أحداث 24 ساعة

نريد ردعا ..لا حربا !


نريد ردعا .. لانريد حربا !


تعالوا نتكلم بشيئ من الواقعية ومن العدل ان جاز التعبير

احنا لو قعدنا نطالب المسئولين والرئيس مبارك لمدة 100 سنة ان يعلن الحرب على اسرائيل لإنقاذ غزه
فلن يستجاب لنا أبدا ..لاعتبارات سياسية وأمنية لادخل لنا فيها الان
زائد انه لو تمت الاستجابة لنا -في المشمش يعني - احنا اللي هنرجع نندم، لسبب بسيط جدا
وهو لو مصر دخلت في حرب مع اسرائيل هتبقى كارثه وهنخسر اكتر من اللي خسرناه في حروبنا السابقه

طيب اذن نجيب مسالة الحرب على جنب ..وننتقل لصلب الموضوع

يوجد في أبجديات السياسه الدولية مايعرف بالردع

والردع هو تهديد طرف للأطراف الاخرى او حتى التلميح باستخدام سلاح غير عادي قادر على انهاء
الصراع لصالحه دون الاخرين في زمن قياسي

فيكون الطرف الرادع في موقف أقوى حتى ولو لن يستخدم ماهدد به
حيث يكون قد زرع الشك في نفوس الاخرين بل وسرب لهم الخوف بإمكانية لجوءه لاستخدام هذا السلاح

وكل هذا سواء كان يملك هذا السلاح الرادع من عدمه ، حيث يعتمد في هذا الشان على ألته الاعلامية في تعزيز
الفكرة وانجاحها ولو بالتزييف الاعلامي

وهذا يا اخواني ما تستخدمه إسرائيل معنا كدول عربية بكل ماتحمل الكلمات من معاني

ألم تفكرون لماذا كل هذا الرعب العربي من دولة حقيرة صغيرة المساحة شحيحة السكان كإسرائيل ؟!

طبعا بسبب اجادتها باحترافيه لسلاح الردع الذي هو سبب ذل العرب وماآالت اليه احوالهم الان

صحيح إسرائيل أصبحت الأن تمتلك برنامجا نوويا قويا جدا جدا هو السادس على المستوى العالمي بعد الخمسه الكبار
المنتصرين في الحرب العالمية الثانية ،

ويتسائل سائل : طالما انها تمتلك سلاحا نوويا ضخما يصل الى
أكثر من 300 رأسا ذريا يمكنها اقتلاع الوطن العربي من جذوره .. لماذا إذن اسرائيل لاتضربنا به ؟!

أرد على ذلك بأن اسرائيل لم تسعى لامتلاك سلاحها النووي لتضرب به العرب ، وانما لردعهم
وتخويفهم الدائم بإمتلاكها لسلاح مخيف كهذا يمكنها استخدامه اذا ما تجرأت أي قوة عربية حتى على
رفع مطوه في وجه اسرائيل !!

اللي عاوز أقوله : من خلال هذا البوست ..ان انا مش بأطالب مصر بلدنا بإعلان الحرب على الكيان
الصهيوني ، ليس بسبب ان فلسطين لاتستاهل ان ندخل حربا من أجلها ، وانما لأني أعلم
أننا سنكون الخاسرين مثلنا مثل غيرنا من كل دول المنطقة اذا قامت هذه الحرب

لأنه باختصار اسرائيل اذا ماوجدت تعرضها لحرب في العمق او حتى على حدودها وخصوصا من
جانب مصر لن تقف مكتوفة الأيدي عن استخدامها للسلاح النووي

خصوصا انها طورت أسلحة نووية صغيرة الحجم يمكنها ان تنفذ مهام محدده في مناطق
جغرافية معينه .. دون الاضرار بنفسها..!
يعني مثلا ممكن تضرب السد العالي فقط على سبيل المثال لتغرق مصر
يعني موت بالبطيئ..!

عاوز اقول : ان مصر لديها أيضا أسلحه للردع رغم كونها أشياء من أبجديات حقوقنا المشروعه
في التعبير عن مواقفنا السياسية .. ولن تضرنا أبدا ولن تكون سببا في شن اسرائيل حربا علينا

أول هذه الأسلحه ، هو قطع العلاقات الدبلوماسية فورا مع اسرئيل ..بطرد سفيرهم وسحب
سفيرنا

وميجيش حد ذكي يقولي : ان مصر مش من حقها قطع علاقتها الدبلوماسية مع اسرائيل لأن فيه اتفاقية سلام
وفيه معاهدات دولية تمنع كده ..!

أرد واقول : ان اسرائيل اكثر دول العالم - ان كانت دولة يعني - غير ملتزمة بالقانون الدولي ولا بمعاهدات
دولية ولا اتفاقيات ثنائية او متعددة .. وعايشه في وسطنا وزي الفل .. بل بالعكس مطنططه وبتدينا على
قفانا ومحدش قادر عليها

ثاني هذه الأسلحه بل والاهم ، هو قطع إمداد مصر لهؤلاء الصهاينه بالغاز الطبيعي
اللي هو من حق شعب مصر .. بدل ما بتاخده مننا وبأقل من الاسعار العالمية بكتير جدا
دا احنا على ما اعتقد مبنديش غاز للفلسطينين .. !

طب ندعمهم بالمال والسلاح ولو بطرق غير مباشره بل وغير شرعية
مش ضرورة نبقى في الصورة يعني ونفضح نفسنا لو خايفين من الفضيحه ان جاز التعبير

كان ممكن ووزيرة الخارجية الصهيونية ليفني في مصر لحظة المؤتمر
الصحفي مع الوزير أبو الغيط من كام يوم لما لمحت بشكل مباشر
بل وهددت باللي بيعملوه في غزه دلوقتي ..كان ممكن واحد صحفي
راااااااااجل بجد يديها جازمة مصرية محترمة زي الجزمة العراقية
ولا خلاص بقى مفيش كمان جزم في مصر..!

ياعالم .. انا مش عاوز مصر تحارب اسرائيل عشان نحافظ على استقرار بلادنا
لكن لو قطعنا علاقتنا معاهم وأوقفنا تصدير الغاز ..مش هتحصل كارثه يعني
وده نقدر نعتبره ردع مصري وعربي لإسرائيل رغم ان اسرائيل تعلم اننا ليس لدينا شيئ
ما يرعبها ..لكنه أضعف الايمان يا اخواننا

وانا بقول ومحدد مصر بالذات لأن مصر هي الأكثر فاعلية في كل الدول العربية في هذه المشكلة
بسبب حروبنا السابقة وبسبب ثقل وضعنا السياسي والعسكري أيضا
وكمان بسبب ان الرئيس الفلسطيني محمود عباس بنفسه قال : انه يدعو مصر فقط دون
اي طرف عربي او اجنبي لحل الأزمة

ده كان ما وددت أن أقوله

وادعو الله رب العالمين ان ينصر شعب غزة وكل فلسطين في هذه الهجمة الصهيونية الشرسه

18 تعليقات القراء:

~*§¦§ Appy §¦§*~ يقول...

ليفى طالعه تستعطف المجتمع الدولى شوووووووفت الهنا اللى احنا فيه

ماما أمولة يقول...

وفين الردع

ياريت

حتى نبيض ماء الوجوه

ونستعيد ولو القليل من كرامتنا

محمد فوزى يقول...

كل سنه وانت طيب بمناسبة العام الهجري الجديد
خلافي الوحيد في وجهة النظر دي ان الردع ده لازم يكون ردع عربي جماعي وليس مصري فقط
الغاز المصري لإسرائيل يصب للفلسطيني ايضا والكهرباء التي تصل غزه من مصر ولا يخفى ذلك على احد لكن استثمارات قطر بالمليارات مع اسرائيل دي ممكن نبصلها ازاي ,
عزيزي عصر ان تتولى مصر المسئوليه بالوكاله عن الجميع ده انتهى واظن واضح انه حتى مفيش الحب والتقدير لمصر من الأشقاء اللي يمكنها انها تعمل كده
والمطلوب والممكن ان تحاول مصر أن توحد الصف للإتفاق على وسائل ردع مشتركه والا يبقى مفيش فايده
تحياتي

fashkool يقول...

يا قلم رصاص .. يا اخى احنا بنعدك للمهمه الجامده .. تقوم تقول الكلام ده .. يا رااااجل عايز تسحب السفيى وتقطع الغاز عن اسرائيل .. لا يا عم الحرب احسن
عارف النكته بتاع العفريت اللى قالوا له ابنى لنا كوبرى يودينا لامريكا قال لهم لا مستحيل .. قالوا له طب شيل لنا فلان الفلانى ده احنا مش عايزينه .. قام العفريت قال لهم عايزين الكوبرى بتاع امريكا عرضه قد ايه.
أهو قطع الغاز وسحب السفير زى الحكايه دى
وجهة نظرك يا اخى ان مصر الاكثر فاعليه فى كل الدول العربيه .. هى كانت كدا فعلا .. بس دالوقت .... فيها نظر .. زمن التحلل .. زمن الذوبان .. لا امل فيها تطلب .. ما تخلينش اغلظ
كل سنه وانت طيب وتعود عليك هذه الايام بالخير واليمن والبركات

مسدس صغير يقول...

يا عم قلم رصاص الصورة ليست وردية بهذه الطريقة التى تذكرها مع احترامى المتناهى لوجهة نظرك الصورة يا اخى كما تقول انت ان دولة اسرائيل التى وصلت الى تقدم علمى واقتصادى رهيب جعلها فى مصاف الدول العظمى من حيث امتلاكها سلاح نووى يوازى السلاح النووى الامريكى والانجليزى والفرنسى وغيره . هى غير عاجزة عن استيراد الغاز من دولة الواق واق " بفلوسى يا كلاب" دا مش سلاح ولا حاجه ممكن عملية قطع العلاقات هيه اللى يبقى ليها اثر بس مش كبير . دى وجهة نظرى والامر محتاج موقف صارم من الحكومة المصرية بس مش لوحدها بل ومن الحكومات العربيه النائمة فى العسل... اشكرك وتقبل تحيتى وكل عام وانتم بخير

انسانةعادية فى عالم مش عادى يقول...

كلام جميل بس مين اللى ينفذ
بس اللى اقدر ااقوله عمر اسرائيل ما هتستخدم سلام نووى فى الوطن العربى دى هى عايزة تحتله كله تروح تتدمره واللى يقول هتضرب السد العالى كلام فارغ وعمره ما هيحصل
اسرائيل اجبن من انها تحارب مصر تانى هى اخرها تحارب دولة ضعيفة زى فلسطين عدد سكانها وامكانياتها الحربية قليلة
كفاية كلام علشان انا زهقت من الكلام ومفيش فعال

فركشاوي ..ناوي يقول...

السلام عليكم ورحمه الله وبركاته
قلم ...لو كانت اسرائيل زي ما بتقول يبقي علينا السلام ...وما كنتش انتظرت ...اسرائيل يا سيدي زبابه صنعت من نفسها صقرا ...وبجبن من تعرف صارهذا واقع ...
أما سلاح الردع الذي تتحدث عنه فقد استخدمته جيدا وتم ردع حماس وقهرها بهذه الصوره التي يراها الجميع .
كل ردع واحنا مردوعين ..ربنا يردعهم يا شيخ.

GiGi يقول...

انا عجبنى راي فى تعليق على احد المدونات اسرائيل بتسحبنا لحرب علشان بدل ماتاخد غزه بس تاخدالماظه كمان احنا فعلا مش قد الحرب ومصر جى دوله كفايه دلوقتى ان وصلونا فى المظاهرات بنطالب بغزه مش فلسطين

محمد مارو يقول...

و الله يا اخى اكبر ردع هواتحدنامعا

و نبطل نرمى الكوره فى ملعب كل واحد شويه

مره سوريا ومره ايرانومره حزب الله

الكل ديما بيتهم مصر

Beram ElMasry يقول...

قلم رصاص
شكرا لك انت قلم القذائف
قادم لو وعينا جيدا جميع المواقف ، ولا نزايد
(-في المشمش يعني )
لا ، عندما نملك احتياط استراتيجى ، دقيق وسكر وزيت
( لهم الخوف بإمكانية لجوءه لاستخدام هذا السلاح )
اى سلاح وانت خاضع للتفتيش الدولى ، وهى تملك ان لم يكن لديها ففى اي دولة حتى روسيا ، تجد ما تطلب
( لماذا إذن اسرائيل لاتضربنا به )
لان الضرب سيلوث المنطقة وهي عايزاها نظيفة
( هتحصل كارثه يعني )
اكيد
كل سنة وانت سالم غانم
تقبل تحياتى

سندس وأمل يقول...

:(......

ولكن ...لن يكون هناك ردع ايضا...

فالحكومه(المصريه)تخاف من ايرائيل واكيانالصهيونى...

لا نملك الا الدعاء والمقاطعه....


سندس

البت المشمشية حلوة بس شقية يقول...

انتا اكيد مش قلم رصاص
انتا قلم صاروخ
قلم جاف
اى قلم
قلم على الوش
ايه الكلام ده حاسب بقه ليقفشوك
وبعدين ردع
ردع من مين
والله ياعم انتا طيب وعندك امل فى بكرة
روح نام واشرب كوباية لبن وبقسماطة قبل النوم

قلم رصاص يقول...

~*§¦§ Appy §¦§*~

ده أقل حاجة يعملوها .. مش جديد عليهم يا أبي

منورة يا أختي

-------------------

ماما أمولة

موجود والله يا ماما أمولة وفي ايدنا بس يقف على التنفيذ

انها السياسه

نورتي المدونة حضرتك

تقبلي تحيتي

قلم رصاص يقول...

محمد فوزي

وانت طيب اخي الكريم محمد وكل الأمة بخير

انا لا اختلف معك في وجهة نظرك..فكلامك لايختلف عن كلامي كثير اللهم الا من حيث انك حددت الصورة أكثر فيما يتعلق من يقوم بالمساعدة في حل الأزمة ..مصر منفردة أم الدول العربية كلها

وانفراد مصر بالحل ليس معناه انفراد بالمعنى الحقيقي وانما قصدي الأسبقية من جانب مصر..وهذا لايمنع من دخول الدولالعربية الاخرى بالحلول في اطار الحل المصري اياكان هو

انا سعيد برأيك

ونورتني

تقبل تحيتي

-----------------

fashkool

ههههههههههههههههه

حلوة يا عمو صلاح الفكرة دي هههههههه

بس خلينا واقعيين شوية
هل لو مصر سحبت سفيرها وطردت سفيرهم وقطعت امدادات الغاز ده معناه اعلان الحرب على اسرائيل معتقدش للدرجة دي

شكرا جزيلا أستاذنا الكريم على ردك البناء

تقبل تحيتي

قلم رصاص يقول...

مسدس صغير


لا اختلف معك كثيرا
لكن انظر لمفهوم الردع بشكل عام .. الردع لايرتكز الى الردع العسكري فقط .. أبدا وكلا البطه هههههههههه

الردع يشمل الردع الاقتصادي والسياسي وا وا الخ ..صحيح انت حددت نقطة مهمة بأنه اسرائيل تقدر تتصرف في الحصول على الغاز البديل للغاز المصري وبفلوسها ياكلاب وكده هههههه
لكن يا اخي وياحبيبي المسألة معقدة أكبر مما نتصور .. فاسرائيل لاتستطيع الحياه منفرده معزولة عن بقية الدول المحيطة بها ..مهما كان لازم هتقع..امريكا مش هتفضل ابوها وامها وانور وجدي مدى الحياه..لذلك لجأوا لما يسمى بالتطبيع مع الدول العربية

هذا ليس موضوعنا الأن

عموما انا سعيد بوجهة نظرك وردك الرائع ..وخليك معايا دايما في الصورة

تقبل تحيتي

--------------

انسانه عادية في عالم مش عادي

مشكورة اختي الكريمة على المرور والتعليق على الموضوع

انا مقولتش انها هتضرب وتمسح الدول العربية لالالالا انا قصدي ده كان زمان في خالة تعرضها لخطر يهدد بقائها..لكنها الان طورت اسلحه تكتيكية تمكنها من ضرب اهداف محدده في بعض الدول العربية المهمة كمصر مثل السد العالي من باب التخويف وليس الحرب

واشكرك مرة تانية على المرور

تقبلي تحيتي

قلم رصاص يقول...

فـركـشاوي..نـاوي..

وعليكم السلام ورحمة الله وبركاته

نورتني اخي الكريم

وده الواقع فعلا انا مش بألف ولا ده كلامي .. فالبرنامج النووي الاسرائيلي أصبح حقيقة لاينكرها احد في العالم

واسرائيل مش عامله لنا ردع بسلاحها النووي فقط .. لالالا ابدا .. انما بعلاقاتها الاقتصادية والدولية المتشابكه والمعقدة وخصوصا مع امريكا بالتحديد فهي الام والاب وهي انور وجدي لها

انا سعيد بمرور ورأيك

تقبل تحيتي

-----------------

GiGi

كل شيئ وارد في الحرب والسياسه يا اخت جيجي خصوصا هذه الايام

نورتينا جدا

تقبلي تحيتي

قلم رصاص يقول...

محمد مارو

يا اخ محمد وهو فيه حد مختلف على كده
لا ابدا كل ماهنالك ان مسألة وحدة العرب دي محتاجه وقت طوووووويل جدا
طب ما احنا بنحاول من الخمسينات ومفيش فايدة

انا بتكلم على ردع سريع يمكن تحقيقه في الوقت العاجل او القريب

عموما نروتني جدا يا اخ محمد

تقبل تحيتي

------------

Beram ElMasry

مشكور جدا جدا أستاذنا بيرم على المرور الكريم والرد الرائع

تقبل تحيتي

قلم رصاص يقول...

سندس وامل

المسألة ليست مسألة خوف يا اخت سندس بقدر ماهي حسابات السياسة وظروفها

مشكورة جدا على المرور الكريم

تقبلي تحيتي

---------------

البت المشمشية حلوة بس شقية

ههههههههههههههه

انا قلم رصاص والله متخافيش
وانا لا اخشى في الحق لومة لائم وعلي وعلى أصحابي ههههههههه

مشكورة يا مشمشية على المرور والرأي الكريم

تقبلي تحيتي

Twitter Delicious Facebook Digg Stumbleupon Favorites More

 
Free Web Hosting