أحداث 24 ساعة

حوار إستراتيجي مع مادو

مادو


بعد صداع متواصل على مدار يومين, وسهر أمام الإنترنت حتى السابعة صباح أمس لمتابعة الأحداث الملتهبة على الساحة السياسية المصرية, غرقت في سُبات عميق ولم أدري من أمري شيئا إلا صوت آذان العصر على أثر تحركات مادو- إبن أخي كي جي1- في الغرفة وتعامله معي كهدف بدأ بمداعبة لطيفة وإنتهت بترخيم متواصل كاد أن يصل إلى حد التشابك باﻷيدي بيني وبينه.

الطفل لم يعجبه حالي الذي أوصلني للنوم حتى العصر, ووضع في رأسه هدفا لا مناص للتراجع عنه بأن يوقظني حتى لو كلفه ذلك قُبله على جبينه.. وليس " قلمين" كما سيتوقع البعض!!!
في البداية قاومت محاولاته للنيل مني حتى أستكمل رحلتي مع النوم...

وقلت: إخرج برا الأوضه يا مادو عشان أنام
مادو: إصحى بقينا العصر
قلت: معلهش سيبني كمان شوية
مادو: مش هاخرج.. ولازم تصحى يعني هاتصحى

وإقترب مني مداعبا شعري.. وكلما قاومته باﻷيدي تاره، وبقُبله على جبينه تاره، وببضع كلمات تارة أخرى زاد إصراره على تحقيق هدفه. وإستطاع بالفعل أن يُخرجني مادو من مود النوم إلى غير رجعه.

ولما ذهب النوم وزادت مقدمات الإستعداد للإستيقاظ من جانبي،  خطر في بالي فجأة سؤال أردت توجيهه لمادو، ولم يدر بخلدي أنه سيفتح لي معه المجال إلى الحديث بهذا الشكل

أنا: بتشوف يا مادو اللي إسرائيل بتعمله في الفلسطينين
رد في حماس: طب ومصر مبتعملش حاجة ليه ياعمو؟!
قلت: ما انت شايف اللي بيحصل عندنا.. محدش في مصر يقدر يساعدهم دلوقتي
قال: تعرف ياعمو, محدش يقدر يساعدهم الا واحد زي عمر بن الخطاب

وما أن قالها مادو حتى نزلت علي مسامعي كلماته كصاعقة من هول الدهشه، وانفجرت ضاحكا: انت عارفه منين؟!!!

ومع ملاحظتي ملامح تصاعد ملفت في نبرة الحوار, أردت أن أثير غيظه لُيخرج أكثر وأكثر مما لديه...

فقلت له: بس مين في مصر بقى اللي زي سيدنا عُمر؟!!!
فقال في ثقة تثير اﻹعجاب والضحك في ذات اللحظة: أنا ياعمو

ورغبة مني في الحفاظ على سخونة الحوار, ومحاولة إزدياده إشتعالا...

قلت له: إنت متنفعش, إنت مش إسمك عُمر, اللي ينفع عُمر أخوك أو عُمر النونو الجديد إبن عمو

تخيلت أن مادو قد إستسلم لما قلته له, ولن يجد في جعبته ما يلقيه على مسامعي للخروج من هذا المأزق, لكن أعترف أنني كنت واهمًا تمامًا.. فألقى بقنبلة حسمت الأمر لصالحه...

فقال: أنا إسمي مادو يعني محمد, يعني أنا على إسم الرسول عليه الصلاة والسلام- كما قال بالحرف- والرسول احسن من سيدنا عمر ابن الخطاب.. يبقى أنا أقوى واحد وأقدر أقتل إسرائيل


أمام معلوماته, وطريقة معالجته لها, وطريقة تفكيره, وأسلوبه في الرد.. طبعت على وجنتيه عدة قُبلات.. وإحتضنته للحظات، وقلت له في صوت خافت:

إنت خسارة في التعليم المصري يا مادو.. بحبك أوي يابن الللللللللللل



16 تعليقات القراء:

موناليزا يقول...

ربنا يحميه بجد :)

ليلى الصباحى.. lolocat يقول...

إنت خسارة في التعليم المجاني يا مادو
****************************
والله اخى خسارة فى المجانى وغيره :)
التعليم بمصر كله زى بعضه يمكن المجانى لازال يحتفظ ببعض اخلاق من التقاليد والقيم


بارك الله فيه و حفظه وانبته نبات حسن
ماشاء الله عليه ...

بس اللى ينام للعصر يصلى الضهر امتى هههههه

تحياتى لك اخى

قلم رصاص يقول...

موناليزا

اللهم امين
شكرا لكِ :)

قلم رصاص يقول...

ليلى الصباحي

اللهم امين
شكرا لحضرتك على التعليق القيم
ماهو مش كل يوم للعصر بعض مرة كدا فقط :)

ღ أحاسيس آيـــوشـه ღ يقول...

ماشاء الله ربنا يحميه يارب ويبارك فيه ونشوفه باذن الله مثل عمرو بن الخطاب
الاطفال بهم طاقات مهدرة للاسف ولو قدرنا تنميتهم بجد هنخلق جيل قادر على فعل اى شئ

قلم رصاص يقول...

آيوشه

اللهم آمين
شكرا على مرورك وتعليقك :)
فعلا الأطفال عندهم طاقات كبيرة جدا لو أحسنا إستغلالها ان شاء الله هانكون أحسن بكتير

ندى الياسمين يقول...

ههههههههه لا جامد جامد يعنى احجزلي الواد ده ياعمنا
ربنا يخليه ويبارك فيه يارب

قلم رصاص يقول...

ندى الياسمين

ههههههههه خلاص والله ماهو راجع يا ام مريم :)
بس ان كنتوا عايزينه خلفوله حتة بنوته حلوة كدا, بس تكون لمضه عشان تسلك له :)))

اللهم امين, ومشكورة على المرور والتعليق

جارة القمر يقول...

ههههههههههههههههه عسل الواد جدااااا
ربنا يحميه يارب

قلم رصاص يقول...

جارة القمر

اللهم آمين
طالع لعمو بقى D:

فشكووول يقول...

عارف يا قلم ان مادو ابن اخوك ربنا يخليه لكم طريقة تفكيره اكبر مننا احنا يعنى هما بيشوفوا التليفزيون من مرحله مبكره من العمر وتعرف ان لو خليته يفتح الكمبيوتر حتلاقى مفاجأه انه بيعرف فيه اكتر من جده فشكول .. انا عندى حفيدى الواد احمد بيفتح الكمبيوتر ويعمل فيه كل اللى هو عايزه بالرغم من ان عمره لسه ما كملش اربع سنوات .. جيل مهبب بهباب
تحياتى

قلم رصاص يقول...

فشكووول

اللهم امين.. ربنا يخليك ياعمنا :)
الحمد لله ربنا بيحب مصر عشان فيها اجيال حلوة جايه بقوة.. وعارف ليه, ماهو فعلا عندنا مادو ماشاء الله عليه في استخدام الكمبيوتر والفيديو جيمز ولا حد زيه, ماشاء الله عليه فيه بعض الألعاب الشهيرة هو محقق فيها مراكز متقدمة جدا عننا بمراحل

طب اقولك حاجة جديدة بس خليها سر عشان الواد ميتحسدش: مادو بيلعب شطرنج وبينفذ خطة نابليون كمان ههههههههههه اه والله

منورني دايما يا أستاذنا :)

DiaaSamy يقول...

جزاك الله خيراً علي هذا الموضوع الرائع حقا

تشرفت بالدخول الي هذة المدونة الرائعة

تحياتي

DiaaSamy يقول...
أزال المؤلف هذا التعليق.
قلم رصاص يقول...

ضياء سامي

الشرف لينا يا اخ ضياء
نورتنا :)

أحلى حياة يقول...

صدق مادو! :)

ربنا يحفظه ويحميه ويبارك فيه ويجعل النصر على ايديه وينفع بيه ويستخدمه ولا يستبدله ويعزه بالإسلام ويعز الإسلام به ويجعله من الصالحين المصلحين الهداة المهتدين ... كفاية كدا ولا في وقت أكمل؟! :))

Twitter Delicious Facebook Digg Stumbleupon Favorites More

 
Free Web Hosting