الست فشخره وجوزها محسن بيه منظر منهم لله رفعوا الأسعار..!

مدام فشخرة منظر و جوزها محسن بيه منظر عاملين عزومة
و يتقدم أكل كتير على السفرة و بعد كده نص الأكل يترمى
اللى بناكله فى رمضان و فى شهر واحد ممكن يكفينا فى 365 يوم

لحد هنا حلو و جميل و دعوة لعدم الاسراف و التبذير

خدوا بالكم بقى من باقي الاعلان

اللى يولع الأسعار و يخرب الجيوب هوا الفشخرة و المنظرة يا حبوب

ونقول ليه السكر غلي .. وليه الرز غلي .. وايه اللي غلى التوم .. ياعم صحي النوم

وبعد كده نلاقي الاعلان برعاية

بنك الأسكندرية - بورسعيد الوطنية للصلب - البنك العقارى العربى - بنك التعمير و الاسكان .

باختصار يا ساده .. اللي الاعلان ده عاوز يقوله : ان الفشخرة والتنبذير من الناس هي السبب الحقيقي اللي أدى الى رفع الأسعار..

بقى بالذمة دي ناس عندها دم .. ؟!
بقى دي ناس عارفه أدنى قواعد اللياقه حتى.. ميش هقول الفهم ؟!
لأنه واضح انهم ميعرفوش يفهموا..

والله ناقص يقولوا ان الست فشخره وجوزها محسن منظر هما اللي ورا الأزمة المالية اللي حصلت في أمريكا اليومين دول .. ههههههههههههههههه

طب انا هسلم بكلامهم وافترض جدلا ان الفشخرة في شهر رمضان من الناس هي السبب ورا رفع الأسعار..

طيب يا محترمين قولولنا بقى : مين السبب اللي ورا ارتفاع الأسعار في بقية أيام وشهور السنة ؟؟؟؟؟ !

ردو بقى يا بتوع الاعلانات يامحترمين ..
ردوا بقى ياساده ياوزرا يا نضاف ..
ردوا بقى يارجال الاقتصاد يا فاهمين ..
ردوا بقى يا كوادر الحزن الوطني ..

اللي يعرف الاجابه ياريت .. ياريت يكلمني على 0900

بس بسرعه قبل المراره ماتتفقع م اللي بيحصل

تقبلوا تحياتي