أحداث 24 ساعة

الإذلال الضريبــــــــــــــي ! + تحديث مهم




من المعروف أن الضريبة أحد أهم الايرادات اللازمة لتغطية الإنفاق العام في أي دولة . والحقيقة الضرايب بتتعدد صورها أو أنواعها بمرور الزمن ، وبتظهر ضرايب وتختفي حسب الأوضاع الاقتصادية والاجتماعية السائدة في أي مجتمع .

يعني مثلا ، كان فيه زمان ضريبة تسمى بضريبة الرؤوس أو ما يطلق عليها أحيانا ضريبة الفِردة (بكسر الفاء كسرا مبرحا حتى يتم الدفع أو الحبس ...هههههههه ) ، ودي كانت بتفرض على المواطن لمجرد كونه إنسان يعيش على هذه الأرض أو تلك .

محدش يقدر ينكر ان التزام الشعب في أي مكان بدفع ماعليه من ضرايب ، هو واجب وطني مقدس .. لضمان استمرارية الدولة في تغطية نفقاتها العامة من أجل صالح المجموع في إقامة الجسور وشق الطرق ، والاهتمام بالتعليم والصحة ...الخ .

لكن الحاصل في بلدنا مصر بالتحديد في هذا المجال ، خلا النااااااااس شقت هدومها (طبعا ملهاش علاقة بشق الطرق ... هههههههههه ) ، فرغم ان ضريبة الفردة بتاعة زمان دي أنا باعتبرها انها كانت غير انسانية ، إلا إنها أرحم بكتييييير من اللي بيتفرض على المواطن دفعه من ضرايب ورسوم هذه الأيااااااام .

فيه حاجات بيدفعها المواطن لاتعتبر ضرايب ، ولكن هي في أصلها ملهاش تفسير غير كده . خد عندك مثلا ، انت تروح تركب تليفون أرضي جديد اليومين دول بـ 250 جنيه أو حتى بدون مقابل (جرررررر رجل يعني) .. شوف بقى أول فاتورة هتجيلك هتبقى بكاااااااام ؟ هههههههههه مش هقول لأني مش اللي هدفعهالك !

وعلى هذه الشاكله بقى ، خد عندك فواتير الكهربا والميااااااه ... الخ . انا عارف انها رسوم مقابل خدمة بتؤدى ، لكن المشكلة في الضرايب المفروضة على استخدامك لهذه الخدماااااات ، والتفنن في اصطناع الضريبة من جانب الحكومة معناها ذل منها للشعب ، وده مش كلامي انا .. ده كلام علماء وخبراء المالية والاقتصاد ، في معرض تفسيرهم للعلاقه بين الضرايب في النظام المالي الحالي والزكاة في الاقتصاد الاسلامي ، باختصار قالوا : ان الضريبة أصلها جه من كلمة ضرب ، أي انها مفروضه عليك من جانب واحد ، وذلك لقوله تعالى :- " ُضربت عليكم الذلةُ والمسكنه " . في حين ان الزكاة فيها تزكيه للمكلف بدفعها وتطهير لماله من حسد المستحقين لها ، وذلك لقوله تعالى :- " خذ من اموالهم صدقه تطهرهم وتزكيهم بها " ، صدق الله العظيم.

معلهش سرحت بيكم بعيد شوية ، نرجع لموضوعنا تاني ونقول: خد عندك كمان حاجة اسمها إشغال طرق .. يعني ايه ؟ منعرفش .. ملناش دعوة .. ادفع أول وبعدين ابقى تعالى إسأل ..حاجات عجيبة متلقهاش الا عندنا في المخروسة ... والله بلدنا صعبانه علي من اللي الحكومات المتعاقبة واحدة ورا التانية بتعمله فيها وكأنها مش بلدهم برضه !

أه نسيت أقولكم على رسوم النظافه ولم القمامه .. مع ان والله عمر ماحد جه نضف شارع _يمكن عندنا بس الله اعلم وانا مش واخد بالي_ واقل كوم زبالة (لامؤاخذه ياجماعه) في المنطقة أعلى من قمة إفرست بجبال الهيملايا ههههههههههه ... اللهم باستنثاء دولة عظمى على حدودنا الشمالية ، اسمها بلاد ماوراء الترعة ، دي بقى قطعة من نيويورك أو دبي هههههههههههه . وزي ماقولت لكم ان عمر ماحد جه خد القمامة من مكانها ، رغم ان رسوم تحصيلها بتيجي على فاتورة الكهربا تقريبا ، واوعى تعترض ياأستاذ مواطن .. أزعل منك وممكن أعمل لك قضيه .. وخد عندك رسوم وتبديدات ودمغات وغرامات ..واعيشك في حالة تنازع اختصاص قضائي ، ومحاكم البلد كلها تقع في بعض بسبب جنابك .. ههههههههه !

يعني المواطن باختصار ياسادة ، مطالب في نهاية الأمر بدفع فاتورة شهرية أو فصلية تتعدى وتفوق دخله بمراحل .وعلى رأي أحد أقاربي : إحنا نعتبر شاريين بيوتنا من الحكومة بالتقسيط !!! وهيجي يوم يفرضوا علينا ضريبة استنشاق هوااا ... واللي مش هيلتزم بالدفع ، هيكون متهم بجريمة شم هوااا على خلاف مايقره القانون ...!

نرجع تالت لموضوع الضرايب ، الدكتور يوسف بطرس غالي وزير المالية بيقول : أي وزير مالية في العالم مكروووه من شعب دولته .. طبعا يادوك ، دي حاجة طبيعية .. بس أحب أطمن حضرتك واقولك : احنا اجدع من أي شعب في العالم ، وبنكرهك فووووووووق ماتتصور هههههههه !

وبيقول كمان : كل الوزرا بينتشوا فيا .. عاوزين يزودوا اعتمادات إضافية في ميزانيات وزاراتهم ، وكل مايشوفوني عاوزين فلوس عاوزين فلوس .. يعني يااخواني تعالوا نتخيل المشهد ، وكأن الوزير من دول أول مايشوف وزير المالية ، يهرش له في دماغه ... هههههههههههه!

والدكتور غالي مستكملا حديثه قائلا : وانا مفيش امامي شيئ غير اني أتصرف واجيب لهم فلووووس.





عشان كده حضرته معذور ، ويتصرف يعني يذل الناس بالضرايب .. وكل يوم مشكلة شكل مع الممولين وعلى رأسهم أصحاب المهن الحره .. واخر واقعه شهدتها مصر ، إضراب الصيادلة من كام شهر فات. كل ده بسبب ان الدكتور الغالي مُطالب ومضطر لتزويد حصيلة الضرايب عشان يدفع للوزارات التانية اعتمادات زيادة لزوم البرستيج والبزخ الحكومي والنفقات العامة المزيفه اللي بقالها سنوات بتروح في غير محلها ، وكله كله على قفا الأجيال القادمه ، لأنها بتحط الحكومة في ازمة ورا التانية نتيجة عدم ترشيد الانفاق الحكومي وفي الاخر تضطر لتمويل عجزها بطريق عجز الموازنه واصدار نقدي جديد دون مقابل انتاجي ، والتضخم يبرطع في البلد ومحدش أده بقى ، ومحدش فاهم حاجة ، محدش من الناس البسطاء فاهم اي حاجة غير لما يتفاجئ بالنتايج المدمرة على مستوى الاقتصاد الكلي من ارتفاعات غير مبررة للأسعار وجفاف للدخول وبطاله ماشاء الله حاجة تفرح ..واللي يضحك انه تلاقي الوزير من دول يطلع بكلام غير منطقي ويقول : اقتصاد مصر بخير ..ومش متأثر بالأزمة المالية العالمية ، اشمعنى دلوقتي ملناش دعوة بالاقتصاد العالمي .. يعني احنا اقتصادنا اقوى من اقتصاد امريكا والإتحاد الاوروبي وغيرها من القوى الكبرى ، دا ياسيادة الوزير منك ليه .. رئيس وزراء بريطانيا جون براون ، برطيانيا يعني دولة صاحبة اقتصاد عملاق ، رااااااح يعيط لدول الخليج عشان تنقذ الاقتصاد العالمي بضخ فلوسها في الأسواق ودعم الشركات الخاسرة لإنقاذ مايمكن انقاذه ... خدو بالكوا من الحتة الاقتصادية الفنية دي .. الراجل عمل كده تأثرا بفكر ونظريات عالم الاقتصاد المعروف جون مينارد كينز ، اللي بيدعو دايما لتدخل الدولة في الحياه الاقتصادية بعد أزمة الكساد العالمي في سنة 1929 ، عكس فكر أدم سميث في كتابه الشهير ثروة اللأمم اللي دعى فيه الى اطلاق حرية المنافسة السوقية وغل يد الدولة عن التدخل ، يعني تقعد على دكة الاحتياطي !

شوفتوا رجال السياسة اللي ماشيين على أسس علميه ، مهما كانت خاطئة او ناجحه ، المهم انهم ماشيين صح مش اعتباطا كده .. ناس متعلمه بجد ..مش الوزراء بتوعنا اللي معظمهم واخد شهادات من برا لزوم المنظره والتعليق على الجدران وبس !!!


يظهر اني سرحت تاني .. ماعلينا ، ياشباب المدونات خدوا بالكم أنا متوقع إن وزارة المالية المصرية ، قريب جداااااااا هتفرض ضرايب نوعية أو رسوم على التدوين على شبكة الانترنت .. وأتصور إن حزمة الضرايب اللي هتتفرض علينا هتكون كالأتي :

+ ضريبة على رقم الأعمال ، ودي بتتحسب من خلال عداد الزوار.
+ ضريبة على القيمة المضافة ، ودي بتتوقف على مدى فاعلية وحلزونية ودائرية التعليقات بالمدونة طبقا للنموذج الضريبي المعد لذلك من وزارة ولاد الجٍنيًه .. قصدي المالية هههههههه !
+ ضريبة على مرور البيانات من المدونين وإلى موقع بلوجر عبر سلك نت الحكومة .. هامش (مزمع إنشاؤه في خلال 70 سنة )
+ ضريبة على الاعلانات داخل المدونة.
+ ده كله طبعا غير ضريبة استهلاك الحاسوب للكهربا النظيفه أثناء العملية التدوينية ، وضريبة استهلاك المدون للميه المعدنية الذي يتصبب عرقا في التدوين عشان يطول حق ولا باطل من الحكومة ودون جدوى .وهي ضريبة مصرية خاصة جدا !

اللهم قد بلغت اللهم فاشهد !

أرجو المعذرة على طول البوست

أخوكم / قلم رصاص

+-+-+-+-+-+-+-+-+

تحديث مهم :

بعد كتابتي للبوست بـ 24 ساعة فقط ، وكأن الوزارة بتشم على ظهر ايدها زي مابيقولوا ، واقرأو الخبر ده على مصراوي

المالية تبدأ في تحصيل الضرائب إلكترونيا اعتبارا من الأحد5 يوليو الجاري

وشكلهم هياخدوا بالهم صحيح هههههههههههههه

والسلام عليكم ورحمة الله وبركاته

40 تعليقات القراء:

AhMeD RaDy يقول...

اول تعليق

AhMeD RaDy يقول...

هههههههههههههه حلو اوى هبقىاقر بقى على مهلى وارجع ارد على مهلى بردك

AhMeD RaDy يقول...

لا لا بص بقى انا محتاج بجد اركزززززززز

الموضوع عجبنى

واحد نسكافيه بقى

Beram ElMasry يقول...

لن يكون بيننا رافت الهجان ثانيا الا اذاكنا قادريين علي حماية اهله بيننا وان لانجحد حقوقهم

لك خالص ودي واحترامي وشكرا لتعلقاتك وتفضلك بالزيارة

جحا المصرى يقول...

هههههههههههههههه
خد بالك انك كده اتفرض عليك ضريبة ههههههههههههههههههه
أى حدبيتكم ضريبة
واى حد هيمشى فى الشارع ضريبة

بنجاواتى يقول...

ضريبة=اذلال

يسلم قلمك

برضه يا جماعة لازم نقول ان وزير المالية رغم جهله الا انه بيتعامل مع وزرا تانيين اكثر منه جهلا والبلد مفيهاش صناعة ولا تجارة والحل الوحيد انه يخلق لهم فلوس يفرضها ع الناس ويسكتهم برفع المرتبات ومعاها ترتفع الاسعار وتضخم ورا تضخم وربنا يستر علينا

تحياتى

قلب ارهقته الاحلام يقول...

ايه مواضيع الجامدة دي

شكل الدبلوبة دي هتيجي علي دماغنا ههههههههه

انت خوفتني كده الفرح ال انا عملاه ف المدونه هيدفع عليه ضرايب كتير اوي :D

الضرايب الخفية بقت كتير اوي

الضرايب دي هي ال بتمص دم الشعب بس هو لو يبقي فيه موقف حاسم تجاه الحكومة والوزراات دي من اضرابات سلمية و كده

أكيد هيبقي فيه ضغط وتغيير زي مابيحصل ف كل الدول المتقدمة ال أحنا اولهم طبعا :)

والاعتذار من طول البوست مش هيفيدك

ايدك علي الضريبه الطولية ^^ ويا الدفع يا الحبس ههههههه

وهنحكم عليك بالبري حتي الاستيكة :)

بحييك ع البوست بجد

دمت بخيرررر

وطبعا أنا نورت ^^


تحياتي ,,,,

Haytham Alsayes يقول...

الناس دي بتتفنن انها تسرقنا شوية لصوص اشكرك اخي علي البوست

مسدس صغير يقول...

لطالما كرهنا محمد شومان فى عيشتنا وقرف مصر كلها
بصراحة مصر كلها بتكرهك يا محمد شومان كره شديد جدا
عار شومان ده؟؟
بتاع الضرايب مصلحتك اولا؟؟؟؟؟
ازاى يعنى؟؟؟
يمكن
اما بالنسبة للضرايب بتاعة المدونات فالظاهر انت اللى هتفكرهم بيها
كانو ناسيننا الله يعمر بيتك؟؟
حرام عليك
وبالنسبة لبلاد ما وراء الترعة
ياااااااااى انتو عندكو ترعة؟؟؟
سوهاااااااج
ههههههههههههههههههه
الناس وصلت المريخ وانت لسه بتستحمى فى الترعة؟؟؟
هههههههههههههه
رسم نضافه؟؟؟؟؟؟؟؟؟؟
نضافة ايه؟؟
المفروض يعملو رسوم للزبالة
لان الزبالة هيه اللى موجوده وبكثرة
وسلملى على وزارة المالية والتموين
ههههههههههه
حلو اوى البوست ياباشا
مذاكر كويس

mohamed ghalia يقول...

ههههههههههههههه
ربنا يخيليك أنا لسه سايب الضرايب كانت أخر مادة عندى فى الإمتحانات بلاش تفكرنى بيها

قلم رصاص يقول...

AhMeD RaDy

مبروك عليك اول تعليق ياباشا
ودخلت التاريخ خلاص
هههههههههههههههه

وبراحتك خالص
اقرأ على أقل من مهلك

ما انت هتدفع هتدفع
هههههههههههه

ويلا نسكافيه بالهنا والشفا

في حفظ الله

قلم رصاص يقول...

Beram ElMasry

أستاذي الغالي بيرم
نورتني والله بجد وانا سعيد جداااا ان حضرتك طليت علي هنا

وعن موضوع رأفت الهجان ، فعلا عندكم حق يجب ان يكون عندنا وفاء أكثر من كده ونعطي كل ذي حق حقه خصوصا لمن وضعوا أرواحهم على أكفهم لأجل وطنهم بدون كلل او خوف او ملل

ومشكور جدا حضرتك على الزيارة الميمونة

في حفظ الله

قلم رصاص يقول...

جحا المصري

ولايهمك ياباشا
ههههههههههههههه

ما انا واحد من المدونين
واللي يمشي عليكم يمشي علي برضه
بس مش أووووي هههههههههه

نورتنا بجد

والاجو ان يكون الموضوع نال اعجابكم

في حفظ الله

قلم رصاص يقول...

بنجاواتي

نورتنا يادكتور

وبالفعل هي المشكلة ان الوزير من دول مفكر ان الوزارة تكية البابا بتاع الهو وهي سابهاله يبرطع فيها زي ماهو عاوز

وده طبعا على حساب المضمون ولصالح الشكل
وعلى الشعب ولصالح المصالح اللي أكيد بتيجي يوم وتتصالح
ههههههههههههه

رأيك عجبني

في حفظ الله

قلم رصاص يقول...

قلب أرهقته الأحلام

أولا نورتي حضرتك المدونة

واشكرك جدا على رأيك الرائع

والموضوع مش جامد ولا حاجة ، انا بس كنت متغاظ شوية من الموضوع ده فحبيت أصيغه في شكل بوست وطلع بهذا الشكل

واما بخصوص الدبلوم ، فبالله عليكي يافندم تدعيلي ان ربنا بس يعديها على خيرو انجح بجيد بس انا مش عاوز اكتر من كده والله

وبالفعل الضرايب موضوع مهم جدا مش في مصر بس دا في العالم كله ولكن بيختلف التعامل معاه من دولة الى أخرى

واما بقى عن العقووووووبة
أرجووكي حرام عليكي والله .. كله الا البررررررررري حتى الأستكيه
هههههههههههههههه

أدفع ضرايب أحسن وأسهل لي من البري

نورتي المدونة
وخفيالنور عندك شوية لحسن الدكتور يوسف بسن اسنانه وجي ياخد حق الدولة من الضرايب من مدونتك ..جي ورايا اه حالا ههههههههههههههه

في حفظ الله

قلم رصاص يقول...

Haytham Alsayes

هنعمل ايه بس أخي الفاضل

ربنا يهدي الجميع

نورتني بجد والله

في حفظ الله

قلم رصاص يقول...

مسدس صغير

طب والله محمد شومان ده راجل ظريف جدا
هههههههههههههههه

وهو يعتبر ضحية للضرايب زينا بالظبط ، لأنه مغرر بيه هههههههههه

ثم انه يا اخي انا مبفكرهومش بفرض الضريبه على التدوين ولا حاجة .. اطمن انا محدش يعرفني منهم ولا يعرف مدونتي
هههههههههههههه

وبعدين حتى لو يعرفوني ، هما يا اخويا منتظرين حد يفننلهم ضرايب جديدة
دي أساتذة ياباشا واحنا نتعلم منهم

ثم تعالى هنا ، انت لاااااااازم تفضح نفسك بنفسك يعني وتعرف الجمييييييع هنا انك المقصود من بلاد ماوراء الترعة

انت خلااااااص ثبتها على نفسك وانا مقولتش حاجة ههههههههه

انت اللي نورتي بجد
بس خف بقى عشان الفاتورة تقلت جدا وانا مش ناقص فواتير حكومية ، القطاع الخاص يزعل مني وهيطالب المعاملة بالمثل
هههههههههههههههه

في حفظ الله ياصديقي الغالي

قلم رصاص يقول...

mohamed ghalia

أي خدمة محمد باشا
هههههههههههههههههههه

نورتني جدا .. بس ابقى ادفع فاتورة الكهرباااا انت بقى هههههههههه

في حفظ الله

ابو المفاصل الواصل يقول...

الشماعة
وبعدين فى الطــــــبع الغريـــب يا جماعة
كل واحد لغـــــلطة مفصــــل لـه شـماعة
يعلق عليها عيوبه ونفــــــسة الملتـــــاعة
ويدارى الخـــــيبة بدل مواجهتها بشجاعة
وهو فاكر عمل اللى عليه فى نفس الساعة
ولكنه زيه زى اللى بيحــــرق نفسه بولاعة
بعد فترة هيحس مدى التقصير والبشــــاعة
فى حق نفسه المغيبه وكأنه فى بلاعــــــة
ولا يبقى له غير الندم والعطش والمجاعة
=============
ناجح يوسف فهمى

ومازلتُ أتعلم يقول...

هيفرضوا ضرايب علينا
حتى الحاجة الوحيدة اللى بنعملها
عايزين يفرضوا عليها ضرايب

طيب يعنى نقعد ساكتين


لا أكيد برده
هيفرضوا ضرايب على السكوت
اعااااااااااااا

بوست جميل جداً
وفيه معلومات قيمة
جزاكم الله خيراً

قلم رصاص يقول...

ابو المفاصل الواصل

أهلا وسهلا بيك اخي الفاضل

كلماتك بديعه
اتمنى مزيد من التوفيق

وان شاء الله ازور مدونتك

نورت

في حفظ الله

قلم رصاص يقول...

ومازلتُ أتعلم

هو مجرد توقع سفسطائي أو خيالي يادكتورة

دا مستحيل يحصل .. دا يبقى حرام عليهم
ههههههههه

أكيد هي مجرد فكرة ليست الا ولاتمت للواقع بصلة

نورتي المدونة

واتمنى لكم التوفيق

في حفظ الله

*البت المشمشية *حلوة بس شقية * يقول...

موضوع مهم

Sweet Violet يقول...

تؤتؤتؤتؤتؤتؤتؤتؤ v_v
انا قلبى كان مش مرتاح من الاول
مرة تاخد قلم مش بتاعك
ودلوقتى عايز تقول ان "الضرايب مش مصلحتك اولا "
اممممممممممم
و كمان بتفتح عينهم علشان يفرضوا الضرايب علينا
اممممممممممم "مصحوبة بنظرة حذر اللى هى يعنى رفع حاجب و النظر بنص عين ^_^ "
(اتعلموها بقى هو الواحد هيفضل يعلم فيكم لحد امتى v_v )

المهم نرجع تانى للحالة اللى كنت فيها بلاش توتر بقى

اممممممممممممممم
انت جاسوس مشترك مابين الناس اللى هناك و الناس اللى هناك بردو

اعترف و قر مين الناس دول و عايزين ايه بالظبط
ويعنى ايه كلمة "أسس علميه " دى كلمة السر بينكم ؟؟؟
اكيد طبعا
لانك لو جبت اكبر واحد فى البلد "من حيث المنصب " و سألتوه هيتهته و يقولك ماخدنهاش فى المقرر ^_^

بطلوا افترى بقى على المسوؤلين .. العيب فى المقرر مش فيهم @_@
شعب شرير بصحيح
^_^

Soul.o0o.Whisper يقول...

أه نسيت أقولكم على رسوم النظافه ولم القمامه ...

كنت لسه هأقولها
هههههههههههه


بس بجد اتخضيت من التحديث و دخلت جرى اشوف

بس الحمد لله بلوجر ضحك عليهم و لسه ماضافش للقايمة

ربنا يستر


بس موضوع رائع
رغم انى تهت فيه شوية




دمت بود

beautiful mind يقول...

قلم رصاص
هذه اولي مشاركاتي في مدونتك الرائعه

بصراحه اعجبني اسلوبك وشدني اكثر تنظيمك للموضوع والبوست مميز جدا

واضح انه من مجال دراستك

اتمني تقبل اضافتي لمدونتك عندي

وانتظرني دائما

قلم رصاص يقول...

البت المشمشية

وزيارتك أهم برضه

مزيد من التوفيق

في حفظ الله

حازم ربيع يقول...

وانا عايز اقدم تحية
مع خمسين شمعة
لاونكل طارق نور
ومصلحتك اولا
----------------------
مع تحياتى
حازم ربيع

قلم رصاص يقول...

Sweet Violet

والله بريئ ياسعادة البيه
هههههههههههه

وهي كانت الضرايب مصلحتك ، مصلحتك من امتى يعني ؟!

وحلوة أوي كلمة السر دي اللي هي أسس علمية ههههههههه

والاحسن بجد تعبير شعب شرير صحيح العيب في المقرر مش في المسئولين
هههههههههههه

ردك متميز حقيقي

نورتينا

في حفظ الله

قلم رصاص يقول...

Soul.o0o.Whisper

ههههههههههههه

احنا أي خدمة يادكتور

والحمدلله ان الموضوع نال اعجابك

بس اطمني يوم ماالكارثه تحصل ويفرضوا علينا ضرايب هتبقى حلوة برضه

عارفه ليه ؟ عشان ساعتها نقدر نتكلم براحتنا وننتقد الحكومة بمزيد من الجرأة والاقدام وساعتها معادش هيبقى فيه اعتقال لحد من المدنين

بالعكس خالص والله ، دا هيكون فيه ودن من طين وودن من عجين من جانب الحكومة ومش كده وبس دي كمان هتشجعنا عشان هي محجانا جدا في تمويل نفقاتها العامة
هههههههههههه

ما احنا ساعتها بقى هيبقى لنا وزن في السياسة المالية للدولة وهيبقى لنا تأثير اقتصادي كبير جدا باعتبارنا احد مصادر تمويل الموازنة العامة للدولة زي ايرادات قناة السويس كده
ههههههههههههه

سبيها لله

نورتي الموضوع

في حفظ الله

Sweet Violet يقول...

مصلحتك من امتى !!!!!!!!

من وقت ما شومان بدأ يتحفنا باعلانه و جملته الشهيرة ربنا يفوتر خيركم @_@

انت عامل مقاطعة مع التليفزيون ولا ايه

حلم بيعافر يقول...

هههههههههههههههه
اللهم اكفينا شر الفقعة
ايه الحقد ده؟
ماتسيبوا الحكومة تشوف شغلها
ايه يعنى لما الشعب يضحى
يغوووووووووووووور الشعب ف داهية
اهم حاجة جعلص غالى يكون مرتاح
بس بصراحة ان جيت للحق
جعلص ده فنان
بيلم فلوس بطريقة غريبة
يعنى حاجة عمرك ماكنت تتصور يندفعلها فلوس
تلاقيك دافعع قد كده
يللا بقى ربنا ع الظالم وابن الحرام ووزير المالية السنغالى

عابر سبيل (عبدالرحمن محمود) يقول...

كلام وزير الماليه يعبر عن سياسة هذه الدولة بمنتهى الصدق
وتحليلك للموضوع شيق وجذاب

قلم رصاص يقول...

beautiful mind

ياباشا المدونة وصاحبها تحت أمرك

داانا اجيبهالك لحد عندك بشنطة هدومها
هههههههههههههه

واشكرك من كل قلبي على هذا التشجيع

وايوا فعلا الموضوع من مجال دراستي هذا السنة في دبلوم القانون العام فيم ادة المالية العامة اللي ان شاء الله هتخصص فيها مع الاقتصاد في الماجستير بإذن الله
بس اهم حاجة دعواتك لي كده ربنا يوفقني وانجح في الدبلوم السنة دي واللي منتظر نتيجتها بعد ايام

نورتي بجد حقيقي

وننتظرك باستمرار

في حفظ الله

قلم رصاص يقول...

روح الفدا

نورت اخي الفاضل حازم

وعمو طارق نور ده لو بياخد ربع جنيه في كل اعلان كان يبقى اغنى من هشام طلعت
هههههههههههههه

مشكور على الزيارة

في حفظ الله

قلم رصاص يقول...

Sweet Violet

هي من حيث النظرية والتطبيق في اوروبا والدول المتقدمه تعتبر فعلا مصلحتي اولا

اما في مصر فهي برضه مثلحتي من حيث الورق والنظرية أما على أرض الواقع لشوشته لالالالالالالالالا طبعا مش مصلحتي ولاحاجة

اما بخصوص شومان ده فانا مقدرش اخفي اعجابي بشخصيته الظريفة جدا بصرف النظر عن المحتوى اللي بيقدمه

نورتينا ياستي تاني مرة
حرام عليكم هدفع كهرباء منين انا
هههههههههههههه

في حفظ الله

قلم رصاص يقول...

حلم بيعافر

عندك حق يا اخي والله
احنا فعلا شعب شرير وقلبه أبيض وفيه خطين حمر هههههههههههه

ايه يعني صحيح اما نضحي عشان خاطر الحكومة الغلبانة بتاعتنا مرة ماهي ياما ضحت عشانا بكل غااااااااالي ورخيص
ههههههههههههه

نورت يابن خالتي

ابقى افرش لي الأرض رمله عشان اجي ازورك في مدونتك

في حفظ الله

قلم رصاص يقول...

عابر سبيل

نورتني ياباشا والله

اه فعلا دي سياسة دولة ومش هتتغير الا اما القائمين عليها يتغيروا

بس اعرفها اخي الفاضل احنا مش دولة مؤسسات ولا حاجة يعني باختصار بمجرد خروج الوزير من دول بتتغير سياسة وزارته على يد الوزير اللاحق له

نحن كلنا أمل في غد أفضل مهما كانت الصورة قاتمة

نورتني بجد حقيقي والله

في حفظ الله

شبه إنسانه .....( سهوره ) يقول...

بصراحه

كلامك فرض عليه ضريبه الاعجاب

بجدفكرة البوست حلوة قوى

والأروع تناولك للموضوع بخفه دم

ماشاء الله عليك

دمت بخير

آااااااه نسيت أقولك

ميرسى على زيارتك

وياريت تشرفنى على طول

ومتخافش مفيش ضرايب

تقبل مرورى

سهوره

قلم رصاص يقول...

بقايا انسانه

أشكرك يافندم على كلامك الجميل ده
انا معملتش بوست يستاهل كل هذا الكلام

وممنون جدا لرد الزيارة
وان شاء الله هيكون فيه تواصل بين المدونتين

اتمنى لك مزيد من التميز

في حفظ الله

Twitter Delicious Facebook Digg Stumbleupon Favorites More

 
Free Web Hosting