الحمدلله خلصت

بسم الله الرحمن الرحيم

السلام عليكم ورحمة الله وبركاته

الحمدلله اخيرا ياجماعه خلصت بعون الله الامتحانات على خير ورجعنا تاني للحياه التدوينية

نسألكم فقط الدعاء بالتوفيق بالنجاح في امتحانات التحريري

واحب اقولكم على حاجة جميلة حدثت معايا في المادة قبل الاخيرة وهي مادة القانون الاداري (المسئولية الادارية ) كان الوقت ضيق جدا والامتحان طوووووووووووووويل للغاية ، هو كان تقريبا كده المنهج كله ههههههههههههه

المهم اني مكنتش نمت ليلة الامتحان والتركيز كان مش عالي اوي ، فمأخدتش معايا غير قلم أزرق واحد فقط دون شيئ أخر

وطول الامتحانات مش راضي اغير الطقوس العجيبة دي تفاؤلا مني بهذا القلم رغم انه قلم عادي جدا ، ودايما بقيت استلف مسطره من اللي جنبي عشان بأحرج اني ابقى كبير اوي كده في السن _يجي 95 سنه_واشيل مسطرة ، داحتى يبقى عيب اوي ومبتقاش منظر أدام الامم المتحدة ههههههههههههههههههههه

المهم جيت في المادة قبل الاخيرة اللي قولت لكم عليها وفي اخر تلات دقايق تقريبا ، صاحبنا القلم وحيد السن من نوعه اياه ده وقااااااااااااااام فاااااااااااااااااااااضي هههههههههههههههههههه وانا كنت لسه مكتبتش نقطتين تلاتة مهمين جدا يمكن عليهم نجاحي في المادة والله ، فطلبت من المراقبة الفاضلة اللي علينا تجيبلي قلم ازرق بسرعة ، فكتر ستين ألف خيرها والله جابت لي قلـــــــــم من زميل او زميلة مش اخدت بالي ، وعينك ماتشوف الا النور ونزلت كتابة في اخر تلات دقايق دول .. وكأن العدو ورائي والبحر أمامي ، على رأي طارق ابن زياد ههههههههههههههههه

فالقلم ده بصراحة تفائلت بيه جدا جدا جدا لدرجة بقى اني نسيت واخدته معايا البيت ومرجعتوش لصاحبه او صاحبته ، من الاخر يعني لطشته ههههههههههههههههههههه لأني ارتحت له جدا وحصلت بينا كيميا ممكن تنجحني في المادة يوميها والحمدلله

بعد كده قررت اني اخد القلم ده لوحده برضه المادة الاخيره اللي امتحنتها امبارح ، فقد كان،،،، وكان ختامها مســــــــــــــــــــــــــــــــــــك

وعندي أمل عرييييييييييييييييييييييض جدا ان الدكتور يرق قلبه ويعطيني 20/20 لأني الحمدلله حليت فيها بما يرضي الله ثم يرضي الدكتور وان شاء الله يرضيني .. وانا قنوع جدا الحمدلله ومش هقبل أقل من الدرجة النهائية في المادة ههههههههههههههههه

وبالمناسبة المادة كانت الدعوى الدستورية

فأنا اعلنها من هذا المنبر اني احببت هذا القلم واشكره جدا على وقفته جنبي في الامتحان

ويوم ماربنا يوفقني وانجح في التحريري والله ليه علي اخده معايا في امتحانات الشفوي

بس مش ههينه واشغله ، هفسحه بس في شوارع مدينة المنصورة

ههههههههههههههههههههههههههههه

سعيد جدا اني خلصت بهذا الختام المسك واتمنى ان ربنا يكلل تعبنا ده على خير وناخد الدبلوم انا وكل

الزملاء والزميلات لأنه اكيد الكل تعب ، ولكل مجتهد نصيب

وسعيد اكتر اني وانا مروح في الطريق قابلت اخويا وصديقي الغالي علي مسدس صغير ووقفنا مع بعض شوية

وسعيد أكتر واكتر اني رجعت لقيتهم عاملين في الغدااااااااا محشي ورق عنب ، والورق للعلم محلي الزرع ، من الجنينة بتاعتنا
معلهش اعذروني ، بحبه جدا وهو من اهم الاكلات المفضلة عندي وكان لازم اقول حاجة عنه
هههههههههههههههههههه

وسعيد اكتر واكتر واكتر إني رجعت لمنطقتي وحياتي التدوينية اللي مقدرش اعيش من غير اني ابص واطل عليها

وانتظروني في البوست القادم ، وان شاء الله هيعجبكم

والسلام عليكم ورحمة الله وبركاته

اخوكم / قلم رصاص