل كابل الانترنت من نوع دس إس إل .. وجنب منه مخرجين من نوع يو إس بي زي اللي اتكلمت عنهم فوق

رقم خمسه - ده بقى كارت الصوت المدمج في اللوحة .. يعني بتوصل فيها سلك السماعات .. وطبعا بتبقى غالبا في المخرج اللي في النص غاااااااااااااالبا

رقم سته - ده بقى ياجماعه عش الدبابير أو بيت الأسد ههههههههههه.. ده مكان تركيب المعالج أو رئيس العصابه

رقم سبعه - دي اماكن تركيب الرامات او الذاكرة العشوائية..وكل ماتكون راماتك كبيرة من حيث السعه كلما زادت سرعة جهازك

رقم ثمانية - مكان توصيل كابل السي دي روم او رايتر

رقم تسعه - مكان توصيل كابل داتا الهارد في اللوحة الأم

رقم عشره - دي اماكن توصيل او تركيب كروت خارجية على اللوحة مثل كرت فيديو(فيجا او شاشه يعني) أو كرت صوت أو كرت فاكس للإتصال بالانترنت عن طريق التليفون .. أو حتى كارت دش لتستقبل القنوات الفضائية على الحاسب بتاعك

معلهش طولت عليكم ، بس والله حبيت اني يمكن بالبوست ده تستفيدوا حاجة

المهم بعد ماضفت كل حاجة في الجهاز وركبتها مكانها تاني ،قفلت الكيسه تاني عادي جدا .. فحبيت أكمل جميلي على الجهاز وقومت جايب سي دي الويندوز ونزلت له ويندوز جديد عشان يبقى الشغل صح بقىىىىىىىىى

ودي صورة سطح المكتب بتاعي أول مانزلت الويندوز وظبطت شوية حاجات في الجهاز
ولو احتاجتم طريقة تنزيل الويندوز للجهاز معنديش مانع أنزلهالكم بالشرح التفصيلي وبالصور
ولكن لن يكون هنا على هذه المدونة ولكن على مدونتي التانية اللي بظبط فيها اليومين دول
في هذه المجالات وعملتها والله عشان خاطركم انتوا فقط بحيث اللي يحتاج حاجة فيما يختص
بالكمبيوتر هبذل قصارى جهدي لمساعدته في حدود ماعرفه

والله المستعان

دمتم في حفظ الله

وطيبتم وطاب سعيكم وممشاكم
تحيتي / قلم رصاص

55 تعليقات القراء:

شبه إنسانه .....( سهوره ) يقول...

ايه ده

لالالالالالالالالا


أنا أول تعليق

أحمدك يارب


هقرا وارجع

شبه إنسانه .....( سهوره ) يقول...

ياااااااااااه

سبحان الله

تصدقنى لو قلت لك انى حلمت امبارح انى بتعلم تصليح الكمبيوتر

والله العظيم حصل

بركة والله

شبه إنسانه .....( سهوره ) يقول...

إحساس حلو قوى

اللى هو احساس الاحتلال

احتلت مدونتك يا رصاص

معلش بقى

اما بالنسبة للفيروسات

نفس العلاقة بينك وبينها زى حلاتى تمام

شىء لا يمكن الاستغناء عنه

شبه إنسانه .....( سهوره ) يقول...

اما الموضوع المهم بقى

ان البوست ده رائع

اللهم لاحسد

مش هعمل زي صاحبك الغلبان

تحية صباحية وردية

سهوره

بنجاواتى يقول...

الله الله الله

كلماتك رائعة واحساس مرهف هههههههههههههههههههههههههه


ايه يا عم ناقم ع الجهاز ليه كده ده فى اجهزة تانية ظروفها اصعب من كده بكتيييير

زمانك يا عينى اتعصت تراب والاوضة باظت من كتر التراب وقعدت تنضف فى الاوضة اكتر ما نضفت الجهاز ههههه

بس المفروض ان احنا نسمع كلامك بقى لما تكتب فى المدونة التانية عن الكمبيوتر وكده بعد ما قلت لنا ان جهازك اصبح هو والفيروسات كيان واحد زى الفول ععند المصرى ؟؟؟ انت متفائل فى الموضوع ده شوية ههه

تحياتى

Sweet Violet يقول...

"ودي صورة جبتها من النت للوحة منفردة"
اممممممممممممممممم
ماشى نمشيها هه
مع انك مش مشيت الجزء بتاع الرجالة عندى
واخد بالك طبعا ×_×
ايوة ايوة احم احم و تبص فى السما ولا كانك سمعت حاجة

ايه بقى البوست ده هه
انت كنت بتنضف الجهاز ولا بتنتقم منه ؟؟؟
ده انا كنت متخيلة كل حاجة بقراها
ازاى الجهاز بتاعك يسكت على كده
لا و كمان بتقول احتمال تجيب لاب توب وتستغنى عن خدماته
اعوذ بالله على البشر ياجدع
هى دى اخرتها يعنى
تؤتؤتؤتؤتؤتؤتؤتؤ
v_v

لا و ايه كمان عمال تتريق على اجزائه
مالها الرام هه ماهى زى الفل اهى
ولا البروسيسورجميل و ابن ناس
لكن هنقول ايه فى البشر
لا يعجبها العجب ولا الصيام فى رجب

لالالالا و كله كوم بقى و انك بتتكلم عن حالة الجهاز كوم تانى
على اساس انه هو مثلا اللى جاب الفيروس لحد عنده
مش هو اللى مأمنك على صحيته و انت اهملت فيها
بس بس
مش عايزة اسمع صوت
ولا بصى ولا افهمك

خلاص خلص الكلام لحد هنا
و ابقى خلى الاب توب اللى انت عايز تشتريه ينفعك
انت خلاص مالكش عيشة مع الجهاز ده تانى
×_×

***
نتكلم جد بقى
مش معقول كده على فكرة

لا بجد بوست مفيد تشكر عليه بجد

لكن بردو مالكش عيشة مع الجهاز ده خلاص
v_v

الفراغ يقول...

ماشاء الله ماشاء الله
ايه النظافه دى
ده انا من ساعة ماجيبت الجهاز خايفه اقرب ابص فيه حتى

زمانه مرتع للاتربه والحشرات
ههههههههههههههه


ادعيلى بقه انظفه
اصلى بخاف اوى العب فى حاجه مافهمش فيها

اللى موش عارف يتغير يقول...

لافته كويسه منك عزاء ابراهيم
بس ياريت تخلى صورة ابراهيم خلفية لهذه الكلمات الجميلة

حاول تدخل عالنت قبل العصر

غير معرف يقول...

ده إيه ده
ده غرام و انتقام مش تصبيح ابدا

فين بابا يجى يقرا..تعرف ان انا عمرى ما حفظت شكل الكمبيوتر بتاعه لان كل شهرين بيغيره ..ياريت تخده قدوة :)


و ياريت تغير سطح الكمبيوتر لأن واضح إن الكلام اللى مكتوب شكله كدة هو اللى جايب النحس P:

طوبه فضه وطوبه دهب يقول...

yah da el donya 3ndk 7lwa awy amal lo get 3ndna zyara htkrh el net wlcomputer wmsh b3ed el aktshafhm kman hahaha

ليس فقيرا من يحب يقول...

السلام عليكم

اتارى الجهاز بيتنضف من جوه
اول مرة اعرف دا انا شكلى عايشه فى العصر الحجرى
تقبل تحياتى وحمد الله على سلامه النت والجهاز

mohamed ghalia يقول...

شايف الكوره مزينة سطح مكتبك هههههههههههههههه
الموضوع بجد روعة تسلم ايدك

قلم رصاص يقول...

بقايا انسانة

ألف مبروك على أول تعليق

ياسلام دا احنا اي خدمة والله

ومبروك عليكم كمان دخول التاريخ من اوسع ابوابه .. وكمان الجغرافيا
ههههههههههههههه

ومصدقك والله ..عادي جدا ان الواحد يحلم
بتحصل والله ههههههههههه

بس الجديد انك تحلمي بتصليح الكمبيوتر
دي جديدة بصراحة .. ربنا يتمم بخير وتصلحيه بقى

ماهو ليه عليكي حقوق برضه .. حقوق التصليح والتنظيف ..ماهو من نفسه يعيش زي أي حد برضه

منورة يا اخت سهوره

دمتي في حفظ الله

قلم رصاص يقول...

بنجاواتي

ههههههههههههههه

اهلا اهلا اهلا يادوك

زيارتك دي بترفع عندي الروح المعنوية

وعندك حق انا فعلا الدنيا كانت عندي مقلوبه في الاوضه اكتر منها في الجهاز
ههههههههههههههه

والحمدلله ان امي ممش متابعة مدونتي ، كانت هتأيدك في الموضوع ده .. لأن ست الحبايب عندها النضافه احسن من ابنها
ههههههههههههههههه

اه والله وكويس اوي اني انتهزت فرصة عدم وجودها في البيت يوم هذه العملية الخطيرة وانقضيت على الجهاز ونضفته جدااااااااااا من جوااااااااا

وبوظت الأوضه جداااااااا من براااااا
ههههههههههههههههه

وان شاء الله هحاول اقطع العلاقات الديبلوماسية مع الفيروسات في الفترة القادمة اولم ا جيب جهاز جديد او لاب

لكن بخصوص المدونة التانية أنا مش هشتغل فيها الا لما تشجعوني

وشغلي فيها هيبقى حسب الطبات بتاعتكم انتم فقط كمدونين ليس الا

واللي يحتاج حاجة انا هشرحها بالتفصيل في بوست مستقل

احنا اي خدمة يابني أدمين
هههههههههههههههه

منورني بجد يادكتووووور حقيقي مش مجاملة !

دمت في حفظ الله

قلم رصاص يقول...

Sweet Violet


يا اهلا يا اهلا بالحزب النسائي المصري

ههههههههههههه

اه فعلا عندك حق انا فعلا عامل نفسي مش واخد بالي .. ولا كأنك بتكلميني أساسا
هههههههههههههه


وبعدين كفاية الجهاز كده انا عاوز مصلحته والله لأنه تعب معايا جدا

دا جزائي اني عاوز أريخه اليومين اللي باقيين له في هذه الدنيا
ههههههههههههههههه


دايما مظلوم ياقم رصاص

عموما انا بعمل كده لوجه الله ثم الوطن

واللاب دي مرحلته وانا اللي اتأخرت جدا على شرائه اه طبعا دي مراحل ولازم نجرب كل حاجة

بس المهم انا لسه محضرتش فلوس اللاب

فلموا من بعض كده وخليكوا متعاونين
ههههههههههههههههههه

منورة يااااااااا فندم والله

دمتي في حفظ الله

قلم رصاص يقول...

الفراغ

أهلا بحضرتك في الزيارة الاولى

ومتقلقيش تنظيف الكمبيوتر رغم انه مهم جداااااااا لحسن سيره وسلوكه الا انه ليس بالشبيئ الصعب

وانا كنت نفس الشيئ كنت بخاف اقرب له ليبوظ ولا حاجة هههههههههه

وان شاء الله انتظروني في المدونة التانية بانفرادات هتفيدكم جدا ان شاء الله قريبا

دمتم في حفظ الله

قلم رصاص يقول...

اللي موش عارف يتغير

اهلا بيك يا ايهاب

كيف حالك وحال ابو عمر ومعمر ومادو
ابقى طمني عليكم

وطبعا ياعمنا دا اقل حاجة اقدر اعملها لإبراهيم الله يرحمه يارب وتكون مثواه الجنه

وهنفذ اقتراحك ان شاء الله

وبخصوص الدخول بالنهار مش عارف حسب ظروفي

دمت في حفظ الله

قلم رصاص يقول...

انا ودماغي

دا انا كنت بس بعلمه الأدب
هههههههههههه

وبخصوص بابا وتغييره للجهاز كل فترة.. اه التغيير شيئ جميل ومطلوب بس الاهم انه ميكونش التغيير هدف في حد ذاته المفروض يكون وسيلة للوصول لأهداف احسن

يعني ايه ..معرفش
ههههههههههههههه

دمتم في حفظ الله

قلم رصاص يقول...

طوبة ذهب وطوبة فضة

ههههههههههههههه

من غير ما اجي انا متخيل الموقف أساسا

لأني مريت بيه كتيييييير جدا وربنا يسهل وينصلح الحال عندكم

وانتظروني في المدونة الجديدة بمفاجأت هتفيدكم ان شاء الله

نورتي يادكتورة

في حفظ الله

قلم رصاص يقول...

ليس فقيرا من يحب

وعليكم السلام ورحمة الله وبركاته

ايوا يافندم بيتنظف من جوا .. دي خطوة مهمة جدا مفروض تتعمل للجهاز المكتبي كل فترة 3 شهور على الاكثر عشان نحافظ على سرعة الجهاز وعدم تهنيجه

واي خدمة .. وانتظروا المدونة الجديدة هتفيدكم

دمتم في حفظ الله

قلم رصاص يقول...

محمد غاليه

ههههههههههههه

الكورة دي مش الفيفا يامحمد دي برنامج اسمه Network Scanner لتصفح أجهزة الشبكة

ولا يهمك ياباشا

واشكرك بشدة على التشجيع

دمت في حفظ الله وطيبتم وطاب سعيكم وممشاكم

ومازلتُ أتعلم يقول...

بجد يأخى
أنا عندى مشاكل محدش ممكن يتوقعها فى الجهاز بتاعى
واستعمال أنا بسميه بناتى
علشان مش بعرف اصلح حاجة
منظر الكيسة أصلاً منظرها عايزة
زرع كيسة جديدة

تحياتى على البوست اللذيذ

EMMY BABY يقول...

هههههههههههههههههههههههههههههههههههههههههههههههههههههههههههههههه

والله ضحكتنى ضحك بجد فى اول البوست

بجد بوست مفيد جدااا بالرغم انى لاافقه شىء فى صيانة الكمبيوتر او تغيير الويندوز واستحالة اجرب الا لو حد عملها قصاد عينى علشان ميحصلشى خساير زى ماقلت

انا هجيبك انت او سويت فيلوت تصلحولى الجهاز لما يبوظ وامركم لله ههههههههههه


بجد والله انا سعيدة بدخولى مدونتك بجد استمتعت جدا زى لما استمتعت بكومنتك عندى

وسيتم اضافة اللينك حالا علشان ارخم عليك دايما

تحياتى

ايمى

حلم بيعافر يقول...

ياااااااااااااااااه
كل ده شايله فى قلبك وساكت
ههههههههههههههه
معقولة ياجدعان قلم رصاص بيشتكى من الفيروسات ؟
صحيح دنيا دنية
يلا ياعم استحمل بقى ونضف وهات مفكاتك وعدتك

اتمني الشهادة يقول...

موضوع مفيد جدا وياريت لو تعمل لزاميلك الغلابه المدونين مركز صيانه كده وتعملنا كمان دورات تدريبيه لاننا فاشلين جدا في الصيانه

في يوم كده هناخد الخطوه دي وهنعمل حاملة نظافه لجهازنا ونستعين بالموسوعه دي ( ان لجهازك عليك حق )

جزاك الله كل الخير علي المعلومات القيمة دي

مسدس صغير يقول...

فعلا موضوع مفيد جدا
برغم التطور الغير معقول فى بلادكم الا انكم مش قادرين تضعو تصور للتخلص من الفيروسات سواء الكومبيوتريه او البشرية
اما بالنسبة لصاحبك اللى حسد النت بتاعك ده فأنا بستغرب ازاى واحد يحسد حاجة أو يحسد ناس فى خير
الاحسن له انه يتمنى الخير للناس
المشكلة انه كان بيزورك قبلها بيومين
حسااااااااااااااااااد
انسان غريب
فعلا انتو دولة متقدمة جدا جدا

دا حتى انتو بتفهمو فى صيانة الكومبيوتر اهوه
دا كمان انتو بتعرفو تنضفو الكومبيوتر من الاحقاد اللى فيه
مهو ناصح بقى
طب ايه اخبار الزلط اللى فى الكومبيوتر
اتمنى يكون بخير
بس فيه طلب نفسة تعمله
الطلب ده انك تفضح الشخص الحساد اللى حسد النت بتاعك على رؤوس الاشهاد ولا تأخذك به رأفه
ماشى
ههههههههههههههه
ماشى؟
ان موريتك

قلم رصاص يقول...

ومازلتُ أتعلم

أشكرك يادكتوره على المرور والتعليق

وفعلا انا مصدق ان فيه استعمال بناتي

لأنه فيه استعمال رجالي موجود اساسا

يعني تلاقي الشاب بيعامل جهازه دايما بعنف في بعض الاحيان..مثلا لو جه يقفل الجهاز واتأخر في الاغلاق..يضغط على زر الباور او يفصل الفيش ويجري

ههههههههههههههه

وطالما استعمال جهاز حضرتك بناتي يبقى لسه فيه امل في الجهاز ده بصيانته واعادة دمجه في المجتمع التكنولوجي من جديد

اطمني حضرتك لسه فيه امل ان شاء الله

بس حلوة اوي حتة عاوز زرع كيسه دي
ههههههههههههه

شكرا جزيلا مرة تانية

في حفظ الله

قلم رصاص يقول...

EMMY BABY

اهلا بحضرتك اختنا ايمي

نورتي والله

وكويس اني باعرف اكون سبب في اضحاك الاخرين .. والله ميزة باكتشفها في نفسي واحدة واحدة

وبعدين مين تطلع سويت فيوليييييييت دي
أساسا عشان تصلح زيي هههههههههههه

انا معرفش حد بالاسم ده

ههههههههههههههههه

لا مفيناش من الترخيم انا باقولك اهه
المدونة سورها متكهرب أي حد هينط من على السور ياويله
هههههههههههههههههه

نورتي يا اخت ايمي

واشكرك على التشجيع والاضافه والزيارة وتسديد ديون مصر كمان
هههههههههههههههه

في حفظ الله

قلم رصاص يقول...

حلم بيعافر

في كيستي وحياتك يابن خالتي مش قلبي

هههههههههههههه

ايوا يابني باشتكي من الفيروسات عادي جدا
انا بشر زيكم برضه من لحم ودم يا اخي
ومن حقي اتنغص شوية زيكم من الفيروسات

مش كفاية طول عمري التكنولوجي بحارب الفيروسات في كل مكان اينما وجدت

اما بعدت شوية عن الساحة الفيروسات بقى استغلت هذه الثغره الامنية الخطيرة المتمثلة في غيابي عن الساحة واخترقت الجهاز وعششت في الهارد بعيد عنك

والمفكات جاهزة وكل حاجة ولايهمني

منور يامحمد

في حفظ الله

قلم رصاص يقول...

أتمنى الشهادة

هههههههههههههه

ياعم الله يخليك على ايه بس الكلام الكبير اوي ده

انا على أدي بس بحاول يعني
ههههههههههه

ووالله فكرة فعلا الحملة دي ، اه خلاص حطها في الخطة وانا معاكم بمجهودي طبعا

وان شاء الله ادوني فرصه بسيطة كده كام يوم وهفاجئكم بموقع ومنتدى بشتغل فيهم اليومين دول وبظبطهم عشان عيونكم يامدونيين

دمت في حفظ الله

قلم رصاص يقول...

مسدس صغير

هههههههههههههههههه

اخيرا جيييييييييت ياعم مسدس

ايه يابني الغيب ةدي كلها

.. الا من حق .. مين معايا ؟!

عاوز مين يابني ؟

ياعم النمرة غلط قولت لك ..

ههههههههههههههههههه

وبخصوص الشخص ده انا عاوز نفسك معايا
ياصاصا ..لأني مش أده ومحتاجك في الموضوع ده هههههههههههههه

اشكرك ياحبيب قلبي على المرور الجمييييل
وتعليقك الأجمل اللي بأنتظره بفاغ الصبر


متخدش في نفسك مقلب بقى وتنسى نفسك
ههههههههههههه

وعندي ليك مفاجأة حلوة حلوة حلوة جدا
اليومين دول .. انتظرها

عشان بس مقلقكش ..انا بأعمل في موقع ومنتدى هيعجبوك جدا وانت في الخطة جدا
ياباشا انت ومرعي وناس يتعدو على الأصابع فقط
ههههههههههههههه

دمت في حفظ الله

clownlover يقول...

حمله نظافة كاملة
ههههههه
انا جديد في عالم التدوين ارجو المتابعة

سنابل يقول...

أما صحيح يا ولاااااد العلم نووورون

وبتقول يادوب سبته كام شهر من غير تنظيف أمال انا بقي اللي جهازى من يوم ما جه من 4 سنين ولا عبرته باى حموم زمانه بقي احراش وبرك ومستنقعات
طيب انا هاعمل زى ما انت قلت بالظبط بس لو حاجة باظت تبقي عليك بقي
ماشي ؟

جحا المصرى يقول...

هههههههههههه
معاك حق
الرحمة الرحمة
كل أجهزتنا بتقولنا كده
حلوه المعلومات الى فى الموضوع
خالص مودتى

قلم رصاص يقول...

clownlover

خلااااااااااص هنحطك في دماغنا

ههههههههه

منور عالم التدوين يابطل

اتمنى لك التوفيق

في حفظ الله

قلم رصاص يقول...

سنابل قمح

4 سنييييين من غير تنظيف
تلاقيه ياعيني عنده كلاب وقطط بتنخر في عضمه ههههههههههههه

لأ لازم يدخل ورشة الصيانة حالا
وتعلني حالة الطوارئ جييييييم فورا
هههههههههههههه

والنتايج علينا

دمتم في حفظ الله

قلم رصاص يقول...

جحا المصري

أهلا اهلا بحبيب قلبنا جحا

منورنا والله ياجحجوحه

ههههههههههههه

واشكرك على التشجيع

في حفظ الله

حياتي كلها لله يقول...

السلام عليكم
ياااااااااااا الله كل ده بوست
ما شاء الله طبعا ..لحسن البوست الجاي يكش ولا حاجةوأبقي أنا السبب (:

و أنا اللي كنت فاكرة أن بوستاتس طويلة !!!!

بصراحة انا مقدرتش أخلصه
بس رجعاله رجعاله لأنه بجد يستاهل

تحيايت
سلمي

قلم رصاص يقول...

حياتي كلها لله

وعليكم السلام ورحمة الله وبركاته

ولايهمك يا دكتورة سلمى

والله اللي بيحكم طول البوست هو غالبا محتواه بالنسبة للكاتب ، وده لما يتلقى نفسه اندمج مع فكرته اللي عاوز يوصلها للأخرين .. دا ممكن لو الواحد اندمج اوي يوصل يومين في بعض هههههههههههه

وطبعا لازم ترجعي تقرأي وتكملي الموضوع
لأن رأيك يهمنا طبعا يافندم

ودمتي مبدعة وفي حفظ الله

حلم بيعافر يقول...

انت يا ايها القابع خلف اشجار الجوافة
هى النسخة اللى شبه الفيستا اللى فى المدونة التانية بتاعتك دى بتنزل عادى ولا فيه حاجات؟
رد عليا بدل ماارمى نفسى من فوق سور الجنينة بتاعتكوا واجيبلك مصيبة
انت حر......

noon kiko يقول...

ايه ياعم مالهم السوهاجيه منشبهش ولا مانشبهش..ثم احنا اتعودنا على الفيروسات من زمان من قبل حضرتك احنا الاسبقيه فكل شىء..وكمان بننام والناموس ف حضننا ولو مفيش ناموس ننزل نجيب من البلاعه اللى جمب البيت..خير مش عاجبك..قال سوهاجيه قال..دول ملوك الصعيد وبر مصر كله
ثم انا مالى بكمبيوترك..مش لما اكون بهتم بجهازى ابقا صدعنى بجهازك
على فكره انا بس بنكشك..هههههههههههههه
بس حسك عينك تغلط فى السوهاجيه..دول هشتكه وبشتكه وملوك الانتكه يا معلم
واشوفك على خير مع فيروس قصدى ناموس قصدى..قصدى اشوفك على خيررررررررررر

قلم رصاص يقول...

حلم بيعافر

مالك ياض انت ومال الجوافة بتاعتنا

هه انطق .. اوعى تكون ناوي على عملية فدائية وتسرق الجوافة من الشجر .. واقعتك هتبقى هباب ههههههههههه

إرررررر مييييييين وراء وبتشتغل لحساب مين؟ !

المهم

بخصوص طلبك ابقى كلمني على الميل وانا اشوفك أو اترك طلبك في المدونة التانية
أوووووووووو تصبر علي شوية صغيرين بس
عما افتتح الموقع والمنتدى بتوعي اللي بشطب فيهم اليومين دول

اكيد مش هنساك

في حفظ الله

قلم رصاص يقول...

زهرة ربيعية

يا أهلا يا أهلا وسهلا بالصعايدة والنجعاوية
ههههههههههههه

وشهد شاهد من أهلها

بقى سوهاااااااااج بلدكم مرتع الفيروسات وموطن الناموس والحشرات ؟!

جميل جدا انك اعترفتي وشهد شاهد من اهلها !

كده انا هبلغ الحكومة يفنوا البلد بالقنابل الكفروسولية وأقراص الريد الملفوف في ورق سوليفان كي نحافظ على سلامة مصر وعافيتها
هههههههههههه

طبعا طبعا يافندم عارف انكم بتهزروا

ونورتي في اول زيارة

دمتي في حفظ الله

تلميذة سلمان الفارسى يقول...

يااااااه
الحمد لله خلصت
وانتهيت من مشاهدة الصور
هههه
استنونى بقى لما اقرى الموضوع
ربنا يديم بينكم الموده حضرتك والجهاز

غير معرف يقول...

:)))))))))))))

تعرف انني مش بفهم في الحاجات دي خالص .. ولا حتي ببقي عارفه اساميهم :)))

يلا ادينا خدنا كورس عندك اهو :))))

ومبروك علي جملة النضافه اللي سيطرت علي الكمبيوتر :)))))

قلم رصاص يقول...

تلميذة سلمان الفارسي

طب الحمدلله .. مع اني مش حاطط صور كتير
ههههههههههه

وياريت يكون البوست مفيد

منورة ياهندسه

دمتي في حفظ الله

قلم رصاص يقول...

hager za3bal

أهلا أهلا يادكتورة هاجر

جايه بنفسك هنا .. دا كتير والله

حقيقي سعدت بمرورك

------
"تعرف انني مش بفهم في الحاجات دي خالص .. ولا حتي ببقي عارفه اساميهم :)))
"

ولا انا برضه ,,, مش باعرفهم خالص
هههههههههههههه

وأي خدمة للشعب المصري المطحون

البلوج أكيد هيجراله حاجة النهاردة بمرور حضرتك وتلميذة سلمان الفارسي

ربنا يستر

في حفظ الله

وطيبتم وطاب سعيكم وممشاكم

Unknown يقول...

بقولك ايه؟انا لسه راجعة
من الشغل وجعــانة كمان
ومش حافهم حاجة خالص الا
لما أكل.اتغدى وارجع
اشووووووووف الموضوع
لانه باين عليه كبيييرر
خاااااااااااااااااااالص
وطنط الدكتورررررررررررررة
نونو ما بتعرفش اساساً فى كومبو
غير :افتح الجهاز,,,,,اغلق الجهاز.

Unknown يقول...

بس يعنى عايزة اسأل
هو انت حتعلمنا نصلح
كومبو؟حقا لو حصل ده
يبقى لك حلاااااااااوة
كبيرة عندى:دستة بريات:)

Unknown يقول...

بس برضه حكمن ولابدن احذرك
لانى لو أتعلمت ناس كتير هنا
حيتقطع عيشها(اولاد اختى)
وأكيد حيكرهوك فلازمن احذرك!

قلم رصاص يقول...

norahaty

هههههههههههههه

كلي يادكتورة هو انا حايشك

بس اهم حاجة متخليش جنبك حد من العيلة احسن شكلك جعانة اوي هههههههههههه

ومش توصل لدرجة قطع العيش ، انا على ادي برضه في الكمبيوتر بس بحاول

المهم نورتينا

في حفظ الله

اقدم عاصمه فى الحب يقول...

السلام عليكم

تسلم ايدك
يا كبير
.
.
انت فكرتنى انى اعمل حمله نظافه والله
.
مشكريين يا برنس
.
.
ليتك تتقبل مرورى
مودتى :)

قلم رصاص يقول...

أقدم عاصمة في الحب

وعليكم السلام ورحمة الله وبركاته

وانا معاك في هذه الحملة

ان احتجت شامبوهات ماشي

برسيل وتايد مااااااااشي

ولو رز بلبن برضه ماشي

هههههههههههههههههه

منورني والله

وطبعا ياباشا نتقبل مرورك وكلنا في

غبطة من أمرنا....!

فيه احترام لهذا الكهل المبهم

ههههههههههههههههه

نتمنى مداومة الزيارة يابطل

في حفظ الله

*البت المشمشية *حلوة بس شقية * يقول...

سطح كوكب قلم رصاص
انتا اجرت الكوككب لحسابك ولا ايه
وبعدين ليه حق الجهاز يصوت منك

قلم رصاص يقول...

البت المشمشية

اه طبعا ماهو كوكب قلم رصاص مش كوكب الزهرة او عطارد

ماهو كوكب قلم رصاص ده لسه مكتشف قريب

نورتي يامشمشية

دمتي في حفظ الله

Twitter Delicious Facebook Digg Stumbleupon Favorites More

 
Free Web Hosting