إفتح الحنفيه .. تجد مايسرك

في الأول إقرأو الخبر الجميل ده .. وبعدين لينا قعده

تسربت كميات كبيرة من المازوت إلى نهر النيل بمنطقة محافظة حلوان وذلك للمرة لثانية خلال شهرين.

الحادث وقع يوم الجمعة أمام محطة كهرباء جنوب القاهرة شمال محافظة حلوان، عندما تسربت كمية تصل إلى 10 أطنان من المازوت إلى أحد المصارف التي تتصل بنهر النيل .

وكشفت التحقيقات عن تسرب البقعة من محطة الكهرباء نتيجة حدوث خلل بها‏,‏ وقد أصلحت الأجهزة المعنية ذلك الخلل‏.‏

كان الحادث قد تم اكتشافه أثناء مرور أحد العاملين بفرع القاهرة الكبرى بجهاز شئون البيئة بمنطقة المعصرة حيث شاهد بقع الزيت فى مرسى العبارة الذي يربط بين منطقتي المعصرة والحوامدية .

قامت سلطات وزارة البيئة باستدعاء إحدى الشركات المتخصصة فى أعمال شفط الزيوت وتطهير المجارى المائية لسحب الزيت الموجود فى مياة نهر النيل باستخدام طلمبات خاصة ونقلة الى إحدى الشركات المتخصصة لإعادة استخدامه كما تم الاستعانة بكميات من قش الأرز وكمية من المواد التي تمتص الزيت .

وقد تجمعت كميات من المازوت امام البيارة الموجودة شمال المحطة شرق طريق الكورنيش والتى تتصل ببيارة أخرى غرب طريق مكشوف يؤدى إلى المصرف .

ومن ناحية أخرى أكدت وزارة الرى والموارد المائية بأنه تم السيطرة بالكامل على بقعة المازوت التي وصلت حوالى 10 اطنان من المازوت بمصرف حلوان الزراعي المغطى بطول 4 كيلو مترات .

-----------------------------------------------------------------------------

والله يعني ما انا عارف اقول ايه يابني آدمين

حاجة بجد تفقع المراره لعدة أسباب :

أولا - لما بقعة زيت بالحجم الضخم ده تتسرب من محطة كهرباء جنوب القاهرة .. !! يبقى ازاي وزارة الكهربا بوضعها ده هتقدر تدير برنامج الطاقة النووية لتوليد الطاقة البديله إزززززززاااااااااااااااااي ؟؟!

حاجة بجد تدعو الى التنغيص .. وياشعب مصر عيش وهيص .. !

ثانيا - هو بسهولة ممكن البترول او أي حاجة ضاره او ملوثه تتسرب لمياه النيل كده عادي .. وبالشكل ده .. ؟!

يعني الواحد يفتح الحنفيه بدل مايلاقي مياه حاف كده.. هيلاقي كوكاكولا ولا بيبسي .. هههههههههههه

زغرطي يالي منتيش غرمانة .. !

ولا على ايه .. ما ياما مصانع ومعامل ويمكن وزارات كمان بتصرف مخلفاتها في النيل من سنين طويلة.. وعلى عينك يا تاجر.. واللايحة مبتمنعش ياسيد.. وفوت علينا بعد 3 سنين .. والشعب يأربع مياه ببلاوي .. مع عيش بزلط .. ويعمل أحلى دماغ !

ثالثا - والاهم اللي غايظني اكتر ان الموضوع تم اكتشافه بالصدفه من أحد العاملين بفرع القاهرة الكبرى بجهاز شئون البيئة بمنطقة المعصرة..!

ههههههههههههههههههه

يعني بدل ما يبقى عندنا نظام الكتروني يراقب الحاجات المهمة اللي زي دي .. أو نظام انذار مبكر أو أو .. الخ ..

لأ يا جماعه .. احنا بقى لسه بندقدق بظلطين على رأي اللمبي .. !

وأخير أقول :

ياحكومة ياجمـــــــــيله

خليتي عيشتنا نيــــــله

فين الذكاوة والنضافة

ولا أقولك : جتنا نيله

**************

قلمي الرصاص من كتر اللي بيحصل في المحروسة ده .. شال في نفسه كتير .. وزعل جدا .. وسنه اتقصف على طول

وبناءا عليه ، أعلن تجديد النيه .. وانعاش الهمة .. قررنا .. نبري القلم من جديد .. لأجل البلاد والعباد .. !