أحداث 24 ساعة

خلي الرادار صااااااااااحي !


للمرة المليون وفي غير حالة الحرب بين العرب واسرائيل ، تستبيح الاخيرة المجال الجوي للأراضي العربية ، مخترقة إياه بطائراتها لتنفيذ مهام محددة وتصيبها بدقة ، ثم تعود أدراجها بكل سهولة .. وأصحاب الفخامة والسمو في سباتهم نائمون .. ثم بعدها لايفعلون سوى أنهم بالصوت يرقعون .. وللخدود يلطمون .. ولامانع من أنهم يشجبون وينددون .. الخ الخ !

أصبح هذا المشهد متكررا كثيرا من جانب الاسرائيليين .. وكأنه مثل نزهه للطيارين اليهود على أرض العرب ، دون أن يعترضهم أي شيئ..وكيف يعترضهم أحد وهو لايعلم أساسا بوجودهم.

فنحن اعتدنا في مثل هذه الحالات ، أن لانعلم عنها شيئا إلا من الاسرائيلين أنفسهم .. وذلك بهدف ، إما التفاخر بما لديهم من قوة ، أو بث الردع في النفوس العربية ، أو حتى إحراج الأنظمة السياسية العربية أمام شعوبها .. لعلمها يقينا عدم جرأة أي من هذه الأنظمة على الإعلان عن مثل هذه الأحداث .

وأشهر هذه العمليات ، كانت في 1981م عندما اخترق تشكيل من 4 الى 6 مقاتلات حربية اسرائيلية المجال الجوي للسعودية ، وانقض على المفاعل النووي العراقي ، الذي كان يسمى على ما أتذكر من مادة القانون الدولي في السنة التانية في كلية الحقوق ، مفاعل الأوزارك .. ودمره تدميرا كاملا .. ثم عادت الى مطاراتها بصحة وعافية .

يلي هذه العملية شهرة من سلسلة النكسات العربية المتسلسلة ،عملية تونس.عندما طارت الطائرات الحربية الاسرائيلية الى تونس .. تصوروا ..تووووونس .. اللي يفصلها عن حدود اسرائيل ثلاث دول .. وضربت مقرا للسلطة الوطنية الفلسطينية هناك .. وبالطبع عادت سالمة غانمة .. وكأنها كانت في مهمة قطف جوز حزم جرجير من تونس الخضرااااااا...!

هذا بالإضافة الى الاختراقات شبه الدورية بين حين وآخر للمجال الجوي اللبناني ..وسلم لي على سي حسن نصرالله ...! ثم النكته الكبرى ، وهي اختراق المجال الجوي السوري منذ أقل من عام وضرب أهداف بعينها هناك .. وقبلها بفترة ليست ببعيدة ، مرور الطيران الاسرائيلي فوق قصر الرئاسة السورية .. وأمجاد ياعرب أمجاد

كل مافات يمكننا اعتباره وكأن لم يكن ، لأنه تم مع دول ليس لها وزن ..لا سياسي ولا عسكري إزاء إسرائيل . فهم مفعول بهم وليسوا فاعلين ، لكن مالايمكن فهمه ولا ادراكه أن يحدث مثل هذه الاستفزازات على الحدود المصرية منذ أقل من ثلاثة أشهر ....!

القصة غالبا معروفة ، ولكني سأذكرها لكم باختصار ، فطبقا لإحدى الأخبار الواردة في صحيفة معارييف الاسرائيلية ، أنه قامت المقاتلات الاسرائيلية في منتصف شهر يناير الماضي بقصف موكب من الحافلات شمال السودان بمحازاة سواحل البحر الأحمر . وقد أسفر عن ذلك مقتل 39 شخصا وتدمير عدة حافلات .. زاعمة أنه كان بها شحنات سلاح في طريقها الى الفلسطينين.

بالطبع نحن أمام حدث يحتاج الى تحليل عميق لن نخوض فيه .. ولكنني سألقي ضوءا على عدة نقاط جوهرية دون ذكر تفاصيل .

أولا :

فيما يتعلق بالمسار الجوي الذي سلكته الطائرات الاسرائيلية كي تصل للهدف ، فنحن أمام فرضين :



الفرض الأول - وهو ان هذه الطائرات في الغالب أقلعت من مدارجها في اسرائيل واتخذت طريقها في الغالب فوق البحر الأحمر منتصف الحدود الدولية بين السعودية ومصر . فإذا سلمنا بصحة هذا الفرض ..فالسؤال هو، أين كانت الرادارات العسكرية المصرية ؟! مش احنا عندنا رادارات برضه ؟! .. ولا اللي عندنا ده طشت غسيل وحاطينه على السطوح يجيب القناة الاولى (مجلس الشعب) والقناة التانية (البيت بيتك) .. وتلاقي الفراخ بتبيض فيه أساسا .. ههههههههههههههههههه !



ولاهو الرادار شاطر بس يقفش واحد ماشي على 120 في طريق مصر- اسكندرية الصحراوي .. ده أخره ...!!!



الفرض الثاني - محتمل أيضا أن تكون الطائرات الاسرائيلية أقلعت من القاعدة العسكرية الأمريكية في جيبوتي .. خدوا بالكوا دي دولة عربية ..هههههههه .. ماعلينا .



والأمر هنا أخطر وأخطر..فنحن تعلمنا في دروس الجغرافيا أن البحر الأحمر يعتبر بحيرة عربية خالصة نظرا لأن معظم ان لم يكن كل الدول المطلة عليه هي دولا عربية . فإن كان الأمر كذلك .. سؤالي هو : هل الأولى التواجد العسكري للقواعد الأمريكية والصهيونية أم للعربية في هذه المنطقة الخطيرة على أمن الوطن العربي بأكمله ؟!



أنا لي وجهة نظر متواضعة في هذا الموضوع . أرى أن التواجد العسكري المصري في البحر الأحمر سيحقق : أولا سيحمي الأمن القومي المصري من الاعتداءات الأجنبية المستقبلية المحتملة من الجنوب ، وثانيا والأهم حاليا ، هو القضاء على ظاهرة القرصنة البحرية في منطقة القرن الأفريقي أما سواحل الصومال ، بما يعود بالنفع على قناة السويس كشريان للتجارة العالمية ورافد هام للغاية من روافد الدخل القومي المصري .. فهذه القرصنة إن كانت تؤثر على التجارة الدولية بشكل غير مباشر ، فإنها تؤثر على اقتصاد مصر بشكل مباشر وخطير.. وليس على عاتق أحد أن ينفذ استراتيجياتنا وأهدافنا .. فعلينا أن نحقق مصالحنا القومية العليا بأنفسنا.



فمن يدري ..ربما تكون الولايات المتحدة نفسها داعمة لعمليات القرصنة هذه لسببين :



- إضعاف إقتصاد مصر بالتأثير على دخل قناة السويس من العملة الصعبة ..ولاجدال في ان هذا يصب في مصلحة اسرائيل .



- إيجاد فرص عمل لشركات الأمن الأمريكية الخاصة وعلى رأسها الشركة الشهيرة Black Water من خلال تأجيرهم لحماية السفن التجارية المارة بقناة السويس .

ثانيا :

أما مايتعلق بمكان الهدف أو الغارة ، فهو في شمال السودان بمحازاة البحر الأحمر، بما يعني أنه كان على الحدود الجنوبية لمصر.. وهذا أمر له مغزى سياسي وبُعد اقتصادي خطير للغاية .

أما عن الهدف السياسي ، فهو التدخل الذي أصبح صريحا ولم يعد سرا كما كان للإسرائيليين في الشئون السودانية .فتواجدهم يصبح مع الوقت وشيئا فشيئا من الأمور العادية ..وهو كان ولازال على أشُده في الجنوب ..ويدعم حركات التحرر الداعية للإنسلاخ عن شمال السودان وبقوة ..والدعم يشمل كافة النواحي بما فيها العسكرية ، كي يصل الى الهدف المنشود بتفتيت الدول العربية الى كيانات صغيرة يسهل اللعب بها أكثر وأكثر . واعتقد أن الإسرائيليين يأملون إن حدث وأصبح جنوب السودان دولة منفصلة عن الاخيرة ، أن يحذو سكان جنوب مصر حذوهم ويعلنون التمرد على الدولة المصرية ، ويطالبون بدولة مستقلة ..صدقوني لاتسبعدون شيئا من اليهود .

وأما عن الهدف الاقتصادي ، فبالطبع هو التأثير على حصة مصر المائية من نهر النيل .. بل ويسعون أنفسهم الى استغلال مياه النيل وشرائها من هذه الدولة التي يسعون لقيامها بكل قوة لضرب المصالح المصرية العليا..فالحروب القادمة الكل يجمع على انها ستكون حروبا على المياه .

أيها السادة نحن أمام أمر جد خطير..ومؤامرات كبرى تُحاك ضد.. وطننا والحكومة والنظام لايحركان ساكنا ..أعلم أن مثل هذه الأشياء تعد من الأمور الأكثر أهمية وسرية بالنسبة للمصالح والسياسة العليا للدولة ، وبالتالي لايصح أن تعلن القيادة السياسية على الجماهير ماتعد له من ردود وتحركات . ولكن على الأقل ، أطالب أن لاتلجأ الى استفزاز الشعب والضغط على أعصابه في مثل هذه الظروف .

حيث مازاد الطين بله ، أنه قِيل على لسان وزير الخارجية السيد/أحمد أبو الغيط أن مصركانت على علم بهذه العملية التي نفذتها المقاتلات الحربية الاسرائيلية مؤخرا في شمال السودان ..مما يزيد الفجوة اتساعا بين الشعب المصري وبين قيادته السياسية .

نحن لانريد حربا مع أي طرف من الأطراف .. فمصر انكويت بنيران الحروب وفقدت الكثير فيها ، لكن على الأقل من حقنا أن نعيش في أمان ..وأن نكون قادرين على الدفاع عن أنفسنا .

قيادات مصر الأجلاء ، رفقا بمصر .. زودوا عنها بكل غالِ وثمين ..فمصر كنانة الله في أرضه ، وهي أمانة في رقابكم وسُتسئلون عنها يوم الدين . لذا أقول لكم : خلوا الرادار صاحي !
---------------------------------------------------------
تحديث صغير
التمسوا لي العذر ان لم أتمكن من الرد على تعليقاتكم او عدم وضع بوست جديد خلال المدة القادمة ، نظرا لأني مشغول بالمذاكرة الخاصة بامتحانات الدبلوم (دبلوم القانون العام ) هذه الأيام.
دعواتكم لنا بالنجاح والتوفيق من عند الله
ولكم جزيل الشكر وعظيم العرفان

قلم رصاص

68 تعليقات القراء:

صمت المشاعر يقول...

اوووول تعليق ونقووووووول


خلي الردار صاحي

والله ياخ قلم رصاص الردرار بيشوف اللي علي مزاجه بس اوقات كدا شوية تراب بيجوا في عنيه فالرؤيه بيبقي فيها غلوشه

وعندك حق الحروب القادمه هتبقي حروب علي المياه حتي دي بصين لينا فيها

ربنا يستر عليكي يا بلد

اما بالنسبه للعرب فهم طول الوقت يشجبون وينددون ويحتجون ولا حياة لمن تنادي

بوست رائع بيبين اشياء كتير الاغلبيه العظمي ليست علي درايه بيها

دمت بكل خير

*البت المشمشية *حلوة بس شقية * يقول...

لالالا
ايه ده بقه
طيب ان ااقول تعليق
ماليش دعوة

*البت المشمشية *حلوة بس شقية * يقول...

تانى تعليق اوعا حد يكلمنى

*البت المشمشية *حلوة بس شقية * يقول...

مش هقولك تانى خوش علىا لاميل بتاعك
براحتك اوى

*البت المشمشية *حلوة بس شقية * يقول...

هقرا واجى

*البت المشمشية *حلوة بس شقية * يقول...

حرام عليك ده كلو بوست
انتا جاى حامى علينا ايه مكنا مستريحين
هههههههههه
بلننسبة للدردار بتاعك ده
انا هعلق على موقف العرب
الطيبيعى دول لو عملو غير انهم ينددو وييجتمعو ويكلممو

ممكن نشك انهم مش عرب

mohamed ghalia يقول...

قيادات مصر الأجلاء ، رفقا بمصر .. زودوا عنها بكل غالِ وثمين ..فمصر كنانة الله في أرضه ، وهي أمانة في رقابكم وسُتسئلون عنها يوم الدين . لذا أقول لكم : خلوا الرادار صاحي !
معاك حق بجد

مسدس صغير يقول...

ايه الكلام الكبير على عقولنا ده يا باشا
اسرائيل والبحر الاحمر والسودان والصومال وجيبوتى وحسن نصر الله ومسدس صغير وكل ده ونستنتج منه ان مصر "ولاهو الرادار شاطر بس يقفش واحد ماشي على 120 في طريق مصر- اسكندرية الصحراوي .. ده أخره ...!!!"
فعلا الرادارات المصرية حلة نحاس من بتاعة زمااااان؟
عارفها؟؟
طبعا عارفها انت قديم اوى.
المهم فعلا والله معاك حق جدا جدا فى كل كلمة قولتها. عمليات القرصنة اللى فى المياة الصومالية وما وازاها من مياة دولية المتأثر الوحيد بها ليس التجارة الدولية وانما مصر العربية.
وانا ارى انها مؤشر باحتلال الصومال قريبا جدا جدا لان الصومال اعطت الدول الغربية كعكة على طبق من ذهب لتلتهمها والدول الغربية" امريكا وانجلترا وفرنسا وغيرها" مهتصدق بالخبر
...
على فكرة انا عايز اتكلم فى الموضوع ده كتير بس افضل انسحب لان بجد الواحد هيفرقع..
بووووم بووووووووووم
بووووووووووووم
بووووووووووووووووووم

قلم رصاص يقول...

صمت المشاعر

مبروك ياستي على اول تعليق

وعجبني جدا كلمتك اللي بتقولي فيها : ان الرادار بيشوف اللي على مزاجه..والله يبدو ان الكلام ده صحيح هههههههه

مشكورة جدا على التلعيق الرائع

قلم رصاص يقول...

البت المشمشية

اشكرك جدا على التعليق

وهارد لك على انك مش الاولى
هههههههههه

ثانيا احييكي على وجهة نظرك في التعليق

شكرا جزيلا

قلم رصاص يقول...

mohamed ghalia

كفاية علينا مرورك بس والله يا محمد


بارك الله فيك

قلم رصاص يقول...

مسدس صغير

صديقي العزيز

تعليقك اثلج صدري يا اخي

وسلمت لنا من الفرقعة
ههههههههههههههههههه


واعمل حسابك معادش عندي بوستات قبل شهر على الاقل انا مش فاضيلك ياعم انت
ههههههههههههههه

نورتني مرة تانية

في حفظ الله

شاب كــ طخين ـــــا يقول...

اسم البوست جامد اوى ده فى الاول يعنى :D
المدونه بتطلع من الليبيه بردو ولا انتا من دبى ياعم ورايق ههههههههه

______________
معاك حق فى كل كلمه قولتها
ده احنا من زمان اوى
ومش عارف حاسس بردو اننا هنفضل كده لغايه لما مصر تاخد كاس العالم ان شاء الله :D

دمت بكل خير

د. ياسر عمر عبد الفتاح يقول...

ضيف عندك كمان إشاعت كيرة
بوجود إختراقات للمجال الجوي المصري أكثر من مرة لكن بيتم التعتيم عليها.
وكمان قتل الجنود المصريين على الحدود ونفس التعتيم

ربنا يحفظ البلد دي

قلم رصاص يقول...

امبارح كان عمري عشرين

أولا برضه مرحبا بيك في المدونة

ثانيا ان شاء الله الجي احسن

شوف مهما كانت الصورة سيئة لازم سكون عندنا امل في غد افضل

اشكرك جدا على الزيارة

قلم رصاص يقول...

د.ياسرعبدالفتاح

مرحبا بيك في المدونة

وفعلا ده بيحصل لكن نقدر نقول رغم خطورته الا انه ليس له اهداف استراتيجية بعيدة كما الاختراقات على حدودنا الجنوبية

اضف الى ذلك انه هذه الاختراقات كانت ايام حرب غزة ومحتمل يدخل فيها عنصر الخطأ

عموما ربنا يستر

نورتنا

فشكووول يقول...

شوف بقى يا قلم رصاص من الآخر يعنى
انت عايز تفقع مرارتى لييييييييه؟
طبعا يا سيدى الرادارات طشت غسيل وبيضحكوا علينا ويقولوا رادارات وكفايه عليهم مجالسهم وبيت بيتهم ..طبعا لازم البيت يبقى بيت تامر بسيونى لانه ابن امين بسيونى رئيس مجلس امناء اتحاد الازاعه والتليفزيون سابقا وعشان كدا بيشجع الوريث جدا لانهم زى بعض
عايز تواجه عسكرى مصرى فى البحر الاحمر ... مرارتى يا قلم رصاص ... سيب مرارتى ... مش لما يكون فيه تواجد عسكرى فيى سيناء ... ياراجل سيب مرارتى
انت يا قلم فاهم انك بتتكلم عن دول ذات مؤسسات .... فوق يا قلم رصاص ... انت بتتكلم عن عصابات بتحكم الدول دى ... انت بتتكلم عن دول بيدلعوها ويقولوا عليها عالم ثالت وهى عالم متخلف ولو فيه اقل من كلمة تخلف تبقى دولنا.
شوف ياقلم بالعند فيك خد بقى المفاجأه دى:
بالرغم من كرهى لاسرائيل وحقدى عليها وغلى منها ومرارتى مفقوعه منها الا انها :
دوله محترمه تحترم شعبها ودوله متقدمه وانا احترمهم واحترم الشعب الاسرائيلى واحترم النظام الاسرائيلى واحترم دولتهم اللى شبر ونصف وقادره تزل الغجر العرب دول كلهم بالرغم من بترولهم وثرواتهم ونيل وفراد ودجله ونهر اردن وثروات مائيه كثيره وشبر ونصف بس ذالل الدول دى كلها
شفت الانتخابات فى اسرائيل ... هكذا تكون الدول المحترمه ... مش قلت لك سيب مرارتى.
واخيرا يا قلم رصاص ( العرب جرب)
حاطق يا عالم ...

بنجاواتى يقول...
أزال المؤلف هذا التعليق.
بنجاواتى يقول...

السلام عليكم

موضوع جميل ومهم

انا اعتقد بالنسبة لموضوع المجال الجوى ان الرواية الاولى هى الاصح

وتقبل فائق احترامى

فوبيا - سايكولاند يقول...

ردار ايه يا معلم انا اقولك الحقيقه ليا واد صاحبى ظابط صغنتت فى الدفاع الجوى بيقولى كان واقف على شبكه الرادار فى مناوره النجم الساطع ديه اللى بنعملها مع امريكا اول ما الطيران الامريكى بعون الله هجم شبكه الرادار ضلمت وما شافوش ولا طياره وابتدوا يبلغوا سماعى --- اوعا يا معلم الطياره جايه من اليمين حاسب الطياره اللى مرسوم عليها صقر طلعت شمال ولفت بعد كده يمن وطلعت على الصحراوى -
انسى يا معلم احنا يحتلوا سينا فى خلال 7 ساعات وده مش كلامى ده من جوه الجيش والله
العظيم
اساسا الدبابات والمدرعات اللى فى الوحدات ما فيهاش بنزين الا قليل جدا عارف ليه عشان ما يعملوش بيها انقلاب
والذخيره قليله كمان للسبب نفسه

قلم رصاص يقول...

فشكووول

استاذي العزيز فشكول

منورنا دايما والله

وبالراحة علينا وعلى نفسك شوية

صحتك بالدنيا ياأستاذنا..المرارة بتاعة حضرتك عندي اهم والله بجد

عموما رأيك يحترم

لكن اللي انا عاوز اقوله من خلال البوست ده ، انه رغم اننا كلنا عارفين ان البلد مليئة بالسلبيات والاخفاقات في ميادين عديدة

لكن نحن مازلنا الدولة العربية الكبرى على الاقل امنيا وعسكريا وهذا كلام واقع مهما كانت هناك مؤشرات عكس ذلك

وعلى الكبير ان يقدم مايدل على انه مازال كبيرا ، وانا باقصد بلدنا العظيمة مصر .

وليه لأ ميبقاش لنا تواجد عسكري في البحر الاحمر ، بصرف النظر عن الوضع الخاص بسيناء

كلنا نذكر وحضرتك اكيد قبلنا كلنا ان البحرية المصرية من خلال تواجدها في البحر الاحمر ابان حرب اكتوبر المجيدة سنة 73 اغلقت وسيطرت على مضيق باب المندب في وجه الملاحة ضمانا ل وعدم مرور اي سفن معادية في تلك الفترة الفاصلة في تاريخ مصر الحديث

دعنا نكون منصفين ونذكر مالنا وماعلينا ياسيدي الفاضل وانا اعلم انك محسوب على المنصفين ان شاء الله لأي حق مهما كان مكانه حتى لو كان عند الجن الأزرق
هههههههههههههههههه

سعيد جدا بمرور وتعليق حضرتك

تحياتي
قلم رصاص

قلم رصاص يقول...

بنجاواتي

وعليكم السلام ورحمة الله وبركاته

اولا مرحبا بك يادكتور في المدونة

ثانيا هذا اقرب الى الواقع بالفعل لأنه اسرائيل يجب ان نعلم انها رغم اعتمادها الكلي على امريكا الا انها تفضل في احيان كثيرة عدم اشراك الامريكيين في بعض خططهم واهدافهم ضمانا لعدم لاقاة معارضة امريكية تحول دون تحقيقهم لأهدافهم في الوقت المحدد لها


في حفظ الله

قلم رصاص يقول...

فوبيا - سايكولاند

اولا مرحبا بيك

واسمح لي اختلف مع حضرتك في نقطة واحدة فقط

وهي انه من المفروض علينا لو بلغ الفساد في بلدنا الركب - زي ماهو حاصل يعني - مفروض علينا لما نيجي نتكلم عن المسائل العسكرية مفروض نتكلم بحذر شوية

مينفعش انك تنقل اي معلومة عن الجيش وتيجي تحكيها على الملأ كده سواء منك شخصيا او عن طريق واحد صاحبك ظابط في الجيش زي مابتقول..ومينفعش تقول اي معلومة عن القوات المسلحة مهما كانت تافهه من وجهة نظرك وتقولها كده على الملأ في اي وسيلة اعلام مهما كانت

انا عارف انك يمكن تاخد كلامي بتريأه ، لكن الواقع بيقول ان الكلام ده يضر بلدنا لو كل واحد عنده معلومة عن الجيش وقالها على الانترنت مثلا ..دي تبقي كارثه !


انت حضرتك تعرف ان اجهزة المخابرات في العالم كله بيستقوا اخبارهم ويكونوا معلوماتهم عن جهة او اي دولة من خلال المعلومات اليومية العادية والتافهه اللي بتتنشر في صحف هذه البلد او تلك

فما بالك بقى لما تكون المعلومات دي عسكرية... اعتقد الصورة واضحة !

هل تعلم ان موقع الفيس بوك المعروف ده انه مراقب من السي اي ايه ومن الموساد ..وبيستفيدوا جدا منه من خلال المعلومات اللي المصريين بيدوهالهم على طبق من فضة وبكل بساطة .

واختلف معاك في مألة امكانيتهم احتلال سيناء في 7 دقايق دي..لأ طبعا ميقدروش..هما يقدرو يعملوها مع اي دولة عربية الا مصر..وذاكر التاريخ كويس يا استاذ..وانا بكلامي ده مبناقضش نفسي ولا حاجة..بالعكس ، انا انا او غيري مفروض لما ننتقد الوضع بيبقى الهدف المضي قدما في الطريق الصحيح كما كنا..وده مش معناه اننا اي كلام ولاضعفاء.....

احنا بعد حرب اكتوبر المجيدة اعتبرتنا الدوائر السياسية والعسكرية في العالم الغربي نفسه بأننا القوة السادسة عسكريا في العالم بعد الخمسه الكبار..وحربنا كانت اول حرب الكترونية في التاريخ الحديث......

دعنا ننتقد الاوضاع في بلدنا بشكل بناء وليس بشكل هدام .. بمعنى ان لانتجاوز الخطوط المرسومة لنا.. فالحرية مسئولية.

انا لما اتكلمت عن الرادار اتكلمت بشكل عام ولم اعط تفاصيل عن اي حاجة عسكرية.

ههههههههههههههههه

معلهش انا طولت عليك وفردت في الكلام رغم ان الفكرة اللي حبيت اقولهالك ابسط من البساطة...

معلهش اعذرني اصل خطي جميل والحبر كتير
ههههههههههههههههه

اتمنى ان لاتحمل في صدرك شيئا فنحن اولا واخيرا اخوة في الله وابناء بلد واحدة والخلاف في الرأي لايفسد للود قضية

سعيد بزيارتك

في حفظ الله

Soul.o0o.Whisper يقول...

السلام عليكم و رحمة الله

أولا طبعا لازم اقدم اعتذارى على التأخير
معلش بئا


ثانيا ربنا يبارك لك يارب
والله تنفع وزير
هأقترح عليهم الاقتراح دا فى اجتماع مجلس الشعب الجاى
ههههههههههههههههههههههههههه

ثالثا بئا
بجد فى معلومات اول مرة اعرفها منك
و تحليل رائع

بس مين يسمع

و المصيبة ان يكون الرادار صاحى
و اللى قاعد عليه نايم

يااااااااااااااااارب رحمتك




دمت بود

Unknown يقول...

تحليلك للموقف جميل
وتحليلك للموضوع دا شدنى جداً

بالتوفيق والى الامام

قلم رصاص يقول...

Soul.o0o.Whisper

وعليكم والسلام ورحمة الله وبركاته

اولا اهلا بيكي يادكتورة

ثانيا لكم العذر على التأخير في الرد

كيف تعرفون بمدونة مجهولة مثل مدونتي

ههههههههههه شوية تواضع بس يعني
ههههههههههههههههههههههههههههه

واشكرك على الاطراء ده

وبخصوص تعييني وزير ، أنا احتج وارفض
فالكرسي غير دائم لصاحبه وبريق الكراسي يفقد العقول صوابها ، على رأي اخويا الكبير هههههههههه

اصل احنا عيلتنا كلها مفتحين شوية

حقيقي رد حضرتك اسعدني وشجعني

بارك الله فيكم

في حفظ الله

قلم رصاص يقول...

اصحى يا مصر : اسلام ديو

اشكرك اخي الفاضل على المرور العطر

والتعليق على الموضوع

اخجلتم تواضعنا

نتمنى مداومة الزيارة

في حفظ الله

۩ Nour ۩ يقول...

السلام عليكم..

ان دراسة القانون فى حد ذاته يجعل لك عقلاً اخر ولكن عقل مشتت نظراً للكم الرهيب من التناقضات التى تدرس والتى نراها بالعين المجردة..
واجمل ما فى الدراسة رأى الدكاترة فى الخفاءوشرح خلاف ذلك فى تلك الكتب الصماء التى ان نطقت فستلعن تلك التناقضات..

وأحيك على تلك الجولة والخوض فى تلك الطرق الوعرة التى تحتاج الى وعى تام بكل ما يزحف قبل ان يسير..

وموضوع الرادار اعتقد انه محلى فقط مهمته ابناء تلك البلد اما غيرهم لديهم تصريح ممهور فى الخفاء من الغيبوبة..

...
ربنا يوفقك ويكتبلك النجاح والتوفيق وخصوصا ان القانون العام وجبة دسمة جدا" الله يكون فى عونك".. بس فى ملاحظه بسيطة فى تانيه لم يرد علينا ذلك اسم النفاعل ربما تم حذفة نظرا لتلك الهجمة التى أودت بحياته..
****
ربنا يوفقك وننتظر الجديد ..
دمت بخير

ضحكات الحياة يقول...

خلى الردار صاحى صاحى

ههههههههههه

بوست حلو و جميل

و تقبل تحياتى

قلم رصاص يقول...

Nour

وعليكم والسلام ورحمة الله وبركاته

اشكرك اختنا الفاضلة على المرور الطيب
وعلى رأيك السديد

واحييكي على فصاحة وبلاغة لسانك ، أسأل الله ان يديمها عليكم نعمة من فضل الله

ويبدو ان ماقلتيه بخصوص تناقضات الدراسة موجود بالفعل ولكني اختلف معكي في نقطة واحدة وهي انه هذه المسألة نسبية وليست مطلقة

فعندنا في كلية الحقوق أساتذة معروف عنهم البعد التام عن دهاليز الحكم بل ورفضهم التام الدخول فيه بشكل او بأخر زائد انهم في بعض الاحيان لديهم آراء مضادة وبسدة لتوجهات الحكمة

وعلى العكس من هؤلاء يوجد النقيض من زمرة الأساتذة الذين ينعمون في كنف وفكر الحكومة

هكذا هي الحياة ، مليئة بالتناقض والتضاد ، وهي رغم ذلك وتلك مستمرة الى ان يرث الله الأرض ومن عليها

واشكركم مرة تانية على الدعاء

بارك الله فيكم

في حفظ الله

قلم رصاص

قلم رصاص يقول...

ضحكات الحياة

اشكرك اخي الفاضل على المرور العطر

وعلى رأيك في البوست

في حفظ الله

فشكووول يقول...

العزيز قلم رصاص
تحياتى
ولا رادار صاحى ولا السلاح صاحى ولا حتى احنا صاحيين
نوم عميق خ خ خ خ خ
تحياتى

قلم رصاص يقول...

فشكووول

هههههههههههههههه

ماشي ياعم فشكول

حصل لنا الزعر

ههههههههههههههه

نورتنا للمرة التانية ياعمو العزيز

شمس النهار يقول...

برغم ان كل المعلومات دي الواحد عارفها الا اني برضه احوليت وانا بقراها وتعليقك علي الاحداث كان جميل

قلم رصاص يقول...

شمس النهار

أي خدمة ياأختنا الفاضلة

نورتي المدونة

في حفظ الله

kafrawy يقول...

هههههههههههههههههههههههههههههههههههههههههههههههههههههههههههههه


وسليملى ع الرادر

ربنا يوفقك ف امتحاناتك يارب

فشكووول يقول...

اهلا يا صاحب القلم الرصاص
تحياتى
اشكرك جدا على التعليق يا اخى والله انت سباق بالفضل

على العموم وامعانا بالعرفان بالفضل حاحوش لك وزارة التدوين والمدونات
تحياتى

قلم رصاص يقول...

kafrawy

مشكور اخي الفاضل على التعليق

قلم رصاص يقول...

فشكووول

ههههههههههههههه

منورني دايما استاذي الفاضل

ومتشكر جدا على الوزارة وتترد لحضرتك ان شاء الله

في حفظ الله

Beram ElMasry يقول...

قلم رصاص
اخي وصديقي العزيز حفظك الله من كل مكروه وادام عليك فضله ونعمه واغدق عليك من خيره بما يرضيك ويرضيه
ولك تحباتي والسلام ولا سلام مع اليهود

قلم رصاص يقول...

Beram ElMasry

الله يخليك استاذنا الفاضل

منورني دايما والله

في حفظ الله

فارس عبدالفتاح يقول...

سلام عليكم \

متنساش أخي الفاضل

انه فيه معاهدة سلام ولم تخترق إلى ألان وبعدين متنساش دول الاعتدال وبعدين متنساش انه إحنا مناش دعوا بالعرب أصلا وبعدين متنساش انه فيه توريث وبعدين متنساش انه مفيش شعب أصلا وبعدين متنساش انه مفيش كرامة ولا عزة في الشعب لا جوا البلد ولا بره البلد وبعدين متنساش انك أول واحد من دول المنطقة التي تنتهج سياسة التسليم قبل الضرب وبعدين متنساش انك أنك قبض قبل كده من أمريكا عشان توافق على ضرب إخوانك العرب والعراق نموذج صارخ ده إذا كنا فكرين أساسا إننا عرب ولينا إخوان اسمهم العرب والمسلمين


وبعدين متنساش انه قبل ما تحصل أي حاجة ضد إسرائيل بتطلع القيادات المصري وعلى رأسها القائد المفدى بتسفيه هذه الأعمال المقاومة بل ويعتبرها وبال على الشعب العرب وان الشعب العربي قبل هذه العملية كان عايش في رخاء وسعادة وبسبب هذه العملية أو هذه السياسة أو ما شئت أن تسميها هي سبب كل الكوارث التي نمر بها والتي سوف نمر بها بعد ذلك

وبعدين متنساش أنك سفهت تاريخك ونضالك في الماضي وقلت أن الذي ناضل من قبلك كان دكتاتور وكان انفعالاي ولا يفقه شيء في السياسة وفي الحرب وهو أيضا سبب ما نعانيه الآن

وقس على ذلك كل شيء عشان أنا تعبت من متنساش

وبعدي قبل متعيب على شوية ملشيات مثل حزب الله وهم اشرف مني ومن الجيش المصري لمأخذه يعني

أتكلم عن نفسك الأول ومناش دعوه بحد الراجل قالها حرب 2006 وقال بالعربي وليس بالعبري يمكن لو كان قالها بالعبري كنا أكيد خدناها على محمل الجد واحترمنا أنفسنا لكن طلع القائد المفدى سعتها وأنا شاهد على هذا وقل أن حزب الله هو السبب في دمار للبنان والسبب في عدم تقدم عملية الاستلام وهكذا

يعني إحنا اللي لسانا طويل وإحنا بنقول إحنا ضحينا عشان العرب وهم ولد كلب

طيب اتحترم نفسك وملكش دعوى بحد يتكون راجل بجد وتدخل في الصراع كما كنت

مع انه كان بيهاجم اللى دخل في الصراع كما قلت وقال عليه دكتاتور وحمار ومش عارف حاجة وحجات يعني يراد منها تضيع الوعي والذاكرة والتاريخ وغيرهما

المهم ياريت مناش دعوه بحد وخلينا في نفسينا مادام إحنا شوية غنم لإسرائيل

اللى عايز يقاوم يقاوم واللي عايز يستسلم يستلم

حنا مناش دعوة بحد ونحط لسانا جوا بقنا ونحترم نفسا

هذا هو المطلوب

لاما تكون قد الصراع الحقيقي وتخش وأنا اشك انه في رجاله في مصر يستطيعوا أن يدخلوا هذا الصراع

الرجالة ماتوا وبالباقي كبروا في السن ربنا يحسن ختامنا وختامهم


سلام عليكم

وأسف على الدخول على الخط مره وحده لكن فعلا أحنا شعب قذر وسياستنا سياسة قذرة ومعندناش أي وعي أو إدراك أو احترام لنفسا قبل أن نطالب الآخرين بان يحترمونا

قلم رصاص يقول...

فارس عبدالفتاح

اولا مرحبا بك في المدونة

ومبدأيا عاز نأكد على انه الخلاف في الرأي لا يفسد للود قضية كما يقال

ومبدأيا برضه دعني أعترض وبشدة على وصفك للشعب المصري اللي انت وانا وكلنا جزء منه بأنه شعب قذر .. يا اخي مهما كانت قذارة السياسة وايضا قذارة البعض منا ليس هذا معناه الجميع قذر بالضرورة

متخليش انفعالنا بالموقف السياسية هذه او تلك يخلينا نفقد أعصابنا

انا معاك في حاجات كتيرة جدا انت قولتها... بل بالعكس انا مؤمن بان ده موجود فعلا وبيحصل في مصر

لكن برضه منعممش ، افترض يا اخي ان بلدك مثلا بتمر بظروف معينة او فترة سوداء ، ده مفروض ميخليكش تكون شايف الصورة مظلمة جدا للدرجة دي وتفقد الامل في المستقبل ..بلدنا مليانة حاجات حلوة كتيرة

كلنا عاوزين مصلحة بلدنا ، وكلنا ضد الظلم وكلنا ضد التوريث وكلنا ضد حاجات كتيرة

وان كان حد من النظام او النظام كله جار على ماضيه او تنصل من بعض قيمه او حتى تعهداته اللي قطعها على نفسه ..تعالى نكون طوبة في بناء جديد صالح
ودعك وانا وكلنا من نبرة التشاؤم والتخاذل ، فالتغيير سمة أساسية في الحياة .. يا اخي اذا كان انظمة الحكم نفسها بتتغير كمفهوم استراتيجي ..يعني بنشوف ملكيات تتحول لجمهوريات والعكس صحيح..ليه ميكونش احنا عندنا امل في غد افضل لبلدنا

وكمان فيه نقطة مهمة جدا ، ليس معنى ان عندنا قصور ما ، او هجوم رسميي على بعض افعال الاخرين التي تروق لشعبنا او بمعنى اصح التي تلعب على نبرات ومشاعر شعبنا الطيب ، ده مش معناه ان هؤلاء ملائكة .. بالعكس هناك اطراف عربية لايمكن وصفهم بأقل من وصف الكلاب ولايقلوانخرا في عظام الأمة العربية والاسلامية عن حفدة القردة والخنازير في تل أبيب..

السياسة بحورها عميقة جدا ، ومظلمة جدا ..واحيانا قذرة جدا..لكن هكذا هي

هههههههههههههههههه

معلهش طولت عليك بس برضه حاسس اني معرفتش اوصل لحضرتك وجهة نظري بسبب انشغاللي بظروف امتحانات الدبلوم

اصل البعيد _انايعني _ بيعمل دبلوم دراسات عليا..دعواتك لينا بقى يابطل
مينفعش تيجي هنا وتمشي من غير ما أقللللبك هههههههههههههه

عموما فرصه سعيدة جدا ولنا لقاءات اخرى

في حفظ الله

حياة بلا روح يقول...
أزال المؤلف هذا التعليق.
حياة بلا روح يقول...

السلام عليكم

قلم رصاص

البوست اكثر من رائع

للأسف الأمة العربية في حالة سبات ونوم عميق .. حتى لو الردار في مصر او غيرها من الدول العربية رصد طيارات معادية لازم يستأذن من القواعد الأمريكية اولا في المنطقة .


عندك حق التواجد العسكري للقواعد الأمريكية والصهيونية بيهدد أمن الوطن العربي بأكمله



للأسف الوطن العربي محاصر من كل جانب بالقواعد العسكرية الأمريكية حماية لإسرائيل لإستكمال مخططها ببناء الهيكل قبل تاريخ محدد عام 1458 هجريا ودعمها استراتيجيا ودعمها بالسيطرة وتفكيك القوة العربية نهائيا للتمهيد لملحمة ارض الميعاد والحرب الأخيرة مع العرب..فالسياسة مرتبطة بالدين .


أما قراصنة الصومال ماهم الا دمية تحركها اسرائيل لإستكمال بناء مشروعاتها في اثيوبيا تمهيدا للمخطط الصهيوني في المنطقة وهي للسيطرة على المياه في حصة مصر والسودان من المنابع وطبعا مانقدرش تطلع من عندنا طيارة استطلاع واحدة او طيارة لضرب مقار القراصنة الا بإذن وطبعا غير مسموح ..

بارك الله فيك وفي المدونة الأكثر من رائعة

الله يوفقك

أطيب تحية

قلم رصاص يقول...

حياة

وعليكم السلام ورحمة الله وبركاته

سعيد جدا بمرور حضرتك وتعليقك القيم على الموضوع

فإن دل انما يدل على عقلية ناضجة مثقفة

بارك الله فيكم

في حفظ الله

yomna يقول...

لفخامة والسمو في سباتهم نائمون .. ثم بعدها لايفعلون سوى أنهم بالصوت يرقعون .. وللخدود يلطمون .. ولامانع من أنهم يشجبون وينددون .

خلاااااااااااص الوضع بقي شبه مستحيل انو يتغير الا بمعجزه من ربنا
وربنا يستر وما تبقاش الضربه الجايه علينا احنا المصريين
فاضلنا زلطه ونطلع بره :)

د.آيه يقول...

كلام كبير ..
سياسي مخضرم..

يا ريت الرادار يسمع حضرتك..
بجد كل مابنعرف اكتر اللي بيحصل .. بنطمن على مصر اكتر..
لنا الله

Beram ElMasry يقول...

قلم رصاص
عزيزي يسعدني قولك المقتضب لكنه يفيض ودا وصدقا ومحبة
ولك تحباتي والسلام ولا سلام مع اليهود

قلم رصاص يقول...

yomna

اولا مرحبابحضرتك في المدونة

وبخصوص مصر ربنا هيستر ان شاء الله
اطمني حضرتك احنا لسه موصلناش لمرحلة الظلطة ونطلع بره

مشكورة على الزيارة الميمونة والتعليق على الموضوع

في حفظ الله

قلم رصاص يقول...

د.أية

مرحبا بحضرتك في المدونة

واشكرك على المجاملة الكبيرة هذه
فأنا لست بسياسي ولست بمخضرم والحمدلله

وعندك حق فعلا كل مابنعرف اكتر بنطمن اكتر خصوصا لما نحاول نعرف ونفصل ونأصل موضوعاتنا بهدوء بعيدا عن التعصب

دمتي في حفظ الله

قلم رصاص يقول...

Beram ElMasry

استاذي الفاضل

نورتني حقيقي من كل قلبي

واعذرني على اقتضاب تعليقاتي عندك هذه الأيام لأني منشغل بامتحانات دبلوم الدراسات العليا وحال ما انتهى ان شاء الله سيكون لنا لقاءات مفصلة

في حفظ الله

فارس عبدالفتاح يقول...

اخي الكريم

انا متفائل الى ابعد مما تتخيل انا ابن الفكر القومي العربي وهذا الفكر لا يعرف اليأس ولا يعرف التخاذل ولا يعرف التهادن


واعلم جيدا وهذه عقيده ايضا من نابعه من خلال اعتقادي في الفكر القومي العربي

انه لا توجد ملائكة على ظهر الارض او هناك جنان في الحياة الدنيا

لكن

عندما نكون شعب مغفل وانت تصفه بانه طيب

وهو يردد ما يقوله نظام الذي هو يعاني منه اشد المعاناة

فاذا اما هو شعب قذر ولا يحترم نفسه اولا واما هو شع مغفل ويستحق به

واما هناك مشكلة فكرية كبيرة بحيث لا يستطيع ان يمز بين العدو والصديق

واما هو مغرور ويعتقد في نفسه انه اشرف شعب في المنطقة دون ان يستند الى حقيقة واقعية انه عميل للاسرائيليين في الوقت الحالي

ويحارب كل من يقاوم هذا الكيان

مع خالص احترامي

قلم رصاص يقول...

فارس عبدالفتاح

مرحبا بك اخي الفاضل

صدقني والله انا بالفعل متفق معاك في حاجات كتير ، وخصوصا الايمان بفكرة القومية العربية ، وانت بنفسك قولتها قومية عربية..يعني لاينتمي لها أطراف اخرى لها لاتريد للعرب الخير .. بخلاف اسرائيل الكيان الأكثر خطورة على العرب

ولكنه ليس الوحيد ، وخلينا موضوعيين ..وانا باقصد طبعا وبشكل مباشر ايران ..ياسيدي الفاضل ايران الدولة السياسية غير ايران الدولة الاسلامية هذا شيئ وهذا شيئ مختلف تماما
والسياسة هذا طبعها وده مش كلام انا مخترعه ولا نازل بيه من حتة محدش يعرفها


اسرائيل احنا كلنا كشعوب عربية متفقين على انها عدو مفيش كلمة في كده

لكن اللي مش متفقين بشكل على انها حقيقي عدو لنا هي ايران ..وذلك لجهل الغالبية العظمى من الشعب لنوايا ومخططات بل وحتى شواهد هذه الدولة الفارسية ..ومفروض لانحكم عليها بشوية الكلام الجميل اللي بتفرقعه في الجو عندهم ضد اسرائيل

ومش كل الناس تعرف برضه ان احتلال امريكا للعراق تم ليس بتسهيلات عربية لأمريكا وحلفاءها عكس مايشاع

وانما بخطط امريكية ايرانية ومساومات بين البلدين على حاجات كتيره في الشرق الاوسط كما في غزة والمساومة على دعم المقاومة مقابل تسهيلات البرنامج النووي من جانب امريكا لإيران

حاجات كتيره اوي
لايتسع الوقت لذكرها لأني بجد يا اخي الفاضل مشغول في الامتحانات

وان شاء الله هيبقى لنا لقاءات تانية كتيره

اتمنة لحضرتك التوفيق

في حفظ الله

فارس عبدالفتاح يقول...

يا أخي الفاضل .. يا مواطن

أوكيه .. إيران وكل من يحالفها وكل من يسير في ركبها ... أوكيه .. نفس الاسطوانة التي نسمعها من النظام المصري بإيعاز من إسرائيل وأميركا على تأليب العرب وشن حرب عليها مثل حرب العراق

وإذا أقررت لك بكل ما تقوله جملة وتفصيلا لماذا كانت إيران الملاك الطاهر في عهد الشاه الذي كان يوالي أمريكا علناً واستضافة السادات مع العلم أن البترول الذي كانت إسرائيل تستخدمه في حرب 1967م، بترول إيراني .. اكرر إيراني وادعاء السادات بأنه ساعدنا في حرب 1973م، ببترول هذا كلام غير دقيق ولا أساس له من الحقيقة والوثائق التي تثبت الحقيقة .

لماذا أعلنا الحرب على إيران بمجرد أن الإمام الخميني قال على أمريكا الشيطان الأعظم ولماذا أعلنا الحرب على إيران والإمام الخميني بعد إعلانه إهدار دم سلمان رشدي .

لماذا ساعدنا العراق في حرب لا اعرف لها سبب إلا إضعاف الجيش العراقي والدولة العراقية بحرب تسعة أعوام قام فيها ضباط الجيش المصري بمساعدة الجيش العراقي ضد إيران والنظام الإيراني .

لماذا من أول يوم قامت فيها الثورة الإيرانية وبعد احتجاز الطلبة الإيرانيين بعض الرعاية الأميريكان في السفارة الأميركية في طهرن قمنا بإعلان الحرب على إيران

أخي هذه ادعاءات لا تنطلي على طفل صغير .. أنت تكرر ما يقوله النظام العميل


أخي الفاضل إيران ليست ملاك وليست المهدي المنتظر ولكن ولها أهدافها الخاصة ولها مطامعها الخاصة ولها تطلعاتها الخاصة ولها ولها ولها ولها ... الخ


هذا أمر طبيعي في السياسة هذا أمر طبيعي في صراع الدول هذا أمر طبيعي في حركة التاريخ هذا أمر طبيعي في فلسفة التاريخ هذا أمر طبيعي في حركة الصيرورة والتحول في حياة الشعوب والأمم والدول والإمبراطوريات

هذا .. هذا .. هذا .. الخ

المهم أين أنت من هذا كله .. أما أن تدخل الصراع وتكون على مستوى الحدث والحديث وتفعل سياساتك وتعمل في نطاق أنت الغالب في لأنك عربي وهو دخيل وإما أن تعمل تحالف معها بدلا من أن تعمل تحالف مع إسرائيل ضد العرب وضد المسلمين وضد شعبك .. ولا تصبح ذنب لأمريكا وإسرائيل وتابع خاضع يسمع ويطيع

وأضف إلى معلوماتك الشخصية وابحث عن هذه المعلومة لتتأكد منها جيداً لقد حصل مصر وبشكل علني وأنا سمعتها في النشرات الإخبارية المصرية وغير المصرية أثناء غزو العراق 2003م، - والله على ما اقول شهيد – أن مصر طلبت من أميركا أن تعوضها عن خسائرها في العراق وهذا قبل الغزو بأسابيع

لأن العراق سوق تجاري للمنتجات المصرية .. وعليه فإن مصر سوف تخسر من هذه الحرب ( غزو العراق ) فقامت الحكومة الأميركية وبتفويض من الكونجرس إعطاء مصر 7 مليار دولار تعويض لخسارتها في هذه الحرب

قلي بالله عليه وحكم عقلك وقلبك في هذا

هل إيران التي تتعامل مع أميركا من تحت الطاولة وتحقق مصالحها دون أن تحرج نفسها أمام العالم العربي والإسلامي والعالم كله ... إذا وافقنا على ما تقوله من ادعاءات لا أساس لها من الصحة

ومصر التي تقبض من أمريكا علنا جهاراً نهاراً على إخوانها العرب والمسلمين في فلسطين

من منهم تتهمه بالغباء السياسي كما ادعى العميل السادات

بالله عليك حكم عقلك وقلب وبعدها قول رأيك بما يرضي الله


سلام عليكم

فشكووول يقول...

طبعا يا قلم رصاص ادعى لك واقول لك يا رب ربنا يوفقك وتوفق هذا العام فى امتحان الدبلوم العام وتجيب تقدير كمان عشان يسهل لك فى الماجستير
اللهم وفقه ونجحه يا رب واجعل له من كل ضيق فى ورقة الامتحان مخرجا.
اللهم آمين
تحياتى

dalia يقول...

حزنت جدا انك بتقرأ لصحيفه معارييف الاسرائيلية ومش بتقرا الجرائد المصرية كانت جريدة الشروق الجديد المصرية أول من فجر خبر قصف جنوب السودان في يناير الماضى لاسلحة تزعم اتجاهها لفلسطين وتناقلته وسائل الاعلام الغربية والاسرائيلية واليك موقع الجريدة التى انتمي اليها
http://shorouknews.com/Default.aspx
وغير هذا موضوعك جيد جدا ويناقش قضية حساسة وفي غاية الخطورة والمشكلة مثل ما بتقول ان هذا الاختراق الجوي يحدث دون أن يشعر به أحد
تحياتي

dalia يقول...

http://shorouknews.com/ContentData.aspx?id=19028
هذا هو اللينك عن انفراد الشروق بموضوع ضرب السودان
تحياتي

قلم رصاص يقول...

فارس عبد الفتاح

اخي الفاضل مرحبا بك للمرة التالة

وان شاء الله لحديثنا بقية وقتما افرغ من امتحانات الدبلوم

سعيد جدا بتواصلك

والله تعالى أسأل التوفيق لي ولكم

في حفظ الله

قلم رصاص يقول...

م/ الحسيني لزومي

مرحبا بحضرتك في المدونة

ونسأل الله تعالى ان يفك كرب المسلمين في كل مكان

والقدس عربية مهما حدث بإذن الله

وجزاكم الله خيرا على مجهودكم الرائع في هذا الصدد

في حفظ الله

قلم رصاص يقول...

dalia

اولا مرحبا بحضرتك في المدونة

ثانيا لاتحزني أستاذة داليا فصدقيني انا لا أقرأ الصحف الاسرائيلية ولم أقرأها قبل ذلك

وارجو ان تلتمسي لي العذر لعدم ذكري انفراد جريدة الشروق بالخبر موضوع الموضوع..فهذا سقط مني سهوا أمام انشغالي بإعداد فكرة الموضوع ومادته

ثم هذا ليس لب الفكرة ، فالمصادر وان تعددت يبقى الخبر موضوعها هو الأهم ..فأنا لم أكن بصدد بحث من وراء الخبر وانما ماهمني ويهمني وسيهمني هو الموضوع نفسه، لاسيما والموضوع اصبح حقيقة وحديث العالم وعدم ذكري انفراد الشروق بالخبر او غيرها اصبح غير ذي اهمية

وان كنت اعتبر عدم قرائتي انا او غيري من المصريين والعرب للصحف والكتابات الاسرائيلية تقصير مني ومننا جميعا لأنه يجب علينا كي نأمن شر هؤلاء الخنازير المتربصين لنا دائما علينا ان نتابع مايكتبون وما يقولون ..صدقيني حضرتك دي ظاهره صحية


ثم أساسا يمكن للمرة الاولى من زمن طووووووووووووويل جدا نعتمد نحن العرب على مصدر محلي في التعامل مع الكيان الاسرائيلي

فاسرائيل دوما عودتنا على ان تفاجئنا بما تخطط له وما نفذته ضدنا في وسائل اعلامهم كنوع من الترهيب او بث الردع في نفوسنا

وكذلك هناك سبب تاريخي ايضا وانا ذكرته في صلب البوست انه غالبا ماتتستر الانظمة العربية على مثل هذه التجاوزات الاسرائيلية في حقنا كنوع من عدم اثارة حفيظة الشعوب العربية ضد انظمتها ..لذا يلتزمون الصمت في مثل هذه الحالات


عموما سعدت جدااااااااااا بمرور حضرتك وتعليقك الرائع علي الموضوع

وبالتأكيد مدونتي المتواضعه اكتسبت زائرا له قيمه مثل حضرتك


والله تعالى أسأل التوفيق لي ولكم

في حفظ الله

عابر سبيل (عبدالرحمن محمود) يقول...

اخى الكريم
الردار صاحى وشغال
بس فى اى ناحية هى دى المشكلة
الردار صاحى فى كل الدول العربية
نحو المعارضين لسياسات الانظمة التى ترى نفسها معصومة
وكمان الدفاعات الجوية صاحية
بل الهجومات الجوية
ناحية نفس الناس
المعارضين الوحشين الارهابيين المتشددين العاملين على زعزعة الامن القومى
اما الردار ففى نو عمييييييييييييييق
لناس ناس
للغلابة المساكين المتجمعين من الشتات ليعيشوا فى سلام وتبات ونبات ويخلفوا صبيان وبنات

وعلى فكرة بعد قراءة البوست من رأيى ان يكون اسمك
قلم على سهوة

عابر سبيل (عبدالرحمن محمود) يقول...

القلم اللى على سهوة مش ليك ده للى نايمين (توضيح )
دمت اخى بخير

قلم رصاص يقول...

عابر سبيل (عبدالرحمن محمود)

مرحبا بك اخي الفاضل في المدونة

ومشكور جدا على التعليق

وان كنت لاافهم ماهو قصدك بخصوص قلم على سهوة !!!

نرجو التوضيح اكثر

ومرحبا بك مرة تانية


في حفظ الله

Hossam يقول...

حبيب قلبى الجميل
الموضوع بجد رائع مع انى مش بفهم فى السياسة نهائى ولا فى الكلام عن طريق السياسة بس عن جد عجبنى كتير
بس عندى تعليق-بفضل ان الموضوع يكون قصير عشان الواحد يعرف يقراة ويستفيد منه اكثر استفادة حسيت ان فى جمل غير مهمة بالموضوع ولن تضيف شىء
تقبل مرورى صديقى الجديد اللى بجد حسيت انه قريب من تفكيرى
تحياتى وتقبل مرورى ونقضى وشاكرك على مرورك العظيم بمدونتى البسيطة

قلم رصاص يقول...

Hossam

اولا نورتنا ياحسام بيه

وأشكرك جدا على مرورك الجميل على المدونة
واشكرك كمان على رأيك في البوست

وملاحظتك على العين والرأس ومش نقد ولا حاجة

لكن بخصوص طول البوست فصدقني انا كمان لا اميل للموضوعات الطويلة المليئة بالحشو ويمكن ده تاني موضوع تقريبا طويل عندي

والسبب يمكن اني حبيت أأصل الموضوع ده شوية لأنه كان مضايقني شوية فحبيت أخد راحتي فيه شوية

وطبعا ياباشا انا اللي لي الشرف بصداقتك

ننتظر منك مزيد من التميز والابداع ومزيد من تبادل الزيارات

في حفظ الله

رضا الكومى يقول...

هل هذا الردار صنع مصرى ولا شرينه
طبعاً لو شريينه يبقى مالهوش لازمة أن أكيد الأعداء عارفينه حتة حتة وله مضادات
وأما إن كان صنع مصرى فلماذا لا يتم عليه تعديلات وتطويرات على حسب تطوير الطائرات الإسرائيلية كل شوية
وأما إن كان بيكشف الطائرات ويتم الإبلاغ ويسكت المسئولون . فهذه هى المصيبة الكبرى

أخى قلم رصاص
أشكرك على الموضوع الهادف
وتقبل تعليقى

smithe يقول...

hello friend. you want to come race Blog Design, Read more. Can you be a friend again

Twitter Delicious Facebook Digg Stumbleupon Favorites More

 
Free Web Hosting