أحداث 24 ساعة

سويسرا ، حصالة مصر !




منذ نعومة أظافري ، وفكرتي عن سويسرا المكان الآمن الوحيد على وجه الأرض لتخزين أموال كبار الحيتان وآكلي فلوس البشر من كل حدب وصوب . وأصبحت الفكره جزءا من قناعاتي بعدما نضجت وأدركت الحياه العامه في مصر، وملء سمعي وبصري الضجة تلو الأخرى عن فضيحه ماليه كبرى لمسئول من هنا ومسئول من هناك ، قــًلب(تعبير مصري دارج) منها جيوب المطحونين في الأرض من غلابة مصر بطريقه أو بأخرى وجمع ثروه بالملايين وأحيانا بالمليارت وأودعها في حسابات سريه ببنوك سويسرا.

والحقيقه التاريخ حافل بمثل هذه الوقائع ، وغرقت وسائل الإعلام المختلفه في تغطيتها. ولتكرار ذلك الأمر وكونه أصبح العادي بتاعنا ، تخيلت سويسرا وكأنها أصبحت حصاله لفلوس المصريين .

خيل لي وأنا في احدى أحلام اليقظه ، أنه لما لا يحق لأي مصري ممصوص دمه ، قضاء أجازه سنويه أسبوع في أوروبا انطلاقا من سويسرا ؟! أعلم أنها محض خيال ..............!
فهي من حيث الواقع والعدل ، مدفوعه مقدما من جيب هؤلاء البسطاء ولكن في حسابات خاصه بالكبار والمطبلاتيه .. وأهو يبقى نوع من الضريبه السياحيه لرجال الأعمال عوضا عما لايدفعونه من ضرائب اجتماعيه للفقراء الذين يمثلون 40 من سكان مصر.

أو عندي إقتراح أفضل وأكثر واقعيه ، وهو أن يمول رجال الأعمال منحا دراسيه للمتميزين أو حتى غير المتميزين الذين ينقصهم الجو المناسب لتعليم أفضل في الخارج ، تكفيرا عن جمعهم تلك الأموال الطائله من الذين لاحول لهم ولاقوه.



______________

أتترككم لمشاهدة مباراة الأهلي والترجي


تقبلوا تحيتي

24 تعليقات القراء:

MR.PRESIDENT يقول...

بصوا بقي لوحوش السوق في اللقمة
يا بني دا رزق :))
بس دعونا ببتهل من أن يزدادوا غني
ونزداد فقر
يزداد تجبر ونزداد ذل

ما أنا اللي جبته لنفسي أصلا .

زهرة يقول...

انت قلت أحلام يقظة

مش هتبقى غير كدة ..وربنا يخلى لهم سويسرتهم

ويخلى أمنا للغلابه اللى زينا يا أستاذى

الماتش حلو أوى ع فكرة :)

^
^
^
^
أخبار البرد إيه ؟؟

حلم بيعافر يقول...

منك لله يا اهلى صحيتنى من احلاها نومة

قلبى اتقبض فجأة فقمت لقيت الاهلى جايب جون

منك لله ياهلى منك لله

قلم رصاص يقول...

مستر بريزيدنت

أرزااااااااااااق؟

أرزاق والضمير غايب
ومالك يا أوطان سايب

ايه ياعم سيبني احلم
الله ..صحتني من احلاها نومه
هههههههههههههههههه

منورني

قلم رصاص يقول...

زهره

ايوا فعلا أحلام يقظه
بس انا دايما بحب احلم وباحاول احقق احلامي

بمعنى ،،،،،،،،،،
انكوا تسمحولي أبقى رجل اعمال من كبار الحيتان اللي انا اتكلمت عنهم دلوقتي .. واوعدكم اني هنفذ ما أطلبه من الاخرين
هههههههههههه

الماتش فعلا حلو
وبركاتك يابركات

البرد راح الحمدلله

شكرا على السؤال

قلم رصاص يقول...

حلم بيعافر

مووووووووتوا بغيظكم

0_0

ندى الياسمين يقول...

لا الى انت جايز ما تعرفوش بقى ان اغلب الناس دي فلوسها بتروح لاي سبب واي تلكيكه

والبنوك فى سويسرا بقت مقيده جدا فى الفلوس ومصادرها

وبقى الاتجاه دلوقتي لشراء عقارات فى اي مكان فى العالم
وده من كتر الارصده الى اتجمدت وراحت فى الهوا يا ريس ولا حتى حصاله كمان

كلمات من نور يقول...

هي الحصالة دي مش زي بتاعة زمان لما تتملى يعني بيحصل لها إيه؟؟؟؟؟؟؟؟؟؟؟

احلم يا قلم رصاص الأحلام إيجابية

اللى موش عارف يتغير يقول...

يا حبيبى سويسرا ايه دى البطاطس والطماطم شنقت الناس
بس تعرف احنا اللى مشغلين بنوك سويسرا هو احنا شوية
مبروك ياعم بس ان شاء الله الترجى يعوض فى تونس

رحــــيـل يقول...

فاهم غلط يا سيد

دول قلبهم ع البلد وبيحسنو صورتنا فى سويسرا عشان يعرفوا اننا دولة غنيه وعندها فلوس ومش محتاجينلهم فى حاجة بيغظوهم ويطلعولهم لسانهم :D
مبرووووك للاهلى وخلى الناس اللى نفوسها مش صافيه دول يسمعونا والله وعمولها الرجالة :)

قلم رصاص يقول...

ندى الياسمين

انا فاهم كلللللل الكلام دا كويس يا ام مريم وعارف ان ده بيحصل خصوصا بعد احداث 11 سبتمبر

وكمان عارف ان سويسرا مش لوحدها اللي بيتهرب الفلوس ليها فيه دول تانيه كتير زي كندا وامريكا وغيرها

بس انا قصدت لو تلاحظي التركيز على خصوصية سويسرا وارتباطها بالفكره دي
خصوصا اننا طول عمرنا بنسمع الكلام من واحنا اطفال

وكمان حتى في قعدات الواحد مع اصدقائه لما بنهرج وتيجي سيرة فلوس حد بيقول للتاني : ايه ولا تكونشي بتهربها لسويسرا انت كمان؟

كدا يعني

منوره الموضوع

قلم رصاص يقول...

كلمات من نور

اكييييييد بتلفت النظر اوي في البيت فما بالنا بقى في سويسرا ههههههههههه

فعلا فلنعطي الأحلام قسطا من الواقع

مشكوره على المرور

قلم رصاص يقول...

اللي موش عارف يتغير

اهلااااااااااا يا........بولندا
هههههههههههههههههه

طيب يابني ايه علاقة البطاطس والطماطم ام 10 جنيه بكلامي؟ بالعكس دا تاكيد ليه يابني

الله يبارك فييييييييييييك
وان شاء الله الأهلي هيأكد التفوق هنااااك

منور يابن خالي

قلم رصاص يقول...

رحيل

اه والله فكره فعلا استاذه ساره

فسر الجهد بعد الجهد بالماء

^_^

عقبال التأكيد هناك في تونس ان شاء الله

بس بالله عليكِ بلاش الاغنيه دي لأنها كارثه على الرجاله هههههههههه

شكرا على المرور

بنجاواتى يقول...

السلام عليكم.....

ده مرور سريع كاستجابة منّى لنداء روحى التى تعشق قلمك...حلو كده يا عم؟؟؟ههههههههه

دلوقت بقى انا عندى حلم كمان ....هو مش ممكن الاخوة الاعزاء فى سويسرا يشترطوا انهم كل ما يزيد عندهم الارصدة من دولة ما ده يديهم الحق فى التدخل فى شئون الدولة دى ....الله دى تبقى هى دى بقى ...ساعتها طبعا هنصبح نلاقى نفسنا جمهورية مصر السويسرية

اهى احلام طماطمية وشكرا :)
تحياتى

قلم رصاص يقول...

بنجاواتي

عليكم السلام ورحمة الله وبركاته

ازيك يابنجااااااااااا
انت فينك من زمان يادوك
معقوله دا كله غياب عن الساحه التدوينينه

فعلا احلامك رائعه هههههههههههه

منورني جدا

فتاه من الصعيد يقول...

استشعر حكدا تبكيا في هذه التدوينه :)

عموما ده كله احلام .... من امتى الحدايه بترمي كتاكيت

تحياتي

قلم رصاص يقول...

فتاه من الصعيد

الخوف ليكون كدا فعلا

^_^

غير معرف يقول...

مصر فى مهب الريح

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 – العدالة الاجتماعية .. وأطفال الشوارع والذين يملكون كل شىء .
5 – ضرورة الاتحاد مع السودان لتوفير الغذاء وحماية الأمن القومى المصرى.
6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

لمزيد من التفاصيل أذهب إلى مقالات ثقافة الهزيمة بالرابط التالى www.ouregypt.us

د. ياسر عمر عبد الفتاح يقول...

سويسرا

مالك ومالها بس
دي بتاعة الناس اللي فوق

لكن أمثالنا من الناس اللي لمؤاخذة تحت
ملناش فيها


ربنا يوعدنا

ورجال أعمال إيه اللي يتبرعوا
هيه الحداية بتحدف كتاكيت

قلم رصاص يقول...

غير معرف

شكرا للمره التالته على المرور والمشاركه اللي بكل تأكيد أثرت المكان

قلم رصاص يقول...

دكتور ياسر

ههههههههههههههههههه

ياعمنا هتلاحظ اني باقول احلام يقظه

بس ايه المانع اننا نحلم ياجدع؟!

منورني دايما يادكتره

Soul.o0o.Whisper يقول...

ممممممممم

حصالة؟؟؟
بس دى حصالة من نوع خاص...
كل ما تتملى توسع ...نياهاهاهاها


هاسمح لك تكون رجل اعمال
بس اعمال كويسة ، بلاش اعمال من التانية ;)

بشرط أكون اول واحدة مسافرة ، ماشى؟؟؟

خلاص اتفقنا

سلام بئا :)

dr_ahmedcupping@yahoo.com يقول...

السلام عليكم ورحمة الله وبركاته
*******************************

الحجامة الرياضية أول مدونة تهتم بعلم الحجامة وتطبيقاته في المجال الرياضي كعلاج للإصابات الرياضية ، وتسريع استعادة الشفاء ، وفعالية التأهيل ، وكمنشط للآداء البدني . د . أحمد حلمي صالح Sports Cupping the first sports blog concerned with the knowledge of Cupping theray and its applications in the field of sports as a treatment for sports injuries, and speed up the restoration of healing, and the effectiveness of rehabilitation, and a booster for physical performance. Dr.Ahmed Helmy Saleh

Twitter Delicious Facebook Digg Stumbleupon Favorites More

 
Free Web Hosting